Luke 4
4
1ယပြီးကေ ကိုယ်တော်ယေရှုဟာ ဉာဏ်အလင်းတော်နဲ့ အတူဟိတော်မူပြီးကေ ဂျော်ဒန်မြစ်ကပြန်လာပနာ ဉာဏ်အလင်းတော်ရဲ့ ဦးဆောင်မှုနဲ့ တောကန္တာရထဲကို လားခရေ။ 2ယင်းနီရာမာ မာရ်နတ်ရဲ့သွီးဆောင်ဖြားယောင်းဟာကို ရက်ပေါင်းလေးဆယ်ကြာအောင် ခံခရေ။ ယင်းနိန့်တိမာ ကိုယ်တော်ဟာ တစ်ခုချေလေ့မစားဘဲနီခဟာကြောင့် ယင်းနိန့်တိပြီးလားရေအခါ ကိုယ်တော်ဟာ ဝမ်းဆာလာရေ။ 3မာရ်နတ်က ကိုယ်တော်ကို “အသင်ဟာ ဘုရားရှင်ရဲ့သားတော်အမှန်ဆိုကေ ဒေကျောက်တုံးကို ပေါင်မုန့်ဖြိုက်စီလို့ အမိန့်ပီးလိုက်” လို့ပြောခရေ။ 4ယေတာလဲ ကိုယ်တော်က “‘ကျမ်းစာထဲမာ လူဟာ အစားအသောက်တစ်ခုတည်းအတွက်နဲ့ အသက်ရှင်ရဟာမဟုတ်’ လို့ရေးထားရေ” ဆိုပနာ မိန့်တော်မူလိုက်တေ။ 5ယပြီးဟာနဲ့ မာရ်နတ်ဟာ ကိုယ်တော်ကို အကြီးကျယ်မြင့်ရေ တောင်ထိပ်တစ်ခုကို ခေါ်လားခပနာ ကမ္ဘာမာဟိရေ တိုင်းပြည်နိုင်ငံတိ အားလုံးကို အချိန်တအောင့်ချေအတွင်းမာ ပြခရေ။ 6ယပြီးကေ မာရ်နတ်က ကိုယ်တော်ကို “ငါဟာ တိုင်းပြည်နိုင်ငံအားလုံးကို အုပ်ချုပ်နိုင်တဲ့အခွင့်အာဏာနဲ့ လူတိရဲ့စည်းစိမ်ချမ်းသာအားလုံးကိုလည်း ပီးနိုင်ရေ။ အဇာဖြိုက်လို့ဆိုကေ ယင်းအရာတိကို ငါ့ကိုပီးထားပြီးရာဖြိုက်လို့ အသင် မဟုတ်ကေတောင် ငါပီးချင်တဲ့လူကို ပီးနိုင်ရေ။ 7ယင်းကြောင့် ငါ့ကို ရှိခိုးကိုးကွယ်ကေ ဒေအရာတိအားလုံးကို အသင့်ကို ငါပီးနိုင်ရေ” လို့ ပြောခရေ။ 8ယေတာလဲ ကိုယ်တော်က မာရ်နတ်ကို “ကျမ်းစာထဲမာ အသင်ရဲ့အရှင်ဖြိုက်တဲ့ ဘုရားရှင်တစ်ပါးတည်းကိုယာ ရှိခိုးကိုးကွယ်ရဖို့ဖြိုက်ပြီးကေ သူ့ရဲ့အမှုတော်ကိုယာ ထမ်းဆောင်ရဖို့လို့ ဖော်ပြထားရေ” လို့ပြန်ပြောခရေ။ 9မာရ်နတ်က ကိုယ်တော်ကို ဂျေရုဆလင်မြို့က ဗိမာန်တော်ရဲ့အမြင့်ဆုံးနီရာခေါ်လားပနာ “အသင်ဟာ ဘုရားရှင်ရဲ့သားတော်အမှန်ဆိုကေ ဒေနီရာကခုန်ချလိုက်” လို့ထပ်ပနာပြောလိုက်တေ။ 10“ဘုရားရှင်က သူ့ရဲ့နတ်ဒေဝါတိကို အသင့်ကို ကာကွယ်စောင့်ရှောက်ဖို့အတွက် ကျမ်းစာမှာ ဖော်ပြထားရေ။ 11အသင်ရဲ့ခြီထောက်တိကို ကျောက်တုံးတိနဲ့ထိပနာ မနာရအောင် သူရို့ရဲ့လက်တိနဲ့ ရွက်ထားကတ်လိမ့်မယ်” လို့ပြောခရေ။ 12ယေခါ ကိုယ်တော်ကလည်း “ကျမ်းစာထဲမာ ‘အသင်ရဲ့ဘုရားရှင်ကို မစမ်းသပ်ရ’ လို့ရေးထားရေ” ဆိုပနာ မိန့်တော်မူလိုက်တေ။ 13မာရ်နတ်ဟာ ကိုယ်တော်ကို အမျိုးမျိုးဖြားယောင်းသွီးဆောင်ပနာ နောက်တစ်ခေါက်နှောက်ယှက်ဖို့ အခွင့်ကောင်းကိုထပ်လို့ စောင့်နီခပြီးကေ ကိုယ်တော်ပါးက ထွက်လားခရေ။ 14ယပြီးကေ ကိုယ်တော်ယေရှုဟာ ဉာဏ်အလင်းတော်ရဲ့တန်ခိုးနဲ့အတူ ဂါလိလဲပြည်ကို ပြန်ကြွလာခရေ။ ကိုယ်တော်ရဲ့ဂုဏ်သတင်းတိဟာ အရပ်ဒေသတိုင်းကို ပျံ့နှံ့နီခရေ။ 15ကိုယ်တော်ဟာ ဓမ္မာရုံa တိမာ ဟောပြောသွန်သင်တော်မူရေအခါ လူတိအားလုံးက သူ့ကို ချီးမွမ်းခကတ်တေ။ 16ယပြီးကေ ကိုယ်တော်ယေရှုဟာ သူကြီးပြင်းလာရေအရပ်ဖြိုက်တေ နာဇရက်မြို့ကို ပြန်လာခရေ။ ဥပုသ်နိန့်မာ ကိုယ်တော်ဟာ ဓမ္မာရုံကို လားနီကျအတိုင်း လားပနာ ယင်းနီရာမာ ကျမ်းစာကိုဖတ်ဖို့ မတ်တပ်ရပ်လိုက်တေ။ 17ယေပနာ ကိုယ်တော်ကို ပရောဖက်ဟေရှာယရဲ့ကျမ်းစာလိပ်ကို ပီးလိုက်ရေ။ ကိုယ်တော်က ယင်းကျမ်းစာလိပ်ကို ဖွင့်လိုက်တဲ့အခါ ဒေကျမ်းစာပိုဒ်ကို တွိ့ရရေ။ 18“အရှင့်ရဲ့ ဉာဏ်အလင်းတော်ဟာ ငါနဲ့အတူတူ ဟိနီတော်မူယေ။ အဇာဖြိုက်လို့ဆိုကေ ဆင်းရဲသားတိအတွက် မင်္ဂလာသတင်းကောင်းကို ဟောကြားစီဖို့အတွက် ငါ့ကို ဘုရားရှင်က ရွီးကောက်ထားတော်မူဟာကြောင့် ဖြိုက်တေ။ ဘုရားရှင်ဟာ ထောင်ကျနီရေလူတိကို သူရို့ လွတ်ရာဖြိုက်ကြောင်း ပြောကြားစီဖို့၊ မျက်စိမမြင်ရေလူတိကို မျက်စိပြန်မြင်ရာဖြိုက်ကြောင်း ပြောကြားစီဖို့၊ ဖိနှိပ်ခံနီရတဲ့လူတိ လွတ်မြောက်စီဖို့နဲ့ 19ဒေကာလဟာ ဘုရားရှင်က သူ့ရဲ့လူမျိုးတိကို သူ့ရဲ့မဟာကရုဏာတော်ကို ပြသရေအချိန်ကာလဖြိုက်ဟာကို ကြေညာဖို့အတွက် ငါ့ကိုစီလွှတ်တော်မူဟာကြောင့် ဖြိုက်တေ” ဆိုပနာဖြိုက်ပါရေ။ 20ယင်းပိုင်ဖတ်ပြီးခါ ကိုယ်တော်ဟာ ကျမ်းစာကို လိပ်ပနာ ဓမ္မာရုံတာဝန်ခံကို လှမ်းလို့ပီးလိုက်ပြီးကေ ထိုင်လိုက်တေ။ ဓမ္မာရုံမာဟိရေလူတိဟာ ကိုယ်တော်ကို စိုက်ပနာကေ့နီကတ်တေ။ 21ယပြီးကေ ကိုယ်တော်က သူရို့ကို “ဒေကျမ်းစာပိုဒ်တိဟာ အသင်ရို့ကြားနာလိုက်ရရေအတိုင်း ဒေနိန့်ခါ အမှန်ဖြိုက်လာခယာ” လို့ မိန့်တော်မူလိုက်တေ။ 22လူတိဟာ ကိုယ်တော်ကို ချီးကျူးကတ်ပြီးကေ ကိုယ်တော်ယေရှုရဲ့နှုတ်ကထွက်လာတဲ့ အံ့ဩစရာစကားတိကြောင့် လူတိဟာ အံ့ဩမှင်သက်နီကတ်တေ။ သူရို့က “ဒေသူဟာ ယောသပ်ရဲ့သားမဟုတ်လား” လို့အချင်းချင်းပြောနီကတ်တေ။ 23ယင်းကြောင့် ကိုယ်တော်က “အသင်ရို့က ငါ့ကို ‘ဆီးဆရာ၊ ကိုယ့်ဟာကို အယင်ဆီးကုပါ’ ဆိုတဲ့ဆိုရိုးစကားအတိုင်း ‘ကပေရနောင်မြို့မာ အသင်လုပ်ခတဲ့အရာတိကို ငါရို့ကြားခရတဲ့အတိုင်း အသင့်ရဲ့မြို့ဖြိုက်တဲ့ ဒေနီရာမှာလည်းလုပ်ပါ’ လို့အသေအချာ ပြောကတ်လိမ့်မယ်” လို့မိန့်တော်မူရေ။ 24ကိုယ်တော်က ဆက်ပြီးကေ “အသင်ရို့ကို ငါအမှန်ပြောရကေ အဇာပရောဖက်ကိုမဆို သူကြီးပျင်းလာတဲ့မြို့က လက်မခံကတ်။ 25ငါ အရာထပ်ပနာ အမှန်တိုင်းပြောရကေ ပရောဖက်ဧလိယလက်ထက်မှာ သုံးနှစ်ခွဲလောက် မိုးခေါင်ဟာကြောင့် အငတ်ဘေးကျတုန်းက အစ္စရေးပြည်မှာ မုဆိုးမတိအများကြီးဟိခရေ။ 26ယေတာလဲ ဘုရားရှင်က ဧလိယကို အစ္စရေးပြည်မာဟိရေ မုဆိုးမတိကို ကူညီဖို့မစီလွှတ်ခ။ ယေတာလဲ ဇိဒုန်မြို့နားမာဟိတဲ့ ဇရတ္တမြို့က ဂျူးလူမျိုးမဟုတ်တဲ့မုဆိုးမတစ်ယောက်တည်းပါးကိုယာ ကူညီဖို့အတွက် စီလွှတ်ခရေ။ 27ပရောဖက်ဧလိရှဲခေတ်မာလည်း အစ္စရေးပြည်မာ အနာကြီးရောဂါသည်တိ မကန်ဟိခရေ။ ယေတာလဲသို့ ဘုရားရှင်ဟာ ဆီးရီးယားပြည်မာဟိရေ ဂျူးလူမျိုးမဟုတ်တဲ့ နေမန်ဆိုတဲ့လူတစ်ယောက်ကိုရာ ကုပီးခရေ” လို့ မိန့်တော်မူလိုက်တေ။ 28ဓမ္မာရုံထဲမာဟိယေလူတိဟာ ယင်းအကြောင်းအရာကို ကြားရခါ အကြီးကျယ်မာန်ပါလားပြီးကေ ထွက်လားခကတ်တေ။ 29သူရို့ဟာ ထပနာ ကိုယ်တော်ကို မြို့ပြင်သို့ နှင်ထုတ်ကတ်ပြီးကေ ချောက်ကမ်းပါးထက်က တိုးချဖို့ မြို့တည်ထားရေ တောင်ထိပ်ကို ခေါ်လားခကတ်တေ။ 30ယေတာလဲသို့ ကိုယ်တော်ဟာ လူအုပ်ကြားထဲကနီ ဖြတ်လျှောက်ပနာ ကြွလားခရေ။ 31ယပြီးကေ ကိုယ်တော်ဟာ ဂါလိလဲပြည်က ကပေရနောင်မြို့ကို လားပြီးကေ ဥပုသ်နိန့်ခါ လူတိကို ဓမ္မာရုံထဲမာ ဟောပြောသွန်သင်တော်မူခရေ။ 32ကိုယ်တော်ဟာ လူတိကို အခွင့်အာဏာနဲ့ ဟောပြောသွန်သင်ဟာကြောင့် သူ့ရဲ့သွန်သင်ပြပုံတိကို လူတိက အံ့ဩချီးမွမ်းကတ်တေ။ 33ယင်းဓမ္မာရုံထဲမှာ မကောင်းဆိုးဝါးဝင်ပူးနီရေ လူတစ်ယောက်ဟိရေ။ ယင်းလူက ကိုယ်တော်ကို 34“နာဇရက်မြို့သား ယေရှု၊ အသင် ကျနော်ရို့ကို အဇာလုပ်ဖို့လို့ရောင်။ ကျွန်နော်ရို့ကို ဖျက်ဆီးဖို့လာဟာလား။ အသင် အသူရောင်ဆိုဟာ ကျွန်နော်သိရေ။ အသင်ဟာ ဘုရားရှင်ရဲ့မြင့်မြတ်တဲ့သားတော်ဖြိုက်တေ” လို့ အသံအကျယ်ကီးနဲ့ အော်လို့ပြောခရေ။ 35ယေခါ ကိုယ်တော်က မကောင်းဆိုးဝါးကို “တိန်းလို့နီ၊ သူ့ပါးက ထွက်လား” လို့အမိန့်ပီးလိုက်တေ။ ယပြီးဟာနဲ့ မကောင်းဆိုးဝါးဟာ ယင်းလူကို လူတိအလယ်မာ မြီကြီးထက်ကို လှဲချလိုက်ပနာ သူ့ကို မနာမကြင်စီဘဲနဲ့ ထွက်လားခရေ။ 36လူတိအားလုံးဟာ အံ့ဩလားကတ်ပနာ “ဒေဟာက ပဇောင်စကားမျိုးရောင်။ ဒေလူက တန်ခိုးအာဏာနဲ့ မကောင်းဆိုးဝါးတိကို ထွက်လာဖို့ အမိန့်ပီးလိုက်ဟာနဲ့ သူရို့ဟာ ထွက်လာရရေကား” လို့အချင်းချင်းပြောနီကတ်တေ။ 37ယေပနာ ကိုယ်တော်ရဲ့သတင်းတိဟာ ယင်းဒေသမာဟိတဲ့ နီရာတိုင်းကို ပျံ့နှံ့လားခရေ။ 38ကိုယ်တော်ယေရှုဟာ ဓမ္မာရုံက ထွက်လာပနာ ရှိမုန်ဆိုရေလူရဲ့အိမ်ကို ကြွတော်မူရေ။ ရှိမုန်ရဲ့ ယောက္ခမဟာ အဖျားကြီးဖျားနီဟာကြောင့် လူတိက ကိုယ်တော်ကို ယင်းမမါ့ကို ကုပီးဖို့ တောင်းလျှောက်ခကတ်တေ။ 39ယင်းကြောင့် ကိုယ်တော်ဟာ ယင်းမမါ့နားကိုလားပနာ အဖျားရောဂါကို ပျောက်ကင်းစီဖို့အတွက် အမိန့်ပီးတော်မူရေ။ ယင်းမမါ့ဟာ အဖျားရောဂါပျောက်ကင်းလားပြီးကေ ချက်ချင်းထလို့ သူရို့ကို အစားအသောက်တိ ပြင်ဆင်ပီးခရေ။ 40နီဝင်ချိန်ရောက်တေခါ ရောဂါတိအမျိုးမျိုးခံစားနီရတဲ့ လူမမာတိကို ကိုယ်တော်ပါးကို ခေါ်လာခကတ်ခါ ကိုယ်တော်ဟာ ယင်းလူနာတစ်ယောက်ချင်းစီပါးကို သူ့ရဲ့ လက်ကိုတင်ပနာ ရောဂါဝေဒနာတိ ပျောက်အောင် ကုပီးခရေ။ 41မကောင်းဆိုးဝါးတိဟာလည်း သူရို့ဝင်ပူးနီတဲ့လူတိပါးက “အသင်ဟာ ဘုရားရှင်ရဲ့သားတော်ဖြိုက်ပါရေ” လို့ အော်ပြီးကေ ထွက်လားကတ်တေ။ မကောင်းဆိုးဝါးတိက ကိုယ်တော်ယေရှုဟာ မေရှိယအရှင် ဖြိုက်တေဆိုဟာကိုသိဟာကြောင့် ကိုယ်တော်က သူရို့ကို စကားပြောခွင့် မပီးခ။ 42နောက်တစ်ရက် မိုးလင်းရေအခါ ကိုယ်တော်ယေရှုဟာ လူတိနဲ့ဝီးရေအရပ်ကို ထွက်လားခရေ။ လူတိက ကိုယ်တော်ကို နီရာတိုင်းမှာ လိုက်ရှာကတ်ပြီးကေ ပြန်တွိ့လားရေအခါ သူရို့ဟာ ကိုယ်တော်ကို သူရို့ပါးကထွက်မလားဖို့ တောင်းပန်ကတ်တေ။ 43ယေတာလဲသို့ ကိုယ်တော်က “ငါဟာ အရာမြို့ကလူတိကိုလည်း ဘုရားရှင်ရဲ့သာသနာတော်b အကြောင်း မင်္ဂလာသတင်းကောင်းကို ဟောပြောရဖို့သိမ်း။ အဇာဖြိုက်လို့ဆိုကေ ဒေပိုင် ဟောပြောဖို့အတွက် ဘုရားရှင်က ငါ့ကို စီလွှတ်ခဟာဖြိုက်တေ” လို့ မိန့်တော်မူခရေ။ 44ယေပနာ ကိုယ်တော်ဟာ ယုဒပြည်တစ်ပြည်လုံးက ဓမ္မာရုံတိမာ ဆက်လို့ ဟောပြောသွန်သင်နီခရေ။
Currently Selected:
Luke 4: stpv-rv
Highlight
Share
Copy
Want to have your highlights saved across all your devices? Sign up or sign in
This translation of the Southern Rakhine Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
