Luke 4
4
1Boiyesuq khoeq cimcai muikhlawoeng luiq loeqteq Yawdan mlaet phaela khoeq a'lo ba kiyoeng cimcai muikhlaw loeq yaqa tau wa a'thaw. 2Yaqduna Manaq loeq a'mcam nauk khoeq khomhnup hligip a'khaw mi. Yaq hnup haqla a'pi khaw ei ta'ong om loeqteq yaq khomhnup haq a'poeiq kieq ei ok loeq a'boeqi toeq. 3Manaq loeq lo loeqteq Boiya nang khoeq Boipaw caw a'sikcang naka nei lung khoeq muqa sai tiloeq eiye taeng a'hau. 4Boiyesuq loeqkhaw khlaung nakkhoeq ei-ok hongoeng noeng ma'sauk a'haeng seiyaq nakkhoeq klamcawa yok loeqteq a'tauk taeng a'hau. 5Yaqkiyoeng Manaq loeq Boiyesuq khoeq nana a'hlung khoeq tonga ciqi pui nauk loeqteq neisomdaeka a'moeiq khoeq taengblei haqkhoeq ta'nak cawa a'mplaq poeiq. 6Manaq loeq nei a'khwai ana haqloeq nei somdaek khuwawq awlum khoeq kei ka'paek waiq khoeq khlaunga ka'paek noeng klongoeng nanga keiloeq ka'mpaekai. 7Keiya a'mkhoeqi naka nei a'moeiq khoeq awlum nanga ka'mpaek poeiqyai taeng a'hau. 8Seiloeqkhaw Boiyesuq loeq nang Boi a'phlaet khoeq Boipaw poemakanoeng na'mkhoeqi laqai, yaq hmuqlongnoeng na'sai laqai nakkhoeq klamcawa a'hau taeng Manaqa a'msauki ba. 9Yaqkiyoeng Manaq loeq Boiyesuqa Yeruqsalein mloeqa ciqi pui nauk loeqteq Boipawa wotpyuq dun kyong a'hlung sungthoq nang khoeq Boipaw caw a'sikcang naka nei dun thoq paiyiye. 10Boipaw loeq nanga a'mthin haqlai khoeq Boipaw mehon saw haqkhoeq nangtoiq a'tauk haq hni nakkhoeq klamcawa a'hau klongoeng nang khakhaw moeiq hlaqtiq. 11Nang na'kho khoeq lungoeng lalaqaqong yaqhniq loeq án kutoeng a'khaum haqlai taeng a'hau. 12Yaqateq Boiyesuq loeqkhaw nang Boipawa mcamaitiq nakkhoeq klamcawa a'paw taeng a'hau. 13Manaq loeqkhaw Boiyesuqa a'hmlaekinauk kiyoeng Boi hma khoeq sotba loeqteq a'la patak a'khwai a'laqi yai khoeq a'thini nauk.
Galilae pleiya mcaq loeqteq Boiyesuq loeq Boipaw hmuqlong a'sai khoeq klong 14Yaqkiyoeng Boiyesuq khaw muikhlawoeng a'tatoeng luiq loeqteq Galilae pleiya a'lo ba. Yaq sa'taung khaw omdun ta'kuma a'hyayi poeiq. 15Boiyesuq loeq ta'lazalaiq haqla mcok hau haqlateq khlaung haq loeqkhaw Boiyesuqa ánmhlokthoq toeq.
Nazaraeq mloeq saw haqloeq Boiyesuqa án myang khoeq klong 16Yaqkiyoeng Boiyesuq khaw yaq a'bau dun mloeq a'phlaet khoeq Nazaraeq mloeqa a'lo ba. Ubuk hnup a'phaw loeq yaqkhoeq ta'lazalaiq ya paengtoeng a'ciq nawn khut ciq loeqteq yaqduna yaq loeq klamcaw a'phawtai tawiq ya a'thoq. 17Boiya Pa'rawphaeq Hesayaq klamcaw a a'phawtai khoeq a'paeka teq yaq loeqkhaw phwang loeqteq a'phawt. 18Boipaw muikhlaw khoeq kei hma a'luiq hni. Khlaung sounglai haqla a'klawnai khoeq klong sa'taung pawi ka'mhmyauk haqlai tawiq ya keiya Boipaw loeq a'mhaeq hni. A'supa klawq saw haq ánloetai tawiq ya, a'mikmusaw haq ánwa ba lai tawiq ya mlungko pumyo sounglaisaw haq ánloetai tawiq ya ka'mhau haqlai khoeq Boipaw loeq keiya a'mhloeq hni. 19Nei khing khoeq Boipaw loeq yaq khlaungmyoe haqla yaq hmyaensi a'mplaq haqlai khoeq khing a'phlaet hni taeng a'hau. 20Yaqkiyoeng Boiyesuq loeq a'phawt kiloeq klamcaw hyoq khoeq ta'lazalaiq congsawa paek loeqteq a'ngungba kiyoeng ta'lazalaiq ya khoeq khlaung haqloeq Boiya cipcip án sotnauk. 21Yaqkiyoeng Boiyesuq loeq yaqhniqa nanghniq loeq nán yauk laq khoeq klamcaw hyoqa a'paw khoeqhaq towa a'luiq hni taeng a'hau haq. 22Boiyesuq plau án yauk laq khoeq yaqa a'nmoeiq khoeq khlaung haqloeq nana án mauqnauk uk loeqteq nei khlaung khoeq Yawtaq caw seiyaq moe? taeng án hau. 23Boi loeqkhaw sa'lawon khaw yaqa yaq ta'hlai a'saiyiyai a'loe taeng plauwa a'moeiq khakhut Ka'peyanau mloeqa keiloeq ka'sai louq khakhut kei mloeqa khaw saihme taeng nanghniq loeq a'mhau haqlai. 24Seiloeqkhaw nanghniqa keiloeq a'hmon kanhau haqlai baung Pa'rawphaeq pak seisei yaqhniq án moeiq duna án mhmoi laqiyaq uk. 25A'la keiloeq a'hmon ka'hau laqai naka Pa'rawphaeq Eliyaq khaeka Iqtayelaq pleiya kumthum khoeqloeq khlawsok yawq khong loeqteq sumphu a'caiqya teq Iqtayelaq pleiya hmeinu haq thaengthaeng án moeiq hoet. 26Boipaw loeq Eliyaqa Iqtayalaq pleiya khoeq hmeinu haq hma teiq ta'ong Zarataq mloeqa a'moeiq khoeq hmeinu poemak hma noeng a'teiq. 27Pa'rawphaeq Eliqsae khaeka khaw Iqtayelaq khlaungmyoe haq duka a'nmno khoeq khlaung thaengthaeng án moeiq. Seiloeqkhaw yaqhniq duka khoeq Suqriq plei saw Nemana khoeq lawi loeqteq a'ni khaw boei yaq uk taeng a'hau haq. 28Boiloeq a'hau khoeq plau haq án ya uk loeq ta'lazalaiq ya án moeiq khoeq khlaung haq nana ánsaw hlok uk loeqteq 29thouk loeqteq Boi khoeq mloeq planga msoq uk loeqteq yaq mloeqa a'moeiq khoeq tong a'hlung thoq ántongai khoeq án ciqi pui nauk. 30Seiloeqkhaw Boi khoeq khlaung haq tau wa khoeq sot loeqteq a'ciq tauk haq toeq.
Boiyesuq loeq sa'simangca a a'thut khoeq klong 31Yaqkiyoeng Boi khoeq Galilae plei Ka'peyanau mloeqa cit loeqteq ubuk hnupoeng ta'lazalaiya a'nmoeiq khoeq khlaung haqla a'mcok hau haq. 32Boi plauya haqkhoeq a'khwai anaoeng a'luiq khoeq plau a'phlaet klongoeng yaq plauya a'ya uk laq saw haqkhoeq nana ántha a'moeiq. 33Yaq ta'lazalaiq duka sa'simangca loeq a'mani khoeq khlaung poemak a'moeiq. Yaq khlaung loeq Boiya 34Nazaraeq mloeq saw Yesuq, nang loeq keihniqa kha a'msai haq waiq yoe? Ka'hniqa a'mkhlaq haqlai khoeq na'lo moe? Nang a'niyoe nakkhoeq ka'hniq loeq ka'mhmot haq. Nang khoeq Boipaw hma khoeq na'lo khoeq a'cimcai khoeq khlaung na'phlaet taeng a'thai seiyoeng mpoq loeqteq a'hau. 35Yaqateq Boiyesuq loeqkhaw thinthin omtiloeq yaq hma khoeq sote taeng a'maeng a'paek loeq sa'simangca loeq yaq khlaung khoeq khlaung haq laikla a mkhluq loeqteq yaq khlaunga pikhaw sai ta'ong a'soq ba. 36Ta'lazalaiq ya khoeq khlaung haqloeq mauqnauk loeqteq neiplau teq piplauwoe? Khlaung haq hma khoeq sa'simangca amsoqnoeng khoeq a'tat yaqhma a'moeiqsa taeng a'nsoiyi nauk. 37Yaqkiyoeng Boiyesuq sa'taung khoeq yaqhniq phaela a'moeiq khoeq omdun ta'kuma a'hyayi poeiq toeq.
Boiyesuq loeq kaiyaq khoeq khlaung haqla a'mniq a'mboei paek haq ba khoeq klong 38Boiyesuq ta'lazalaiq ya khoeq sot loeqteq Siqmou im a'phaw loeq Simou pok nana kaiyaqa teq klaung haqloeq yaq hna'tawa a'mboeipaekai khoeq Boiya án mtongi. 39Yaqklongoeng Boi khaw yaq hna'taw phaela cit loeqteq a'kaw a'mboei paek kiloeq yaq hna'taw khaw saksang a'kaw boei loeqteq yaqhniqa ei-ok haq a'yoeq haq ba. 40Kho a'mulawma a'mniq thaengthaeng mniqnauk uk loeqteq kailat taq uk khoeq haqla ánpeha ánpawha haqloeq yaq a'nmniq nauksaw haqkhoeq Boiyesuq hma án lowa teq Boiyesuq loeq yaqhniq luwa a'kut taungi nauk haqloeq teq yaq a'mniq a'mboei haq poeiq. 41Sa'simangca haqkhaw yaq a'mniqsaw haq hma khoeq sot uk loeqteq nang khoeq Boipawcaw na'phlaet taeng ánpoq. Boiyesuq khoeq a'plaeta khoeq a'klawn saw Boikhreitaw a'phlaet nakkhoeq án hmot klongoeng Boiyesuq loeq yaqhniqa yaqkha hau wai tuk taeng a'mdip haq.
Galilae plei saw haqla a'mcok hau haq klong 42Kho a'wa loeq Boiyesuq khaw khlaung haqloeng a'hlaw duna a'ciq. Seiloeqkhaw khlaung haqloeq Boiya nana án sui kiyoeng ánkhoma teq yaqhniq hma khoeq citai tiq taeng án keiyi. 43Boiyesuq loeqkhaw kei khoeq a'coe nam haqla khaw cit hang loeqteq Boipaw khomcaeng klong sa'taung pawi ka'hau haq laq hmai. Nei kha ka'hau wai tawiq ya Boipaw loeq keiya a'mhloeq khoeq a'phlaet taeng a'hau haq. 44Yaqkiyoeng Boiyesuq khaw Yudaq pleiya a'moeiq khoeq ta'lazalaiq haqla cit loeqteq a'mcok hau haq.
Currently Selected:
Luke 4: ctpv-rv
Highlight
Share
Copy
Want to have your highlights saved across all your devices? Sign up or sign in
This translation of the Chin-Cumtu (Sumtu) Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
