یوحنا 1
1
کلمه انسان اولدو
1باشلانماکدا کلمه وار ایدی و کلمه تارئ اینان ایدی و کلمه، تارئ ایدی؛ 2او باشلانماکدا تارئ اینان ایدی. 3واری زاد کلمه طَریقیندن دؤزلدی، و هَر‌نه‌دَن کی دؤزلدی، بدون او هئچ‌نه دؤزَلمه‌دی. 4کلمه، زندلیگ سَرچشمه‌سی ایدی و او زندلیگ، آداملارینگ ایشّیقی ایدی. 5بو ایشّیق قَرَنگی‌لیگده ایشّه‌له‌ییر و قَرَنگی‌لیگ اونا گؤج اولماموش.
6بیر کیشی ایدی کی تارئ طَرفیندَن یوللانمیش ایدی؛ آدی یحیا ایدی. 7او شاهد ایدی و گلدی تا او ایشّیق باره‌سینده شهادت وئره، تا واری‌کَس اؤنونگ طَریقیندن ایمان گتیرَلَّر. 8یحیا او ایشّیق ده‌ییلدی، بلکی گلدی تا او ایشّیق باره‌سینده شهادت وئره. 9او حَقیقی ایشّیق کی واری کَسه ایشّیق وئریر، دنیا ایچینه گلیردی.
10کلمه دنیا ایچینده ایدی، و دنیا اؤنونگ طَریقیندن دؤزلدی؛ آما دنیا اؤنو تانیمادی. 11او اؤرایا کی اؤزوکی‌‌ایدی گلدی و اؤز خَلخی اؤنو قبول ائدمه‌دیلَر. 12آما اؤنو قبول ائدنلَرینگ واریسینا، یعنی هَر کَسه کی اؤنونگ آدینا ایمان گتیردی، بو حَقّی وئردی کی تارئ اولادلاری اولالّار. 13او آداملار کی نه اَت و قاندان، نه بَدن سئدیگیندن و نه ده بیر آدام تلاشیندان دوغولدولار، بلکی تارئ‌دان دوغولدولار.
14کلمه، انسان اولدو و بیزیم آرامیزدا مَنزل ائدی. بیز اؤنونگ شوکتینی گؤرموشاک، او شوکت کی گؤیدهکی بووآ طَرفیندَن گلَن تَک اوغولا یاراشیر، فِیض و حَقیقتدَن دؤلو. 15یحیا اؤنونگ باره‌سینده گواهلیگ وئردی و اوجا سَس اینن دئدی: «بو ائله او دور کی باره‌سینده دئدیم: ”او کی مندَن سورا گلیر مندَن باش دیر، بو سَبریه کی مندن ایلَری وار ایدی.“» 16اؤنونگ دؤلولیگی بیزیم واریمیزا نَصیب اولموش، فِیض اوستونه، فِیض. 17شَریعت موسای پیغمبر طَریقیندَن وئریلدی؛ فِیض و حَقیقت عیسا مَسیح طَریقیندَن گلدی. 18هئچ‌کَس هئچ زامان تارئ‌یی گؤرمه‌میش. آما او تَک اوغول کی گؤیدهکی بووآ یانیندا دیر، اؤنو تانیتدیردی.
یحیانینگ گواهلیگی
19بو دور یحیا گواهلیگی او زامان کی یهودی‌لارینگ باشی بویوک‌لَری اورشلیم شَهریندَن، کاهِن‌لَری کی مَعبدینگ عالِم‌لَری ایدیلر و لاوی‌لاری کی مَعبدینگ خادم‌لَری ایدیلر، یحیا یانینا یوللادیلار تا اوندان خبر آلالّار کی: «سن کیمَینگ؟» 20یحیا آچیق دئدی و حاشا ائدمه‌دی، بلکی آچیق دئدی کی: «من وَعده وئریلَن مَسیح ده‌ییلم.» 21اوللار بئلَسیندَن خبر آلدیلار: «پس سَن کیمَینگ؟ اِلیاس پیغمبرَینگ؟» او دئدی: «ده‌ییلَم.» خبر آلدیلار: «سن ائله او پیغمبرَینگ کی موسا، اؤنونگ گلمَکی وَعده‌سینی وئرمیش؟» یحیا جواب وئردی: «یو!» 22اوندا اؤنا دئدیلَر: «پس سَن کیمَینگ؟ بیز، اوللارا کی بئلَمیزی یوللامیشلار بورا بیر جواب وئره‌سیک. اؤز باره‌ینگده نه دئییرَینگ؟» 23یحیا دئدی:
«من او آدامینگ سَسی‌یَم کی بیاباندا جار چَکیر و دئییر:
”رَبّینگ یولونو دؤز ائدینز.“»
ائله اوله‌یین کی اِشعَیای پیغمبر دئدی.
24او آداملار کی فَریسی فِرقه‌سی‌نینگ عالِم‌لَری طَرفیندن یوللانمیشلار ایدی، 25یحیادان خبر آلدیلار: «اگر سَن نه وَعده وئریلَن مَسیحَینگ، نه اِلیاس پیغمبرَینگ، نه ده موسا دئدیگی پیغمبرَینگ، پس نه ایچی خَلخی تَعمید غُسلی وئریرَینگ؟» 26یحیا اوللارا جواب وئردی: «من سو اینَن تَعمید غُسلی وئریرَم، آما سیزینگ آراینزدا بیری تورموش کی سیز اؤنو تانیمئیراینز. 27او ائله او آدام دیر کی مندَن سورا گلیر و من لایق ده‌ییلَم حتّی اؤنونگ آیاق‌قابی‌سی‌نینگ باغینی ده آچام.»
28بو زادلار بِیت‌عَنیا کَندینده کی اوردون چئیی‌نینگ او تئیینده ایدی یئرینه ائتیشدی، ائله اؤرا کی یحیا تَعمید غُسلی وئریردی.
تارئ‌نینگ قُربانلوق قوزّوسو
29او گؤنونگ صاباسی، یحیا عیسایی کی اؤنا ساری گلیردی، گؤردو و دئدی: «باخینز، بودور تارئ‌نینگ قُربانلوق قوزّوسو کی دنیانینگ گُناهینی گؤتورور آپاریر! 30بو دور او آدام کی اؤنونگ باره‌سینده دئدیم، ”مندن سورا بیر کیشی گلیر کی مندَن باش دیر، بو سَبریه کی مندن ایلَری وار ایدی.“ 31منیم اؤزوم اؤنو تانیمئیردیم، آما من بو قَصده کی او، تارئ خَلخینه آشکار اولا، گلدیم تا سو اینن تَعمید غُسلی وئرَم.» 32و یحیا گواهلیگ وئردی و دئدی: «من تارئ روحونو گؤردوم کی بیر گؤی‌اَرچین له‌یین گؤیدَن آشاغی گلدی و اؤنونگ اوستونده قالدی. 33منیم اؤزوم اؤنو تانیمئیردیم، آما تارئ کی منی یوللادی تا سو اینَن تَعمید غُسلی وئرَم، منه دئدی: ”هر وخت گؤردونگ کی تارئ روحو گلدی آشاغی، بیرینه قوندو و او آدام اوستونده ده قالدی، بیل کی بو ائله او دور کی تارئ‌نینگ قُدّوس روحو اینَن تَعمید غُسلی وئره‌ر.“ 34من بونو گؤرموشَم و گواهلیگ وئریرَم کی بو دور تارئ اوغلو.»
عیسانینگ بیرینجی شاگردلَری
35او گؤنونگ صاباسی، یحیا گئنه ائله اؤردا ایدی و ایکّی آدام شاگردلَریندَن ده یانیندا تورموشلار ایدی. 36یحیا، عیسایا کی اؤردان رَد اولیردی، باخدی و دئدی: «باخینز، بودور تارئ‌نینگ قُربانلوق قوزّوسو!» 37او ایکّی شاگرد، یحیا دئدیگی گپی ائشیتدیلَر و عیسانینگ قولونجوندان یولا دؤشدولار. 38عیسا بؤکولدو و اوللاری گؤردو کی قولونجوندان گلیرلَر. اوللارا دئدی: «نه سئیرَینز؟» اوللار دئدیلَر: «رَبّی، هاردا قالیرانگ؟» رَبّی، یعنی اُستاد. 39عیسا اوللارا دئدی: «گلینز، گؤرَرَینز.» اوللار گئتدیلَر و گؤردولَر کی عیسا هاردا قالیردی و او گؤن اؤنونگ اینَن قالدیلار. چونکی پَسین‌چاغی، ساعت دؤردا یاخین ایدی.
40او ایکّی شاگردینگ بیری کی یحیا گپینی ائشیتدی و عیسا قولونجوندان گئتدی، شَمعونِ پِطرُسینگ کاکاسی، آندریاس ایدی. 41او، فوری اؤز کاکاسی شَمعونو بولدو و بئلَسینه دئدی: «بیز وَعده وئریلَن مَسیحی بولموشاک.» مَسیح، یعنی تارئ سَچدیگی. 42آندریاس، شَمعونو عیسا یانینا گتیردی. عیسا اؤنا باخدی و دئدی: «سن یوحَنّا اوغلو، شَمعونانگ، سَن کیفا چاغیریلارانگ.» کیفا‌یا، یونانی دیلده پِطرُس دئییرلَر کی مَعنی‌سی تووآ دیر.
عیسا فیلیپُس و نَتَنائیلی چاغیریر
43او گؤنونگ صاباسی، عیسا تَصمیم توتدو کی جَلیل ولایتینه گئده. او فیلیپُسی بولدو و بئلَسینه دئدی: «مَنیم آردیم سورا گَل!» 44فیلیپُس ده، آندریاس و پِطرُس له‌یین، بِیت‌صِیْدا شَهری‌نینگ آدامی ایدی. 45فیلیپُس، نَتَنائیلی بولدو و بئلَسینه دئدی: «بیز او آدامی کی موسا، توراتدا و پیغمبر‌لَر ده اؤز یازیلی‌لاریندا، اؤنونگ باره‌سینده یازمیش‌لار، بولموشاک! او ناصِره‌لی عیسا، یوسف اوغلو دیر.» 46نَتَنائیل اؤنا دئدی: «بئیه ناصِره شَهریندن خوب زاد ده چیخیر؟» فیلیپُس دئدی: «گَل و گؤر.» 47اوندا کی نَتَنائیل، عیسایا ساری گلیردی، عیسا اؤنو گؤردو و باره‌سینده دئدی: «باخینز، بو دور او آدام تارئ خلخیندن کی گرچَکدن اؤندا هئچ حیله یوخدور!» 48نَتَنائیل عیسایا دئدی: «سن منی هاردان تانیرانگ؟» عیسا بئلَسینه جواب وئردی و دئدی: «فیلیپُس سنی چاغیراندان ایلَری، اوندا کی انجیر آغاجی آلتیندایدینگ، سنی گؤردوم.» 49نَتَنائیل جواب وئردی: «اُستاد، سن تارئ اوغلویانگ! سن تارئ خلخی‌نینگ پادشاهی‌یانگ!» 50عیسا اؤنا جواب وئردی: «بو سَبریه کی سنه دئدیم، ”سنی انجیر آغاجی آلتیندا گؤردوم،“ ایمان گتیریرَینگ؟ بوللاردان بویوکتر زادلار گؤرَرَینگ.» 51و اؤنا دئدی: «گرچَکینی سیزه دئییرم؛ گؤیو آچیلی گؤرَرَینز و تارئ‌نینگ فرشته‌لَرینی گؤرَرَینز کی انسان اوغلو یانیندان گؤیه گئدیرلَر و گؤیدَن، انسان اوغلو یانینا گلیرلَر.»
Currently Selected:
یوحنا 1: QII
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
