Luke 2
2
1ချန်ကာလနွို့နား ဩဂုတ္တုရောမဧကရာဇ်နွို့နား တကပ်ရောမအင်ပါယာဘာ့အုပ်စိုးနွို့ ဇာ့လို့ဘာ့မန်းနွို့ အ့်တန်သန်ခေါင်စာရန်းနွို့ မင်ထွဠ့်စာရင်းနု့ ထှက်မဲ့အမိန့်ကိုးနဲ့။ 2ပထမငွမ်းထက်နီး စတန်သန်ခေါင်စာရင်းချန်နွို့ မန်းကုရေနိနောင်း ကလုဲင်မဲ့လို့အုပ်ချုပ် ဖြိုင်ဆီးရီးယားကိုးနဲ့။ 3နွို့နား လို့စေ့ကွက်နောင်း ဘာ့ကလုဲင်လို့ကစာ မြို၊ တဘိုဘို့ဘက်နွို့ မောင်ထွဠ့်စာရင်းနွို့ ကု့ကူးကြဘို့နဲ့။ 4စနွို့ခေါင်း ယောသပ်နောင်းလဲဉ်း ကမာ့ဖရင်ဒါဝိဒ်မှ ဆန်းပိုကလုဲင်လို့အာ့်ကွက်နွို့ခေါင်း ဖြိုင်ဂါလိလဲ မြိုနာဇရက်နွို့လေးပွန်တွို့ထာ ဘာ့ကလုဲင် မြိုဇာတိ ဖရင်ဒါဝိဒ် ဗဟိုဖြိုင်ယုဒ မြိုဗက်လင်နွို့ ကုလောက်ကြဘို့နွို့နဲ့။ 5စနွို့ ထွဠ်စာရင်းနွို့ မောင်းထွဠ့်သန်ခေါင်စာရင်းနွို့ခေါင်း ဘာ့ကု့နွို့နု့ အမ်နအနုဲင်နုဲင် ဘာ့စေ့စပ်ပို့ယော့ ကွန်ဘာ့ဟိုမာရိနအနုဲင်နုဲင် ကု့ကြဘို့နွို့နဲ့။ 6ခွို့နွို့ မြို့ဗက်လင်နွို့ ဆောင့်လောက်ပိုနောင်း ညာ့ဘာ့မန်းနွို့နား ဧည်ထည်ဘို့ဘက် မောင်းမန်းနွို့နား လွက်အလွတ်ဟိုကောနွို့ကိုးနဲ့။ 7စနွို့နား ခွို့နွို့နောင်း တာ့လွက်ခန်းမန်းနွို့ မန်းမဲ့ကြဘို့နွို့နဲ့။ နွို့ခေါင်း မာရိနောင်း အချန်မွီးဆောင့်လောက်ပိုနွို့နား ကွန်ဖြောက်မောင်းဦးနွို့ မွီးလေးပွိုနွို့နဲ့။ သမြနွို့နောင်း လို့ပေ့နွို့ ပတ်တွို့အ်ခံ့ထာ ကောင်အံဝက်နွို့ ထပ်ပို့ကိုးနဲ့။ 8ဂို့နွို့နု့ လို့ထွမ်းသိုးတောင်ခိုင့်နောင်း သိုးအမ်ဘို့ဘက်နွို့နား ဗဟိုတမေ့မြိုဗက်လင် ကောင်တောရေ့တိုက်နွို့ ဆုပ်မဲ့ဘို့သိုးဘို့ဘက်ကိုးနဲ့။ 9နွို့ခေါင်း ကနံကလို့ဖြားအာ့်ပါးနောင်း ငွမ်းခွို့နွို့နား ရုတ်တရက်ပေါ်လေးတွို့ထာ ဖုန်းတန်ခိုးတော်ဖြားနွို့န တာ့ဇာ့ခွို့နွို့ ထွန်းလင်းထာလန်းမနလို့ထွမ်းသိုးနောင်းလဲဉ်း ခရုံးလွန်းကုဟောက်နွို့နဲ့။ 10နွို့ခေါင်း ကနံကလို့နား ခွို့နွို့နု့ “လပ်ရနာနဲ။ အိုးနောင်း တာလို့မေ့မေ့နွို့ ဘာ့ပျော်ရွှင်လွန်းမဲ့ ဘာ့ကလုဲင် ကတမ်းကလို့စ်နွို့ တာပွို့ အွေပိုကိုး။ 11ဂို့နု့နွို့ အရှင်မေရှိယbပဒေမဲ့ ကယ်တင်ရှင်နောင်း ဘာ့ကလုဲင်မြို ဖရင်ဒါဝိဒ် မြိုဗက်လင်နွို့ ဒါပွို့နွို့မွီးပွို့တွို့နွို့ကိုးနဲ့။ 12ပွို့နွို့ အမ်နားမင်ငန်းဇာ့မွှားနွို့ အို့ဖြိုပလေလောက်ဟောက်။ မြိုဗက်လင်နွို့ တောင်းခံ့နဘာ့ပက်ပို့မဲ့ ကောင်အံဝက်နွို့ ဘာ့သက်လန်မဲ့ လို့ပေ့နွို့ ဆောင့်ထွိနား ပွို့နွို့ငန်းလောက်ဟောက်အမ်” နွိုဖြိုမနနဲ့။ 13ရုတ်တရုတ် ရွှေမြို့တော်cနွို့မှ အခြားကနံကလို့အဘို့အ့်ဘက်နွို့နောင်းလဲဉ်း ကနံကလို့နွို့နအနုဲင်နုဲင် ပေါ်လေးပိုနွို့နဲ့။ 14“ဘာ့တောင်းကံထက်ဗေ့ဘေ့ ရွှေမြို့တော်နွို့ ဘာဟိုတော်မူမဲ့ ဖြားနွို့ ချီးမွမ်းကြဘို့နွို့နဲ့။ဘာ့ဟိုကွေကသေ့ကမ္ဘာ ဖြားနား ဘာ့ခှိက်မဲ့ ကွေလို့မေ့မေ့ ဘာငြိမ်းချမ်းတာ့ဟိုလောက်ဟောက်”နွို့ ချီးမွမ်းကြဘို့ဖြားနွို့နဲ့။ 15နွို့ခေါင်း ကနံကလို့နွို့နောင်း တာလို့ထန်သိုးဘို့ဘက်နွို့မှ ဆောင်ရန်းယော့ရွှေမြို့တော်နွို့နား ခွို့နွို့နု့ “ဖြားနား ကနံကလို့နွို့မှအဆန် ဘာ့ဟောဖြိုပွို့အေ့အဖြစ်အပျက်နွို့နု့ မောင်းရေ့ မြိုဗက်လင်နွို့ ကု့ကြဘို့” နွို့အချောင်းချောင်းဖြိုကြဘို့နွို့နဲ့။ 16နွို့ခေါင်း ခွို့နွို့နောင်း တာ့လွက်နွို့ ဆောင့်ကု့ကြဘို့အဗီအပါနောင်း ယောသပ်၊ မာရိနအနုဲင်နုဲင် ကောင်အံဝက်နွို့ ဘာ့သီမဲ့ လို့ပေ့နွို့ ထွိကြဘို့နွို့နဲ့။ 17လို့ထန်းသိုးနောင်းလဲဉ်း ဆောင့်ထွိလို့ပေ့နွို့နောင်း ကနံကလို့ဘို့ဘက်နွို့ ခွို့နွို့နား ဘာဖြိုပလေ့ဘို့ လို့ပေ့နွို့န ဘာ့သက်ဆိုင်မဲ့ အကြောင်းအရာဇာနွို့နု့ လို့နွို့မေ့မေ့နား ဖြိုပလေကြဘို့အခွပ်နွို့နဲ့။ 18လို့ပထွမ်သို့ဘို့ဘက် ဘာဖြိုပလေမဲ့ အကြောင်းအရာဘို့ဘက်နွို့ ဘာ့ကမ်းကြမဲ့ဘို့ လို့မေ့မေ့နောင်းလဲဉ်း အံ့သြလွန်းကြဘို့နွို့နဲ့။ 19ဇာနု့လဲ မာရိနောင်း ဘာ့ကလုဲင်မဲ့အကြောင်းအရာမေ့မေ့နွို့ ထန်းပို့တွို့ကောင်နွက်အမ်နွို့ထာ အဖြစ်ပျက်ဘို့ဘက်နွို့နောင်း အမ်ဆိုလို့အစိပ္ပာယ်တတ်ထားနွို့ အခွပ်ရောအခွပ် စဉ်းစားလေမနနွို့နဲ့။ 20လို့ထွမ်သိုးနောင်းလဲဉ်း ဖြားနား ချီးမွမ်းကြဘို့ရိုရိုသေသေထာ ဗဟိုတော့ရေ့ဗါ့တိုက်တာသိုးခွို့နွို့ ရန်းကု့ကြဘို့နွို့နဲ့။ ရွားနွို့ပဒေကား ခွို့ဆန့်ဘာ့ရင်ဇာ့နွို့မေ့မေ့နွို့နောင်း ကနံကလို့နွို့ ခွို့ဖြိုပို့နွို့အတွိုန်း ကလုဲင်ပိုခါလောလောနွို့ခေါင်းနွို့နဲ့။ကိုယ်တော်ယေရှုအရွေပေ့နွို့နား ဗေ့ကူဆပ်ကပ်သဖြား 21ဆောင်ကနွိုတွိုစံဆီးနားမာရိန ယောသပ်နား ဥပဒေမောရှေ အတွို့ ညဲနွိုနား အမ်ယောက်အာပွီးအရေပြားလှီးမင်္ဂလာနဲ့။နိုတရား ညဲပဲ့နွို့ ဖွန်သန္ဓေတည်ကောင်ပက်အမ်နားအတွို့ အခမ်းကနံ လဖြိုပို့နို့ ခွိုအာအာ မတ်ယေရှုနဲ့။ 22ပညက်တရားကျမ်းမောရှေနွို့ ဘာဖော်ပလေဘို့နွို့အတွိုန်း ဆောင်ယို့ယော့ပွီးစန်မင်္ဂလာeနွို့ ဆောင်ယို့ယော့ရှိနွို့ နောင်း မာရိန ယောသပ်နား လို့ပေ့ကိုယ်တော်ယေရှုနွို့ တာ့ဖြားနွို့ မောင်းဆက်ကပ် ဗဟိုမြိုဂျေရုဆလင် မြိုဗက်လင်နွို့ ဟက်ကုကြဘို့နွို့နဲ့။ 23ခွို့နွို့နောင်း ဘာ့လောက်ပို ဗိမာန်တော်နွို့နား ပညက်တရားကျမ်းဖြားနွို့ ဘာတဲင်းပွို့နွို့အတွိုန်း “ကွန်ကဗြောက်မောင်းဉီးနောင်း မင်အပ်ဆပ်ကပ် တဖြားနွို့” ကိုးနဲ့။ 24နွို့နား “စံချိုးအစုံ တာ့ကက်ကောလဲ မိုက်တူပေ့အဲဉ်ကွက်န မင်ပူဇော်ဟောက်” ပညက်တရားဖြားနွို့ ဘာ့ဖြိုနွို့အတွိုန်း ပူဇော်ဟောက်နွို့ကိုးနဲ့။ 25ချန်နို့နား မြိုဂျေရုဆလင်နွို့ မာတ်ဗဟိုရှုမောင်နွို့ လို့အာ့်ကွက်ဟိုဟောက်ကိုးနဲ့။ အမ်နောင်း လို့ဖြောင့်မက်ဟောက်နွို့ခေါင်း လို့ယုံကြည်ဖြားလဲဉ်းကက်ဟောက်။ အမ်နောင်း ဖြားဘာ့ပလွှတ်မဲ့ မေရှိယနား လို့မျိုးအစ္စရေးနွို့ မောင်းကယ်တင်အာနွို့ ဆုပ်မနနွို့ခေါင်း ဉာဏ်အလင်းတော်နောင်း အမ်နွို့အွမ်ခေါင်းလောက်ဟောက်နွို့နဲ့။ 26စနွို့နား “မွိုနွို့ မေရှိယနောင်း ခါမင်ရင်ကောနွို့ လမင်ဗီးကား” နွို့ ကြိုတင်ဖြိုပို့မနကိုးနဲ့။ 27မာရိ၊ ယောသပ်န လို့ပေ့ယေရှုနောင်း ပညက်တရားဖြားနွို့ ဘာ့ဖော်ပလေပို့နွို့အတွိုန်း လို့ပေ့ယေရှုနား ကောင်ခြံဗိမာန်တော်နွို့ ဆောင့်ဟက်ပိုနွို့နောင်း ရှုမောင်နွို့ အ့်ကွက်ကောင်ဗိမာန်တော်နွို့အောင် ဉာဏ်အလင်းတော်နား အွမ်ခေါင်းပလေ့စ်ပွို့ကညွမ်းနွို့နဲ့။ 28နွို့ခေါင်း ရှုမောင်နောင်း လို့ပေ့ယေရှုနား ကောင်တိအမ်နွို့ ပန်တွို့ထာ ကျေးဇူးဖြားနွို့ ချီးမွမ်းကြဘို့ဇနီးကိုးနဲ့။ 29“ဖြား၊ မို့ဘာ့ကရီအာဘို့ဘတ်နွို့အ့်တွိုန်း ဘာ့ကလုဲင်အစေခံဖြား အေ့နွို့ အခွပ်နားငြိမ်းငြိမ်းချမ်းချမ်းအာဗီးနိုင်းတွို့။ 30ရွှားပဒေနွိုကား တာ့လို့ဘို့ဘက် အမ်းကယ်တင်နွို့ ဘာ့လွတ်တော်မူမဲ့အရှင်နွို့ အို့ရင်မာန်တွို့ကိုယ်တိုင်နွို့ကိုးနဲ့။ 31စနွို့ဖုန် လို့မေ့မေ့နောင်းလဲဉ်းဖြားပြင်ဆင်ပွို့ဘာ့ပလွတ်ကု့ကယ်တင်ရှင်နွို့ မင်ရင်ဟောက်နွို့ကိုးနဲ့။ 32မေရှိယနွို့နောင်း ဖြားနွို့ လို့မျိုးခြားနွို့ ငန်းအောင်ဘာ့ပလေပိုမဲ့ ကလုဲင်အလန်းရောင်နွို့ခေါင်းဘာ့ကလုဲင်ကမာ့ လို့မျိုးအစ္စရေးလို့မျိုးနွို့နား မင်ရိုသေလေးစားခံအောင် ယို့အာလောက်ဟောက်”နွို့ချီးမွမ်းမနနဲ့။ 33မာရိန ယောသပ်နွို့နောင်း ရှုမောင်ဘာ့ဖြိုပလေမဲ့ ခံမ့်ကိုယ်တော်ယေရှုနွို့ ဆောင်အွမ်ယော့ အံ့သြကု့ကြဘို့နွို့နဲ့။ 34နွို့ခေါင်း ရှုမောင်နောင်း ခွို့နွို့နု့ အာယော့ကောင်းကြီးနောင်း မာရိနွို့ “ဖြားနား ကွန်မွိုနွို့နို ကောင်းဗလလို့မျိုးအစ္စရေးနွိုနား လို့ဘာ့လောက်အ့်ဖျောက်နွို့န လို့ဘာ့ဗင်ကယ်တင်ခြင်းနွို့ မောင်ခွီနား ရွီးတော်မူဟောက်။ အမ်နား ကလုဲင်နိမိတ်လက္ခဏာအာ့်မာ့နွို့လဲဉ်း လို့ဘို့ဘက်နွို့နား အမ်နွို့ မင်ဆန်ကျင်ခံဟောက်နွို့နဲ့။ 35နွို့ခေါင်း အမ်နောင်း ကောင်နွက်လို့နွို့ အကြံစည်ဘို့ဘက်မေ့မေ့နွို့နု့ ပေါ်ပိုအောင်ယို့လောက်ဟောက်။ မို့နောင်းလဲဉ်း နာ့နှိက်ဖြိုက်အာ့်ရန်နွို့အ့်တွိုန်း ကောင်နှလုံးမို့နွို့ နာ့ဆုပ့်ထု့နွို့အ့်တွိုန်း အ့်ကစုနောင်း မင်ခံစွေဟောက်” နွို့ဖြိုမနနဲ့။ 36သလွပ်နွိုနွို့ မျိုးနွယ်အာရှာ ပကလုဲင်ကွန်ကမြဖနွေလန ပရောဖက်အန္နနောင်းလဲဉ်း ဟိုမနနဲ့။ ကမြနွိုနား ချယော့ညားရေ့နား ကမှန်အမ်နအနုဲင်နုဲင် ကနိုဘက်နှမ်း မန်းဟွပ်ကြဘို့နွို့နဲ့။ 37အခွပ် သမြနွို့နောင်း ကလုဲင်မိတ်ဆိုးမအာ့်ကွက်ခေါင်း အထက်နောင်းလဲဉ်း ဟိုတွို့ဆံကျင်ပွန်နှမ်းနွို့ခေါင်း ထောလွန်းတွိုနွို့နဲ့။ သမြနွို့နောင်း ကောင်ဗိမာန်တော်နွို့ ဆောင်မားမှ လာလေးကော၊ ရှိရှိဂို့ဂို့မဖျောက် ဆုတောင်းဝါးကြဘို့ထာ အစူးစူး အစွေအငွမ်းလဲဉ်း စွေကောနားမန်းမနကိုးနဲ့။ 38သမြနွို့နား ကောင်ဗလဗိမာန်တော်နွို့ ဆောင့်လောက်ပိုနွို့ ချီးမွမ်းတိုကျေးဇူးဖြားထာ မေရှိယနား လို့မျိုးအစ္စရေး မောင်းကယ်တင်အာနွို့ ဘာ့ဆုပ်ရေ့ကြမဲ့ လို့မေ့မေ့ဇာ့နွို့နား ခံမ့်ယေရှုနွို့နား ဖြိုအွမ်မနနွို့နဲ့။ 39နွို့ခေါင်း မာရိန ယောသပ်နွို့နား ပညက်တရားဖြားဘို့ဘက်နွို့ တာဝန်အမ်ဆောင့်ယို့ယော့နောင်း ညာ့ခွို့ဗဟိုဖြိုင်ဂါလိလဲ မြိုနာဇရက်နွို့ ရန်းကုကြဘို့နဲ့။ 40လို့ပေ့ နိုဆောင်ကုန်းပိုနို့နောင်း ဉာဏ်ပညာန ဗြောင့်တွို့ထာ ဖြားအာကောင်းကြီးနွို့ မင်ခံစွေဟောက်နွို့နဲ့။ 41စစ်နှမ်းစစ်နှမ်း မာရိန ယောသပ်နွို့နောင်း တာပွီးပသခါဘာယို့နွို့ မြိုဂျေရုဆလင်နို့ ကု့မဲ့ကြဘို့နွို့နဲ။ 42လို့ပေ့ယေရှု အထက်မာကျင်အဲဉ်နှမ်းနွို့ ခွို့မေ့မေ့နောင်း ပုံမှန်အတွိုန်း မောင်းယို့ပွီးတာပွီးပသခါနွို့ မြို့ဂျေရုဆလင်နု့ ကုကူးကြဘို့နွို့နဲ့။ 43ရှိပွီးပသခါ ဆောင်ယားနောင်း လို့အရွေပေ့ယေရှုနွို့ အမ်မန်းလွန်ကွေမြိုဂျေရုဆလင်နွိုနား မိတ်ပါအမ်အံပါးနွို့နောင်း ငန်းကြကောဘို့နွို့ခေါင်း တမြိုနွို့ ပို့ဘို့ဘတ်ပိုနွို့နဲ့။ 44မာရိနယောသပ်နောင်း လို့အရွေပေ့ယေရှု ရန်းညာ့နွို့ ကောင်ဖုန်လို့ကု့ခရီးနွို့ တန်ပိုဟောက်နွို့ ထုန်ကြဘွတ်ခေါင်း ဆောင်ကနိုအ့်ရှိနွို့ ဆက်ကု့ကူးခရီးနွို့နဲ့။ ဆောင့်လာက်ဘတ်နွို့ ခွို့နွို့နောင်း လို့အရွေပေ့ယေရှုနား ကမာ့ဘို့ဘက်န ကောင်ဗလဗိုလ့်ဗေ့နွို့ ကုနွို့ထာ ရက်ကြဘို့နွို့။ 45စနွို့လဲ လို့အရွယ်ပေ့ယေရှုနွို့ရက်ထွီးကြကားဘို့န မြိုဂျေရုဆလင်နွို့ မောင်းရက်တွို့ထာ ပို့ပိုကြဘို့နွို့နဲ့။ 46ဆောင့်ကနို့ကူအွီရှိနောင်း ခွို့နွို့နု့ လို့အရွေပေ့ယေရှုနောင်း တဗိမာန်တော်နို့ ကောင်ဗလဂျုးဘာသာရေးဆာယာနွို့ ထု့မဲ့ဘို့နောင်း ထွိဟောက်နွို့နဲ့။ 47အမ်ပါဖြိုပနောင် အသိပညာန ဖြေကြားချက်နွို့ လို့အများန အန်အွတ်ဟခမ်း အံ့ဩကျဗို့။ 48ယောသပ်န မာရိနောင်းလဲဉ်း ဆောင့်ထွိလို့အရွေးပေ့ယေရှုနွို့ ခွို့ နွို့နောင်း အံ့ဩကြဘို့ထာ ယောသပ်န မာရိနား “ကွန်ဖြောက်၊ ရွား တကွေအေ့ ယို့ဇာ့နီးနား။ တာအေ့နီး နွက်လက်လက်န ဗင်ရက်ဟောက်နွို့” ဖြိုမနနဲ့။ 49ချန်နွို့နု့ လို့အရွေပေ့ယေရှုနား “ရွား ပိုရက်ကျဘို့ ကွန်နောင်း။ ကွန်နား ဟိုမဲ့တညားပါးအေနွတ်စယ် မွို့လငမ်းကဒေစ်” အမ်ဖြိုဘတ်စနွို့ကိုးနဲ့။ 50စနွတ်ခရိန်းဆယ် ခွို့နွို့နောင်း လို့အရွေပေ့ယေရှုဘာဖြိုအဓိပ္ပာယ်နွို့ နားလည်ကြကောဘို့နွို့နဲ့။ 51နွို့ခေါင်း ကိုယ်တော်ယေရှုနောင်း ယောသပ်န ပနောင်မာရိနာခံတွို့ထာ ခွို့နအနုဲင်နုဲင်မြိုနာဇရက်နွို့ ယန်းလွမ်းကုနွို့နဲ့။ မိတ်ပါအမ်နောင်း ကနံကလို့န ဘာ့စထွိအကြောင်းအရာနွို့ လို့အရွေပေ့ယေရှုန ဘာ့သက်ဆိုင်အကြောင်းအရာဇာ့နွို့မေ့မေ့နောင်း ကောင်နွိက်နှလုံးသမြနွို့ စဉ်းစားမနနဲ့။ 52ဆောင်ယော့နို့ ကိုယ်တော်ယေရှုနောင်း ဆောင်ကုန်းပို့နွို့နား ဉာဏ်ပညာလဲဉ်းတိုးပွားတွို့ထာ ရင်ကျက်ပိုဟောက်ခမ်း တာ့ဖြားနွို့လဲဉ်း ဗင်ကောင်းကြီးမင်္ဂလာနွို့ထာ လို့မေ့မေ့လဲဉ်းအထူးမင် ခှိက်ခံကြဘို့နွို့နဲ့။
Currently Selected:
Luke 2: dtpv-rv
Highlight
Share
Copy
Want to have your highlights saved across all your devices? Sign up or sign in
This translation of the Dannau Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
