လုကာ 18

မဲမုဲင်းမူႏတွမ်ႏတရာꩻလိုꩻတန်ပွုံႏဥပမာႏ

1နဝ်ꩻထွူ မုဲင်ꩻခါတဲ့ ဖေႏသꩻကကုဲင် ဗာႏမွိုန်းနဝ်ꩻ ဝွေꩻသီး အဝ်ႏလိုႏဆုတောင်ꩻ သေႏသေႏကျောင်ꩻ ဗွေႏယေသျု ဒေါ့ꩻနယ်ဖေႏ ဝွေꩻဗွေႏ တပဲ့တောႏဖုံႏ ငဝ်းဥပမာႏ တစွိုးတဲင် သွဉ်သင်ဖေႏ ဝွေꩻသီးနဝ်ꩻသွူ။ 2“ဝေင်ꩻတဖြုံႏကိုနဝ်ꩻ တရာꩻလိုꩻတန် အဝ်ႏတဖြာꩻ၊ တငမ်းတဝ်း ဗွေႏဘုရာꩻတွော့ꩻ လိုꩻတဲ့ ဝွေꩻတရိုႏသေႏတဝ်း နဝ်ꩻသွူ။ 3ဝေင်ꩻနဝ်ꩻနဝ်ꩻ မဲမုဲင်းမူႏ အဝ်ႏတဖြာꩻ အဝ်ႏလွဉ်သေႏသေႏ ဝွေꩻထျꩻတဲင် အဝ်ႏတောင်ꩻပြန်ႏ ဝွေꩻမူႏတာႏ အခွင်ꩻအရေꩻတဲင်ရိုꩻ၊ ‘ ဖေႏကနွောင်ꩻ ခွေတရာꩻ ခေးပြဲင်ႏသားနဝ်ꩻ စွဲကိုဗဲင်းခွေမွိုင်’ နုဲင်းနဝ်ꩻသွူ။ 4တရာꩻသူကီꩻနဝ်ꩻ တထူႏရေꩻတဝ်းတဲင် တမာꩻဖေႏတဝ်းနဝ်ꩻ အချိန်ႏညတန်သွူ။ ကွဲႏတွော့ꩻ အဆုဲင်ꩻသွတ်ꩻ ဝွေꩻဒေါ့ꩻချာ အသꩻကို၊ ခွေနဝ်ꩻ ဗွေႏဘုရာꩻတဲ့ လဲင်ꩻတငမ်းတဝ်း၊ လိုꩻတဲ့ ခွေတရိုႏသေႏ ရေႏမတ်တဝ်း၊ ကွဲႏတွော့ꩻ 5ကွပ်ပွိုး မဲမုဲင်းမူႏယို ဖေႏမွေးနေးစွဉ်ႏခွေ ထာꩻယပ်ꩻ၊ ဝွေꩻမူႏဖေႏကလꩻ အခွင်ꩻအရေꩻနဝ်ꩻ ခွေအီႏထွားမာꩻဖေႏ၊၊ ခွေမဉ်ႏ တမာꩻဖေႏတဝ်းနဝ်ꩻ ဝွေꩻမူႏယို အီႏလွဉ်သွုပ်သွုပ်တဲင် အဆုဲင်ꩻသွတ်ꩻ အီႏမာꩻရွိုးခွေ’” နုဲင်းနဝ်ꩻသွူ။

6ဗွေႏဘုရာꩻဒေါ့ꩻသွုပ်၊ “တစွို့ꩻစွဉ်ႏတဝ်း တရာꩻလိုꩻတန် ထာꩻဒေါ့ꩻနဝ်ꩻ နာႏစမ်ꩻမွိုင်။ 7ယိုခါ၊ ဗွေႏဘုရာꩻနမ်း အလိုꩻဖုံႏ ဖေႏကစွဲကိုတာႏနဝ်ꩻ ခြောဝ်ထေ့ဝွေꩻဗွေႏ စွုမ်ႏနီꩻစွုမ်ႏနာꩻနဝ်ꩻ ဝွေꩻဗွေႏအွဉ်ႏရေꩻ စီႏရင်ႏ ဖေႏတဝ်းဟောင်း။ ကအီႏစွဲကို ဝွေꩻသီးနဝ်ꩻ စောင်းမꩻဝွေꩻဗွေႏ အီႏယွိုက်ꩻယုဲင်ဟောင်း။ 8ခွေဒေါ့ꩻဖေႏသီ၊ ဝွေꩻဗွေႏ အီႏစီႏရင်ႏ ဖေႏသေရေꩻ ဝွေꩻသီးတွော့ꩻ အီႏမာꩻမွိုင်ဖေႏဒျာႏသွူ။ ကွဲႏတွော့ꩻ လိုꩻပိုခို ထွိုင်ႏကျွꩻလွဉ် ဖျင်ချိန်ႏ ဟံႏတန်လောင်းနဝ်ꩻ ဝွေꩻဗွေႏ အီႏမော့ꩻနေ ထာꩻယွုမ်းဟောင်း” နုဲင်းနဝ်ꩻသွူ။

ဖါရိသဲတွမ်ႏအခွဉ်ႏကောက်သားဥပမာႏ

9လိုꩻကရိုꩻချာဒါႏ ဝွေꩻသီးနမ်း ဟဝ်မျတ်တွော့ꩻ ကသွင်ꩻဖွီဒါႏ လိုꩻလင်ဖုံႏနဝ်ꩻ ဗွေႏယေသျု ဒေါ့ꩻနယ်ဖေႏပါက ငဝ်းဥပမာႏနုဲင်းယိုသွူ။ 10“တလဲင်ႏသား ပါꩻဝင်ꩻနီ အီႏဆုတောင်ꩻဘုရာꩻနဝ်ꩻ ထင်ႏလွေꩻ ဗိမာန်ႏတောႏကျောင်ꩻသွူ။ တဖြာꩻနဝ်ꩻထွာ ဖါရိသဲတွော့ꩻ အလင်တဖြာꩻနဝ်ꩻထွာ အခွဉ်ႏကောက်သားသွူ။

11ဖါရိသဲနဝ်ꩻ အုံထွိုင်ႏနေးတဲင် ဝွေꩻဆုတောင်ꩻ၊ ‘အွိုးဗွေႏဘုရာꩻ ခွေသွဉ်းနဝ်ꩻ တဗွိုန်တဝ်း နုဲင်းလိုꩻထာꩻလောဘတန်၊ တစွို့ꩻစွဉ်ႏတဝ်းတဲင် ကလွူꩻလောႏဒါႏ ဝင်ꩻပိုမာသားနဝ်ꩻသွူ။ ခွေသွဉ်းနဝ်ꩻ တဗွိုန်တဝ်း နုဲင်းအခွဉ်ႏကောက်သားသူꩻ နဝ်ꩻမꩻ ခွေသွဉ်း ကေꩻဇူꩻတင်ႏငါႏ နီဗွေႏသွူ။ 12တပတ်နဝ်ꩻ ခွေသွဉ်း သျောင်ႏကံထာꩻအံႏ နီနီꩻတဲင် ခွေသွဉ်းရွဉ်နွို့ဖုံႏ ကားကအဝ်ႏနဝ်ꩻ ခွေသွဉ်းဖေႏနီဗွေႏ ဆီပွန်းတပွန်း’ နုဲင်းနဝ်ꩻသွူ။

13ကွဲႏတွော့ꩻ အခွဉ်ႏကောက်သားနဝ်ꩻ အုံထွိုင်ႏညာꩻနေးတဲင် ဝွေꩻမဲ့ငါနဝ်ꩻ အွော့ꩻထွား ခမ်းထီမို့ꩻလောင်းငါ တဗွိုန်ႏတဝ်း၊ ကွဲႏတွော့ꩻ ဝွေꩻတဗꩻ အသꩻအင်တဲင် ဆုတောင်ꩻ၊ ‘အွိုးဗွေႏဘုရာꩻ ခွေသွဉ်းနဝ်ꩻ ထွာဒျာႏ အပဲစ်သား တဖြာꩻနဝ်ꩻမꩻ အွဉ်ႏဗဲင်းထာꩻသꩻညင်ꩻ ခွေသွဉ်းလောင်းမွိုင်။’ နုဲင်းနဝ်ꩻသွူ။ 14#မ ၂၃:၁၂၊ လု ၁၄:၁၁။ ဗွေႏယေသျုဒေါ့ꩻ၊ “ခွေဒေါ့ꩻဖေႏသီ အခွဉ်ႏကောက်သား ဝွေꩻထွိုင်ႏသဲင်ꩻလွဉ်ချာ လမ်းနဝ်ꩻ ဝွေꩻအပဲစ်လွစ်တဲင် လꩻထာꩻစွို့ꩻစွဉ်ႏခွင်ꩻ ဗွေႏဘုရာꩻထျꩻတွော့ꩻ ဖါရိသဲနဝ်ꩻ တလꩻတဝ်းသွူ။ ပွိုးလိုꩻကအွဉ်ႏတန်ချာဒါႏ ဝွေꩻသီး အနမ်းသားဖုံႏနဝ်ꩻ အီႏခံႏဗာႏ အချꩻဖွိုႏတဲင် လိုꩻကချꩻဖွိုႏဒါႏ ဝွေꩻသီး နမ်းသားဖုံႏနဝ်ꩻ၊ အီႏခံႏဗာႏ အပင်ႏထိုꩻသွူ။

ဗွေႏယေသျုဖေႏလိုꩻပေႏဖုံႏမင်္ဂလာႏ

(မတဲ ၁၉:၁၃–၁၅။ မာကု ၁၀:၁၃–၁၆)

15ဖေႏနေးဝွေꩻဗွေႏ ကအွဉ်ႏဒင်ႏဖေႏအစူ ဝွေꩻသီးလောင်းနဝ်ꩻ လိုꩻယင်ဟန်ႏဖုံႏ အီလွဉ် ဝွေꩻသီးပိုပေႏဖုံႏ ဗွေႏယေသျုထျꩻသွူ။ တပဲ့တောႏဖုံႏ ထွိုင်ႏထီႏဝွေꩻသီး အဝ်ႏမာꩻနုဲင်းနဝ်ꩻနဝ်ꩻ ခွန်းနယ်ꩻစွဉ်ႏ ဝွေꩻသီးနဝ်ꩻသွူ။ 16ကွဲႏတွော့ꩻ ဗွေႏယေသျုဟဲ့ꩻလွဉ် လိုꩻပေႏဖုံႏ ဝွေꩻဗွေႏထျꩻတဲင်ဒေါ့ꩻ၊ “အွဉ်ႏလိုꩻပေႏဖုံႏ လွဉ်ထေ့သွော့ ခွေထျꩻ၊ တွမ်ႏရဲဆီꩻမွိုန်း ဝွေꩻသီး၊ ပွိုးတွော့ꩻ ဗွေႏဘုရာꩻ ခမ်းထီနဲင်ႏငံႏနဝ်ꩻ ဆဲင်ႏဒျာႏ လိုꩻပေႏ စားယိုဖုံႏသွူ။ 17ယူႏလꩻချာသွော့ နုဲင်းယိုဟုဲင်း။ ပါꩻမုဲင်ꩻ လက္ခံႏတဝ်း ဗွေႏဘုရာꩻ ခမ်းထီနဲင်ႏငံႏ ဗွိုန်နုဲင်း လိုꩻပေႏတဖြာꩻနဝ်ꩻ မုဲင်ꩻခါတဲ့ အီႏတနွို့သော့ꩻဗာႏတဝ်း ခမ်းထီနဲင်ႏငံႏကို” နုဲင်းနဝ်ꩻသွူ။

ပါꩻခြွေချမ်ꩻသာႏ

(မတဲ ၁၉:၁၆–၃၀။ မာကု ၁၀:၁၇–၃၁)

18ဂျူးလိုꩻတန် တဖြာꩻရီ ဗွေႏယေသျု၊ “ဟဝ်မျတ်ငါႏဆရာႏ၊ ဖေႏကလꩻ ထာဝရအသက်နဝ်ꩻ ခွေအီႏမာꩻဗာႏ တမုဲင်ꩻဟောင်း” နုဲင်းနဝ်ꩻသွူ။

19ဗွေႏယေသျုရီဝွေꩻ၊ “ပွိုးတမုဲင်ꩻ နာꩻဟဲ့ꩻဗာႏတွိုႏခွေ ဟဝ်မျတ်ငါႏ နုဲင်းမုဲင်ꩻဟောင်း။ ပေါႏလွိုသွူ ဗွေႏဘုရာꩻ တပါꩻနဝ်ꩻ ပါꩻမုဲင်ꩻတဖြာꩻတဲ့ တဟဝ်မျတ်တဝ်းသွူ။ 20#ထလ ၂၀:၁၄၊ ဟော်ꩻ ၅:၁၈၊ ထလ ၂၀:၁၃၊ ဟော်ꩻ ၅:၁၇၊ ထလ ၂၀:၁၅၊ ဟော်ꩻ ၅:၁၉၊ ထလ ၂၀:၁၆၊ ဟော်ꩻ ၅:၂၀၊ ထလ ၂၀:၁၂၊ ဟော်ꩻ ၅:၁၆။ ပညတ်တောႏဖုံႏနဝ်ꩻ နာꩻအဝ်ႏသေဒျာႏ။ “တွမ်ႏပဲစ်မာႏမွိုန်း ဝင်ꩻပိုမာ၊ တွမ်ႏမာꩻသီမွိုန်း လိုꩻအသက်၊ တွမ်ႏတခွန်ꩻမွိုန်း ဝင်ꩻထာꩻခြိုꩻ၊ တမွေးမဲဉ်ႏတဝ်းနဝ်ꩻ တွမ်ႏစွဲꩻတရာꩻမွိုန်း ပါꩻတဖြာꩻဖြာꩻ၊ ရိုႏသေႏသွော့ သီမွိုးတွမ်ႏသီဖါ’” နုဲင်းနဝ်ꩻသွူ။

21ပါꩻခိုလဝ်းချာ၊ “ပညတ်တောႏယိုဖုံႏ ကားကအဝ်ႏနဝ်ꩻ တယ်ႏစွဉ်ႏ ခွေအဝ်ႏပေႏခါကာႏ ခွေလွောက်ꩻနာႏလို့လဲဉ်း” နုဲင်းနဝ်ꩻသွူ။

22ဗွေႏယေသျု ထွိုင်ႏဟွိုန်နုဲင်းယို ဝွေꩻဗွေႏဒေါ့ꩻဖေႏဝွေꩻ၊ “နာꩻအဝ်ႏလိုႏမာꩻနဝ်ꩻ အဝ်ႏလိုႏထဲင်းက တစွိုးသွူ။ စာထိုꩻသွော့ နာꩻထာꩻခြိုꩻဖုံႏ ကားကအဝ်ႏတွော့ꩻ ရွဉ်နဝ်ꩻ ဖေႏထိုꩻသွော့ လိုꩻကေန်ꩻခြောဖုံႏ၊ နဝ်ꩻမꩻ နာꩻအီႏခြွေချမ်ꩻသာႏသော့ꩻဗာႏ ခမ်းထီမို့ꩻလောင်းကို။ နဝ်ꩻထွူလွဉ်တဲင် လွေꩻလွဉ်ꩻသွော့ခွေ” နုဲင်းနဝ်ꩻသွူ။ 23ကွဲႏတွော့ꩻ ပွိုးဝွေꩻနဝ်ꩻထွာ လိုꩻခြွေ ချမ်ꩻသာႏငါႏအတွက် ပါꩻခိုထွိုင်ႏဟွိုန် နုဲင်းယိုနဝ်ꩻ ဝွေꩻသꩻကုဲင် မွေးစွဉ်ႏထာꩻသွူ။

24ဝွေꩻအဝ်ႏသꩻကုဲင်ငါႏနဝ်ꩻ ဗွေႏယေသျု ထီႏတဲင်ဒေါ့ꩻ၊ “လိုꩻခြွေချမ်ꩻသာႏတာႏ ကအီႏနွို့သော့ꩻဗာႏ ဗွေႏဘုရာꩻ ခမ်းထီကိုနဝ်ꩻ ယပ်ꩻခုဲင်ႏငါႏ ခွိုင်းကားမုဲင်ꩻ။ 25လိုꩻခြွေချမ်ꩻသာႏ တဖြာꩻ ကအီႏနွို့သော့ꩻဗာႏ ဗွေႏဘုရာꩻ ခမ်းထီနဝ်ꩻ ယပ်ꩻကယ်ꩻလဲဉ်းက ကလာအုတ်နွို့သော့ꩻ တထꩻမီးအိုကို” နုဲင်းနဝ်ꩻသွူ။

26လိုꩻကဟွိုန်သားဖုံႏနဝ်ꩻ ရီဝွေꩻဗွေႏ၊ “ပေါ့ꩻနုဲင်းနဝ်ꩻနဝ်ꩻ ပါꩻမုဲင်ꩻလꩻနွောင်ꩻ ထာꩻကယ်ႏတင်ႏဟောင်း” နုဲင်းနဝ်ꩻသွူ။

27ဗွေႏယေသျုလဝ်းချာ၊ “လိုꩻအတာႏ တထွာနွောင်ꩻတဝ်းတဲ့ ဗွေႏဘုရာꩻတာႏနဝ်ꩻ ထွာနွောင်ꩻ” နုဲင်းနဝ်ꩻသွူ။

28နဝ်ꩻထွူ ပေတရုဒေါ့ꩻ၊ “ထွားမွိုင်၊ နီအွဉ်ႏကုဲင်ထိုꩻ နီလမ်းဖုံႏ အဝ်ႏလွေꩻလွဉ်ꩻဒျာႏနီဗွေႏ” နုဲင်းနဝ်ꩻသွူ။

29ဗွေႏယေသျု လဝ်းချာဝွေꩻသီး၊ “မွေးလဲဉ်းသွူ၊ ခွေဒေါ့ꩻဖေႏသီ အမွေး၊ ဗွေႏဘုရာꩻ ခမ်းထီတွက်တာႏ ပါꩻမုဲင်ꩻအွဉ်ႏကုဲင်ထိုꩻ အလမ်းတဲ့နဝ်ꩻ အမာတဲ့နဝ်ꩻ အဖူးဝေးတဲ့နဝ်ꩻ အမွိုးဖါတဲ့နဝ်ꩻ အပိုဖုံႏတဲ့နဝ်ꩻ၊ 30ဘဝစိုးယို အီႏလꩻအာလွိုတဲင် ဘဝစိုးငါနဝ်ꩻ အီႏလꩻ ထာဝရအသက်” နုဲင်းနဝ်ꩻသွူ။

ပွိုင်းဝွို့တွမ်ႏဝွေꩻဗွေႏအီႏသီခရာႏဗွေႏယေသျုဒေါ့ꩻနယ်ဗွေသွံလဲင်ႏ

(မတဲ ၂၀:၁၇–၁၉။ မာကု ၁၀:၃၂–၃၄)

31ဗွေႏယေသျုဟဲ့ꩻလွဉ် တမန်ႏတောႏ တဆီနီဖြာꩻတဲင် ဒေါ့ꩻဖေႏဝွေꩻသီး၊ “နာႏလွသွော့၊ နီအဝ်ႏလွေꩻဝေင်ꩻယေရုသလမ်ႏ၊ နဝ်ꩻကို နုဲင်းပရောဖဲစ်ဖုံႏ ကအဝ်ႏတဲမ်းခါꩻလဲဉ်းဒါႏ လိုꩻပိုခိုခရာႏ ကားကအဝ်ႏနဝ်ꩻ အီႏဗွေမဲဉ်ႏလွဉ်ꩻမွေးသွူ။ 32ဝွေꩻနဝ်ꩻ အီႏခံႏဗာႏဝင်ꩻဆွမ်ꩻတဲင် အပ်သော့ꩻဖေႏ လိုꩻမျိုꩻလင်စူကိုသွူ။ အီႏသဲ့ꩻသွမ်ꩻဝွေꩻ စောက်ꩻကာꩻဝွေꩻတဲင် ပထိုဝွေꩻသွူ။ 33ဝွေꩻသီး အီႏတွဲႏဝွေꩻတဲင် အီႏမာꩻသီထိုꩻဝွေꩻ၊ ကွဲႏတွော့ꩻ ညသွံနီꩻနဝ်ꩻ ဝွေꩻအီႏထွိုင်ႏမွန်လွဉ်ချာ” နုဲင်းနဝ်ꩻသွူ။

34ကွဲႏတွော့ꩻ ထာꩻယိုဖုံႏခရာႏနဝ်ꩻ တပဲ့တောႏဖုံႏ တသေနာႏတဝ်း တစိꩻစိꩻသွူ။ ငဝ်းဖုံႏအဓိပ္ပါယ်ႏနဝ်ꩻ အွဉ်ႏဗဉ်ႏဗꩻဒျာႏ ဝွေꩻသီးနဝ်ꩻမꩻ နုဲင်းဗွေႏယေသျု ကအဝ်ႏဒေါ့ꩻဖေႏဒါႏ ခရာႏဖုံႏနဝ်ꩻ ဝွေꩻသီး တသေနာႏတဝ်းသွူ။

ဗွေႏယေသျုလုမ်ꩻလာꩻမာꩻဟဝ်ဖေႏထာꩻကွီအံႏသားမဲ့ခေ့ꩻတဖြာꩻ

(မတဲ ၂၀:၂၉–၃၄။ မာကု ၁၀:၄၆–၅၂)

35နုဲင်းဗွေႏယေသျု ကအဝ်ႏဖျော်လွဉ်ဗော့ꩻ ဝေင်ꩻယေရိခေါ၊ နဝ်ꩻကို လိုꩻမဲ့ခေ့ꩻတဖြာꩻ အဝ်ႏအုံလင်ꩻ တဖူꩻတန်ထျꩻ၊ အဝ်ႏကွီအံႏထာꩻသွူ။ 36ဝွေꩻထွိုင်ႏဟွိုန် လိုꩻဖုံႏ အဝ်ႏကာႏလွဉ်ထာꩻနဝ်ꩻ ဝွေꩻရီ၊ “ထွာတမုဲင်ꩻတန်ယိုဟောင်း” နုဲင်းနဝ်ꩻသွူ။

37ဝွေꩻသီးဒေါ့ꩻနယ်ဝွေꩻ၊ “နာဇရဲစ်ဝေင်ꩻသား ယေသျုအဝ်ႏကာႏလွေꩻ” နုဲင်းနဝ်ꩻသွူ။

38ဝွေꩻခြောဝ်ထန်ႏ၊ “ဒါဝိဒ်ပိုခို၊ ယေသျု၊ သညင်ꩻဗဲင်း ခွေသွဉ်းမွိုင်” နုဲင်းနဝ်ꩻသွူ။

39လိုꩻဖုံႏကအဝ်ႏလွေꩻ ဆꩻငါဖဲ့ꩻသား ၊ ဖေႏဝွေꩻကအုံ တေ့ꩻတေ့ꩻနဝ်ꩻ ခွန်းနယ်ꩻဝွေꩻသွူ။ ကွဲႏတွော့ꩻ ဝွေꩻကယိန်း ခြောဝ်သန်ထဲင်း၊ “ဒါဝိဒ်ပိုခို သညင်ꩻဗဲင်း ခွေသွဉ်းမွိုင်” နုဲင်းနဝ်ꩻသွူ။

40နဝ်ꩻမꩻ ဖေႏနေးကဟဲ့ꩻလွဉ် ပါꩻမဲ့ခေ့ꩻ ဝွေꩻဗွေႏထျꩻနဝ်ꩻ ဗွေႏယေသျု အုံထွိုင်ႏတဲင် ဖေႏစွဉ်ႏအမိန်းသွူ။ ဝွေꩻထွိုင်ႏဖျော်လွဉ် ဗော့ꩻနဝ်ꩻ ဗွေႏယေသျုရီဝွေꩻ၊ 41“နာꩻတာႏနဝ်ꩻ နာꩻမဉ်အွဉ်ႏခွေမာꩻဖေႏ တမုဲင်ꩻဟောင်း” နုဲင်းနဝ်ꩻသွူ။

ဝွေꩻလဝ်းချာ၊ “ဗွေႏ၊ ခွေသွဉ်း မဉ်ထီႏဖျင်ယင်းထာꩻ” နုဲင်းနဝ်ꩻသွူ။

42ဗွေႏယေသျု ဒေါ့ꩻဖေႏဝွေꩻ၊ “ထီႏသွော့။ နာꩻထာꩻယွုမ်းနဝ်ꩻ မာꩻဟဝ်ရေꩻဖေႏလဲဉ်းနာꩻ၊” နုဲင်းနဝ်ꩻသွူ။

43တလဲင်ႏချင်ꩻ ဝွေꩻထီႏနွောင်ꩻစွဉ်ႏထာꩻတဲင် ဝွေꩻလွေꩻလွဉ်ꩻစွဉ်ႏ ဗွေႏယေသျု ဆꩻချာတွော့ꩻ အုပ်ꩻထင်ႏစွဉ်ႏ ဗွေႏဘုရာꩻ ကေꩻဇူꩻတောႏသွူ။ လိုꩻစွိုꩻဖုံႏ ထွိုင်ႏထီႏနုဲင်းနဝ်ꩻ ဝွေꩻသီးကားက အဝ်ႏ အုပ်ꩻထင်ႏစွဉ်ႏ ဗွေႏဘုရာꩻ ဂွုဏ်ႏတောႏသွူ။

Currently Selected:

လုကာ 18: PBCL

Highlight

Copy