Rukasa 22

Maliyongo govanene gokudipaga Jesus

1Ano sipito soNomboroto da hana Muhahu, esi ava tumbura asi Paska, kwa kere pokusika mo. 2Makura vapristeli wovanene novalirongi womatjangwa kwa paparere evega lyokudipaga Jesus, nye kwa tjilire mbunga zovantu.

3Nye Satana ta hwilire mwaJudasa, ogu ngava tumbura asi Isikalyoto, gumwe powo murongo navavali. 4Judasa makura ta zi a ka liyonge kumwe novapristeli wovanene novakurona wovanomeni omu na mu va horwera. 5Awo eyi kwa yi haferere, makura tava lizuvhu va mu pe yimaliva. 6Judasa makura ta pura, ta papara evega lyewa a mu va horwere, pwa hana ndjorongani.

Ewapaiko lyaPaska

7Ezuva lyoNomboroto da hana Muhahu apa ava dipaga nzwigona zaPaska nalyo lina siki mo nye. 8Makura Jesus ta tumu oPeturusa naJohanesa, ta va tantere asi: “Zendeni mu ka tu wapaikire nondya daPaska, tu ka zi lye.” 9Varongwa vendi tava mu pura asi: “Oku ono hara asi yiko natu ka zi ku wapaikira kupi!” 10Age ta va limburura asi: “Apa nomu ka sika mositata, nomu ka gwanekera nomugara ana simbi kavaza komema. Tomu ka mu kwama dogoro nemembo eli na ka hwilira. 11Tomu ka tantera nturagumbo asi: ‘Murongi kuna tanta asi: Nzugo ezi nani ya lira Paska kumwe novarongwa vange zipi zo?’ 12Age na ka mu likida nzugo zonene zekeguru vana wapeke, omo yimo nye nomu ka zi wapaikira.” 13Awo makura tava zi, tava ka yi gwana moomu ga va tanterere Jesus, makura tava wapaike nondya daPaska.

Murarego gwaHompa

14Siruwo eyi sina siki mo, makura Jesus ta hingire kosiliro kumwe novapostoli. 15Age makura ta va tantere asi: “Ame kwa hara unene kulya Paska ezi kumwe none, ame simpe na hana kumona kanyando. 16Ame tani mu tantere asi, kapi ngani zi lya hena nampili nakauke, azo za hana kuzisikisa mo moUntungi waKarunga.” 17Age makura ta gusa nkinda, ta pandura Guhwe, ta tanta asi: “Guseni mu zi litambagure. 18Ame tani mu tantere asi, kapi ngani nwa yoyiyimwa yosindjembere nampili nakauke, awo Untungi waKarunga wa hana kuwiza.” 19Age makura ta gusa hena mboroto, ga mana kupandura Guhwe, makura ta zi bamagura, ta zi pe varongwa vendi, ta tanta asi: “Oru yiro rutu rwange nina kumupa. Omu yi rugane tomu diworokere nge po.” 20Va mana kulya, ta gusa hena nkinda, ta tanta asi: “Nkinda ezi egwanekero lyepe lyomohonde zange, ezi ngava mu tjisangera.

21“Nye tareni, ogu na horora nge, kuwoko kwendi pokuli paapa positafura kumwe noku kwange. 22MunwaMuntu ngava mu rugana moomu va yi mu pangera, nye ehudi lyogu nga mu horora, ehudi sa lyomu!” 23Awo makura tava lipuragere vene navene asi, yilye mwene ogu na ka yi rugana.

Gomunene po yige yilye

24Movarongwa kwa kere mo nonompata asi pwawo yilye munene po. 25Jesus age ta va tantere asi: “Ohompa wouzuni ou kupangera nomuhoko dawo, ano vapangeli kuvatumbura asi vakwafi wovantu. 26Nye one mwa ha kara ngoso. Mukurona po pokatji keni a fane ngwendi yige munona po, ano mupitisili a kare ngwendi mukareli. 27Munene po gogu a hingire a lye ndi, ndi gogu ana kumuruganena? Nani kapisi gogu ana hingire a lye? Nye ame pokatji keni ngwendi ni mukareli na kara.

28“One nyone mwa kara kumwe name nkenye apa momaheteko gange. 29Ame tani mu tumbwidire Untungi, moomu va u tumbwidira nge otate. 30One ngomu ka lya oku tomu nu kosiliro sange moUntungi wange, makura ngomu ka hingire poyipundi, ngomu ka pangure mazimo murongo nagavali gaIsraeli.”

Jesus ta horora epatano lyaPeturusa

31Jesus makura ta tanta asi: “Simoni, tara, Satana kuna hara unene a mu zere ngwendi moomu ava zere mahangu. 32Nye ame kuna ku kanderere asi epuro lyoge lya ha pwa mo. Ano apa ngo tengwira kwange, ngo koreke vakweni.” 33Simoni ta mu tantere asi: “Hompa, nina litokora kuza noge nomodorongo nomonomfa moomu.” 34Nye Jesus ta mu limburura asi: “Peturusa, tani ku tantere asi, masiku aga ganaina, sikondomboro aso sa hana kuziga, ove nare ono patana nge rutatu asi kapi wa diva nge.”

Nomfuro mbali

35Jesus ta va pura asi: “Apa na mu tumine one mwa hana ndjato zoyimaliva, nezi si zomorugendo, nononkaku si, mwa hepere yuma ndi?” Awo tava limburura asi: “Hawe, nayimwe si.” 36Age ta va tantere asi: “Ano nye ntaantani, ogu ga kara nondjato zoyimaliva, a zi guse, nogu gwezi zomorugendo nage ngosikwawo. Ogu ya pira, a randese po sikoverero sendi, a rande rufuro. 37Yeeyi ame tani mu tantere asi, mwange yimo ngayi ka sikilira mo eyi va tjanga nge asi, ‘Age kwa mu varwira kovazonaguli.’ Yeeyi nayinye eyi ya hamena nge, ngayi sika mo nye.” 38Awo tava mu tantere asi: “Hompa, nomfuro mbali dedi.” Age ta limburura asi: “Makura yi pwe.”

Jesus ta kanderere koNdundu zoMauzwe

39Jesus makura ta zi koNdundu zoMauzwe moomu ga yika. Varongwa vendi makura tava mu kwama. 40Jesus eyi ga wiza pevega olyo, ta va tantere asi: “Kanderereni neisi nomu za momaheteko.” 41Age makura ta linapuka nawo sinano sokuhura apa ali ka gwira emanya eli ana zuguma muntu. Makura a tongeke nongoro, ta kanderere, 42ta tanta asi: “Tate, nsene ono yi panda, ninka runyando oru ru pitakane nge. Nye kapisi moomu na panga ame, nye mpango zoge zi zike mo.” 43Muengeli ta tundu meguru ta mu monekere, makura ta mu koreke. 44Age makura tau mu gwana udigu wounene, makura ta kanderere unene. Ezazu lyendi kwa fene ngwendi mata gohonde gana kundokera pevhu.

45Eyi ga tunda pokukanderera, makura ta wiza kovarongwa vendi, kuyavagwana vana ponyoka morweguwo. 46Age ta va tantere asi: “Yinke muna rarere? Pindukeni mu kanderere, neisi nomu gwira momaheteko.”

Jesus tava mu kwata

47Haga za Jesus kuuyunga ngesi, va tara ko, mbunga zina kuwiza. Mugara ogu ngava tumbura asi Judasa, gumwe powo murongo navavali, kwa pitire komeho zawo, makura ta hedere Jesus asi a ka mu ncumite. 48Jesus ta mu tantere asi: “Judasa, MunwaMuntu yige ono kugombekesa kencumito ove?” 49Ava va mu umbilikidire, apa va mwene eyi yina kuhara kuhoroka, tava tanta asi, “Hompa, tu kamagure nonomfuro ndi?” 50Gumwe po makura ta kamuna mukareli gomupristeli gomunene, ta mu tete kutwi korulyo. 51Nye Jesus ta mu tanterere asi: “Hageka, makura!” Age makura ta gumu kutwi kogo mukareli, ta mu verura.

52Jesus makura ta tantere vapristeli wovanene novanomeni wontembeli nomasimbi aga ga mu wizilire, asi: “One kuna wiza ngwendi moomu ava wizire munamahaka nonomfuro nonomuramu? 53Amesi nkenye ezuva kumwe ngatu kareni montembeli, nye one nokukwata nge si. Nye oru ruveze rweni nononkondo donomundema.”

Peturusa ta patana Jesus

54Awo kwa kwatere Jesus, makura tava mu twara membo lyomupristeli gomunene. Peturusa kwa va kwamene age ure nawo. 55Eyi va hwameka mundiro pokatji keharango va ponge va hingire, Peturusa nage ta hingire nawo. 56Mukareli gumwe gomukadi ta mu mono age ana hingire komundiro, ta mu tarurura, ta tanta asi: “Mugara ogu nage naJesus nga kara‐kara.” 57Nye Peturusa ta mu patana, ta tanta asi: “Ove mukadi, kapi na mu diva ame ogo.” 58Kapi pwa pita siruwo, gumwe ta mu tantere hena asi: “Nogu nage mukwaawo.” Nye Peturusa ta patana asi: “Kapisi nyame, ove.” 59Eyi pana kupita siruwo sokuhura ngwendi povili ngoso, mugara gumwe hena ta yi koreke asi: “Yosili mugara ogu nendi ga kere, yeeyi nage Mugalireya.” 60Nye Peturusa ta limburura asi: “Ove mugara, eyi ono kuuyunga ame kapi na yi diva.” Poopo ngoso age simpe kuna kuuyunga, sikondomboro tasi zigi. 61Makura Hompa ta piruka a tare Peturusa, ano Peturusa ta diworoka nonkango daHompa edi ka mu tanterere asi: “Masiku ganaina aso sikondomboro sa hana kuziga, ove nare ono patana nge rutatu.” 62Peturusa makura ta pwaga, ta ka lira makurulira.

Jesus tava mu swaura oku tava mu toona

63Vagara ava va kwatere Jesus, kwa mu swawire oku tava mu toona. 64Awo makura tava mu manga sikayiwa komeho, tava mu toona kosipara, tava mu pura asi: “Muporofete ove, tu tantera asi yilye ogu ana ku toona!” 65Awo kwa mu rundaikire hena yininke yokumurundira.

Jesus komeho zosigongi somasimbi

66Ano eyi kwa sa, makura masimbi gomuhoko novapristeli wovanene novalirongi womatjangwa tava pongo, makura tava mu twara mosigongi sawo. 67Tava tanta asi: “Nsene asi nyove Kristusa, tu tantera!” Age ta va limburura asi: “Nampili ni mu tantere, one nokupura si. 68Ndi nsene ni mu pura, kapi mu limburure nge ndi asi mu sige nge ni ze. 69Kutunda apa MunwaMuntu nga ka hingira korulyo rwaKarunga goNonkondo nadinye.” 70Awo tava mu pura navenye asi: “Opo ngoso ove o MunwaKarunga ndi?” Age ta va limburura asi: “Muna yi tanta sa asi nyame.” 71Makura awo tava tanta asi: “Umbangi musinke hena tuna hepeni! Yeeyi tuna lizuvhire ko sa nye yomokana kendi.”

Currently Selected:

Rukasa 22: KWN

Highlight

Copy