Luke 5
5
1ဝမ်းနိမ်လော့် မွန်းစောင့်ကော့် ရာခန့်ဟဉ်း(မ်)နောင်ဂင်္နေသရက်စိန်ဆီအူလော့် ကွန်းလေန နှုတ်ကပတ်တော်စောင့်ဖလား အောင်းမွန်းစောင့်ဟောလေ ဟပေါနယ့်ဟဉ်း ရာဟဉ်း(မ်)မွန်းစောင့် မားစူးစပ်ဟင်းကော်ဝိုက်။ 2နောက်လောင်နော့် မွန်းစောင့်လ အောင်းကပ်မားပါ့ဟဉ်းနမ့် အောင်းဟေးဝမ့်ပါးဆောင်(န်)စင်း ဟောန်ကော်ဝိုက်။ ကွန်းဝမ့်ပါးလေန အောင်းဟေးမနော် ဝိုင့်ဝိုက်ဆီ ကွာဆွတ်ပိုက်ဝမ့်ပါးမနော်ဟင်းကော်ဝိုက်။ 3မေနယ့်လော့် စောင့်ယေရှုန ခနောဝ်ဟေးဆောင်(န်)စင်းန ခနေဟေးရှိမုန်နဲဟော် ခွန့်ဆီ အောင်းစဟေး တောင်းဖန်လာတောင်း မကောင့်(ဝ်)မကိုင်း ဟကွဲအောက်ကော်ဝိုက်။ နောက်လောင်နော့် မွန်းစောင့်ကော့် ခနေဟေး နှောင်စောင်း(မ်)ကော်ဆီ အောင်းစကွန်းလေ ဆောန်ဟောင့်(ဝ်)ကော်ဝိုက်။ 4ဆောန်ဆီရောင့်(ဝ်)ကော်လော့် အောင်းရှိမုန် "ဟေးမောကွဲကော်ပါ့နမ့်လိပွန့် ဟပေါနယ့်ဝမ့်ပါး အောင်းပိုက်ဝမ့်ပါးမော ချားတိုကော်"ဆီ ဝါကော်ဝိုက်။ 5ရှိမုန်ကော့် "ဆရာ၊ ဟောတောင်းခမ်ခမ်ဝမ့်မေကော့် ပါးတူးနိမ်ကော့်မနွိုက်မား။ တော်နယ်ကော့် နောင်မောစောင့်ဝါဆီ ပိုက်ဝမ့်ပါးဟော ဟောတချားကော်"ဆီ ဖြေပေါက်ကော်။ 6ရှိမုန်တောင်းကွန်းမွန်းလေန အောင်းပိုက်ဝမ့်ပါး ချားတိုကော်လော့်၊ မနော်လေန ပိုက်လေနောင်တစိုက်ကော်ဝိုက် ပါးလေနွိုက်ဟင်း။ 7ကောပ့်နယ့်ညော့ မနော်ကော့် ဟောင့်အောင်းမွတ်ကွန်းမနော်တန်းတီကော်ဝိုက်။ ကွန်းဝမ့်ပါးဟောန့်လေ ထီန်မားဆီ အောင်းပါးလေ ဆောင်(ဝ်)ဟင်းကော်လော့် ဟေးတောင်းဆောင်(န်)စင်း နောင်တနေ့နမ့်ဟောကော့်ဝိုက်။ 8ပေတရုကော့် အဖြစ်အပျက်ဟိုက် ဟောန်ကော်လော့် ရှိမုန်ပေတရုန ခနာ့စောင့်ယေရှု တောင့်(ဝ်)ခေါင်(ဝ်)ဆီ "ဆရာ၊ ကောလ ပေးကွန်းအပြစ်နမ်ညော့ ဆီမေကော အောက်ကွာကော်"ဆီ ဝါကော်ဝိုက်။ 9ပေတရုတောင်းကွန်းမွန်းလေကော့် အောင်းပါးမနော်နွိုက်လေတွဲဆီ အမ်းမဆိဉ့်ဟင်းကော့်ဝိုက်။ 10ခနောဝ်မွတ်မနော် အောင်းပေးလုစိုင်းဇေဗေဒဲဆောင်(န်)ကော့် ယာကုပ်တောင်းယောဟန်ကော့်ပါဝိုက်။ နောက်လောင်နော့် မွန်းစောင့်ယေရှုန အောင်းရှိမုန် "ပီကိုး ဆီမေအစောင်စဆီ မဆူန အစားပါး အောင်းကွန်းလေဟောင့်ဆီ ဟပေါပေးတပဲ့ကော တနယ့်ဟေဟင်း"ဆီ ဝါကော်ဝိုက်။ 11နောက်လောင်နော့် ကွန်းဟိုက်လေန အောင်းဟေးမနော်လေ ဝိုင့်ရာဟဉ်း(မ်)နမ့်ရောင့်(ဝ်) ကာအောင်းရောင်းရာမနော်လေတောင်းလုန် ဝေဆီ တောင်းမွန်းစောင့်တောင်း စောင်း(မ်)ကွာဟင်းကော်ဝိုက်။ 12မွန်းစောင့်ယေရှုကော့် မှိန်းနိမ်ရောင့်(ဝ်)မှိန်းနိမ် ထီန်ကော်ဆီ အောင်းရောင်းရာမှိန်းဟောန့် ကွန်းပေးရောဂါ ကော့်စိုင်းကော်နိမ်ရောင်းဝိုက်။ မွန်းန ဟောန်အောင်းမွန်းစောင့်ကော်လော့် ရာခနာ့မွန်းစောင့် ခနေနောင်နဉ်း တောင့်(ဝ်)ခေါင်(ဝ်)ဆီ "ဆရာ၊ အလိုမောပေါရောင်း အောင်းရောဂါကော ဟဟိုင်ပဲ့ညော့ အောင်းကော ရားဟောင့်(ဝ်)အီ့"ဆီ ဝါကော်ဝိုက်။ 13နောက်လောင်နော့် မွန်းစောင့်န တောင်းမေးမွန်းစောင့်တောင်း ခနေကွန်းဟောန့် တန်ဆီ "ကောအလိုရောင်းညော့ အစောင် အောင်းရောဂါမော ဟဟိုင်ကော်"ဆီ ဝါရောင့်(ဝ်)ကော်လော့် အနာရောဂါကွန်းဟောန့် ချရှ်ချန်း ဟိုင်ကော်ဝိုက်။ 14မွန်းစောင့်န အောင်းကွန်းဟောန့် "အောင်းအကြောင်းရောဂါဟိုင်ကော်လ အောင်းဖောကော့် ပီကွာလောင်(ဝ်)ဆီ ဆောင်ရောင့်(ဝ်) ကွာရာပုရောဟိတ်ဆီ အောင်းမောတောင်းမောပြားဆီ နောင်မောရှေဥပဒေအတိုင်း ကောပ့်ဟဟိုင်အောင်းရောဂါမောညော့ ကပ်ကော်"ဆီ ဝါကော်ဝိုက်။ 15သတင်းစောင့်ယေရှုန ရာနေရာဟောန့်ပျံ့ကော်ညော့ ကွန်းတောင်းလုန်န ဟပေါနယ့်ထောင်(မ်) အောင်းတလားမွန်းစောင့်လေတောင်း ဟပေါနယ့်ရားအောင်းရောဂါမနော်လေညော့ စူးဆီ မားဟင်းဝိုက်။ 16တော်နယ်ကော့် မွန်းစောင့်လ စရောန်းဆု ရာနေရာရိန်းစမ့်စမ့်ဆီ ရာကွန်းလေမထီန်န ကွာဆီ မွန်းစောင့်ကော်နိမ်အင် စမ်အောက်ကွာကျဉ်းဝိုက်။ 17ဝမ်းနိမ်လော့် တကြားစောင့်ယေရှုဟောန ကွန်းမှိန်းမန့်ဂါလိလဲလေပါ၊ ကွန်းရောင်းရာမှိန်းယုဒလေတောင်း ကွန်းရောင်းရာမှိန်းဂျေရုဆလင်ပါ ထီန်ဟင်းမားဝိုက်။ ဖာရိရှဲမောင်းဖောင်တောင်း ဆရာကျမ်းစမ်လေကော့် ရာနေရောဟောန့် နှောင်ဆီအူဝိုက်။ ရာစောင့်ယေရှု အစွမ်းစောင့်ဖလား အောင်းအနာရောဂါကွန်းလေဟပေါဟိုင်န ရောင်းဝိုက်။ 18တကြားစောင့်ယေရှု အူရာဟောန့်န ကွန်းမောင်းဖောင်လေန အောင်းကွန်းဆိုင်လုမ်းခတ်ကော်နိမ် တောင်းထန်းစန်တောင်း ဟမ်ဟင်းမားဝိုက်။ မနော်လေန အောင်းကွန်းဟောန့် အောဝ်းခေါင့်(ဝ်)ဟုန်းဆီ ခနာ့စောင့်ယေရှု ဟပေါနယ့်ဝိုင့် ဟေဟင်းဝိုက်။ 19တော်နယ်ကော့် ကွန်းလေနမ်အားကြီးကော်ညော့ ဟပေါနယ့်ခေါင့်(ဝ်)ခနောဝ်ဟုန်း ခွန်တန်းခါမဟောန်ကော့်ညော့ ခွန့်ခနေခေါင်ဆီ အောင်းမွန်း(မ်)ဝိုက်လေ ခွာဝေကော်ဝိုက်။ ဆီမေခနောဝ်ဟူးဟောင့်ညော့ အောင်းကွန်းဟောန့် တောင်းဖု တောင်းလှမ်းရောင့်(ဝ်) ဆိုင်တောင်းမှောက်ဆီ ဟပေါထီန်ခနာ့စောင့်ယေရှုပွန့် ရာတိုင်းကန်းကွန်းလေ ချားတိုဟင်းကော်ဝိုက်။ 20အောင်းမနော်ယွန်(မ်)လေ မွန်းစောင့်ဟောန်ကော်လော့် အောင်းကွန်းဟောန့် "အိုက်ကော့် အောင်းအပြစ်မော ကောခွင့်လွတ်ကော်"ဆီ ဝါကော်ဝိုက်။ 21မေနယ့်လော့် ဖာရိရှဲလေတောင်း ဆရာကျမ်းစမ်လေန "အောင်းကျန်ကွန်းလေ ဖောကော့် အောင်းအပြစ် မခွင့်လွတ်ပဲ့ စောင့်ဖလားနဲဟော် အောင်းအပြစ်လေ ခွင့်လွတ်ပဲ့ဟော။ ကွန်းဟိုင့်န ဂုဏ်မှောက်ဆီ မွန်းတန့်ခွမ်းစော်ကားအောင်းစောင့်ဖလား"ဆီ ခနောဝ်စောင်း(ဝ်)မနော် ထန်ဟင်းကော်ဝိုက်။ 22တော်နယ်ကော့် မွန်းစောင့်န ခနောဝ်စောဝ်မနော် ထန်နောင်နယ့်ဝါလ ဟုညော့ အောင်းမနော်လေ "ခနောဝ်စောဝ်မဆူ ဟေဟောင်းဆီ ထန်နောင့်နယ့်လ။ 23အောင်းအပြစ်မော ခွင့်လွှတ်ကော်ဆီ အောင်းဝါတောင်း၊ မောလုဆီပိုင်းကော်ဆီ အောင်းဝါတောင်းလ အောင်းထောချဉ်းတလွယ်။ 24တော်နယ်ကော့် လူ့သားတော်လ အောင်းရောင်းခနေကမ္ဘာဟိုက် အပြစ်တောင်းလုန် အောင်းခွင့်လွတ်ပဲ့ အာဏာရောင်းဝါလ မဆူအစောင်တနယ့်ဟောန်ကော့်" ဆီ ဝါကော်ဝိုက်။ နောက်လောင်နော့် မွန်းစောင့်ကော့် အောင်းကွန်းဟောန့် "အောင်းမော ကောတဝါ၊ လု၊ အောင်းဖုမော ကမ်းဆီ ပေါက်ဟုန်းကော်"ဆီ ဝါကော်ဝိုက်။ 25နောင့်နဲ့ဆီဝါကော်လော့် ချရှ်ချန်း ကွန်းဟောန့်န ခနာ့ကွန်းလေ စိန်ကော်ဝိုက်။ မွန်းလ အောင်းဖုမွန်း ကျေ(ပ်)ရောင့်(ဝ်) အောင်းဂုဏ်တော်စောင့်ဖလား ချီးမွမ်းဆီ ပေါက်ဟုန်းကော်ဝိုက်။ 26ကွန်းတောင်းလုန် အမ်းဟင်းဆီ အောင်းဂုဏ်တော်စောင့်ဖလား ချီးမွမ်းဟင်းကော်ဝိုက်။ မနော်လေန ကိုးဟင်းဆီ "ဝမ်းနယ့် ဟောလေန အောင်းခနီးအမ်းလေ နယ့်ဟောန်ကော်(ဝ်)မားကော်"ဆီ ဝါဟင်းကော်ဝိုက်။ 27အောင်းထိုင့်လေပေးရောင့်(ဝ်)၊ မွန်းစောင့်ယေရှုလ ဆီမေနေရာဟောန့် အောက်မားဆီ ကွန်းကျေ(ပ်)ကာ လေဝိကော်နိမ် နှောင်ဝိုက်ရာခနောဝ်ထိန်လ ဟောန်ကော်ဝိုက်။ မွန်းစောင့်ကော့် အောင်းစလေဝိ စောင်း(မ်)မား ခလောင်ကော"ဆီ ဝါကော်ဝိုက်။ 28ကောပ့်နယ့်ညော့ လေဝိန အောင်းလောင်မွန်းလေဝေဆီ စောင်း(မ်)ကော်ခလောင်စောင့်ယေရှုကော်ဝိုက်။ 29နောက်လောင်နော့် ဟောင့်ကော်ရာဟုန်းလေဝိဆီ အောင်းစစောင့်ယေရှုတောင်းတပဲ့မွန်းလေ ခေါင့်(ဝ်)မားခမ် နီးနီးငမ်းငမ်း မဲဟောင့်(ဝ်)ကော်ဝိုက်။ အောင်းကျန်ကွန်းကျေ(ပ်)ကာလေတောင်း စောင့်ချိုက်လေကော့် ထီန်ဟင်းမားဝိုက်။ 30ဖာရိရှဲလေတောင်း ဆရာကျမ်းစန်လေန "မဆူလ တောင်းကွန်းစောင့်ကျေ(ပ်)ကာလေတောင်း၊ အောင်းကျန်ကွန်းအပြစ်ရောင်းလေတောင်း ဟေဟောင်းဆီ နယ့်ကျဉ်းနွေ့ဟင်းန"ဆီ အောင်းစောင့်ယေရှုတောင်း အောင်းတပဲ့မွန်းစောင့်လေ ထန်(မ်)ဟင်းကော်ဝိုက်။ 31မွန်းစောင့်ဖြေပေါက်ကော်လ "ကွန်းအူနီးလ အောင်းစောင့်ထိုးရ သလိုမစော်၊ ကွန်းမအူနီးနဲဟော် သလိုဟော။ 32ကောလ စကယ်အောင်းကွန်းနီးလေဆီ လုန်းမားမစော်။ ကောလ လာမားကယ် အောင်းကွန်းအပြစ်ရောင်းလေဆီ ကြွမား"ဆီ ဝါကော်ဝိုက်။ 33ဖာရိရှဲလေန အောင်းမွန်းစောင့် "ယောဟန်တောင်းတပဲ့မွန်းလေန အဟောင်းကော့်မကျဉ်းဆီ အကျင်(မ်)ကျင်(မ်)ကော့် ရောန်းဆုဟင်း။ တပဲ့ဖာရိရှဲလေကော့် နောင်နယ့်ကျဉ်းနော့်။ တော်နယ်ကော့် တပဲ့မောလ မေနော်ကော့် နောင်နောင့်ဆီ အောင်းကျဉ်းအောင်းရှောင်လေ မဟေဟင်းန"ဆီ ထန်(မ်)ဟင်းကော်ဝိုက်။ 34မွန်းစောင့်ကော့် အောင်းမနော် ဖြေပေါက်ကော်လ "ကွန်းမားရာမင်္ဂလာပွဲပွဲနိမ့်န မေတောင်းမောဝ်ထောင့်(ဝ်)မောဝ်တောင်း အူနွေ့ဟင်းန အောင်းစမနော် အောင်းကျဉ်းတဟရှောင်လေး။ နောင်နယ့်ကျဉ်းနော့် ဖောကော့် အောင်းတဟရှောင်ဟင်းမစော်။ 35တော်နယ့် အောင်းမောဝ်ထောင့်(ဝ်)မောဝ်ဟောန့် ဆီမေမနော် ဟောင်ပေါဟောင့်ကော်ပေါဝါလော့် မနော်လေန အောင်းကျဉ်းတရှောင်ဟင်း"ဆီ ဝါကော်ဝိုက်။ 36နောက်လောင်နော့် မွန်းစောင့်လ အောင်းမနော် ဥပမာပုဒ်နိမ် လောင်(ဝ်)ပြားကော်ဝိုက်။ "ဖောကော့် ပဉ်ဖဟိုင့်အောင်းမောဝ်စိုက်ဆီ ရာဖာ့ဟိုင့်အောင်းကော်(ဝ်) ရာအောင်းစိုက် အောင်းစပ်ထွုံးစံမရောင်း။ နောင်နယ့်ဆီပေါစပ်ကော်ကော့် ပဉ်ဖာ့ဟိုင့်လ ဆာဆီ တစိုက်ထိုင့်ဟွန်းနော့်။ 37ဖောကော့် စပျစ်ဝိုင်အောင်းမောဝ်လ ခနောဝ်အိ စပျစ်ဝိုင်အောင်းကောင်(ဝ်) တဆောင်(ဝ်)မစော်၊ ဟောင်ပေါဆောင်(ဝ်)နောင်နယ့်လော့် စပျစ်ဝိုင်အောင်းမောဝ်လ အောင်းအိဟိုက် ဟပေါင်ဆီ စပျစ်ဝိုင်ကော့် မာဆီ အိကော့်တပျတ်စီးကော်ဝိုက်။ 38စပျစ်ဝိုင် အောင်းမောဝ်လ ခနောဝ်အိအောင်းမောဝ်နဲဟော် ဆောင်(ဝ်)ဟော။ 39ကွန်းဆို့ကော်(ဝ်) အောင်းဝိုင်ကော်(ဝ်)လ ဝိုင်အောင်းကော်(ဝ်)နဲဟော် ဆာဆီနီးဆီ ဝါဆီ အောင်းစပျစ်ဝိုင်အောင်းမောဝ် တခဆို့ကော့်မစော်"ဆီ ဝါကော်ဝိုက်။
Currently Selected:
Luke 5: ttpv-rv
Highlight
Share
Copy
Want to have your highlights saved across all your devices? Sign up or sign in
This translation of the TaiLaing Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
