Rukasa 23

Jesus komeho zaPiratusa

1Mbunga mudima makura tazi katuka zi tware Jesus kwaPiratusa. 2Awo tava mu rundire asi: “Mugara ogu tuna yi mu nongonona asi ta pukisa muhoko gwetu, age kusilika yokufutira hompa gwaRoma mutero, age hena kutanta mwene asi yige Kristusa, Hompa.” 3Piratusa ta mu pura asi: “Nani o hompa goVajuda ove?” Age ta mu limburura asi: “To tanta sa.” 4Makura Piratusa ta tantere vapristeli wovanene nombunga asi: “Ame kapi na gwana mo nzo momugara ogu.” 5Nye awo kuna kulivambangerera asi: “Erongo lyendi kuna kuretera vantu ndjorongani moJudeya mudima ha ga tamekera moGalireya dogoro nakooku.”

Jesus komeho zaHerodesa

6Piratusa kwa zuvha tupu Galireya, makura ta pura nsene asi Mugalireya ogo mugara. 7Ano apa ga zuvhire asi Jesus gomosirongo sepangero lyaHerodesa, makura ta tumu kwaHerodesa, age nage mweli moJerusarema mazuva ogo. 8Herodesa kwa hafere unene apa ga mwene Jesus, yeeyi age kwa kere siruwo sosinene neharo lyokumumona, morwa yinzi nga zuvhu yokumuhamena. Age hena kwa temenene asi na rugana po sitetu simwe a si mone. 9Herodesa kwa puragerere Jesus mapuro gomanzi, nye Jesus age teete zendi. 10Vapristeli wovanene novalirongi womatjangwa makura tava katuka nouradi va mu pe usima. 11Ano Herodesa novakwayita vendi eyi va mana kumusensa oku tava mu swaura, makura tava mu dwareke sikoverero sokuvaima, makura Herodesa ta mu tumu a tengure kwaPiratusa. 12Kutunda pezuva olyo, yipo va tundire oPiratusa naHerodesa va likwate ukwawo, yeeyi nare kwa linyengere.

Jesus tava mu tokwere nomfa

13Piratusa makura ta zigida vapristeli wovanene novapangeli nomuhoko va ponge, 14ta va tantere asi: “One kuna retere nge mugara ogu, yiyo muna tanta asi ta pukisa vantu. Ano apa nina mu pura‐pura one nyone ava, kapi nina gwana mo nzo zoyininke eyi muna kumurundaika mugara ogu. 15NaHerodesa si kapi ana ka gwana mo unzoni, yiyo ana mu tengwida kwetu. Nayimwe si ga rugana mugara ogu yokumutwaredesesa konomfa. 16Ame tani ninki tupu va mu sepure, makura ni mu sige a ze.”

( 17Sinene sipito soPaska, Piratusa yige kuvamangwilira nkwate zimwe.)

18Nye mbunga tazi zogomoka asi: “A fe, Barabasa yige no tu mangwilira!” 19Barabasa kwa mu tulilire modorongo morwandjorongani mositata nedipago. 20Morwa Piratusa kwa here kumangurura Jesus, yiyo ga uyungisire hena mbunga. 21Nye awo tava zogomoka asi: “Mu pampara kosilivindakano! Mu pampara kosilivindakano!” 22Age ta va tantere hena rwautatu asi: “Yinke ga zona yoyidona no? Ame kapi na gwana mo yuma yokumutwaredesesa konomfa. Ame tani ninki tupu va mu sepure, makura a ze.” 23Nye awo tava twikire ko unene kuzigira asi: “Jesus yige kumupampara kosilivindakano!” Makura ezigiro lyawo neli lyovapristeli wovanene tali fundu. 24Piratusa makura ta tokora asi yi kare po nye moomu vana yi harere. 25Piratusa makura ta va mangwilire nye ogu va tulilire modorongo morwandjorongani nedipago, googu va here po. Nye Jesus ta mu va pe moomu va yi harerere.

Jesus tava mu pampara kosilivindakano

26Pokutwara Jesus makura tava kanderekeda Simoni goMukireni, age ta tundu komapya. Makura tava mu twike silivindakano a si simbe konyima zaJesus.

27Age kwa mu kwamene mbunga zonene zovantu kumwe novakadi ava va tendanene va mu lire. 28Nye Jesus ta piruka ta va tantere asi: “One vakadona vaJerusarema, mwa ha lira nge ame, lilireni nyamweni novana veni. 29Yeeyi mazuva taga wiza, apa ngava tanta asi: ‘Verago nonganze nomazimo aga ga dira kuhampuruka nomavere aga ga dira kuzamweka rumwe.’ 30Makura ntani ngava tantera nondundu asi: ‘Tu gwireni!’ ano yindundugona asi: ‘Tu kudumikeni!’ 31Yeeyi omu vana kurugana ngesi sitji sositarara, sosikukutu nye yireru tupu?”

32Awo kwa twere ko hena vamahaka vavali, va ka va dipage kumwe naJesus. 33Apa va ka sikire pevega eli ava tumbura asi Evega lyoYikora, makura tava mu pampara kosilivindakano kumwe novamahaka, gumwe korulyo rwendi, ano ogu mukwawo korumoho rwendi. 34Jesus makura ta tanta asi: “Tate, va dongwenena po, yeeyi kapi vana diva eyi vana kurugana.” Awo makura tava ligavere yikoverero yendi pokuyininkira fungu‐fungu. 35Mbunga kwa sikamene zi tare. Vapangeli nawo tava mu swaura, tava tanta asi: “Age nga parura vamwe, a liparure sa nye mwene no, age no asi yige Kristusa, ogu ga horowora Karunga.” 36Vakwayita nawo kwa mu swauwire, tava wiza va mu retere vhinyu zoururu, 37tava tanta asi: “Nsene nyove hompa goVajuda, liparura sa nye nyamoge no!” 38Porweguru lyendi pwa kere sitjangwa va tjangere moRugereka nomoRuratina nomoRuhebeli asi: ‘OGU HOMPA GOVAJUDA.’

39Mumahaka gumwe ogu va pamparere nage, ta mu swaura asi: “Nsene asi nyove Kristusa, liparura sa nye no, o tu parure nose.” 40Nye mukwawo ta mu limburura, a mu nyokere asi: “Simpe nokutjira si ove Karunga, mpili ngomu tuna kara metokoro limwe tupu? 41Yetu ko ose uhunga, yeeyi ose kuna kutufutisira mo moyirugana yetu, nye age neisi ga rugana yoyidona.” 42Age makura ta tantere Jesus asi: “Hompa, diworoka nge nsene no za moUntungi woge.” 43Makura Jesus ta mu limburura asi: “Yosili nina kukutantera asi, naina to ka kara kumwe name moParadisa.”

Nomfa daJesus

44Ngwendi povili zomurongo nambali ngoso, ekurundema tali swikilikida uzuni naunye dogoro kovili zautatu. 45Ezuva tali sovagana, makura emukehe eli lya teta ntembeli monda tali bwaruka pokatji. 46Makura Jesus ta zigire unene asi: “Tate, mwenyo gwange tani gu gava momawoko goge!” Kwa yi tanta tupu eyi, makura tagu pu mo. 47Mupitisili govakwayita efere apa ga yi mwene eyi ya horokere po, ta fumadeke Karunga asi: “Yosili mugara ogu muhungami ga kere.” 48Vantu navenye ava va pongere pweyi, apa va mwene eyi ya horokere po, tava likwata kotuna, tava tengauka komambo. 49Vandambo vendi navenye kwa sikamene ure, novakadi ava va mu kweme kutunda koGalireya, va yi mwene yininke eyi.

Evhumbiko lyaJesus

50Pwa kere mugara gumwe edina lyendi Josefa. Age kwa tundire kositata soVajuda Aremateya. Age gosigongi somasimbi goVajuda, mugara gomuwa gomuhungami. 51Age kapi ga pandere magazaro gawo noyirugana yawo. Age kwa ndindilire Untungi waKarunga. 52Age makura ta zi kwaPiratusa, ta ka mu hundira simpu saJesus. 53Age makura ta si turura ko, ta si dingire mekehe lyezera. Makura ta ka si rangeka montoko ezi va tjokora memanya, ezi va dira kurangeka rumwe muntu. 54Alyo kwa kere ezuva lyomaliwapaiko, Esabata tali hara kuvareka.

55Ano vakadi ava ga tundire nawo Jesus koGalireya, tava kwama Josefa, makura tava ka mona ntoko nomu vana kusirangeka mo simpu sendi. 56Awo makura tava tengura va ka wapaike yidumba nomagadi, makura mEsabata tava pwizumuka moomu za tanta Veta.

Currently Selected:

Rukasa 23: KWN

Highlight

Copy