لوقا 20

1وفي يوم كان يسوع عم بعلّم وببشّر الشعب في الهيكل فوقفوا رؤسا الكهنة وجماعة الكتبة مع الشيوخ 2وصاروا يقلولو: قلْنا بأنو حق عم تتصرف هيك ومين اعطاك هادا الحق؟ 3رد عليهن وقال: وأنا كمان عندي سؤال فَقُلولي: 4مين أعطى يوحنا الحق إنو يعمّد، السما ولا الناس؟ 5صاروا يتجادلوا بينات بعض ويقولو: إذا قلنا "السما" رَح يسألنا: طيب ليش مآمنتوش فيه؟ 6وإذا قلنا "الناس" رَح يرجمونا كل الناس بالحجارة لأنهن مقتنعين إنو يوحنا نبي. 7فقَلولُه منعرفش الجواب 8قلهن يسوع: وأنا كمان مش رَح اقلكو بأنو حق عم بتصرف هيك.

9وُبِدي يسوع يحكي للشعب هادا المتل. قال: في واحد زرع كرم عنب وأجّر الأرض لمزارعين وسافر لوقت طويل. 10ولما أجا وقت قطف العنب بعث شغيل للمزارعين عشان يوخد حصتُو من العنب. ضربوه المزارعين ورجعوه بدون ولا إشي. 11رجع الزلمة وبعت شغيل تاني وكمان هادا الشغيل ضربوه وبهدلوه ورجعوه بدون ولا إشي. 12بعتلهن كمان شغيل، جرحوا الشغيل التالت وزتوه بره. 13ففكر صاحب الأرض وقال: شو أعمل؟ ببعتلهن ابنـي المحبوب ويمكن يستحوا ع دمهن. 14لما شافو المزارعين الابن تشاوروا مع بعض وقالو: هادا صاحب الورتة. خلينا نقتلُه عشان تصير الورتة إلنا. 15فقتلوه وزتوه بريت الكرم. شو رَح يساوي فيهن صاحب الكرم؟ 16رَح ييجي ويقضي على هدول المزارعين ويعطي كرم العنب لناس تانيين. لما سمعوا هادا الكلام ردوا وقالو: الشر بره وبعيد. 17ركّز يسوع نظرُه عليهن وقلهن: طيب شو معنى النص المكتوب فيه: الحجر اللي فكروه البنائين مش نافع، طلع هو أهم حجر في الـمبنى؟ 18كل حدا بوقع على هادا الحجر بتفتت وأي حدا بوقع عليه هادا الحجر بطحنو طحن. 19فهموا جماعة الكتبة ورؤسا الكهنة إنو بحكي هادا المتل عليهن فجربوا يعتقلوه بس خافوا من الناس.

20وخلّوه تحت المراقبة وبعتو جواسيس عاملين حالهن مناح عشان يمسكوا عليه ممسك لأنهن بدهن يسلموه لأيدين الحاكم ويحطوه تحت حُكمه. 21وسألوه وقالو: يا معلم، منعرف إنك زلمة دُغري وصادق في تعليمك ومش موجهن وبتعلّم بصدق اللي بطلُبُه الله. 22مسموح ندفع ضريبة لإمبراطور روما واللا لأ؟ 23فهم يسوع إنهن عاملين مؤامرة عليه فقلهن: 24أرجوني الدينار الروماني. صورة مين هاي ومين كتب عليها هادا الكلام؟ قلولو: الإمبراطور. 25فقلهن: عشان هيك أعطو للإمبراطور اللي إلو واعطوا لألله اللي إلو. 26وم قدروش قدام الناس يمسكوا عليه ولا كلمة وتعجبوا من جوابُه وسكتوا.

27وأجا لعندو مجموعة من الصدوقيين وهنـي اللي بآمنوش بالقيامة. وسألوه 28وقالو: يا معلم، كتبلنا موسى "إذا واحد مات وترك أرملة بدون ولاد خلي أخوه يتجوزها ويخلّف نسل لأخوه" 29كان في سبع إخوة تجوز الأول ومات بدون مَ يخلّف 30فتجوزها التاني 31وبعدين التالت وصار نفس الإشي مع السبع إخوة. السبعة تجوزوها وماتو بدون مَ يخلفو. 32وبالنهاية ماتت المره. 33طيب بالقيامة مين بكون جوزها؟ لأنو السبعة تجوزوها! 34فقلهن يسوع: البشر في هادا العالم بجوزو وبتجوزو 35بس اللي استحقوا يكونوا في عالم القيامة من الأموات فش عندهن جيـزة وجواز. 36وببطل الموت يقدر يأثّر عليهن لأنهن بكونو مِتِل الملايكة وبكونو عيلة الله لأنهن عيلة القيامة. 37وبالنسبة لقيامة الموتى مش موسى أعلن لما حكى عن نبتة العليقة وسَمّا الرب "إله إبراهيم وإله اسحق وإله يعقوب". 38الله إله ناس أحياء مش أموات لأنهن بالنسبة إلو كلهن أحياء. 39فردوا جماعة من الكتبة وقالو: يا معلم، ما أحلى جوابك. 40وبعد هيك بطّل حدا يتجرأ يتحداه بأي سؤال.

41وسألهن يسوع: كيف ممكن يكون المسيح ابن داود؟ 42لأنو في كتاب المزاميـر، داود نفسُه بقول: قال الرب لربي اقعد ع يميني 43لحد ما أحط اعداءك تحت إجريك 44فإذا كان داود بناديه "رب" فكيف بكون ابنه؟

45وفي الوقت اللي كان كل الشعب عم بسمع قال يسوع لتلاميذُه: 46ديروا بالكو من جماعة الكتبة اللي بحبو يمشوا في الأسواق بأواعي العظمة وبكثرة السلامات. وبحبو يقعدوا في صدر البيت في العزومات وعلى كراسي الشرف في أماكن العبادة. 47ببلعو حق الأرملة وعشان يبينوا للناس بطولو الصلا. رَح يتعاقبو أكبر عقاب.

Currently Selected:

لوقا 20: CGB

Highlight

Copy