يوحنا 7

1وبعد فترة كان يسوع عم بتمشى في الجليل ومكنش بدو يتمشى في اليهودية عشان اليهود بدهن يقتلوه. 2وقرّب عيد السكّوت (סכות) اليهودي 3فقالولو إخوته: تحرك من محلك وروح ع اليهودية عشان تلاميذك يشوفو الأعمال اللي بتعملها 4لأنو اللي بدو الشهرة بشتغلش بالسر وما دامك بتعمل هيك أعمال فبيّن نفسك للعالم. 5والغريب إنو إخوته مش مآمنين فيه. 6قالهن يسوع: بعدو ما أجاش وقتي بس وقتكو دايما حاضر. 7العالم بيكرهكوش بس بكرهوني لأني بكشف إنو أعمالهن شريرة. 8روحو أنتو ع العيد. أنا مش طالع لأنو بعدو وقتي ما أجاش. 9وقال هاي الكلمات وبقي في الجليل.

10وبعد ما راحوا إخوته ع العيد طلع هو كمان ع العيد بس بالسر ومش بالعلن. 11وكانوا اليهود اللي في العيد عم بدورو عليه وبسألو: وينو؟ 12وكثير من الناس صاروا يحكو عنو. في جماعة قالو هو زلمة منيح وجماعة تانية قالو لأ مش منيح وراح يضيّع الناس. 13وفش حدا حكا عنو بالعلن لأنهن خافو من الرئاسة اليهودية.

14وطلع يسوع ع الهيكل في نص العيد وصار يعلم هناك. 15فتعجبوا اليهود وصاروا يسألو: كيف هادا الزلمة بِعرف الكتب بدون ما حدا يعلمه؟ 16جاوبهن يسوع وقلهن: تعليمي من عند اللي بعتني مش من عندي. 17وإذا واحد بدو يطيع الله بقدر يقرر إذا التعليم مني أو من عند الله اللي بعتني. 18الإنسان اللي بُنشُر التعليم تبعو بدو يكسب أكبر تقدير لنفسه بس اللي بُطلب مجد اللي بعته فهو شخص مش غشاش وحقاني. 19مش موسى أعطاكم التوراة؟ طيب ليش فش حدا فيكو ماشي حسب التوراة وليش بدكو تقتلوني؟ 20جاوبوه الناس وقالو: لابسك شيطان. مين بدو يقتلك؟ 21رد يسوع عليهن وقلهن: عملت عمل واحد وكلكو عم تتعجبو. 22أعطاكو موسى وصية تطهير الأولاد. والوصية مش من موسى، هي من الآباء. وحتى في يوم السبت بتعملو التطهير. 23فإذا الإنسان بتطهَّر يوم السبت عشان يحافظ ع شريعة موسى غضبانين علي لإني شفيت إنسان بأكمله يوم السبت؟ 24احكموا بالعدل ومش بالمظاهر.

25فتساءلت جماعة من أورشليم: مش هادا اللي بدهن يقتلوه؟ 26هياه بحكي قدام الكل وفش حدا عم بعترض. مش يمكن الرؤسا عرفو إنه هو عنجد المسيح؟ 27بس هادا الزلمة منعرف أصله، المسيح فش حدا بعرف من وين رَح ييجي. 28وكان يسوع عم بِعلّم بالهيكل وقال بأعلى صوت عندُه: بتعرفوني وبتعرفو من وين أجيت! أنا ما بعتتش حالي. واللي بعتني حقاني وانتو بتعرفوهش. 29بس أنا بعرفه لإني أجيت من عنده وهو اللي بعتني. 30فصاروا بدهن يقبضو عليه بس فش حدا مد إيدو عليه لأنه وقته بعدو ما أجاش. 31وملان ناس آمنوا فيه وصاروا يقولو: يعني لما بيجي المسيح رَح يعمل آيات أكثر من هادا الزلمة؟

32وكانت الناس بين بعض وع السكت تحكي عن هاي الأشياء وسمعوهن الفريسيين فبعتت الرئاسة الدينية والفريسيين شرطة عشان يقبضوا ع يسوع. 33قلهن يسوع: رَح أكون معكو كمان شوي وبعدين رَح أروح لعند إللي بعتني. 34رَح تدورو علي ومش رَح تلاقوني ومش رَح تقدرو تروحو للمحل اللي بكون فيه. 35صاروا اليهود يحكو بينات بعض. وين رَح يروح وُ-وين منقدرش نلاقيه؟ معقول بدو يعيش في الغربة ويعلّم اليونانيين؟ 36شو قصدو لما قال: رَح تدورو علي ومش رَح تلاقوني ومش رَح تقدرو تروحو ع المحل اللي بكون فيه؟

37وفي آخر وأهم يوم من العيد وقّف يسوع وقال بأعلى صوت عندُه: إذا في حدا عطشان خليه ييجي لعندي ويشرب. 38وزي ما بتعلّم الكتب المقدسة، اللي بآمن فيّ راح تفيض منه أنهار من المي اللي بتحيي. 39كان يسوع عم بحكي عن الروح اللي رَح يستقبلوه الأشخاص اللي آمنوا بيسوع. لأنهن لحد إسه ما آخذوش الروح عشان يسوع بعدو مَتمجدش.

40وفي جماعة من الشعب لما سمعوا كلمات يسوع قالو: عنجد هادا هو النبي. 41وفي ناس تانيين قالو: هادا هو المسيح بس ردت جماعة تانية وقالت: شو المسيح بدو ييجي من الجليل؟ طبعا لأ. 42مش الكتاب المقدس بقول إنو المسيح بييجي من عيلة داود ومن بيت لحم بلد داود؟ 43واختلفت الناس مع بعض بسبب يسوع. 44وكان في ناس بدهن يقبضوا عليه بس فش حدا مد إيدو عليه.

45ورجعت الشرطة لعند الرئاسة الدينية والفريسيين وسألوهن: ليش ما جيبتوهُش؟ 46جاوبوهن الشرطة وقالولهن: ولا مَره سمعنا إنسان بحكي مثل حكيو. 47فقالولهن الفريسيين: ميكنش أنتو كمان لعب بعقلكو؟ 48وميكنش حدا من الرئاسة الدينية أو من الفريسيين آمنوا فيه؟ 49وبالنسبة للشعب اللي بِعرفوش التوراة فهني ملعونين. 50قالهن نيقوديموس اللي مرة زار يسوع، وهو واحد منهن 51يعني التوراة تبعتنا بتحكم ع الإنسان بدون ما تسمع منو بالأوّل وتعرف شو عمل؟ 52ردوا عليه وقالولو: بَرْكي إنت كمان من الجليل؟ دوّر وشوف عشان تتأكد إنو فش نبي من الجليل. 53وروّح كل واحد ع بيتو.

Currently Selected:

يوحنا 7: CGB

Highlight

Copy