Luke 7
7
1အယ်းနွောဂ်မောင် ကွိုယ်တော်ယေရှုဟော် လူထုပရိတ်ဆတ်ကွို ဟိုးကျောဆုန်းမော့ပွီးရယ့်အခေါ် ကပေရနောင်မွှို့ကွို ကျို့တိုမူရယ်။ 2အယ်းမွှို့မောင်ဆိရယ့် ရောမတောဂ်မူးa တယွောဂ်နောင်းမောင် ကော်တရော်သဖိုးကှော့အောထောယော့ရယ့် အစေခေါင်တယွောဂ်ဟော် ဖျောနော်ပွီး ဆေလုမျိုးပေါဖှဂ်နေလေရယ်။ 3အယ်းတောဂ်မူးဟော် ကွိုယ်တော်ယေရှုဆတန်းကွို ကျောဆိဆရယ့်အခေါ် ဆူ့ယယ့်အစေခေါင်ကွို ကုပေးစေဖွို့ ဂျူးလူမျွိုးအကျွီးအကားတခှို့ကွို စေခွှဂ်ပွီး ကွိုယ်တော်ကွို ပန့်ဖိင့်စေရယ်။ 4ဆူတွို့ဟော် ကွိုယ်တော်ယေရှုနောင်းလော်ပွီး ဆူတွို့နောင့်အတူ အယ်းတောဂ်မူးကွိုကူညီပေးပေါ်ဖွို့ လေးလေးနောဂ်နောဂ်တွောင်းပန်ကျော့လေရယ်။ အယ်းဆူတွို့ခေါ့ “ဟော်အယော်ဆိဟော် ကွိုယ်တော်ယယ့်အကူအညီကွို အမင်တကာပယ်းထောဂ်တန်ပေါ်ရယ်။ 5အကျွောင်းမောင်ကော ဆူဟော် ငေါ်တွို့ယယ့်ဂျူးလူမျွိုးရယ်ကွို ခှဂ်ခန်ရယ့်အတွကျွောင့် ငေါ်တွို့အတွ ဓမ္မာရုန်တဆွောင်ကွိုလယ်း ဆွောဂ်လုတ်ခှူဒါန်းပေးခယ့်ရယ့်ဆူလယ်း ဖှဂ်ပေါ်ရယ်” လွို့ ရွှောဂ်တန်ကျော့လေရယ်။ 6အယ်းယော်ကျွောင့် ကွိုယ်တော်ဟော် ဆူတွို့နောင့်အတူ လောဂ်ပေါ်ဆိုးတိုမူပွီး တောဂ်မူးယယ့်အိင်နောင့် မနီးမဝီးကွို ယွောဂ်လော်ရယ့်အခေါ် တောဂ်မူးဟော် ဆူ့ယယ့်မိင့်ဆွေအခှို့ကွို စေခွှဂ်ပွီး ကွိုယ်တော်ယေရှုကွို “ကွိုယ်တော်၊ ငေါ်တွို့ယယ့်အိင်ခွေါင်မွိုးအွောဂ်ကွို ကွိုယ်တော်ကျို့လော်ဖွို့ မထောဂ်တန်ရယ့်အတွ အပန်ပန်းခေါင်ပွီး မကျို့လော်ပေါ်နောင့်။ 7အယ်းအပှင် ငေါ်ဟော်လယ်း ကွိုယ်တော်နောင်းကွို လော်ယွောဂ်တွိဆုန်ဖွို့လယ်း ငေါ်ဟော် မထောဂ်တန်ပေါ်။ ဟော်ပေမယ့် ကွိုယ်တော် အမိင့်ပေးလောဂ်ယုန်နောင့် ငေါ့ယယ့်အစေခေါင်ဟော် ကျောင်းမော်လော်ပေါ်လောဂ်မယ်။ 8ဟော်လွိုဟိုးယော့ခှန်းမောင် ငေါ်ဟော်လယ်း အချောဆူယယ့်အော်နော်အွောဂ်မောင်ဆိရယ့် အတွကျွောင့်ဖှဂ်ရယ်။ ဆူတွို့အမိင့်ပေးယန် ငေါ်နော်ခေါင်ယော့မယ်။ ငေါ့ယယ့်အော်နော်အွောဂ်မောင်လယ်း ငေါ့ယယ့်စဂ်ဆောမျောဆိရယ်။ ဆူတွို့ထားခေါ့တယွောဂ်ကွို ‘အယ်းနေယော်နောင်းကွိုဆိုးပေါ်’ လွို့အမိင့်ပေးယန် ဆူဟော်ဆိုးယော့ပွီး အချောတယွောဂ်ကွို ‘လော်ပေါ်’ လွို့အမိင့်ပေးယန်လယ်း ဆူဟော်လော်ယော့ရယ်။ ငေါ့ယယ့်အစေခေါင်ကွို ‘ဟော်အယော်ကွိုလုတ်ပေါ်’ လွို့အမိင့်ပေးယန် ဆူဟော်လုတ်ယော့ရယ် လွို့ရွှောဂ်တန်စေလေရယ်။ 9အယ်းစကောကွို ကွိုယ်တော်ကျောရယ့်အခေါ် အောင့်အောင့်အိုးအိုးနောင့် ဆူ့နွောဂ်ကွိုလောဂ်ပေါ်လော်ရယ့်ဆူတွို့ကွို ခှယ့်ကျေ့ပွီး နန်တွို့ကွို ငေါ်ဟိုးမယ် အစ္စရယ်းလူမျွိုးမောင်တအွောင် ဟော်လူမျွိုးချောလွောဂ်မောင့် ငေါ့ကွိုယုန်ကျည်ဆူကွိုငေါ်မတွိဖူး ဆေးပေါ်” လွို့ မိင့်တိုမူရယ်။ 10တောဂ်မူးစေခွှဂ်လောဂ်ရယ့်ဆူတွို့လယ်း အိင်ကွိုပှန်ယွောဂ်ဆိုးရယ့်အခေါ် တောဂ်မူးယယ့်အစေခေါင်ဟော် ကျောင်းကျောင်းမောင်မောင်ဆိနေခှန်းကွို တွိလောဂ်ယော့လေရယ်။ 11အယ်းနွောဂ်မောင် မကျော်ခန်ကွိုယ်တော်ယေရှုဟော် နာဣနလွို့ခိုရယ့်မွှို့နောင်းကျို့တိုမူရယ်။ ဆပယ့်တိုမျောနောင့်လူအုတ်ကျွီးဟော်လယ်း ကွိုယ်တော်နောင့်အတူလောဂ်ပေါ်ဆိုးကျော့ရယ်။ 12မွှို့တခေါအနီးနောင်းယွောဂ်တိုမူရယ့်အခှိင်မောင် လူတွို့ဟော် ဆေရယ့်လူတယွောဂ်ကွို မွှို့ပှန်နောင်းသယ်လော်ကျော့ရယ်။ ဆူဟော် မွိဆွိုးမော့ယယ့်တဦးတည်းသောဆောဖှဂ်ရယ်။ မွှို့ဆူမွှို့ဆောတွို့ဟော်လယ်း အယ်းအမျွိုးဆမီးနောင့်အတူဆိကျော့ရယ်။ 13ကွိုယ်တော်ဟော် အယ်းမွိဆွိုးမော့ကွိုမျိုရယ့်အခေါ် ဆူ့ကွို ကော်တရော်ဆနောဂရုနော်ဖှဂ်ပွီး “မငွိုပေါ်နောင့်” လွို့ မိင့်တိုမူလေရယ်။ 14အယ်းနွောဂ်မောင် ကွိုယ်တော်ဟော် လူတွို့သယ်လော်ရယ့် အလွောင်းစန်အနီး ကွို ကျို့တိုမူပွီးယန် အလွောင်းစန်ကွို လဂ်တိုနောင့် ထိတိုမူပွီး အလွောင်းစန်ထောင်းလော်ဆူတွို့ဟော် လယ်း နောပေးလောဂ်ခှိင်မောင် ကွိုယ်တော်ခေါ့ “လူပယ့်ဆငါ၊ နန့်ကွိုငေါ်ဟိုးမယ်။ ထော့ပေါ်” လွို့မိင့်တိုမူလေရယ်။ 15အယ်းအခေါ် ဆေနေရယ့်ဆူဟော် ထော့ထောင်လောဂ်ပွီး စော့တန်စကောဟိုးလေရယ်။ ကွိုယ်တော်ဟော်လယ်း ဆူ့ကွို ဆူ့မွေ့နောင်း ပှန်အောဂ်လေရယ်။ 16လူအပွေါင်းတွို့ဟော်လယ်း ထိင့်လန့်အောင့်အိုးမုနောင့် “ငေါ်တွို့ကျောထားမောင် မှင့်မှဂ်ရယ့်ပရောဖက်တပေါ ပိုထွလော်ပီ။ ဖရောဆန်ခေါ့ ငေါ်တွို့ကွို ကျေ့ရှုတိုမူပွီး” လွို့ ဖရောဆန်ယယ့်ဂုဏ်တိုကွို ခှီးမွမ်းကျော့လေရယ်။ 17ကွိုယ်တော်နောင့် ပဆဂ်ရယ့် အယ်းဆတန်းတွို့ဟော်လယ်း ယုဒပှယ်တခွမ်လုန်းနောင့် အနီးအနော ပတ်ဝန်းကျန်ဒေဆော့အောလုန်းကွို ယွောဂ်ဆိုးလေရယ်။ 18ယေနဂ်မန်ဂလော်ဆရော်ယောဟန်ယယ့် ဆပယ့်မျောဟော် ထွောင်ထားမောင် အကှင်းကှော့ခေါင်နေယော့ရယ့် ယောဟန်နောင်းကွိုဆိုးပွီး ကွိုယ်တော်ယေရှုပှုတိုမူသမျော့ အကျွောင်းအယော်အလုန်းစုန်ကွို ဆူ့ကွိုဟိုးပျော့လေရယ်။ 19ဆူတွို့ကွို ကွိုယ်တော်ယေရှုနောင်းကွိုစေခွှဂ်ပွီး “ကွိုယ်တော်ဟော် ငေါ်တွို့မျိုလန့်နေရယ့်မေရှိယလော အယ်းလွိုမော့မဟွိ ငေါ်တွို့အချောဆူတယွောဂ်ကွို စွောင့်ယော့အုန်းမလော” လွို့မေးမှန်းရွှောဂ်တန်စေလေရယ်။ 20အယ်းဆပည့်တွို့ခေါ့လယ်း ကွိုယ်တော်နောင်းကွို ယွောဂ်လော်ကျော့ရယ့်အခေါ် ကွိုယ်တော်ကွို “ယေနဂ်မန်ဂလော်ဆရော်ယောဟန်ခေါ့ ငေါ်တွို့ကွို ကွိုယ်တော်နောင်းကွိုစေခွှဂ်ပွီး ‘ကွိုယ်တော်ဟော် ငေါ်တွို့မျိုလန့်စွောင့်စောနေယော့ရယ့်မေရှိယအဆန်လော အယ်းလွိုမော့မဟွိ ငေါ်တွို့အချောဆူတယွောဂ်ကွို စွောင့်ယော့အုန်းမလောလွို့ မေးမှန်းရွှောဂ်တန်စေလွိုပေါ်’ လွို့ မေးမှန်းစေပေါ်ရယ်” လွို့ ရွှောဂ်တန်ကျော့လေရယ်။ 21အယ်းအခှိင်မောင် ကွိုယ်တော်ဟော် ဖျောနော်ဆူမျောကွို ကျောင်းမော်စေပွီး မကွောင်းဆွိုးဝါးပူးကောဂ်ခေါင်နေယော့ရယ့် ဆူရယ်နောင်းခေါ့ မကွောင်းဆွိုးဝါးမျောကွိုလယ်း မွောင်းထွိပေးခှန်းမကော့လွို့ မျဂ်မမျိုမျောတွို့ကွိုလယ်း မျဂ်စိအလန်းပှန်ယော့စေဖွို့ ပှုနေတိုမူရယ်။ 22ကွိုယ်တော်ခေါ့လယ်း ယောဟန်ယယ့်ဆပယ့်မျောကွို “နန်တွို့မျိုယော့၊ ကျောယော့ရယ့်အယော်ရယ်ကွို ယောဟန်နောင်း ဆိုးဟိုးပျော့ကျော့ပေါ်။ မျဂ်မမျိုမျော အခုမျဂ်စိပှန်မျိုကျော့ပီ။ ခှေလဂ်မသန်စွမ်းရယ့်လူရယ်ခေါ့လယ်း လောင်းရွှောဂ်နောင်ကျော့ပီ။ အနော်ကျွီးရိုးကော်ဆယ်ရယ်လယ်း ရိုးကော်ပျွောဂ်ကန်းကျော့ပီ။ နောမကျောဆူရယ်လယ်း ပှန်လယ်ကျောကျော့ယော့ပီ။ ဆေရယ့်ဆူရယ်လယ်း အဆဂ်ပှန်ချန်ကျော့ပီ။ ဆားရားဆောရယ်လယ်း မန်ဂလော်ဆတန်းကွောင်းကွို ကျောကျော့ယော့ပီ။ 23ငေါ့ကွို အပှယ့်အဝို့ယုန်ကျည့်ရယ့်လူရယ်ကွို ဖရောဆန်ခေါ့ ကွောင်းခှီးမန်ဂလော် ပေးတိုမူလောဂ်မယ် လွို့ ယောဟန်ကွိုဟိုးလောဂ်ပေါ်” လွို့မိင့်တိုမူလေရယ်။ 24ယောဟန်ယယ့်ဆပယ့်တိုတွို့ ပှန်ဆိုးကျော့ပွီးရယ့်အခေါ် ယောဟန်အကျွောင်းကွို လူထုပရိတ်ဆတ်ရယ်နောင်း ကွိုယ်တော်ဟိုးကျောတိုမူခှန်းခေါ့ “တိုးကန်တော်ရော့ထားကွို စော်အယော်ကွိုကျေ့ဖွို့ ဆိုးကျော့သလော။ လေယူယော်ယောင်းနေရယ့် မျရောင်းပန်ချယ်ရယ်ကွို မျိုခှင်လွို့လော။ 25အယ်းနန်ဟန် စော်အယော်ကွို မျိုခှန်လွို့ အယ်းအရောဂ်ကွိုဆိုးကျော့သလော။ ဝဂ်ကွောင်းစောခှော့ဝဂ်ထောရယ့်ဆူရယ်ကွို မျိုခှန်လွို့လော။ အယ်းလွိုမော့မဟွိ ဝဂ်ကွောင်းစောခှော့ဝဂ်ဆန်ထောပွီး စည်းစိင်အပှယ့်ခေါင်စောနေရယ့်ဆူရယ်ကွို ဘရန်နောင်းတိုထားမောင်ပယ်း မျိုနောင်ရယ်မယ်။ 26ယောဟန်ယယ့်ဆပယ့်တိုတွို့ ပှန်ဆိုးကျော့ပွီးရယ့်အခေါ် ယောဟန်အကျွောင်းကွို လူထုပရိတ်ဆတ်ရယ်နောင်း ကွိုယ်တော်ဟိုးကျောတိုမူခှန်းခေါ့ “တိုးကန်တော်ရော့ထားကွို စော်အယော်ကွိုကျေ့ဖွို့ ဆိုးကျော့သလော။ လေယူယော်ယောင်းနေရယ့် မျရောင်းပန်ချယ်ရယ်ကွို မျိုခှင်လွို့လော။ 27အကျွောင်းမောင်ကော ချယ့်ယခန်ပရောဖက်တပေါကော့ ယောဟန်ယယ့်အကျွောင်းကွို ရယ်းဆောထောခဲ့တော်ကော့ ‘ဖရောဆန်ဟော် မေရှိယကွို ဟော်လွိုမျွိုးမိင့်ဆွိုတိုမူရယ်။ အယ်းယော်ကော့ နန့်ကွို မစေခွှဂ်မီ ငေါ်ဟော် ငေါ့ယယ့်စေတမာန်ကွို အယန်ဦးဆုန်း စေခွှဂ်မယ်။ ဆူဟော် နန့်ယယ့်လောင်းစန်ကွို ပှန်ဆန်ပေးလောဂ်မယ်’ ဆွိုပွီးဖှဂ်ရယ်။ 28နန်တွို့ကွို ငေါ်ဟိုးမယ် အမျွိုးဆမီးမျောခေါ့နေ မွီးလော်ရယ့်ဆူရယ်ထားမောင် ယေနဂ်မန်ဂလော်ဆရော်ယောဟန်ထဂ် ကျွီးမှဂ်ရယ့်လူမဆိပေါ်။ ဟော်ပေမယ့် ဖရောဆန်ယယ့် ဆော်ဆနော်တိုထားမောင် အရယ်းမပေါ်ဆုန်းဆူဟော် ယောဟန်ထဂ်ဆော်ပွီး ကျွီးမှဂ်ရယ်” လွို့ မိင့်တိုမူရယ်။ 29အယ်းအခေါ် အခွမ်ကွောဂ်ဆူမျောခေါ့စော့ပွီး လူအပွေါင်းတွို့ဟော် ယောဟန်နောင်း ယေနဂ်မန်ဂလော်ကွို ခေါင်ယူခယ့်တော်ကျွောင့် အယ်းစကောကွိုကျောနော်ယော့ရယ့်အခေါ် ဖရောဆန်ဟော် ဖွှောင့်မတ်ကျွောင်းကွို ဝမ်ခေါင်ကျော့ရယ်။ 30ဟော်ပေမယ့် ဖာရိရှဲမျောနောင့် ကျောင်းတတ်ဆရော်တွို့ဟော ယောဟန်နောင်းခေါ့နေ ယေနဂ်မန်ဂလော်ကွိုမခေါင်ယူခယ့်လွို့ ဆူတွို့အတွ ဖရောသခန်ကျောင်စည်ထောတိုမူရယ့် အယော်ကွို ပဂ်ပါကျော့ရယ်။ 31အယ်းယော်ပွီးယန် ကွိုယ်တော်ခေါ့ဆဂ်လဂ်ပွီး “အခုခေတ်ကော်လော့လူမျောဖှဂ်ကျော့ရယ့် နန်တွို့ဟော် စော်နောင့်တူသလော၊ စလွိုလူစောမျွိုးဖှဂ်ကျော့သလောဆွိုယန် 32‘ငေါ်တွို့ တီးမွိပျော့နေပေမယ့် နန်တွို့မကော့ကျော့ဘူး။ ငေါ်တွို့ ဝုန်းနယ်းဖွို့ကွောင်းရယ့်ထဂ်ချန်းဆွိုပျော့ပေမယ့်လယ်း နန်တွို့မငွိုကျော့ဘူး’ လွို့ ဈေးထားမောင်ထောင်ပွီး အခှန်းခှန်းအိုဟဂ်ဟိုးနေကျော့ရယ့် လူပယ့်ငါရယ်နောင့်တူရယ်။ 33ယောဟန်ဟော် အစော်လယ်းမစော၊ မူးစေနောင်ရယ့်စပျစ်ဝိုင်ကွိုလယ်း မဆွောဂ်ဝါးနောင့် ဆိုးလော်နေတော်ကွို ‘ယောဟန်ခေါ့ မကွောင်းဆွိုးဝါးပူးကောဂ်နေရယ့်ဆူ’ လွို့နန်တွို့ဟိုးကျော့ရယ်။ 34အယ်းအတောင်းပယ်း လူဆောတိုခေါ့ စောဆွောဂ်ပွီးနေယန်လယ်း နန်တွို့ခေါ့ ‘ယေရှုဟော် အစောအဆွောဂ်ကျွီးဆူဖှဂ်ပွီး အခွမ်ကွောဂ်ဆူရယ်၊ အပှဂ်ဒုစရောက်ဆမောရယ်နောင့်ပွေါင်းဆန်းပွီး စောဆွောဂ်နေရယ်’ လွို့ဟိုးကျော့ပှန်ရယ်။ 35ဟော်ပေမယ့် ဖှရောဆန်ယယ့်အဆိညင်ပညော်ကွို လောဂ်နော်ကှန့်ဆုန်းဆူမျောခေါ့ ဖှရောဆန်ယယ့်အဆိညင်ပညော်ဟော် ဖွှောင့်မတ်မင်ကန်ကျွောင်းကွို ဆဂ်ဆေပျော့နေရယ်” လွို့ မိင့်တိုမူရယ်။ 36တနေ့မောင် ရှိမုန်လွို့ခိုရယ့် ဖာရိရှဲတဦးဟော် ကွိုယ်တော်ယေရှုကွို ဆူ့ယယ့်အိင်မောင် အစောစောဖွို့ ပန့်ဖိင့်လေရယ်။ အယ်းယော်ကျွောင့် ကွိုယ်တော်ဟော် အယ်းလူယယ့်အိင်ကွိုကျို့တိုမူပွီး စောဆွောဂ်ဖွို့ စောပွားမောင်ထောင်တိုမူရယ်။ 37အယ်းမွှို့မောင် အပှဂ်ဒုစရောက်မျောရယ့် အမျွိုးဆမီးတဦး ဆိလေရယ်။ ဆူဟော် ဖာရိရှဲယယ့်အိင်မောင် ကွိုယ်တော်ထောင်ပွီး စောဆွောဂ်နေကျွောင်းကွို ကျောဆိဆယော့လွို့ ကော်တရော်တန်ဖွိုးကျွီးရယ့် ယေမွီးတပလန်းကွို ယူဆွောင်ပွီး အယ်းနေယော်ကွို လော်လေရယ်။ 38အယ်းနွောဂ်မောင် ဆူဟော် ကွိုယ်တော်ယယ့်နွောဂ်မောင် လော်ပွီး ဆူ့ယယ့်ခှေရန်းမောင် ငွိုကျွယ်းနေပွီး ဆူ့ယယ့်မျဂ်ယေတွို့နောင့် ကွိုယ်တော်ယယ့်ချေထွောဂ်ကွို စွဂ်စေပွီး ဦးခွေါင်းခေါ့ဆပန်ရယ်နောင့်ဆွိပွီး ချွောဂ်စေရယ်။ အယ်းနန်လွို့ ကွိုယ်တော်ယယ့်ချေတော်အစုန်ကွို နောင်းလောဂ်ပွီး ယေမွီးနောင့်လိင်းလေရယ်။ 39အယ်းအခေါ် ကွိုယ်တော်ကွို ပန့်ဖိင့်ရယ့်ဖာရိရှဲဟော် မျိုလွို့ “ဟော်လူဟော် ပရောဖက်မင်ပေါ်ကော့ ဆူ့ကွို တွို့ထိနေဆူ အမျွိုးဆမီးဟော် စလွိုမျွိုး မိင်းမော့ဖှဂ်ရယ့်အကျွောင်းကွို ဆိဆဖွို့ဆန့်ရယ်။ အပှဂ်ဒုစရောဂ်မျောရယ့်မိင်းမော့ဖှဂ်ကျွောင်းကွိုလယ်း ဆိဆဆန့်ရယ်” လွို့ စိထားမောင်တွယ်းနေလေရယ်။ 40အယ်းနွောဂ်မောင် ကွိုယ်တော်ယေရှုခေါ့ ဆူ့ကွို “ရှိမုန်၊ နန့်ကွို ငေါ်တခုဟိုးမယ်” လွို့ မိင့်တိုမူရယ့်အခေါ် ရှိမုန်ခေါ့လယ်း “ဟိုးပေါ်၊ ကွိုယ်တော်” လွို့ရွှောဂ်လေရယ်။ 41အယ်ယော်ကျွောင့် ကွိုယ်တော်ခေါ့ “ပိဆင်ခှေးရယ့်ဆူ တယွောဂ်နောင်းမောင် လူနေယွောဂ်ခေါ့ ပိဆင်ခှေးငေါကျော့ရယ်။ တယွောဂ်ခေါ့ ဒေနော်ရီဒန်းကောbငေါရော်၊ အချောတယွောဂ်ခေါ့ ဒေနာရီဒန်းကော ငေါဆာအကျွေးတန်ကျော့ရယ်။ 42ဆူတွို့ဟော် အကျွေးသခန်ကွို ပှန်မဆောဂ်နောင်တို့ရယ့်အခေါ် အကျွေးသခန်ခေါ့ ဆူတွို့နေယွောဂ်ကွို အကျွေးပှန်ဆောဂ်စရော်မလွိုတို့ဘူးလွို့ဟိုးရယ့်အခေါ် စူခေါ့ အကျွေးသခန်ကွို ပွိုပွီးကျယ်းဇူးတန်မလော” လွို့မေးတိုမူရယ်။ 43အယ်းအခေါ် ရှိမုန်ခေါ့ “ပွိုခှေးထောရယ့်ဆူခေါ့ ပွိုပွီးကျယ်းဇူးတန်မောင်ပေါ်” လွို့ရွှောဂ်တန်လောဂ်ရယ်။ ကွိုယ်တော်ယေရှုခေါ့လယ်း “မင်ပေါ်ရယ်” လွို့မိင့်တိုမူလေရယ်။ 44အယ်းနွောဂ်မောင်အယ်းအမျွိုးဆမီးဖဂ်ကွို ခှယ့်ပွီး ရှိမုန်ကွို “အယ်းအမျွိုးဆမီးကွိုမျိုလော။ နန့်အိင်ကွို ငေါ်ကျို့လော်ရယ့်အခေါ်မောင် နန်ဟော် ငေါ့ခှေဆေးဖွို့ ယေမပေးခယ့်ပေမယ့် ဆူခေါ့ ငေါ့ခှေရယ်ကွို မျဂ်ယေရယ်နောင့် ဆေးပေးပွီး ဆူ့ယယ့်ဆပန်နောင့် ချွောဂ်အွောင်ဆွိပေးရယ်။ 45အယ်းအပှန် ငေါ်လော်ရယ့်အ ခေါ်မောင်လယ်း နန်ဟော်ငေါ့ကွို နောင်းပွီး မကျွိုဆွိုခယ့်ပေမယ့်လယ်း ဆူဟော် ငေါ့ယယ့်ခှေထွောဂ်ကွို အဆဂ်မပျဂ်နောင်းနေလေရယ်။ 46နန်ဟော် ငေါ့ခွေါင်းကွို သံလွင်ဆီလိင်းပေးခှန်းနောင့် မကျွိုဆွိုပေမယ့်လယ်း ဆူဟော် ငေါ့ချေကွို တင်ဖွိုးကျွီးယေမွီးလိင်းပေးခှန်းနောင့် ငေါ့ကွိုကျွိုဆွိုရယ်။ 47အယ်းယော်ကျွောင့် နန့်ကွိုငေါ်ဟိုးခှန်တော်ခေါ့ ဖရောဆန်ဟော် ဆူ့ယယ့် မျောပနန်းရယ့်အပှဂ်မျောကွို ခွမ့်ခွှဂ်ပေးတိုမူခယ့်ပီဖှဂ်ရယ့် အတွကျွောင့် ဆူဟော် မျောပနန်းရယ့် ခှဂ်ခှန်းမေတ္တော်တရောကွို ပျော့လေရယ်။ အယ်းလွိုပယ်း နည်းနည်းပယ့် ခွမ့်ခွှဂ်ခှန်းခေါင်ယော့ဆူဟော် နည်းနည်းပယ့် ခှဂ်ခှန်းမေတ္တော်ကွိုပယ်းပျော့ရယ်” လွို့ မိင့်တိုမူရယ်။ 48အယ်းနွောဂ်မောင် ကွိုယ်တော်ခေါ့ အယ်းအမျွိုးဆမီးကွို “နန့်ယယ့်အပှဂ်ဒုစရောက်ရယ် အောလုန်းကွို ခွမ့်ခွှဂ်လောဂ်ပီ” လွို့ မိင့်တိုမူရယ်။ 49အယ်းအခေါ် ကွိုယ်တော်နောင့်အတူ စောဆွောဂ်နေထောင်နေရယ့် အချောဆူမျောခေါ့ “အပှဂ်ဒုစရောက်ကွိုတအွောင်မောင့် ခွမ့်ခွှဂ်နောင်ရယ်လွို့ ဟိုးနေရယ့် ဟော်လူဟော် စနန်လူဖှဂ်မလော” လွို့ တိတိပယ်းဟိုးနေကျော့လေရယ်။ 50ဟော်ပေမယ့်လယ်း ကွိုယ်တော်ယေရှုခေါ့ အယ်းအမျွိုးဆမီးကွို “နန့်ယယ့်ယုန်ကျည်ခှန်းဟော် နန့်ကွိုကာတန်ပီ။ စိခှော့လဂ်ခှော့ဆိုးပေါ်” လွို့မိင့်တိုမူလေရယ်။
Currently Selected:
Luke 7: ttpv-rv
Highlight
Share
Copy
Want to have your highlights saved across all your devices? Sign up or sign in
This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
