Luke 8
8
1အချန်ဆောင့်ကနို့ယော့နွို့ ကိုယ်တော်ယေရှုနောင်း မြိုအနှံ့နွို့ ကု့လောက်တွို့ထာ ခံမ့်ထာထနာတော်ဖြားနွို့ ဟောဖြိုပလေစ်ကရီအာမနနွို့နဲ့။ ကိုယ်တော်နအနုဲင်နုဲင် သာဝကမာကျင်အဲဉ်ကွက်လဲဉ်း တန်လွမ်းကု့ဟောက်နွို့နဲ့။ 2နွို့လဲ အ့်ကစုရောဂါ လို့မောင်းဘာ့ဗာပွန်ခံလို့ဘို့ဘက်န ကနံဆို့ဘာ့ဗာပွန်နွို့မှ ဘာ့ဗာပွန်ဖူးမဲ့ ကမြတောင်ခိုင့်လဲဉ်း ကိုယ်တော်နအနုဲင်နုဲင် တန်လွမ်းကြဘို့နွို့နဲ့။ ကမြဇာ့နွို့နု့ ကိုယ်တော်နား ကောင်တိကနံဆို့ဘတ်ကွက်နွို့ ဘာ့လွှတ်မြောက်မဲ့ မိတ်တဘိုနွို့ဘာ့မန်းမယ့် မာဂဒလ မာရိနွို့လဲဉ်းတန်ဟောက်နွို့နဲ့။ 3ဘာ့ကလုဲင်လို့ဂွန့်အမှု ဖရင်ဟေရုဒ် ဖြိုလ့်ခုဇ ယောဟန္နနဖုန် ရှုရှန္နန ကမြအခြားနွို့လဲဉ်း ဟိုဟောက်နွို့နဲ့။ ကမြဇာ့နွို့မေ့မေ့နောင်းလဲဉ်း ပစ္စည်းဥစ္စာခွို့နွို့ ကိုယ်တော်ယေရှုန တပည့်တော်နွို့နား ယို့မွီးထောက်ပံ့ကြဘို့နွို့နဲ့။ 4မြိုအ့်နှံ့အနောမှ လို့ဘာ့ဘို့မဲ့ လို့မေ့မေ့နွို့လဲဉ်း ပွို့ပို့တကိုယ်တော်ယေရှုထာ ဗဟိုစုဝေးကြမဲ့ဘို့နွို့နောင်း ကိုယ်တော်နား လို့ဇာ့နွို့နား ပုံဥပမာအ့်မာ့န ဘာ့ဖြိုနွို့နောင်း 5“လို့ယောက်ရေ့အာ့်ကွက်နား ကောင်ရေ့လာ့နွို့ မောင်းဖီးရ်ကမာ့နား ကု့ကု့ဟောက်နွို့နဲ့။ လို့ယောက်ရေ့ဆောင့်ဖီးရ်ယော့ကမာ့နား ကမာ့တောင့်ခိုင့်နား ကလို့ကု့ကွေကညွမ်းနွို့နု့ လို့ဘာ့တဉ်ကု့ယော့ စံဘာ့တန်စွေနွို့လဲ မင်ခံဟောက်နွို့နဲ့။ 6ကမားတခြားခြားနား အမ်ကလိုတောမြေဆီလွာပနဲ ကွေကျောက်ခံနွိုခမ်း ဆုပ်အမ်လေပို့နွို့လဲဉ်း အ့်စို့နည်းဟောက်နား အဆူစယ်အမ် ကြောင်းပီးမေ့ကု့ဟောက်နဲ့။ 7ကမားတောင်ခြိုင့်နား အမ်ကလိုယော့တောဘိုခရိတ် တောဆုပ်ကလာ့နား ဆုပ်အမ်လေပို့ပနလဲဉ်း ဆုပ်ကလာ့နွို့နား ဒုတ်မေ့ဝဲ့နွို့ခေါင်း ပ္လေ့ထေ့ပ္လေ့ ရို့လဲဉ်းကလိုလ့်ကောနွို့နဲ့။ 8ကမာ့တောင့်ခိုင့်နွို့နား တာ့ကွေကသေ့ဘာ့ကလို့နွို့ ဆုပ်ဆောင့်လေးပို့ယော့ ပ္လေ့ အမ်အ့်ဆအဖျားလောက် ပေါ်ပို့နွို့နဲ့” နု့ဖြိုမနနဲ့။ဆောင့်ဖြိုယော့ဇာ့နွို့နောင်း ကိုယ်တော်နား “ကတန်ဘာ့ဟိုနွို့ လို့ဘာ့အွမ်နိုင်းနု့ ကမ်းကြဘို့” နွို့ကရက်အ့်ထန်ထောတွိုန်းဖြိုပလေမနနဲ့။ 9နွို့ခေါင်း တပည့်တော်ဘို့ဘက်နား ကိုယ်တော်ယေရှုနွို့ ဘာ့ဆိုလိုပုံဥပမာနွို့ မားကြဘို့နွို့နဲ့။ 10ချန်နွို့ ကိုယ်တော်နား “ဖြားနား ပွို့နွို့နု့ ထာထနာတော်အမ်န အကြောင်းအရာဘာ့နက်နဲနွို့ ဘာ့အွမ်နိုင်းအခွင့်နု့ အာပို့ယောနွို့ကိုးနဲ့။ ဇာနွို့လဲ လိုအခြားနွို့ကား ရေ့ဟောက်နွို့လဲ လာ့ရင်၊ တာ့အွမ်နွို့လဲဉ်း နားလည်နိုင်ကောကြဘို့ခေါင်း ခွို့နွို့နား ပုံဥပမာဇာ့နွို့န မင်ဆန်းပလေစ်ဟောက်” နွို့ဖြိုမနနဲ့။ 11အခွပ် ကိုယ်တော်နား “အဓိပ္ပါယ်လို့ဖီးရ်ကမာ့ပုံဥပမာဘာ့ဆိုလိုနွိုနား ကမားနွို့နား ပနောင်တရားတော် ဖြားကိုးနဲ့။ 12ကမာ့ဘာ့ကလို့ကွေကညွမ်းနွို့ပဒေနောင်း ပနောင်တရားတော်ဖြားနွို့ ဆောင်မင်ကမ်းနောင်း တာခွို့ဘာ့ဗင်ကယ်တင်ခြင်းနွို့နား မာရ်နတ်နွို့ လောက်ပိုယော့ လို့ဘာ့ယုံကြည်နွို့န ဖြားဘာ့ကယ်တင်နွို့ဗင်ခံကောအောင် မောင်းတားဆီနွို့န ကောင်နွက်နှလုံးခွို့နွို့ ပနောင်တရားတော်ဖြားနွို့နု့ လို့မင်နှက်အွေခံကုနွို့နကမွို့ဟောက်နွို့နဲ့။ 13ကွေကသေ့ကမှုကမာ့ဘာ့ကလို့နွို့နု့ပဒေနား ပနောင်တရားတော်ဖြားနွို့နု့ ဆောင့်အွမ်နွို့နား နွက်တူးတူးနခံအွေတွို့နွို့လဲဉ်း စိတ်နှလုံးခွို့နွို့ တည်မြဲကားနား အချန်အ့်စုဆယ် ယုံကြည်လက်ခံအွေတွို့ထာ ဘဝနွို့ ဘာ့ခှမ်းဘာ့ရစ်ရ်ရန်းမဲ့ ယုံကြည်မှုပွို့နွို့နား အ့်တိတွိုန်း လို့ဘာ့မုဲင်ကု့ကု့နွို့ကိုးနွို့နဲ့။ 14ကောင်ဆုပ်ကလာ့နွို့ ကမာ့ဘာ့ကလို့ကု့နွို့ပဒေနောင်း ပနောင်တရားတော်ဖြားနွို့ မင်နာအွေမနနွို့လဲဉ်း လောကနသက်ဆိုင်မဲ့ နွက်ဘာ့လက်နွို့ဖုန်၊ ဘာ့ကထေးနွို့ဖုန်န လို့ဖကုန်းနွို့နား ဒုတ်တွို့ထာ ဘတ်ပို့နွို့ခေါင်း ခွို့နွို့နား ပ္လေ့ထေ့ပပ္လေ့ ရို့ နွို့နကမွို့ဟောက်နွို့နဲ့။ ဆုပ်ဘာ့ပ္လေ့ ကြကောဘို့ဆုပ်ထေ့နွို့နား တာ့လို့ယို့ရေ့ အထုံးကွက်ကြကောပွို့နွို့နား ခွို့နွို့နောင်းလဲဉ်း တာ့ဖြားနွို့ လို့အထုံးကွက်ကောနအနုဲင်နုဲင်နွို့နဲ့။ 15ကွေကသေ့ဘာ့ကလို့နွို့ ဘာ့ကလို့မဲ့ကမာ့နွို့ပဒေနား ပနောင်တရားတော်ဖြားနွို့ ဆောင့်နာအွေယော့ ဘာ့တန်းဘာ့ဖြောက်မဲ့ ကောင်နွက်နှလုံးနွို့ ထန်းပို့တွို့ မြဲမြဲထာ ဒေါက်ယို့လွမ်းကြဘို့နွို့ခေါင်း ပ္လေ့ထေ့ပ္လေ့ရို့နွို့ အ့်ဘို့အဘက် လို့ကလုဲင်ပွိုနွို့နကမွို့ယော့ ဖြားဘာ့ခှိက်မဲ့လို့ဘို့ဘက်နွို့ကိုး” နွို့ဟောဖြိုမနနဲ့။ 16အခွပ် ကိုယ်တော်ယေရှုနား “ထွန်းတွိုညွမ်ဘုတ်ထာ လို့ဒုပ်ပို့စောနွို့န တာ့ကက်ကောလဲ တကပ်ကုတင်နွို့ထန်းပို့နွို့ပဒေနား လာဟိုကော။ လို့ဘာ့ကွက်ပို့နွို့ ဗင်အ့်ာလန်းအောင် ညာ့ညွမ်နွို့ ကွေကရောင်းလ်တိုင်နွို့ ဆွီဘို့ကြဘို့နွို့နဲ့။ 17ဗေ့လရက်ထွိနိုင်းကားအောင် ကမားဗေ့လအွမ်ပွို့နိုင်းနွို ကထန်မားဟို့ကား။ ကမားဗေ့လာ့ငမ်းနိုင်းကားအောင်နွိုနွို့ လျှိုဝှက်ချက်လာ့ဟို့ကား။ 18စနွို့ခမ်း အားရုံစိုက်တွို့ထာ ကမ်းကြဘို့။ လို့ဘာ့ငါးလည်နည်းနည်းနွို့ အာနားလည်လိုလ့်လောက်ဟောက်။ ဇာ့နွို့လဲ အမာ့မာ့မှ ငါးလည်ကောလို့ဇာ့နွို့နား အမ်ငါးလည်ဟောက်နွို့ လွေးဟောက်နွို့ဘာ့ထုန်ပို့ဇာ့နွို့စယ် မင်ထန်အွေလောက်ဟောက်” နွို့ဟောဖြိုမနနဲ့။ 19အာ့်ရှိနွို့ မိတ်ကိုယ်တော်ယေရှုန သွေအမ်ဘို့ဘက်နောင်းလဲဉ်း မောင်းတာကျင်ကိုယ်တော်ယေရှုနား လောက်ပိုကြဘို့နား လို့ဖုန်ကုန်းဗောက်လွန်းဟောက်ခေါင်း တာ့ဇာ့ကိုယ်တော်နွို့ လောက်နိုင်ကြကောဘို့နွို့နဲ့။ 20စနွိုခမ်း လို့အာ့်ကွက်နား “မိတ်ကိုယ်တော်န သွေကိုယ်တော်နား အမ်ဆောင်ထွီးကိုယ်တော်ခမ်း မုဲင်တွို့ဖက်ပလန်းထာ ဆုန့်မဲ့ကြဘို့” နွို့ဖြိုကြဘို့နွို့နဲ့။ 21ချန်နု့နွို့ ကိုယ်တော်နား “နာအွေတွို ပနောင်တရားဖြားထာလဲ့ လို့ပယို့ လွမ်းမေ့မေ့နွို့ မုဲင်အို့၊ မို့အို့သွေအိုစယ်” နွို့ ဖြိုစနွို့ကိုးနဲ့။ 22အာ့်ရှိနွို့ ကိုယ်တော်ယေရှုနောင်း တပည့်တော်ဘို့ဘက်နအနုဲင်နုဲင် ကွေတောင်းလွီနွို့ဒတ်တွို့ထာ “အွူအံန်းနီးနား ဖြတ်ကူးကြမဲ့ဘို့” နွို့ ဖြိုဟောက်နွို့ခေါင်း ခွို့နွို့နား တောင်းလွီးနွို့ ခက်ကု့ကြဘို့နွို့နွို့နဲ့။ 23ခွို့တန်းဘာ့ပါဖြတ်နွို့နား ကိုယ်တော်နောင်း သီဗီကု့ဟောက်နွို့နဲ့။ တရုတ်ရုတ် ကွမ်မုန်းတိုင်းဒုပို့နွို့နား တောင်းလွီနောင်း အွူနကလုဲင်မောင်းမြုပ်မောင်းမြုပ်နား ခွို့နွို့နောင်း ထွိကြမဲ့ဘေးအန္တရာယ်နွို့နဲ့။ 24ချန်နွို့နု့ တပည့်တော်ဘို့ဘက်နွို့နောင်း ကိုယ်တော်နွို့ ရိုလ့်တွို့ထာ “ကိုယ်တော်၊ ကိုယ်တော်၊ အေ့မင်ဗီးမယ်ဟား” နွို့ဖြိုကြဘို့နွို့ခေါင်းကိုယ်တော်နောင်း အောက်တွို့ထာ ကွန်ဖြန်းမုန်တိုင်းနလှိုင်းအွူဘို့ဘက်နား အ့်မုဲင်ကု့အောင် ဆောင့်အာအမိန့်နောင်း ကွန်ဖြန်းမုန်တိုင်းနလှိုင်းအွူဘို့ဘက်နား ညှံညောကုဟောက်နွို့နဲ့။ 25နွို့ခေါင်း ကိုယ်တော်နား တပည့်တော်ဘို့ဘက်နွို့ “ယုံကြည်ခြင်းပွို့ ဟိုတမား” နွို့မားကြမဲ့နနွို့နဲ့။တပည့်တော်နွို့နား အံ့သြဒိုက်ဒတွို့ထာ “လို့နီးနား လို့ကမွှာ့မားကိုးရား။ လှိုင်အွူစယ်နမှ ကမ်းပနောင်အမ်နား” နွို့အချောင်းချောင်းဖြိုကြဘို့နွို့နဲ့။ 26နွို့ခေါင်း ကိုယ်တော်ယေရှုန တပည့်တော်နွို့နောင်း ဗဟိုမဲ့ ဖြိုင်ဂါလိလဲ အဖက် တာ့မေ့မြိုဂါရစနွို့ လောက်ကု့ကြဘို့နွို့နဲ့။ 27ဆောင့်လောက်တာ့လွက်နွို့နား ကိုယ်တော်ဆောင့်ဒတ်ကွေကွဉ်းနောင်း တာမြိုနွို့ ကနံဆို့တာဗောက်မဲ့ လို့အာ့်ကွက်နောင်း ကိုယ်တော်နား ပို့ထွိကြဘို့နွို့နဲ့။ အမ်နွို့ ကနံဆို့ဘာ့တာ့ဗောက်နွို့နား ကနို့လွန်းတွို့ အမ်နောင်း တာ့ညာ့လဲလာ့မန်း၊ ခရိုန်းလဲလာ့ဗာ့ကော၊ ကောင်ဗလတောင်ခြိုင်းနွို့စယ် လက်လေကြိုဆိုမနနဲ့။ 28လို့နွို့နောင်း ဆောင့်ရင်ကိုယ်တော်နောင်း အ့်ငွမ်းနွို့ ဗုတွို့ထာ ထောက်ယောတောင်ကို့ “ကွန်ဖြားယေရှု၊ တာ့အို့နီးဆောင်ဗင်တတ်ထား၊ နှိပ်စက်ကောယောအို့၊ တောင်ပန်ဟောက်” နွို့ ကရက်အထန်ထောတွိုန်းနကလေ့စ်တွို့ထာ ဖြိုမနနဲ့။ 29ဘာဖြိုပွို့ဘို့ဇာ့နွို့နု့နား ကိုယ်တော်နွို့ ကနံဆို့နား တာအမ်နွို့လေးပွန်အောင် ဆောင့်အာအမိန့်နွို့ခေါင်းကိုးနဲ့။ လို့နွို့နား ကနံဆို့နောင်း မို့ခို့ငန်းကော အာမဲ့ဒုက္ခနွို့နဲ့။ တိကောက်အမ်နွို့နု့ ကညေမီးထိန စက်သုတ်ပို့နွို့ထာ ဆုပ်ရေ့ပို့နွို့လဲဉ်း အမ်နောင်း ကညေမီးထိနွို့ ဖြတ်သိပ်တွို့ထာ ဗွေကန္တာရနွို့ ကနံဆို့ဘာ့ဟက်ကု့နွို့ မင်ခံဟောက်နွို့နဲ့။ 30ကိုယ်တော်ယေရှုနွို့ အမ်နား “မာတ်မို့ ဟက်ဇာ့မွှား” နွို့ဆောင့်မားနွို့နု့ကောင်သိုလ်အမ်နွို့ ကနံဆို့ဘို့ဘက်နား တာ့ဗောက်မဲ့နနွို့ခေါင်း လို့နွို့နား “လေဂေါင် ကိုး” နွို့ဖြိုပလောက်နွို့နဲ့။ 31ကနံဆို့ဇာ့နွိုနောင်း လို့နွို့နား ကနံဆို့ဘို့ဘက်နွို့ ဘာ့အာမဲ့အပြစ် ကောင်ကသု့ကရွီ့နွို့ လာ့ဖု့ကောအောင် ဝိုင်းတောင်ပန်ကျဗို့ကိုယ်တော် အခွပ်ယော့အခွပ်နွို့ကိုးနဲ့။ 32သမ်းချန်နွိုနား ဖုံကလိပ် ကုန်းအဖုန်နောင်း ကွေဗွေကုန်းနွို့ ရပ်စွေလေကျဗို့နား ကနံဆို့နွို့နောင်း ကောင်ဖုံကလိပ်နွို့နု့ အ့်ကွက်ပူးအမ်နု့ တောင်းပန်ကြဘို့ကိုယ်တော်ခေါင်း ကိုယ်တော်နားလဲဉ်း အာ့ကွက်ပူးမနနွို့ကိုးနဲ့။ 33စနွို့နား ကနံဆို့နွို့နောင်း လေးပွန်တွို့ကောင် လို့နွို့ထာ ကောင်ကလိပ်ဘို့ဘက်နွို့ ဆောင့်ကွက်ပူးယော့နောင်း ဖုံကလိပ်ကုမ်းဗင်ဖုံဖုံနွိုနောင်း ဘာ့တောင်းစွန်လွန်းမဲ့ပါးမြောင်းကောင်အွူအိုင့်နွို့ မမုဲင်မတန်းကံ့စန်းတွို့ထာ ငှဗီးမေ့ကြဘို့အွူနွို့ကိုးနဲ့။ 34ချန်နွိုနု့ လို့ထမ့်ဖုံကလိပ်ဇာ့နွို့နောင်း ဘာ့ကလုဲင်ဇာ့နီးနွို့ ဆောင့်ရင်နွို့နောင်း ပလက်လေးတွို့ထာ ကတမ်းနွို့နား မြိုနတောတဘိုဖုန်လဲဉ်းလာ့လွန်ကောအောင် ဖြိုလေကျမဲ့ဗို့နွို့ကိုးနဲ့။ 35လို့ဇာ့နွို့နောင်းလဲဉ်း ဘာ့ကလုဲင်ဇာ့နွို့နု့ မောင်တာ့ရေ့ လေးပိုကြဘို့ကောင်မြိုနွို့ကိုးနဲ့။ ခွို့နွို့နောင်း တာ့ယေရှုနွို့ ဆောင့်လောက်ပိုနောင်း ကနံဆို့ဘာ့ကွက်တာဗောက်နွို့မှ လို့ဘာ့လွက်မြောက်နွို့နောင်း ပါ့တွို့ခရိုင်းထာ တာ့ဇာ့ကောက်ကိုယ်တော်နွို့ အ့်ကလို့တွိုန်းတွိုန်း ထု့စ်ထာဟိုမဲ့နောက်နောင်း ဆောင်းရင်နွို့နု့ ရကု့ကြဘို့နွို့ကိုးနဲ့။ 36ဘာ့ကလုဲင်ဇာ့နွို့နု့ လို့ဘာ့ရင်မာန့်ကိုယ်တိုင်နွို့နောင်း ကနံဆို့ဘာ့ဗောက်မဲ့နွို့မှ လို့နွို့ အ့်ကလို့ဘတ်ကု့ဇာ့မွှားနွို့နား ဖြိုပလေစ်ကြဘို့နွို့နဲ့။ 37ချန်နွို့နု့ တာ့မြိုဂါရစနွို့ လို့ဘာ့ပို့ဘိုမဲ့လို့စေ့ကွက်နောင်း ရလှူးလန်းဟောက်နွို့ခေါင်း ကိုယ်တော်နား တာ့လွက်နွို့မှ လေးပွန်စေးနွို့ တောင်းလျှောက်ကြဘို့နွို့ခေါင်း ကိုယ်တော်လဲဉ်း တပည့်ဘို့ဘက်နအနုဲင်နုဲင် ကွေတောင်းလွီနွို့ဒတ်တွို့ထာ တာ့လွက်နွို့လေးပွန်ကု့ဟောက်နွို့နဲ့။ 38ချန်နွို့နု့ ကနံဆို့ ဘာ့တာ့ဗောက်ခံနွို့မှ လို့ဘာ့လွက်မြောက်ကု့နွို့နောင်း ကိုယ်တော်နအနုဲင်နုဲင် အာတန်လွမ်းအောင် လျှောက်တံတောင်းပန်ကျဗို့နွို့နု့ ကိုယ်တော်နွို့ လို့နွို့နား အ့်တန်လွမ်းကောနွို့နဲ့။ 39စနွို့လဲ ကိုယ်တော်ယေရှုနား “ရန်းတွို့ ညာ့ထာ တာ့ကွေမို့ ဖြားဘာ့ယို့ဘို့မဲ့ အ့်ကျိုးလို့နွို့နု့ လို့စေ့ကွက် ဖြိုပလေစ်နိုး” နွို့ ဖြိုမနနဲ့။ စနွို့နု့ အမ်နောင်းလဉ်း မြိုအနှံ့ကု့တွို့ထာ ဇာ့ဘာ့ကလုဲင်ပို့ဘို့ဘက်နွို့ ရက်ဖြိုလေမနနဲ့။ 40အခွပ် ကိုယ်တော်ယေရှုနောင်း တာ့အိုင့်အ့်ဖက်နွို့ ဆောင့်ကြွပိုနွို့အခွပ်နောင်း လို့ဖုန်ကုန်းနွို့နောင်း ဆုန့်ရေ့ထာ ကြိုဆိုကြဘို့နွို့နဲ့။ 41သလွက်နွို့နု့ ဘာ့ကလုဲင်လို့မျိုးဂျူး မာတ်ဘာ့ဟိုမဲ့ယာဣရု လို့အွေတာဝန်ခေါင်းဆောင်ဓမ္မာရုံဟိုမနနွို့နဲ့။ လို့နွို့နောင်း ငွမ်းကိုယ်တော်ယေရှုနွို့ ပွို့ပိုတွို့ထာ ထောက်တွို့တောင်ကို့ထာ ကိုယ်တော်နား ညာ့အမ်နွို့ ကြွလောက်ပို့နွို့ တောင်းပန်မနနွို့ကိုးနဲ့။ 42ရွားနွို့ပဒေကား အရွေလ့်မာကျင်အဲဉ်နှမ်း ကွန်ကမြလို့နွို့နား ကလုဲင်မောင်းဗီးမောင်းဗီးနွို့ခေါင်းကိုးနဲ့။တာညာ့နွို့နု့ တန်ဘာ့ကြွနွို့ လို့ဖုန်ကုန်းဘို့ဘက်နောင်းလဲဉ်း ကိုယ်တော်နွို့ ဝန်းတွို့ထာ စုဒု့စ်တွို့ထာ တန်လွှမ်းကြဘို့နွို့နဲ့။ 43ကောင်လို့ဖုန်ကုန်းနွို့ မာကျင်အဲဉ်နှမ်းနှမ်း ကဏံကသွန်ဘာ့တာ့ဗောက်မဲ့ရောဂါနွို့ သမြအာ့်ကွက်နောင်းလဲဉ်း ဟိုမနနွို့နဲ့။ သမြနွို့နောင်း ဇာ့ပိုက်ဆံဘာ့ဟိုနွို့ခံတွို့အ့်မေ့ထာ ဆာယာလာ့ငန်ဘို့ဘက်န ကုဟောက်နွို့လဲဉ်း ဆောင်ကွေမှ ရောဂါအမ်နား ဗာ့ပွန်အောင် ကုနိုင်းကြကောဘို့။ 44စနွို့နား ကမြနွိုနား ဖက်ဘတ်ကိုယ်တော်နွို့ တာ့ဗောက်တွို့ထာ ခရိုန်းကိုယ်တော်နား ဆောင့်ခိုက်မာန့်တိန အတိတွိုန်းစယ် ရောဂါကဏံကသွန်နွို့ဗာပွန်ကု့ဟောက်နွို့နဲ့။ 45ချန်နွို့နု့ ကိုယ်တော်ယေရှုနား “ကွား ခိုက်မန့်အိုနား” ဆောင့်မုဲင်စနွိုခမ်း လို့ဇာ့နွို့လဲဉ်း အေ့လခိုက်မန့်ကားနွို့ ညောင်းတွို့ထာ ပေတရုနား “တာ့စာ့ကိုယ်တော်နွို့နု့ လို့ဖုန်ကုန်းနား ဒုမဲ့ကြဘို့” နွို့လျှောက်တံကြဘို့နွို့နဲ့။ 46စနွို့လဲ ကိုယ်တော်ယေရှုနား “အာ့်ကွက်ကွက်နား ခိုက်မာန့်အို့ကိုး။ ရွားနွို့ပဒေကား တာ့အို့နီး တန်ခိုးဘာ့လေးပွန်နွို့နား အို့ငန်းဟောက်” နွို့ဖြိုပလောက်အခွပ်နွို့နဲ့။ 47ကမြဇာ့နွို့နားလဲဉ်း အွဉ်ပို့နိုင်းကောနွို့နား ကဒိုက်ကဒတွို့ထာ ငွမ်းကိုယ်တော်နွို့ ထောက်တွို့တောင်ကို့ထာ ခရိုန်းနွို့ ခိုက်နွို့နု့န ရောဂါကမြနွို့ အ့်တိတွိုန်း ဗာ့ပွန်ကု့ဟောက်နွို့ခေါင်း လို့မေမေနွို့နား ဖြိုပလေစ်ကြဘို့နွို့နဲ့။ 48ကိုယ်တော်နွို့ ကမြနွိုနား “ကွန်မြအို့၊ လာ့စိုးရိမ်န။ ယုံကြည်ခြင်းမို့နွို့ ရောဂါမို့နွို့ အ့်ဗာပွန်ဟောက်နွို့နဲ့။ ငြိမ်းငြိမ်းချမ်းချမ်းကု့စေး” နွို့ဖြိုမနနဲ့။ 49ကိုယ်တော်တန်းဘာ့ဖြိုမဲ့နွို့နု့ ညာ့ယာဣရုနွို့ လို့အ့်ကွက်လောက်ပိုယော့ ယာဣရုနား “ကွန်ကမြမို့ဗီးပွန်တွို့၊ ရန်ဆာကောယော့ကိုယ်တော်” နွို့ပို့ဖြိုပိုနွို့ကိုးနဲ့။ 50စနွို့လဲ ပနောင်နွို့နို ကိုယ်တော်ယေရှုဆောင့်အွမ်နောင်း ယာဣရုနား “နွတ်မို့လလွပ်န။ အ့်ဟိုယုံကြည်မှုမွို့စယ်။ ကွန်ကမြမို့ အ့်ထက်ပလုဲင်ဘတ်ပိုလောက်ဟောက်” နွို့မိန့်ဖြိုမဲ့စနွို့နဲ့။ 51နွို့ခေါင်း ကိုယ်တော်နောင်း ကောင်ညာ့ယာဣရုနွို့ ဆောင့်ကြွပိုနွို့နောင်း ပေတရု၊ ယောဟန်၊ ယာကုပ်န ဘာ့လွန်တွို့မိတ်ပါကမြပေ့နွို့အဲဉ်ပါးနွို့ လို့အခြားဘို့ဘက်နား ကောင်ညာ့နွို့ အ့်ကွက်ကောနွို့နဲ့။ 52လို့စေ့ကွက်နောင်း ကမြပေ့နွို့ဗီးကု့ဟောက်နွို့ခေါင်း ညှင်းကြဘို့နွို့နဲ့။ စနွို့လဲ ကိုယ်တော်နား “လာ့ညှင်ကောရော၊ ကမြနီးနား လာ့ဗီးကော။ ကမြနီး အမ်သီဘိဟောက်လောက်ဟောက်” နွို့ဖြိုမနခေါင်း 53လို့ဇာ့နု့နောင်း လို့ပေ့နီးနား ဗီးပွန်တွို့နွို့ငန်းကြဘို့နွို့ခေါင်း ကိုယ်တော်နွို့ ဝိုင်းကရကညေ့စ် ကြဘို့နွို့နဲ့။ 54စနွို့လဲ ကိုယ်တော်ယေရှုနား ဘာ့ဗီးပွန်ကု့ တိကမြပေ့နွို့နား ကုံန်ဘိတွို့ထာ “ကမြပေ့၊ အောက်စေး” နွို့ဆောင့်ဖြိုန 55ကမြပေ့နွို့နောင်း အထက်ပလုဲင်းဘတ်တွို့ထာ အတိတွိုန်းအောက်ထု့စ်မနနဲ့။ နွို့ခေါင်း ကိုယ်တော်နောင်း လို့ပေ့နွို့နား မောင်းမွီးခမ်းစွေအ့်မာ့မာ့နွို့ မိတ်ပါအမ်နား ဖြိုအွမ်မနနဲ့။ 56ချန်နွို့နု့ မိတ်ပါကမြနွို့လဲဉ်း လောက်အံ့ဩကု့နနဲ့။ စနွို့လဲ ကိုယ်တော်နား အဖြစ်ပျက်နီးနွို့ ဆောင်ကွေမှ လာ့ဖြိုကောအောင် မိန့်ဖြိုမနနဲ့။
Currently Selected:
Luke 8: dtpv-rv
Highlight
Share
Copy
Want to have your highlights saved across all your devices? Sign up or sign in
This translation of the Dannau Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
