Luke 5
5
1တနေ့မောင် ကွိုယ်တော်ယေရှုဟော် ဂင်္နေသရက်ယေအောင်a နောင်းမောင်မဂ်တိုမူနေခှိင် လူထုပရိတ်ဆတ်တွို့ဟော် ဖရောဆန်ယယ့် နွောဂ်ကပတ်တိုကွိုကျောနော်ဖွို့ ဆူ့ယယ့်ပတ်လည်မောင် စုဝီးယွောဂ်ဆိလော်ကျော့ရယ်။ 2အယ်းယော်ပွီးယန် ကွိုယ်တော်ဟော် ကမ်းစောဂ်မောင် ဆိုက်ကောဂ်ထောရယ့် ငေါဖောင်းခှယ်နေစန်းကွို မျိုတိုမူရယ်။ ငေါဖောင်းဆမောတွို့ဟော်လယ်း ခှယ်ပိုခေါ့ ဆန်းပွီး ငေါဖောင်းပိမျောကွို ဆေးကျိုးနေကျော့ရယ်။ 3အယ်းအခေါ် ကွိုယ်တော်ယေရှုဟော် အယ်းခှယ်နေစန်းထားခေါ့ ရှိမုန်ယယ့် ခှယ်ပိုကွိုတဂ်ပွီး ခှယ်ကွို ကောင်းခှေခေါ့နေ နယ်းနယ်းခွာဖွို့ မိင့်ဆွိုလေရယ်။ အယ်းနွောဂ်ဆူဟော် ခှယ်ပိုမောင် ထောင်လောဂ်ပွီး လူရယ်ကွို ဟိုးကျောတိုမူရယ်။ 4ဟိုးကျောပွီးရယ့်အခေါ် ကွိုယ်တော်ဟော် ရှိမုန်ကွို “ယေနဂ်ယော်ဖဂ်ကွို ခှယ်ကွိုလော်ခတ်ပွီး ငေါဖောင်းဖွို့အတွ နန့်ယယ့်ငေါဖောင်းပိကွိုခှော့လောဂ်ပေါ်” လွို့ မိင့်တိုမူရယ်။ 5ရှိမုန်ခေါ့လယ်း “ကွိုယ်တော်၊ ငေါ်တွို့ တညော့လုန်း မိုးနောင့်မိုးနောင့် ကျွိုးစောကျော့ပေမယ့်လယ်း ငေါတကွောင်မော့ မယော့ခယ့်ပေါ်။ ဟော်ပေမယ့် ကွိုယ်တော် လုတ်ခေါင်းရယ့်အတွကျွောင့် ငေါဖောင်းပိကွန်ကွို ထောဂ်ပွီး ခှော့လောဂ်ပေါ်မယ်” လွို့ ဖှေလေရယ်။ 6အယ်းလွိုနောင့် ငေါဖောင်းပိကွန်ကွို ခှော့လောဂ်ရယ့်အခေါ် ဆူတွို့ဟော် ပိမျောကွားလုမတတ် ငေါအမျောတွို့ကွို ဖောင်းမိကျော့ရယ်။ 7အယ်းယော်ကျွောင့် ဆူတွို့ဟော် အချောခှယ်ပိုမောင်ဆိရယ့် ငေါဖောင်းဆမောအပွေါင်းအဖိုတွို့ကွို ဆူတွို့ကွို ကူညီနောင်ဖွို့အတွ အချပျော့ပွီး လောင်းခိုလောဂ်လေရယ်။ အယ်းလူရယ် ယွောဂ်လော်ကျော့ပွီး ခှယ်နေစန်းလုန်းမောင် ငေါမျောကွိုထည့်ကျော့ယော် ဆူတွို့ယယ့် ခှယ်မျောဟော်လယ်း နဂ်မွှုပ်လုနီးပေါ ဖှဂ်ဆိုးလေရယ်။ 8အယ်းအဖှဂ်အပျဂ်မျောကွို မျိုတွိယော့ရယ့်အခေါ် ရှိမုန်ပေတရုဟော်b ကွိုယ်တော်ယေရှုယယ့် ခှေရန်းမောင် ဒူးထွောဂ်ချယ့်ခွိုးပွီး “ကွိုယ်တော်၊ ငေါ်ဟော် အပှဂ်ဒုစရောဂ်မျောဆူဖှဂ်ရယ့်အတွ ငေါ့နောင်းခေါ့နေ ထွဆိုးတိုမူပေါ်” လွို့ ရွှောဂ်တန်လေရယ်။ 9ဟော်လွိုရွှောဂ်ယော့ခှန်းမောင် ရှိမုန်နောင့်ဆူ့ယယ့်အပွောင်းအဖိုအောလုန်းဟော် ဖောင်းမိရယ့်ငေါမောင်မျောပနန်းရယ့်အတွ အောင့်အိုးဆိုးကျော့ရယ့်အတွကျွောင့်ဖှဂ်ရယ်။ 10ရှိမုန်နောင့်အပွောင်းအဖိုဖှဂ်ရယ့် ဇေဗေဒဲယယ့်ဆောယာကုပ်နောင့်ယောဟန်တွို့ဟော်လယ်း အောင့်အိုးကျော့လေရယ်။ ကွိုယ်တော်ယေရှုခေါ့ “မကျွောဂ်ပေါ်နောင့် အခုခေါ့စော့ပွီး နန်ဟော်ငေါဖောင်းမယ့်အစော လူတွို့ကွို ငေါ့ယယ့်ဆပယ့်နွောဂ်လောဂ်ဖှဂ်လော်စေဖွို့ စုဝီးစေယော့လောဂ်မယ်” လွို့ မိင့်လေရယ်။ 11အယ်းနန်လွို့ ဆူတွို့ဟော်လယ်း ခှယ်မျောကွို ကောင်းပိုကွို ဆွားတန်ပွီးရယ့်အခေါ် ဆိသမျော့တွို့ကွို ထောခယ့်ဟော့ပွီး ကွိုယ်တော်ယယ့်နွောဂ်ကွို လောဂ်ကျော့လေရယ်။ 12တခေါ်ခေါ့ ကွိုယ်တော်ယေရှုဟော် မွှို့တမွှို့မောင်ဆိနေခှိင် အယ်းနေယော်မောင် အနော်ကျွီးရိုးကော်ခေါင်စောနေယော့ဆူ အမျွိုးဆောတယွောဂ်ဆိလေရယ်။ ဆူဟော် ကွိုယ်တော်ကွိုမျိုပွီး ကွိုယ်တော်ယယ့်ချယ့်မောင် မှေပိုနောင်း ဒူးထွောဂ်ပွီး “ကွိုယ်တော်၊ ကွိုယ်တော်အလွိုဆိယန် အနော်ရိုးကော်ကွို ပျွောဂ်ကန်းစေနောင်ပေါ်ရယ်။ အယ်းယော်ကျွောင့် ငေါ့ယယ့် ရိုးကော်ကွိုပျွောဂ်ကန်းအွောင် ပှုလုတ်ပေးပေါ်” လွို့တွောင်းရွှောဂ်လေရယ်။ 13အယ်းယော်ကျွောင့် ကွိုယ်တော်ဟော် လဂ်ကွိုဆန့်ပွီး အယ်းလူကွိုလဂ်တိုနောင့်ထိပွီး “ငေါ်အလွိုဆိရယ်၊ ပျွောဂ်ကန်းစေ” လွို့မိင့်လောဂ်တော်နောင့် ခှခှင်းပယ်း အယ်းလူယယ့် အနော်ကျွီးရိုးကော်မောင်ပျွောဂ်ကန်းဆိုးလေရယ်။ 14အယ်းနွောဂ်မောင် ကွိုယ်တော်ခေါ့ ခုလွို အနော်ကျွီးရိုး ကော်ပျွောဂ်ကန်းရယ့်အကျွောင်းကွို စူကွိုမောင့် မဟိုးပျော့ဖွို့ ဆူ့ကွို မိင့်ပွီးရယ့်အခေါ် “ပုရောဟိတ်နောင်းကွို ဆိုးပွီး နန့်တကွိုယ်ကွိုပျော့ပေါ်။ ပွီးယန် နန့်ယယ့် အနော်ရိုးကော်ပျွောဂ်ကန်းမုကွို လူရယ်နောင်းဆဂ်ဆေဖှဂ်စေဖွို့အတွ မောရှေပညတ်ကျောင်းမောင် ဖိုပျော့ထောရယ့်အတောင်း ပူဇော်ရယ့်အမုကွို ဆိုးပွီးလုတ်ဆွောင်ပေါ်” လွို့ မိင့်တိုမူရယ်။ 15ဟော်ပေမယ့်လယ်း ကွိုယ်တော်ယယ့်ဆတန်းဟော် နေယော်အရောဂ်ရောဂ်ကွို ယွောဂ်ဆိုးလွို့ လူအမျောတွို့ဟော်လယ်း ကွိုယ်တော်ယယ့် ဟိုးကျောဆုန်းမော့မုမျောကွို နောထွောင်ဖွို့နောင့် နော်မကျောင်းခှန်းခေါ့နေ ပျွောဂ်ကန်းစေဖွို့ စုရုန်းလော်ကျော့ရယ်။ 16ဟော်ပေမယ့် ကွိုယ်တော်ဟော် လူဆူတိဆိင့်ရယ့်အရောဂ်မောင် တယွောဂ်ထယ်း ပုန်မန်ဆိုးယွောဂ် ဆုတွောင်းလေ့ဆိရယ်။ 17တနေ့မောင် ကွိုယ်တော်ယေရှု ဟိုးပျော့ဆုန်းမော့နေရယ့်အခှိင် ဂျေရုဆလင်မွှို့ ဂါလိလဲပှယ်၊ ယုဒပှယ်မောင်ဆိရယ့် ကျေးဝိုမျော ခေါ့နေ လော်ကျော့ရယ့် ဖာရိရှဲc မျောနောင့် ကျောင်းတတ်ဆရော်မျောဟော်လယ်း အယ်းနေယော်အနီးမောင် ထောင်နေကျော့ရယ်။ အယ်းအပှင် ဖရောဆန်ဟော် ကွိုယ်တော်ကွို လူတွို့ယယ့်အနော်ရိုးကော်မျောပျွောဂ်ကန်းစေဖွို့အတွ တခွိုးတိုကွို ပေးထောတိုမူလေရယ်။ 18အယ်းအခှိင်မောင် လေဖှဂ်နေဆူလူတဦးကွို လူတခှို့ဟော် ဖျော်ပိုမောင်တန်ပွီး အိင်ထားကွိုခှီယူပွီးရယ့်အခေါ် ကွိုယ်တော်ယယ့်ချယ့်တိုမောင် ခှော့ထောဖွို့ လုတ်ဆွောင် ကျော့လေရယ်။ 19ဟော်ပေမယ့် အိင်ထားမောင် လူအမျောတွို့နောင့်ပှယ့်နေကျော့လွို့ ဝမ်စရော် လောင်းချော် မတွိရယ့်အတွ အိင်ခွေါင်မွိုးပိုကွိုတဂ်ပွီး အမွိုးတခှောဂ်ကွိုဖာလောဂ်ပွီး လူမျောယယ့်အလာမောင်ဆိရယ့် ကွိုယ်တော်ယေရှုယယ့်ချယ့်ကွို ဖျော်နောင့်အတူ ချိုးခှော့ လောဂ်ကျော့ရယ်။ 2020အယ်းလူတွို့ယယ့် ယုန်ကျည်ချဂ်ကျွီးမောပုန်ကွို ကွိုယ်တော်မျိုရယ့်အခေါ် လေဖှဂ်နေဆူကွို “မိင့်ဆွေ၊ နန့်ယယ့် အပှဂ်ဒုစရောက်ရယ်ကွို ခွမ့်ခွှဂ်ပေးလောဂ်ပီ” လွို့ ဟိုးလေရယ်။ 21အယ်းအခေါ် ဖာရိရှဲမျောနောင့် ကျောင်းတတ်ဆရော်မျောဟော် “ဟော်လူဟော် ဆူ့ကွိုယ်ဆူ စူလွို့ထန်ပွီး ဟော်လွိုမျွိုး ဖရောဆန်ကွို စိုကောရယ့်စကော မျွိုးကွို ဟိုးယော့သလော။ ဆူ့ကွိုယ်ဆူဖရော ဆန်လွို့ထန်နေသလော။ ဖရောဆန်ခေါ့လွားပွီး စူခေါ့မောင့် အပှဂ်ရယ် ကွို ခွမ့်ခွှဂ်ပေးတော်မျွိုး မလုတ်နောင်ဘူး” လွို့ တွယ်းကျော့လေရယ်။ 22ဟော်ပေမယ့်လယ်း ကွိုယ်တော်ယေရှုဟော် ဟော်လူတွို့ စနန်မျွိူး တွယ်းနေတော်ကွို ဆိဆ လွို့ “နန်တွို့ စော်ဖှဂ်လွို့ အယ်းလွိုတွယ်းနေကျော့သလော။ 23‘နန့်ယယ့်အပှဂ်ရယ်ကွိုခွမ့်ခွှဂ်လောဂ်ပီ’ လွို့ဟိုးတော်နောင့် ‘ထော့ပွီးလောင်းရွှောဂ်ပေါ်’ လွို့ဟိုးရယ့်ဟော်မောင် စော်ဟော်ခေါ့ ပွိုလွာသလော။ 24အယ်းအခေါ် လူဆောတိုdဟော် ဟော်ကဘော်မောင်ဆိရယ့် အပှဂ်အောလုန်းကွို ခွမ့်ခွှဂ်နောင်ရယ့် အခွမ့်အော်နော်ဆိရယ်။ အယ်ယော်ကွို နန်တွို့ဆိဆအွောင် ငေါ်ပျော့မယ်” လွို့ ဟိုးပွီး၊ ဟော်လေဖှဂ်နေဆူကွို “ငေါ်ဟိုးမယ်၊ ထော့ပေါ်၊ နန့်ယယ့်ဖျော်ကွိုယူပွီး အိင်ကွိုပှန်ပေါ်” လွို့ မိင့်တိုမူရယ်။ 25အယ်းလွိုဟိုးလောဂ်ပွီး အယ်းလူဟော် ခှခှန်း လူအမျောချယ့်မောင် မတ်လောဂ်ပွီး ဆူလယ်းနေရယ့်ဖျော်ကွို ကွောဂ်ဆိင်းပွီးရယ့် အခေါ် ဖရောဆန်ယယ့် ဂုန်တိုကွိုခှီးမွမ်းပွီး အိင်ကွိုပှန်ဆိုးဟော့ လေရယ်။ 26လူတောင်းဟော် အောင့်အိုးမုနောင့် ဖရောယယ့်ဂုဏ်တိုကွိုခှီးမွမ်းကျော့ရယ်။ ဆူတွို့ဟော် အောင့်အိုးတွိင်လုတ်မုနောင့် “ခုနေ့ ငေါ်တွို့ဟော် အောင့်အိုးစရော်ကွောင်းရယ့်အယော်တွို့ကွို မျိုယော့ပီ” လွို့ ဟိုးကျော့လေရယ်။ 27အယ်းလွိုအဖှဂ်ပျမျောပွီးရယ့်နွောဂ်မောင် ကွိုယ်တော်ယေရှုဟော် အယ်းနေယော်ခေါ့ ထွဆိုးခယ့်ပွီး လေဝိလွို့ခိုရယ့် အခွမ်ကွောဂ်တဦးဟော် အခွမ်ကွောဂ်ရယ့်တား ထားမောင်ထောင်နေတော်ကွို မျိုယန် “ငေါ့နွောဂ်ကွို လောဂ်ခယ့်ပွီး ငေါ့ဆပယ့်တိုလုတ်ပေါ်” လွို့ မိင့်တိုမူရယ်။ 28အယ်းယော်ကျွောင့် လေဝိဟော်ထော့ပွီး ဆိသမျော့ရယ်ကွို စွမ့်ပွီး ကွိုယ်တော်ယယ့်နွောဂ်ကွို လောဂ်ပေါ်ခယ့်လေရယ်။ 29အယ်းနွောဂ်မောင် လေဝိဟော် ကျွီးကှာခမ်းနောရယ့် စောဆွောဂ်ပွားနောင့် ဆူ့ယယ့်အိင်မောင် ကွိုယ်တော်နောင့် ဆပယ့်တိုရယ်ကွို ဧည့်ခေါင်ပွီး အခွမ်ကွောဂ်ဆူမျောနောင့် အချောဧည့်ဆယ်တိုမျောဟော်လယ်း ညော့စော်စောပွားမောင် အတူတူစောဆွောဂ်ကျော့လေရယ်။ 30အယ်းအခေါ် အယ်းဟော်ကွို ဖာရိရှဲမျောနောင့် ကျောင်းတတ်ဆရော်အခှို့ခေါ့ မျိုရယ့်အခေါ် ကွိုယ်တော်ယယ့်ဆပယ့်တိုမျောကွို “နန်တွို့ဟော် ဟော်အခွမ်ကွောဂ်ဆူမျော၊ အပှဂ်ဒုစရောက်ဆမောရယ်နောင့် စော်ကျွောင့်အတူတူ စောဆွောဂ်နေကျော့သလော” လွို့ ကာ့ရာ့ပွီးဟိုးကျော့ လေရယ်။ 31ကွိုယ်တော်ယေရှုခေါ့ ဆူတွို့ကွို ဖှေကျောလောဂ်ခှန်းမောင် “ကျောင်းမော်ရယ့်ဆူဟော် ဆေးဆရော်ကွို လွိုမောင်မဟွိ။ နော်မကျောင်းဆူရယ်ခေါ့ပယ်း ဆေးဆရော်ကွိုလွိုအောဂ်ရယ်။ 32အယ်းလွိုပယ်း ကွိုယ့်ကွိုကွိုယ် ဖွောင့်မတ်မင် ကန်ရယ်လွို့ထန်နေရယ့်ဆူရယ်ကွို ခိုဖွို့ ငေါ်လော်ခွမ်မဟွိဘူး။ အယ်းအစော အပှဂ်ဆောရယ် ကွို နွောင်တော့ယော့စေဖွို့အတွ ငေါ်ခိုဖွို့လော်ခွမ်ဖှဂ်ရယ်” လွို့ မိင့်တိုမူလေရယ်။ 33အယ်းနွောဂ်မောင် ဂျူးဖော်ဆော်ရယ်းခွောင်းဆွောင်မျောခေါ့ ကွိုယ်တော်ယေရှုကွို “ယေနဂ်မန်ဂလော်ဆရော်ယောဟန်ယယ့်ဆပယ့်ရယ်ဟော် အစော်ရွှောင်လေ့ဆိပြီး ဖာရိရှဲယယ့်ဆပည့်မျောဟော်လယ်း အယ်းလွိုမျွိုးပယ်း အစော်ရွှောင်ကျော့ရယ်။ ဟော်ပေမယ့် နန့်ယယ့်ဆပယ့်ရယ်မောင်ကော စောလောဂ်ဆွောဂ်လောဂ်နေကျော့ရယ်။ စော်ကျွောင့် အချောဆူရယ်လွိုမျွိုး အစောမဆွောင်ကျော့သလော” လွို့ မေးကျော့လေရယ်။ 34ကွိုယ်တော်ယေရှုခေါ့ “မန်ဂလော်ပွားလော်ရယ့်ဆူရယ်ဟော် သတွိုးဆောနောင့်အတူ ဆိနေရယ့်အခှိင်မောင် အစော်ရွှောင်စေနောင်မလော။ အယ်းလွိုမျွိုး စူမောင့် ပှုလုတ်မောင်မဟွိဘူး။ 35ဟော်ပေမယ့် သတွိုးဆောကွို ဆူတွို့နောင်းခေါ့နေ ခိုယူဆိုးမယ့်အခှိင်ယွောဂ်လော်ရယ့်အခေါ်မောင်ကော ဆူတွို့ဟော် မစောမဆွောဂ်ပယ်း အစော်ရွှောင်ကျော့လောဂ်မောင်ဖှဂ်ရယ်” လွို့မိင့်တိုမူလေရယ်။ 36အယ်းနွောဂ်မောင် ကွိုယ်တော်ဟော် ဆူတွို့ကွို ပုန်ဥဖမော်မိင့်ဆွိုခှန်းမောင် အဝဂ်ဆဂ်ခေါ့ပိစော့ကွို ဆွားဖှဂ်ပွီး အဝဂ်ဟွောင်းယယ့် အပွောဂ်အပှဂ် ကွို ဖော်ရယ့်ဆူမဆိပေါ်။ အယ်းလွိုလုတ်ယန် အဝဂ်အဆဂ်ကွို ဆွားဖှဂ်တအွောင်မကော့လွို့ ဖော်လောဂ်ရယ့် ပိင့်စော့အဆဂ်ဟော် လယ်း အဝဂ်ဟွောင်းနောင့် ကောဂ်ညီမုလယ်းမဆိပေါ်။ 37စပျစ်ဝိုင်အဆဂ်ကွို ဆရယ်ဖူးအဟွောင်းထားမောင် စူမောင့် မထည့်ကျော့ဘူး။ အယ်းလွိုလုတ်ယန် စပျစ်ဝိုင်အဆဂ်ခေါ့ ဆရယ်ဖူးကွို ပွေါဂ်ပှားဆိုးစေနောင်ရယ့်အတွ စပျစ်ဝိုင်ဟော် ယွိုဖိပွီး ဆရယ်ဖူးဟော်လယ်း ပျဂ်စီးဆိုးမောင်ဖှဂ်ရယ်။ 38အယ်းယော်ကျွောင့် စပျစ်ဝိုင်အဆဂ်ကွို ဆရယ်ဖူးအဆဂ်မောင်ပယ်း ထည့်ယော့မယ်။ 39အယ်းအပှင် စပျစ်ဝိုင်အဟွောင်းကွိုဆွောဂ်ပွီးရယ့် ဆူဟော် စပျစ်ဝိုင်အဆဂ်ကွို မဆွောဂ်ခှန်ကျော့ပေါ်။ စော်ကျွောင့်လောဟန်ကော ဆူတွို့ဟော် ဟိုးကျော့ရယ် “စပျစ်ဝိုင်အဟွောင်းဟော် စပျစ်ဝိုင်အဆဂ်ထဂ် အရောဂ်ဆော် ပွိုကွောင်းရယ်” လွို့ မိင့်လေရယ်။
Currently Selected:
Luke 5: ttpv-rv
Highlight
Share
Copy
Want to have your highlights saved across all your devices? Sign up or sign in
This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
