လုကာ 16
16
မန်နေဂျာလက်ꩻ
1ဗွေႏယေသျု ဒေါ့ꩻဖေႏ ဝွေꩻဗွေႏ တပဲ့တောႏဖုံႏ၊ “တလဲင်ႏသား ပါꩻခြွေတဖြာꩻနဝ်ꩻ အသွဉ်းထိန်ꩻထွားဖေႏဒါႏ ဝွေꩻဥစ္စာႏပစ္စေꩻ အဝ်ႏတဖြာꩻသွူ။ အမန်နေဂျာနဝ်ꩻ အဝ်ႏဖျုန်ꩻ ဝွေꩻအဗွေႏရွဉ်ကျောင်ꩻ လိုꩻဖုံႏအွဉ်ႏဒေါ့ꩻဖေႏ ပါꩻခြွေနဝ်ꩻသွူ။ 2နဝ်ꩻမꩻ ဝွေꩻဟဲ့ꩻလွဉ်သော့ꩻ အမန်နေဂျာ ကောင်းကိုတဲင်ဒေါ့ꩻ၊ ‘ခွေကဟွိုန် နာꩻခရာႏယိုနဝ်ꩻ ထွာထာꩻနုဲင်းမုဲင်ꩻဟောင်း။ နာꩻကအဝ်ႏခွုမ်ဒါႏ ခွေဥစ္စာႏပစ္စေꩻ စရင်ꩻနဝ်ꩻ ဖေႏလွဉ်ချာလို့လို့၊ ပွိုးတွော့ꩻ နာꩻနဝ်ꩻ ခွေအီႏတခန်ꩻသွုပ် တဝ်းဒွုမ် ခွေမန်နေဂျာ’ နုဲင်းနဝ်ꩻသွူ။ 3သွဉ်းနဝ်ꩻ ရိုꩻချာအနမ်း၊ ခွေဗွေႏ အီႏအွဉ်ႏထန်ႏထိုꩻသွူ ခွေထာꩻမာꩻ၊ ခွေအီႏမာꩻဗာႏဒွုမ် နုဲင်းမုဲင်ꩻဟောင်း။ ခွေမဉ်ႏခူႏအံႏ ခြောင်နဝ်ꩻ အာႏတအဲဉ်ထဝ်းတဲင် ခွေမဉ်ႏကွီအံႏထာꩻတဲ့ ဝင်ꩻသꩻငါႏဝင်ꩻသွူ။ 4ခွေထာꩻမာꩻ မဉ်ႏအဲဉ်ထဝ်းဒွုမ်ချိန်ႏ၊ ခွေသွꩻဖုံႏ ဖေႏကလက်ခံႏ ကျိုႏဆွုမ်ႏခွေ ဝွေꩻသီး အလမ်းကိုနဝ်ꩻ ခွေအီႏမာꩻဗာႏ တမုဲင်ꩻနဝ်ꩻ ယိုခါ ခွေသေလဲဉ်း။
5နဝ်ꩻမꩻ လိုꩻကမော့ꩻနီးဒါႏ ဝွေꩻအဗွေႏသားဖုံႏ ကားကအဝ်ႏနဝ်ꩻ ဝွေꩻဟဲ့ꩻလွဉ်သော့ꩻလို့စွဉ်ႏ ကောင်းကိုသွူ။ ဝွေꩻရီ အရီးသွတ်ꩻ တဖြာꩻ၊ ‘နာꩻအဝ်ႏမော့ꩻနီး ခွေအဗွေႏ ခွိုင်းကားမုဲင်ꩻဟောင်း’ နုဲင်းနဝ်ꩻသွူ။ 6ဝွေꩻလဝ်းချာ၊ ‘သံလွေင်နမ်းမန်ꩻ အစွဲတရာꩻ’ နုဲင်းနဝ်ꩻသွူ။ မန်နေဂျာနဝ်ꩻ ဒေါ့ꩻဖေႏဝွေꩻ၊ ‘ယိုနဝ်ꩻထွာ နာꩻစရင်ꩻ၊ အုံလင်ꩻတွော့ꩻ တဲမ်းသော့ꩻ ငတ်ꩻဆီငါဟုဲင်း’ နုဲင်းနဝ်ꩻသွူ။ 7နဝ်ꩻထွူ ဝွေꩻရီဖျင် အလင်တဖြာꩻ၊ ‘နာꩻကအဝ်ႏမော့ꩻနီးဒါႏ ခွေအဗွေႏနဝ်ꩻ ခွိုင်းကားမုဲင်ꩻဟောင်း၊’ နုဲင်းနဝ်ꩻတဲင်၊ ပါꩻလဝ်းချာ၊ ‘ဗွူကလာꩻ အဖျတရေင်၊’ နုဲင်းနဝ်ꩻသွူ။ မန်နေဂျာနဝ်ꩻ ဒေါ့ꩻဖေႏဝွေꩻ၊ ‘ယိုဟာနာꩻစရင်ꩻ၊ တဲမ်းသော့ꩻငါ သွစ်ꩻရျာꩻငါဟုဲင်း’ နုဲင်းနဝ်ꩻသွူ။
8တစွို့ꩻစွဉ်ႏတဝ်း မန်နေဂျာယို အဆုဲင်ꩻသွတ်ꩻနဝ်ꩻ အဗွေႏအဝ်ႏအုပ်ꩻစွဉ်ႏ ဝွေꩻကမာꩻ လက်ꩻလဲဉ်းထာꩻနဝ်ꩻသွူ။ လိုꩻကမ္ဘာႏ လောကကိုယိုသားဖုံႏ၊ ကအဝ်ႏခွုမ်စမ်ႏဒါႏ ဝွေꩻသီး လောကအရေꩻဖုံႏနဝ်ꩻ ကွပ်ပွိုး လက်ꩻကယ်ꩻလဲဉ်းက လိုꩻကဆဲင်ႏဒါႏ ထာꩻလေသားဖုံႏအတွက်” နုဲင်းနဝ်ꩻသွူ။
9တဲင်ဗွေႏယေသျု ဒေါ့ꩻသွုပ်၊ “နဝ်ꩻမꩻခွေဒေါ့ꩻဖေႏသီ၊ တွမ်ႏလောက ဥစ္စာႏပစ္စေꩻဖုံႏနဝ်ꩻ ထုမ်ႏမာꩻအီသွော့ သီနမ်းတာႏ သွꩻဖုံႏဟုဲင်း။ နဝ်ꩻမꩻ သီထွိုင်ႏဖေႏထန်ႏထိုꩻ လောကဥစ္စာႏပစ္စေꩻချိန်ႏ ထာဝရလမ်းကိုနဝ်ꩻ အီႏကျိုႏဆွုမ်ႏသော့ꩻသီသွူ။ 10ပါꩻမုဲင်ꩻသစ္စာႏမဉ်ႏအဝ်ႏ ကိစ္စအပေႏသွတ်ꩻနဝ်ꩻ ကိစ္စအတန်သွတ်ꩻ နဝ်ꩻတဲ့ သစ္စာႏအီႏအဝ်ႏသွူ။ ပါꩻမုဲင်ꩻတစွို့ꩻစွဉ်ႏတဝ်း ကိစ္စအပေႏသွတ်ꩻနဝ်ꩻ၊ ကိစ္စအတန်သွတ်ꩻနဝ်ꩻတဲ့ အီႏတစွို့ꩻစွဉ်ႏတဝ်းသွူ။ 11နဝ်ꩻထွူ ကအဝ်ႏခွုမ်စမ်ႏဒါႏ ကမ္ဘာႏလောက ဥစ္စာႏပစ္စေꩻလောင်း သီသစ္စာႏ မဉ်ႏအဲဉ်ထဝ်းနဝ်ꩻ တွမ်ႏဥစ္စာႏအစဲစ်အမဲဉ်ႏ အီႏယွုမ်းအံႏ အာႏကွိုꩻနွောင်ꩻသီ နုဲင်းမုဲင်ꩻဟောင်း။ 12သီသစ္စာႏ မဉ်ႏတအဲဉ်ထဝ်း ပါꩻလင်တဖြာꩻဖြာꩻ အထာꩻခြိုꩻ ဥစ္စာႏလောင်းနဝ်ꩻ ပါꩻမုဲင်ꩻအီႏဖေႏသီ ထာꩻခြိုꩻဥစ္စာႏပဲင်ႏဟောင်း။
13 #
မ ၆:၂၄။ “သွဉ်းနဝ်ꩻ အီႏတခံႏနွောင်ꩻတဝ်း ဗွေႏဝင်ꩻနီ အသွဉ်းသွူ။ သွဉ်းစားနဝ်ꩻ တဖြာꩻနဝ်ꩻ အီႏလွꩻထီႏတဖြာꩻတဲင် အီႏရက်အလင်တဖြာꩻ၊ မဉ်ႏတမွေးတဝ်း သစ္စာႏအီႏအဝ်ႏ တဖြာꩻလောင်းတဲင် အီႏသွင်ꩻဖွီထိုꩻ အလင်တဖြာꩻသွူ။ သီနဝ်ꩻ တခံႏနွောင်ꩻတဝ်း ဗွေႏဘုရာꩻတွမ်ႏရွဉ် နဝ်ꩻနီစွိုး အသွဉ်းသွူ။
ဗွေႏယေသျုကအဝ်ႏဒေါ့ꩻဒါႏငဝ်းယင်ဟန်ႏ
(မတဲ ၁၁:၁၂–၁၃။ ၅:၃၁–၃၂။ မာကု ၁၀:၁၁–၁၂)
14ဖါရိသဲဖုံႏ ထွိုင်ႏဟွိုန် ငဝ်းနုဲင်းယို ကားကအဝ်ႏ ကွပ်ပွိုး ဝွေꩻသီး ကျွိုက်နစ်သက်ရွဉ် အတွက် ဝွေꩻသီးသဲ့ꩻသွမ်ꩻ ဗွေႏယေသျုသွူ။ 15ဗွေႏယေသျုဒေါ့ꩻဖေႏ ဝွေꩻသီး၊ “သီနဝ်ꩻထွာဒျာႏ ပါꩻအဖြာꩻ မာꩻအနမ်း လိုꩻအလင်ဖဲ့ꩻထွားနဝ်ꩻ ထွာအမဲဉ်ႏစွဉ်ႏတဲ့ ဗွေႏဘုရာꩻ အဝ်ႏသေ သီသꩻဖုံႏသွူ။ ပွိုးထာꩻခြိုꩻလိုꩻဖုံႏဖဲ့ꩻ ကဖျတ်အွဉ်ႏတန်ဒါႏ တံႏဖိုꩻဖုံႏနဝ်ꩻ ဗွေႏဘုရာꩻဆꩻငါ တံꩻဖိုꩻတမုဲင်ꩻတဲ့ အဲဉ်ထဝ်းသွူ။
16 #
မ ၁၁:၁၂၊ ၁၃။ “မောသျေ ပညတ်ကျမ်ꩻတွမ်ႏ ပရောဖဲစ်ဖုံႏ ကတဲမ်းဒါႏ ကျမ်ꩻဖုံႏနဝ်ꩻ အကျိုꩻတွိုႏလွေꩻစွဉ်ႏ ဗတ္တိဇံႏဆရာႏ ယောဟန်စိုးနဝ်ꩻသွူ။ တယ်ႏစွဉ်ႏနဝ်ꩻထွူ ဗွေႏဘုရာꩻ ခမ်းထီခရာႏ သတင်ꩻဟဝ်နဝ်ꩻ ဒေါ့ꩻဟော်ꩻဖေႏလဲဉ်းတဲင် လိုꩻစွုမ်ႏဖြာꩻတဲ့ ဝွေꩻသီး ရိမ်နွို့သော့ꩻစွဉ်ႏသွူ။ 17#မ ၅:၁၈။ ကွဲႏတွော့ꩻ မို့ꩻတွမ်ႏဟံႏ ကအီႏထိုꩻမားနဝ်ꩻ ယိုꩻကယ်ꩻက ပညတ်ကျမ်ꩻ အမုဲင်ပေႏသွတ်ꩻတဖြုံႏ ကအီႏကုဲင်ထိုꩻနဝ်ꩻသွူ။။
18 #
မ ၅:၃၂၊ ၂ကော ၇:၁၀၊ ၁၁။ “ပါꩻခိုအဖြာꩻမုဲင်ꩻတယဝ်း အွဉ်ႏကုဲင်ထိုꩻ ဝွေꩻအမာတွော့ꩻ တောႏလမ်းမင်္ဂလာႏထိုꩻ လိုꩻမူႏလင်နဝ်ꩻ ပဲစ်မာႏလဲဉ်း ဝင်ꩻပိုမာသွူ။ တဲင်ပါꩻခို ကတောႏလမ်းဒါႏ မဲရင်းတဖြာꩻနဝ်ꩻ ပဲစ်မာႏလဲဉ်း ဝင်ꩻပိုမာသွူ။
ပါꩻခြွေစွဉ်ႏလာဇရု
19“တလဲင်ႏသား ပါꩻခြွေတဖြာꩻ ကွဉ်ကꩻစွဉ်ႏ ခွမ်ꩻလာꩻ အငိုꩻတန်စားသွတ်ꩻနဝ်ꩻ အုံစေꩻစိန်ႏချမ်ꩻသာႏ စွုမ်ႏနီꩻနီꩻနဝ်ꩻသွူ။ 20နဝ်ꩻကိုနဝ်ꩻ လိုꩻကေန်ꩻခြော တဖြာꩻ အမဉ်ꩻ လာဇရုအဝ်ႏ၊ ဝွေꩻနမ်းတဗာႏလွုမ်းနဝ်ꩻ အဝ်ႏဗွေစွဉ်ႏ ဒွေဖုံႏတဲင် အဝ်ႏဖျော်လွဉ် သေႏသေႏ ပါꩻခြွေတခါꩻထျꩻ၊ 21ဖေႏကအံႏဗာႏ ပါꩻခြွေထာꩻအံႏ အဈꩻအကင် ထာꩻအံႏခွုံႏလောင်း ထဲ့လင်ꩻနဝ်ꩻ အဝ်ႏမောင်ꩻနဝ်ꩻသွူ။ ထွီႏဖုံႏလွဉ်တဲင် လဲင်ꩻမွစ်ꩻဖေႏနေးစွဉ်ႏ ဝွေꩻဒွေမဉ်ထီဖုံႏနဝ်ꩻသွူ။
22လိုꩻကေန်ꩻနဝ်ꩻ အသီထိုꩻတဲင် မို့ꩻလောင်းတမန်ႏဖုံႏ ထူႏလွေꩻအုံလင်ꩻ အဗြာဟံထျꩻ ထာꩻအံႏပွယ်ꩻ ခမ်းထီမို့ꩻလောင်းကိုနဝ်ꩻသွူ။ ပါꩻခြွေနဝ်ꩻတဲ့ သီတဲင် ဝင်ꩻသင်္ဂြိုဟ်ႏတွော့ꩻ၊ 23ထဲ့သော့ꩻစွဉ်ႏ ငါးရုဲင်ꩻကို၊ နဝ်ꩻကို ဝွေꩻခံႏစာꩻဗာႏ သန်မွေးနေးစွဉ်ႏ ဝေႏဒနာႏထာꩻဆာ၊ ထွားကီထင်ႏတဲင် ထီႏညာꩻလွေꩻစွဉ်ႏ အဗြာဟံတဲင် လာဇရုနဝ်ꩻ အဝ်ႏဝွေꩻထျꩻသွူ။ 24နဝ်ꩻမꩻ ဝွေꩻခြောဝ်ထန်ႏ၊ ‘အွိုးဖါ အဗြာဟံ၊ သꩻညင်ꩻဗဲင်းခွေသွဉ်း၊ ပွိုးတွော့ꩻ ခွေသွဉ်း အဝ်ႏခံႏဗာႏမွေးနေးစွဉ်ႏ မေႏကိုယိုနဝ်ꩻမꩻ အွဉ်ႏလာဇရု စုပ်ꩻထီ ဝွေꩻစူနုန်နာလောင်းတဲင် ခွေကထောင်ꩻ ဖေႏကခွꩻနဝ်ꩻ အွဉ်ႏဗဲက်ꩻလင်ꩻသော့ꩻဖေႏမွိုင်။
25ကွဲႏတွော့ꩻ အဗြာဟံဒေါ့ꩻ၊ ‘ခွေပိုခို နာꩻသက်အဝ်ႏမွန်ချိန်ႏနဝ်ꩻ နာꩻစံႏစာꩻဗာႏ ဟဝ်မွေးနေးစွဉ်ႏ ထာꩻခြွေချမ်ꩻသာႏကျာꩻ၊ လာဇရုနဝ်ꩻ အဝ်ႏခံႏစာꩻဗာႏမွေး ထာꩻဒုက္ခဖုံႏ ကားကအဝ်ႏနဝ်ꩻ ယူႏလꩻချာသွော့။ ကွဲႏတွော့ꩻ ယိုခါဝွေꩻနမ်း အဝ်ႏစံႏစာꩻဗာႏ ထာꩻမွန်းပျောႏ ယိုကိုကျာꩻနဝ်ꩻ နာꩻအဝ်ႏခံႏဗာႏ ထာꩻဒုက္ခဝေႏဒနာႏသွူ။ 26နဝ်ꩻလွုမ်ꩻတကာႏတဝ်း နီအခါႏနဝ်ꩻ ထာꩻခြောက်ꩻယော့ အဝ်ႏခန်းသေꩻခါသွူ။ ပွိုးနုဲင်းနဝ်ꩻမꩻ ပါꩻမုဲင်ꩻတဖြာꩻတဲ့ အဝ်ႏယိုကို အီႏဖျတ်ကာႏလွေꩻ နာꩻထျꩻ တလꩻတဝ်း၊ ပါꩻမုဲင်ꩻတဖြာꩻတဲ့ အဝ်ႏနာꩻထျꩻနဝ်ꩻ ကာႏလွဉ်နီထျꩻ တလꩻတဝ်း’ နုဲင်းနဝ်ꩻသွူ။ 27ပါꩻခြွေနဝ်ꩻဒေါ့ꩻ၊ ‘ခွေတောင်ꩻပြန်ႏဒျာႏ နီဖါ အဗြာဟံ၊ လာဇရုနဝ်ꩻ အွဉ်ႏစွꩻသဲင်ꩻဗဲင်း ခွေဖါလမ်းမွိုင်။ 28နဝ်ꩻကို ခွေသွဉ်းဖူးခို အဝ်ႏဝင်ꩻငတ်ꩻ၊ အဆုဲင်ꩻသွတ်ꩻ ဖေႏနေး ဝွေꩻသီး ကလွဉ်ခံႏစာꩻဗာႏမွိုန်း ထာꩻဒုက္ခဝေႏဒနာႏ ခင်ႏလမ်းယိုကိုနဝ်ꩻ အွဉ်ႏဝွေꩻလွေꩻဖေႏသတိꩻ ဝွေꩻသီးမွိုင်၊’ နုဲင်းနဝ်ꩻသွူ။
29အဗြာဟံဒေါ့ꩻဖေႏ၊ ‘နာꩻဖူးဖုံႏတာႏ၊ ကအီႏဖေႏသတိꩻ ဝွေꩻသီးနဝ်ꩻ မောသျေတွမ်ႏ ပရောဖဲစ်ဖုံႏအဝ်ႏဒျာႏ၊ နုဲင်းဝွေꩻသီး ကဒေါ့ꩻဖေႏနဝ်ꩻ နာꩻဖူးဖုံႏဟဝ်နာႏဒျာႏ’ နုဲင်းနဝ်ꩻသွူ။ 30ပါꩻခြွေလဝ်းချာ၊ ‘ဖါအဗြာဟံ၊ နုဲင်းနဝ်ꩻလွုမ်ꩻနဝ်ꩻ တလွုမ်းလဲင်ꩻတဝ်းဒွိုန်း၊ ကွဲႏတွော့ꩻ လိုꩻတဖြာꩻဖြာꩻ အဝ်ႏထာꩻသီကို ထွိုင်ႏမွန်လွဉ်ချာတဲင် မဉ်ႏလွေꩻဒေါ့ꩻဖေႏ ဝွေꩻသီးနဝ်ꩻ ဝွေꩻသီး အဝ်ႏအပဲစ်ဖုံႏကို အီႏလꩻချာထာꩻကော့ꩻမာႏ’ နုဲင်းနဝ်ꩻသွူ။ 31ကွဲႏတွော့ꩻ အဗြာဟံဒေါ့ꩻဖေႏ၊ ‘ဝွေꩻသီး မဉ်ႏတနာႏတဝ်း မောသျေတွမ်ႏ ပရောဖဲစ်ဖုံႏ ငဝ်းနဝ်ꩻ ပါꩻတဖြာꩻဖြာꩻ အဝ်ႏထာꩻသီကို လဲင်ꩻထွိုင်ႏမွန်ချာ သဲင်ꩻဒေါ့ꩻဖေႏစွဉ်ႏတဲ့ ဝွေꩻသီး အီႏတလက္ခံႏတဝ်း’” နုဲင်းနဝ်ꩻသွူ။
Currently Selected:
လုကာ 16: PBCL
Highlight
Share
Copy
Want to have your highlights saved across all your devices? Sign up or sign in
Pao Bible Common Language© Bible Society of Myanmar, 2019.
