Luke 8
8
1ႎါည်းဟောည်ႇလှေင် စဝ်ဖြားယေရှုနီန် အ်ုန်ဟာဝ်းဟောတြား ဘည်မိုႈဆာဆနာတော်စဝ်ဖြား ကာည်း မံင်ဂလာဆဒါင်မှိူမ် တောပ်ပည် သာဝကကဲ အူကိူရ်လေႈအာရ်အီး ကံပ်ကလဲ့ကီုင်း။ 2ဆဲႈဒါႇဒီန် ကောန်အီပ်ုန် ကဲအီတိူမ်ဂဲန်ဒါႇ ဆဝ်းဖိူဝ် ကာည်း ငျားတိုအာဝ်ကျအာဝ်နကဲနီန်မာ် တောပ်ဒိုႇရဘံန်းစဝ်ဖြား။ ကောန်အီပ်ုန်ကဲဒီန်မိုႈ အီကတူႈတိုအာဝ်ကျအာဝ်နလေႈဒါႇတိုဂဲ အီဇီုဝ်မာရိ ကဝ်အီဂေါည်ရဝ်မာဂဒလ၊ ယောဟန္န ကာည်း 3ယောဟန္န အီမိုႈပီး ခုဇ ကဝ်အီထာမ်းဇီုင်း ဟောခံမ်းဟေရုဒ်။ ကဲဒါစရိက်ကဲ ကဇောည်ရေဲန်ဟျံင် စဝ်ဖြားယေရှု ကာည်း တပဲ့အ်ုန်ဂဲ။ 4ခိင်ရောတ်ကစုဒေဲႈ တိုအအီးဂဲအီယိူဝ်ႇ တောန်ကီုင်းတောန်လှံင်ကဲနီန် တစဝ်ဖြား အ်ုန်စီက္လာင်းနှဲ ပုင်တဲႇအူလှေ 5“မိူဝ်ႈကညာရေဲန်ဂီုင်အူအီး အ်ုန်ဟာဝ်းခေဲင်ဂီုင် ကနာည်နံင်ပြံတ်ကအာင်ပိုႈ။ ခိင်ကညာရေဲန်ဂီုင်ဒီန် ပြံတ်ကအာင်ဆမာရ်နီန် ကအာင်ဆမာရ်မံင်လှေ ဇောႈပဒေင်ႎ ငျားတိုအီးကဲညဲ့ ငျားဘိုးဆီမ်းထောည်ႇဟောမ်။ 6ကအာင်ဆမာရ်မံင်လှေ အ်ုန်ဘိူည်လဲ့မာ် ဂေါႇမိုႈငျားဒေဇောႈဒီဘြေ့ထာတ်ကတာည်း အာဝ်လှေင် ကဲဟည်ခေါႈယံမ်းဟာဝ်းဒိုႇ။ 7ကအာင်ဆမာရ်မံင်လှေ အ်ုန်ဘိူည်လဲ့မာ် ဂေါႇမိုႈငျားဒေဇောႈ ခြူမ်တံင်ပအောႇ ဘ်ုပ်ကတူႈပ်ုန်ကတ်ုရ်ႈကတေင် တံင်ပအောႇကဲဒီန်။ 8ကအာင်ဆမာရ်မံင်လှေ ဂေါႇမိုႈအ်ုန်ဇောႈဒီမှိူမ်ကတာည်း ဟောည်ႇလဲ့ဖါ်ႈ ပ္လေးပွံတ် အူပယာႈပူန်း။” ႎါည်းဟောည်ႇဒါႈစဝ်ဖြားယေရှုဘည်ဒီန် အ်ုန်စီဒါႈထဲင် “ဟံပ်နောႈဟံပ်ဖိူမ် တငါဝ်း ပဲအီမိူဝ်ႈဟျာ့် ဘယ်ဒေယိူဝ်းတငါဝ်းကဲဒီန်။” 9ဟောည်ႇဒီန် တပဲ့တော်ဂဲ ဟည်ဆမွံတ် ဘည်ပ်ုန်ဆိင်ဒါႈ ပုင်တဲႇနီန်။ 10ဟောည်ႇဒီန် စဝ်ဖြားယေရှုစီဒါႈ “စဝ်ဖြားဟောည်ႇဒဲႈပဲနံပ် ဘည်လှေဲမ်ချြံ င်ထဲဝ် ဆာဆနာတော်အ်ုန်စဝ်ဖြား။ မိုႈလိူည် ကဲပေန်အီးကဲဒိူန် ဘိူည်တိူရ်ႈမာ် အာဝ်ယိူဝ်း၊ ဘိူည်ယိူဝ်းဒေတငါဝ်းမာ်a အာဝ်လှံန်မတနောႈဂဲ ဂေါႇမိုႈဘည်ဒီန် စီဘ်ုပ်နှဲပုင်တဲႇ ကဘ္လာင်းဒဲႈကဲနံပ်။” 11စဝ်ဖြားယေရှုစီဒါႈ “အဓိပ္ပါယ် ပုင်တဲႇကညာအီပြံတ်ကအာင်ဆမာရ်နီန်မိုႈ တြားတော်စဝ်ဖြားယာ့်။ 12ကအာင်ဆမာရ်အီဇောႈတောပ်ဒေင်ဒါႈအီးမိုႈ ကဲအီဟောည်ႇညှူမ်ခိင်ဟောည်ႇယိူဝ်းဒေတငါဝ်း တြားတော်စဝ်ဖြား မာရ်နာတ်ဟည်ဒေဲႈရောတ် တီုတ်လာည်းတြားတော်စဝ်ဖြားခေဲင်နောႈဂဲ ကနာည်နံင်အာဝ်ဘိူန်း ပ်ုန်ကဇောည်စဝ်ဖြား။ 13ကအာင်ဆမာရ်အီဇောႈ တေဲင်ကတာည်းခါမ်မာဝ်းဒါႈအီး မိုႈတိုအီးတဇား ကဲဘိူည်ရျံန်ဒေ ရံပ်ခါမ်လာည်းမာ် အာဝ်ဇံတ်တနောႈ ညှူမ်လာည်းပွံတ်အူကဇီန် ခိင်ကတူႈကဲတကီန်းဒည်း ဘည်ညှူမ်ကဲ ဟည်ဇံင်းဟာဝ်းပွံတ်အူစာ်န်း။ 14ကအာင်ဆမာရ်အီဇောႈခြူမ် တံင်ပအောႇနီန် အ်ုန်မိုႈတိုအီးတဇား ကဲဘိူည်ယိူဝ်းဒေတငါဝ်း တြားတော်စဝ်ဖြားမာ် ဂေါႇနောႈကီန်းနောႈမှည်၊ ဂေါႇမိူဝ်ႈရိူန်းမိူဝ်ႈခြီရ်၊ ဂေါႇဂုင်ကာမကဲနီန် ဘ္လီုက်လှူပ် စီပဲန်အာဝ်ပဲန်ပွံတ် ပ္လေလှာ။ 15ကအာင်ဆမာရ်အီဇောႈ ဒီမှိူမ်ထာတ်ကတာည်းဒါႈအီး မိုႈတိုအီးတဇား ဟောည်ႇယိူဝ်းတငါဝ်းတြားတော်စဝ်ဖြား ဟံပ်အူန်းပွံတ်ခေဲင်နောႈမှိူမ်ဖိူမ်ဆငါးကဲ ကနာည်နံင်ရေဲန်တောပ် စီပဲန်ကဲပဲန်ပွံတ်ပ္လေလှာမှိူမ်။” 16“အာဝ်မိူဝ်ႈမတိုအီးဟောည်ႇစံပ်ဖါ်ႈဂါင်ငံရ် ဒါရအူပ်အူပ် ဆာ်အာဝ်မိုႈ တိူဝ်ႈဆီမ်းလာည်းအူန်း ခြူမ်ကူအီတ်။ အီတိူမ်ႎှအူန်းလိူည်တေဲင်တဲင်ငံရ် ကနာည်နံင်ပ္လါင်တကဲ အီလီပ်ဒေဲႈ။ 17အာဝ်မိူဝ်ႈမခံင်အီနံင်ဘယ် ကတ်ုရ်ကတေင်နှာင်းအာဝ်ယိူဝ်း။ ပ်ုန်ချြံ င်ထဲဝ် မောကံပ်အာဝ်ဘယ်ဒေနံပ်မာ် အာဝ်မိူဝ်ႈမ။ 18ဂေါႇဘည်ဒီန် ဟံပ်နောႈဟံပ်ဖိူမ်ပဲ တငါဝ်း။ နံင်ဒဲႈလှိူဝ်း တအီမိူဝ်ႈမံင်မျိုးမံင်လှေ။ မိုႈလိူည် ကံပ်အာဝ်မိူဝ်ႈဆေမာ် ခံင်ပ်ုန်ထာင်ကဲတမိူဝ်ႈဒီန် နံင်ကတူႈဆီမ်းယာ့်။”
ဘည်ကစာပ် အီမိုႈအီငျား 19မာစဝ်ဖြား ကာည်း ႎါးအ်ုန်ဂဲမာ် ရောတ်စာ်မ်းကနာည်နံင်ဒေဲႈယိူဝ်း တစဝ်ဖြား ဂေါႇမိုႈတိုအီးဂီုန်းဇာဝ်း ကဲအာဝ်မဒေ ရောတ်စာ်မ်းတစဝ်ဖြား။ 20ဂေါႇဘည်ဒီန် တိုအီးအူအီး စီဟြာင်းတစဝ်ဖြား “မာစဝ်ဖြား ကာည်း ႎါးစဝ်ဖြားကဲ ဇံင်းရဲ့နှာရိူဝ်ႇ ကဲဒါႈဆိင်ကယိူဝ်း တောပ်စဝ်ဖြားယေရှု။” 21ခိင်ဒီန် စဝ်ဖြားစီဒှုါ “ကဲအီတောပ်ဒါ တငါဝ်းတြားတော်စဝ်ဖြားကဲနီန်ယာ့် မှိုမာအော ကာည်း ဝိါးအော။” 22အူဆငည်း ကိုတော်ကဲတပဲ့အ်ုန်ကဲ စီဟိုက်တေဲင်ကလေဲႇ ဆူည်ႇကဲႎဲႇရိူဝ်ဇဲဝ်း “ဆာ်ႈ အယ်ခ္လေါႈဟာဝ်း ဆိုရ် ဒါႇအိုမ်တီုင်။” 23ခိင်ခ္လေါႈဟာဝ်းကဲဘည်ဒီန် စဝ်ဖြားဟည်အီတ်ဆငဲႈခေဲင်ကလေဲႇဒီန်။ ကဲဟည်ကတူႈဒိုႇကီန်း ဂေါႇခူရ်ဒါင်း က္လာည်းဒါင်းဟည်ရောတ်ဒေဲႈကတီုင် ကလေဲႇကဲမာ် ဟည်ဇူႈဒေစိူမ်လီပ်ခေဲင်အိုမ်။ 24ခိင်ဒီန် တပဲ့အ်ုန်ကဲ ဟည်ပျိူဝ်ႇကိုတော် “ကိုတော်၊ ကိုတော် အယ်နံင်ယံမ်းဒိုႇ” ခိင်ကိုတော်ယိူဝ်ႇဒဲႈအမိင် ကနာည်နံင်ယေန် ခူရ်ဒါင်းက္လာည်းဒါင်း ကာည်း အိုမ်ဒါင်းကဲဒီန် ခူရ်ဒါင်းက္လာည်းဒါင်း ကာည်း အိုမ်ဒါင်းကဲဒီန်မာ် ယေန်ဟာဝ်းပွံတ်။ 25ဟောည်ႇဒီန် ကိုတော်စီဆမွံတ်တပဲ့အ်ုန်ကဲ “မှောဒိုည်ႇပ်ုန်ညှူမ်ပဲ” ကဲဟည်အာမ်းယောဒိုည်ႇ “တိုအီးအူအီးနီန် အဆေအ်ုန်မိုႈ။ ကဲဟည်လည်ဒါႈခနားကဲတောခနားကဲ ခူရ်က္လာည်းကဲနီန်လိူည် စီတငါဝ်းအမိင် ပ်ုန်ဒဲႈအ်ုန်။” 26ဟောည်ႇဒီန် ကိုတော်နီန်ကာည်းတပဲ့အ်ုန်ကဲ ဟည်ခ္လေါႈဒေဲႈအိုမ်တီုင်ဂါလိလဲ ရောတ်စာ်မ်းအရာပ် ကီုင်းဂါရစ ကဲဟည်ဆီုပ်ခ္လေါႈဟာဝ်းဘိုး။ 27ခိင်ကိုတော်ဟိုက်တေဲင်ခေါပ်ပြာဒီန် မိူဝ်ႈတအီးအူအီး ဒေဲႈရောတ်ကယိူဝ်းတောပ်စဝ်ဖြား အ်ုန်အီကတူႈကငျားတိုအာဝ်ကျအာဝ်နလီပ်ခေဲင်တိုအ်ုန်ဒီန်။ တိုအာဝ်ကျအာဝ်နဒီန် လီပ်ဒေဲႈခေဲင်တိုအ်ုန် ဟည်လှေင် ပဂါင်မာ်အ်ုန်အာဝ်ဂေါည်၊ ဂြူမာ်အ်ုန်အာဝ်ချှူပ် လည်လိူည်လာ်ဂေါည် ခနားဆံင်ခဴင်။ 28ခိင်အူအီးဒီန် ယိူဝ်းကိုတော် အ်ုန်အံက်ဆီႇပွံတ်ကြိုင်းရအာည်ႇကိုတော် ရျံင်ဒေဒါႈတစဝ်ဖြား “ယေရှုတော် ကောန်စဝ်ဖြား၊ ဆေမည်းမိူဝ်ႈပ်ုန်လိုတအော၊ မည်လာလီနဘာည်းတအော၊ မှာန်းမည်းပ္လိုတ်ခွါင်းဒဲႈတအောစိ။” 29အ်ုန်ရျံင်လာ်ဒါႈဘည်ဒီန်ဂေါႇမိုႈ စဝ်ဖြားယေရှုဒီန် ဒဲႈအမိင်တအ်ုန် ကနာည်နံင်လေႈဒါႇတိုပိုင်း တိုအီးအူအီးဒီန်။ တိုအာဝ်ကျအာဝ်နဒီန် အ်ုန်ဒဲႈကီန်းတတိုအီးအူကဝ်ဒီန် ကည်လိူဝ်ႈကည်လိူဝ်ႈ။ ကဲကံပ်တိုည်း ဒါႎံ ရ်ဟီရ်တုဘက်ဇိူင်တည်း နှံက်လာ်တိူရ်ႈအ်ုန်မာ် အ်ုန်ဂကဘြိူဝ်ႈႎံ ရ်ဟီရ်ဒီန် ဟာဝ်းဂေါည်ပွံတ်ဒေ ခနားဆံင်ခဴင် တောပ်ဘည်ဟံမ်းတောႇ တိုအာဝ်ကျအာဝ်နဒီန်။ 30စဝ်ဖြားယေရှုဟည်ဆမွံတ် “ဆေမည်းဇီုဝ်” ဂေါႇမိုႈ တိုအာဝ်ကျအာဝ်နအီလီပ်ခေဲင်တိုအ်ုန်ဒီန်ဂီုန်းဇာဝ်း၊ အူကဝ်ဒီန်စီဒါႈ “မိုႈလေဂေါင်b။” 31တိုအာဝ်ကျအာဝ်နကဲဒီန် ကဲမှာန်းမည်ဒဲႈစဝ်ဖြား ဒဲႈတာမ်တိုန်းကဲခေဲင်ကတဝ်ဘီုင် လှေဲမ်အံပ် ကဆီုဝ်ဒဲႈအီတတာမ်။ 32ခိင်ဒီန် မိူဝ်ႈလေ့အူဖုင် ဟိုကဟောမ်ပ်ုန်ဟောမ် တေဲင်ဂေါင် တိုအာဝ်ကျအာဝ်နကဲဒီန် စီမှာန်းကဲလီပ်ခေဲင်တိုလေ့ စဝ်ဖြားယေရှုမာ် ပ္လိုတ်ခွါင်းဒဲႈကဲလီပ်။ 33ဂေါႇဘည်ဒီန် တိုအာဝ်ကျအာဝ်နကဲဒီန် ႎါည်းဟောည်ႇလေႈကဲဒါႇတိုတိုအီး ကဲစီလီပ်ခေဲင်တိုလေ့ကဲဒီန် တဘုလေႈပွံတ် ပအိုမ်တီုင် ပည်ဟည်ရအာင်ရအိုႈ ဒံမ်လီပ်ဒိုႇခေဲင်အိုမ်။ 34ခိင်ဒီန် ကဲအီထိင်လေ့ဂဲဒီန် ဟည်ယိူဝ်းဘည်မိုႈ ကဲဟည်တဘုႎီရ်ပ္လိူရ်ႈဒိုႇဆဒါင်ဒီန် ကီုင်နောမာ်အာဝ်ႎါည်းယာ့်။ 35တိုအီးကဲနီန်မာ် ကဲဟည်လည်လေႈဒိုႇ ဒါႇကီုင်း ကနာည်ဟာဝ်းတိူရ်ႈ ဘည်မိုႈဘည်ဘာည်း လှေနီန်။ ခိင်ဟာဝ်းရောတ်ကဲ တစဝ်ဖြားယေရှု ကဲဟည်ယိူဝ်းဘည်မိုႈ ကဝ်အီကတူႈ တိုအာဝ်ကျအာဝ်နဂဲလီပ်ခေဲင်တိုအ်ုန်ဒီန် ဘာည်းဘိုးတိုအီးပြီမ် ချှူပ်ဒါဂြူ အံက်တေဲင်ဇိူင်စဝ်ဖြား ႎါည်းဒီန် ကဲဟည်အာမ်းဒိုႇ ကဘ်ုရ်ဒိုႈ။ 36အူကဝ်ယိူဝ်းပွံတ်ဒါငါည်အ်ုန်ဒီန် စီက္လာင်းကဲနံပ် ဘည်မှောအ်ုန်ဘာည်း လောတ်ဟာဝ်းဒါႇပ်ုန်လီပ်တိုအာဝ်ကျအာဝ်နဂဲဒီန်။ 37ခိင်ဒီန် ဂေါႇမိုႈတိုအီးယိူဝ်ႇဒေဲႈ ကီုင်းဂါရစကဲဒီန်ယော ကဲစီမှာန်းဒဲႈ စဝ်ဖြားယေရှုလည်လေႈဟာဝ်းဒါႇအရာပ်ဒီန် စဝ်ဖြားယေရှုကဲတပဲ့အ်ုန်ဂဲမာ် ဘကလေဲႇလည်လေႈဟာဝ်းပွံတ်ဒါႇအရာပ်ဒီန်။ 38ကဝ်အီလောတ်ဒါႇ ပ်ုန်လီပ်တိုအာဝ်ကျအာဝ်နဂဲဒီန် အ်ုန်မှာန်းဒေတောပ်ဟာဝ်း စဝ်ဖြားယေရှု မိုႈလိူည်စဝ်ဖြားယေရှုအာဝ်ဒဲႈမအ်ုန်တောပ်၊ စဝ်ဖြားယေရှုစီဒါႈ 39“ႎီရ်ပဂါင် က္လာင်းဒဲႈအီးနံပ် ဘည်ဒဲႈအကျိုးစဝ်ဖြား တေဲင်မည်း။” ဂေါႇဘည်ဒီန် အ်ုန်မာ် လွံင်ဒေက္လာင်းပွံတ် ဘည်မိုႈဘည်ဘာည်း ကံပ်ကလဲ့ခေဲင်ကီုင်း။ 40ခိင်စဝ်ဖြားယေရှု ႎီရ်စွရောတ်စာ်မ်းဘိုး ကဒါႇအိုမ်တီုင်ဒီန် ကူန်ရဝ်မာဂါင်ကဲမာ် ရဲ့ဒေရံပ်ရိုႈဒိုႇအ်ုန်။ 41ဒီဒီန် အ်ုန်မိူဝ်ႈ ကောန်အီမာည်းခြိူဝ်းဇူးအ်ုန်အီဇီုဝ် ယာဣရု အီမိုႈအီအွံရ်ပဓမ္မာယုင်။ အ်ုန်ဟာဝ်းအံက်ဆီႇကြိုင်း ရအာည်ႇစဝ်ဖြားယေရှု ဖိင်ပါင်းစဝ်ဖြားစွရောတ်ပဂါင်အ်ုန်။ 42ဂေါႇမိုႈအ်ုန်မိူဝ်ႈလိူည် ကောန်အီပ်ုန်အူအီးဒီန် ဘိူန်းအဆာက် အူကိူရ်လေႈအာရ်ဆန်ုမ် ဟည်မိုႈနံင်ယံမ်း။ ခိင်စွရောတ်စဝ်ဖြားပဂါင်ဒီန် ကူန်ရဝ်မာဂါင်မာ်ဂီုန်း ကနျံတ်ဒေလီပ် ကႎျံ ရ်ဒိုႇ စဝ်ဖြား။ 43ခေဲင်ကူန်ရဝ်မာဂါင်ကဲဒီန် မိူဝ်ႈဘိုးကောန်အီပ်ုန်အူအီး ကတူႈရောဂါနှာမ်းဟာဝ်း ဘြည်အူကိူရ်လေႈအာရ်ဆန်ုမ်။ ခါမ်ဒိုႇရိူန်းပစိူဝ်း ဒဲႈဆြာခေါခါႇဂဲ ဆနံမ်း မိုႈလိူည် ဆြာကဝ်မှောမာ် အာဝ်ဘယ်မဒေ ဆနံမ်းပ်ုန်ဟြာည်ရောဂါအ်ုန်ဒီန်။ 44ကောန်အီပ်ုန်ဒီန် အ်ုန်စီဟာဝ်း ရဘံန်းစဝ်ဖြားယေရှု ဒါတည်းအ်ုန် စီႇဆဒေါစဝ်ဖြား ရောဂါနှာမ်းဟာဝ်းအ်ုန်ဒီန်မာ် ကမာ်ႈဟာဝ်းပွံတ်အူစာ်န်း။ 45ခိင်ဒီန် စဝ်ဖြားစီဒါႈ “အဆေမိုႈ အီစီႇအောဒီန်” တိုအီးကဲဒီန်မာ် ထဴင်ဘည်အာဝ်စီႇကဲ ပေတရုစီဒါႈ “ရီမ်းပြောစဝ်ဖြား မိုႈဒိုည်ႇတိုအီးဂဲ ကမှတ်ဒေကနျံတ်။” 46စဝ်ဖြားစီဒါႈ မိုႈလိူည် “အောတံန်းနံပ်အေ့ ဂေါႇမိုႈအူအီးအူအီး စီႇအော တဂိုးအောဟည်လည်လေႈဟာဝ်းပွံတ်။” 47ကောန်အီပ်ုန်ဒီန်မာ် အ်ုန်အာဝ်ဘယ်ဒေရျံတ် အ်ုန်ကဘ်ုရ်ဒေဒါ အံက်ဆီႇကြိုင်းရအာည်ႇစဝ်ဖြား ဒါႈပွံတ်ရအာည်ႇတိုအီးဂီုန်း အောဆီုင်ဂီုည်ဇူႈလိူည်စီႇလဂြူစဝ်ဖြား ရောဂါအောဟည်ကမာ်ႈဟာဝ်းပွံတ်။ 48စဝ်ဖြားစီဒါႈ “ဂေါႇပ်ုန်ညှူမ်မည်း အ်ုန်ႎီရ်ပ်ုန်ဟြာည် ရောဂါမည်းဒီန် ဟည်ဘိူန်းဟာဝ်း ဘည်လိုနောႈမည်းအေ့။” 49ခိင်က္လာင်းစဝ်ဖြားဘည်ဒီန် တိုအီးဂါင်ဓမ္မာယုင်ယာဣရုအူအီး ရောတ်ဒေဲႈက္လာင်း တယာဣရု “ကောန်မည်းဟည်ယံမ်း၊ မည်ချှုက်ယာ့် စဝ်ဖြားယေရှု။” 50ခိင်စဝ်ဖြားယိူဝ်းဒေတငါဝ်း ကြောႈလှေဒီန် စဝ်ဖြားစီဒါႈ “မည်နောႈမှည်။ ညှူမ်လိူည်။ ခေါခါႇကောန်မည်းနံင်ႎီရ် ပဲန်ဘိုး။” 51ဟောည်ႇဒီန် ခိင်စွဟာဝ်းစဝ်ဖြားပဂါင် ယာဣရုကဲဒီန် ဆဲႈဒါႇ ပေတရု၊ ယောဟာန်၊ ယာကုက် ကာည်း ကူန်မာအ်ုန်အာရ်အီး အဆေမာ် အာဝ်ဘိူန်းလီပ်။ 52တိုအီးဂဲတောန်အီးမာ် ဟည်ယာမ်းဒိုႇ ဂေါႇကောန်ဒဲႇဒီန်ယံမ်း။ မိုႈလိူည် စဝ်ဖြားစီဒါႈ “မည်ယာမ်း။ ကောန်ဒဲႇနီန်အ်ုန်ညှံမ်ယံမ်းမ၊ မိုႈလိူည်အ်ုန်အီတ်ဆငဲႈ” 53ဘံန်မှိုတိုအီးဂဲဒီန် ဟည်နံပ်မှိုတကောန်ဒှဲဒီန် ဟည်ယံမ်း ကဲကညာႈလိူည်စဝ်ဖြားဒီန်။ 54စဝ်ဖြားစီဘားတည်း ကောန်ဒဲႇဒီန် “ကောန်ဒဲႇ ယိူဝ်ႇပွံတ်” 55ဟောည်ႇဒီန် အဆာက်ကောန်ဒဲႇဒီန်မာ် ဟည်ႎီရ်လီပ် အ်ုန်မာ်ယိူဝ်ႇအံက်ပွံတ်။ ဟောည်ႇဒီန် စဝ်ဖြားစီဆူည်ႇ ကူန်မာအ်ုန်ကဲ ဒဲႈအ်ုန်ဟောမ်ပေါမ်။ 56ကူန်မာအ်ုန်ကဲမာ် ဟည်အာမ်းခည်းခည်း။ မိုႈလိူည် စဝ်ဖြားစီတံမ်း မည်က္လာင်းတအဆေ ဘည်မိုႈဘည်ဘာည်း လှေနီန်။
Currently Selected:
Luke 8: stpv-rv
Highlight
Share
Copy

Want to have your highlights saved across all your devices? Sign up or sign in
This translation of the Shwe Palaung Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.