ମାତିଉ 11
11
ଜିସୁଲା ମାରି ବାପ୍ତିସ୍ମା ବିବେ'ଡା ଜଅନ୍ଲା
(ଲୁକ 7:18–35)
1ଜିସୁଲା ମାଇନା ବାରଲକ୍ ସିସ୍ୟଲେନ୍ବକ୍ କେନ୍ ଗୁଲାଇ ସୁଁସୁ ଅ'ଡମ'ସେକ୍ ମାଇ ଉନ୍ତ୍କୁରୁଂ ତୁର୍ସେକ୍ ମାପ୍ରୁନା ତୁମ' ଆରେମଲେ ଅମାକ୍ପୁଲେଇ ମାରି ମାପ୍ରୁନା ବଲ୍କବର୍ ଆଗୁଲାଇର ସୁଁସୁପୁଲେଇ ଜିଉଦିରେମଲେନା ପାଲ୍ପାଲ୍ ମୁନା' ଉଂଗମେବକ୍ ଉଇଗା' ।
2କିରିସ୍ଟଲା ଡେମ'କୁନୁଂ ଗୁଲାଇ ଅଂଅଁ'ସେକ୍ ବନ୍ଦିବକ୍ ଡୁକୁନୁଂ ବାପ୍ତିସ୍ମା ବିବେ'ଡା ଜଅନ୍ଲା ଆମାଇନା ସିସ୍ୟଲେ ଜିସୁନ୍ବକ୍ ବେନ୍ଟାୟ' । 3ସା' ମା'ଏ ଉଇସେକ୍ ଆଜିସୁଲା ସୁନ', “ମୁଇନ୍ଡା ରେମ ସାପ୍ତା ଡ'ସେକ୍ ସୁନ'କୁନୁଂଆଁ ନ ଇ? ଆରା'ଗେ ଆପାଲ୍ ଆଜାଏସା ସାପ୍ତା ଡ'ସେକ୍ ନେଇ ଜାଗ୍ବାର୍ ଡୁତା ଇ?” ଡ'ସେକ୍ ଅ'ଗଁସ୍ଲା'ଗା' ।
4-5ସା' ଜିସୁଲା ଆମା'ଏ ସୁନ', “ଜୁ, କାନାକାନିବାଇ' ରେମଲେ ବଲ୍ ଜୁଜୁ ଗଂଗୁତା; ସଟାସଟିବାଇ' ରେମଲେ ବଲ୍ ଉରିଂ ଗଂଗୁତା, କୁକୁମ୍ବାଇ' ରେମଲେ ବଲ୍ ଡେଂଗୁତା, ବଇରାବଇରିବାଇ' ରେମଲେ ବଲ୍ ଅଂଅଁ'ତା, ଗୁଇ'କୁନୁଂ ରେମଲେ ବୁର'ଗୁତା ମାରି ଆଗରିବ୍ରେମେ ମାପ୍ରୁନା ବଲ୍କବର୍ ସୁଁସୁଡେନ୍, ଡୁ'ତୁନ୍ଉ ମାମା ପେ ଆକେ ଜୁଲ'ତୁପେ ମାରି ଅଂଅଁ'ତୁପେ ଗୁତୁନ୍ ଗୁଲାଇ ଉଇସେକ୍ ଆଜଅନ୍ଲା ସୁଁ । 6ନିଂ ଡେମ'କୁନୁଂ ଗୁଲାଇ ଜୁଲ'ସେକ୍ ଆନିଂ ବିସ୍ବାସ୍ ଡେମ'କୁନୁଂ ମଅନ୍ତୁର୍ ଜାଜା ଆନିଂ ବଲ୍ ବିସ୍ବାସ୍ ଡେମ୍ତ ମା'ଏ କପାଲ୍ବାଇ' ରେମଲେ” ଡ'ସେକ୍ ସୁନ' ।
7ଜଅନ୍ନା ସିସ୍ୟଲେ ଆତ୍କୁରୁଂ ଡୁଂଡୁଂବେଲା ଆତା ଅବୁଦି ରେମଲେ ରୁନ୍କୁନୁଂବକ୍ ଜଅନ୍ନା ବିସୟ ଜିସୁଲା ସୁଁସୁ ମୁଲାୟ': ଆତା ଟାଂରାବାଟାପାଦାବକ୍ ପେ ଆଜା ଜୁଜୁ ଉଇକୁପେ? ଉଇଡାକ୍ ସାକ୍ନା ଅର୍ଡାକ୍ ମି ତଂରିତଂକେ ଜୁଲ୍ତା ଡୁ'ତୁନ୍ବାଇ' ରେମବକ୍ ଜୁଜୁ ଉଇକୁପେ ଇ? 8ଆରାକ୍ ଡ'ନା ମାରି ମିବାଇ' ରେମବକ୍ ଜୁଜୁ ଉଇକୁପେ? ଜୁ, ଅବୁଦି ଦାମ୍ନା ବଲ୍ଟା ସକା ଅଲୁ'କୁନୁଂ ଆମୁଇନ୍ଡା ଜୁଜୁ ଉଇକୁପେ ଇ? ଆରାକ୍, ଅବୁଦି ଦାମ୍ନା ବଲ୍ଟା ସକା ଅଲୁ'କୁନୁଂ ରେମଲେ ରାଜାଲେନ୍ ଡିଂଅଁବକ୍ଉ ଡୁତା । 9ଡୁ'ତୁନ୍ ଡ'ନା ମାରି ମିବାଇ' ରେମବକ୍ ପେ ଜୁଜୁ ଉଇକୁପେ? ଆବାବବାଦିଲେ ଜୁଜୁ ଉଇକୁପେ ଇ? ଅଁ'ଅଁ, ଆମାଇଉ ପେ ଜୁଜୁ ଉଇକୁପେ । ମାତର୍ ବାବବାଦିଲେନ୍କୁରୁଂ ଜଅନ୍ଲା ଅବୁଦି ମୁନା' ଡ'ସେକ୍ ନିଂ ଆପେ ସୁନ'ତିଂ । 10ଇନ୍ତେକନ୍ଡେ'କା ବାବବାଦିଲେ କେନ୍ ଜଅନ୍ନା ବିସୟଉ ମାପ୍ରୁନା ଉଲାକ୍ବକ୍ ଡି'କେନା ଲେକ୍ଲ'ବୁଂଅଁ'କୁ, ମା ଲେକ୍ଲ'କୁ ଡ'ନା:
“‘ନ ସୁସାପ୍ ସିଁସେଇଁନୁକ୍ କବର୍ ସୁଁସୁପୁଲେଇ ନିଂ ଆନିଂନା ରେମ ଆମୁଇନ୍ଡା ବେନ୍ଟାଇତିଂ ।
ମାଇ ସାକ୍ସେ'ଗା ନପୁଲେଇ କୁରୁଂ ବଲ୍ ଡେମ' ବୁଂତ’ ଡ'ସେକ୍ ଲେକ୍ଲ'ବୁଂଅଁ'କୁ ।”
11“ଆକେ ଦର୍ତନିବକ୍ ଆ'ନ୍ପନ୍ତେକ୍ ଜନମ୍ ଡେଂକୁନୁଂ ଗୁଲାଇରନ୍କୁରୁଂ ଆରେମଲେ ବାପ୍ତିସ୍ମା ବିବେ'ଡା ଜଅନ୍ଲା ଅବୁଦି ମୁନା'ବାଇ' । ଡୁ'ତୁନ୍ ଡ'ନାସା ସରଗ୍ରାଜିବକ୍ ଜା ଅବୁଦି ଡାଉବାଇ' ମାଇ ଜଅନ୍କୁରୁଂସା ଅବୁଦି ମୁନା'ବାଇ' ଡ'ସେକ୍ ନିଂ ଆପେ ସତଇସା ସୁନ'ତିଂ । 12#ଲୁକ 16:16#11:12 କେନ୍ 12 ପଦନା ଅର୍ତ ଗିରିକ୍ ସାମ୍ବକ୍ ବଲ୍ ଆଡୁତାବାପ୍ତିସ୍ମା ବିବେ'ଡା ଜଅନ୍ଲା ମାଇନା କାମ୍ ମୁଲାୟ'କୁନୁଂ ବେଲାବାଂସା' ଆ'ନ୍ପନ୍ତେକ୍ ଅବୁଦି ରେମଲେ ସରଗ୍ରାଜିବକ୍ ଗୁଗାଇପୁଲେଇ ଅବୁଦି ସେସ୍ଟା ଡେମ'କୁ । ଡୁ'ତୁନ୍ଉ ଜାଜାନ୍ବକ୍ ଅବୁଦି ବପୁ ଡୁତା ମା'ଏ ଅବୁଦିର ସରଗ୍ରାଜିବକ୍ ଉଇପୁଲେଇ ଅଜଗ୍ଡାକ୍ ଅ'ତେଇଁଡା'ଗୁତା । 13ମାସା'ଡ'ନା ଗୁଲାଇ ବାବବାଦିଲେ ସୁନ'କୁନୁଂ ମାରି ମାପ୍ରୁନା ନିୟମ୍ବକ୍ ଲେକ୍ଲ'କୁନୁଂ ଗୁତୁନ୍ ଗୁଲାଇ ଜଅନ୍ଲା ଡୁକୁନୁଂ ପନ୍ତେକ୍ ମା'ଏ ସରଗ୍ରାଜିନା ବିସୟଉ ସୁନ'କୁ । 14#ମାତିଉ 17:10–13; ମାର୍କ 9:11–13ସା' ଇନ୍ତେକନ୍ଡେ'କା ଏଲିୟଲାସୁଗ ମୁଇନ୍ଡା ସାପ୍ତା ଡ'ସେକ୍ ବାବବାଦିଲେ ସୁନ'କୁନୁଂ ଜା ଡ'ନା ଜଅନ୍ଲାଉ, ଗୁତୁନ୍ ବିସ୍ବାସ୍ ଡିନ୍ଡେମ୍ପୁଲେଇ ଆପେ ମୁନ୍ ଡୁକୁନା ପେ ବିସ୍ବାସ୍ ଡେମ୍ । 15ନିଂ ସୁନ'କୁନୁଂ ମା ଡ'ସେକ୍ ମାଗ୍ମାକ୍ପୁଲେଇ ଆପେ ମୁନ୍ ଡୁକୁନା ପେ ବଲ୍ ଅଂଅଁ'କୁଲା ।”
16ଜିସୁଲା ମାରି ଆମା'ଏ ସୁନ', “ଆନ୍ନା ଜୁଲିନ୍ ରେମଲେବକ୍ ନିଂ ମାବୁରଂ ଅ'ସରିଲ'ନା ଡେନ୍ତା? ମା'ଏ ମିବାଇ' ରେମଲେ ଡ'ନା ସଦର୍ବକ୍ ବକର'ସେକ୍ ଡୁକୁନୁଂ ଗୁବୁଲେସୁଗ । ମା'ଏ ମୁଇ ଡାଡିନ୍ରେମଲେ ଆମୁଇ ଡାଡିନ୍ରେମଲେବକ୍ ବକର'ସେକ୍ ଡି'କେନ୍ ସୁନ୍ତ:
17‘ନେଇ ପେପୁଲେଇ ପୁନେ' ପେଡ'ନେଇ
ମାତର୍ ପେ ଆମେତୁପେ ।
ନେଇ ପେପୁଲେଇ ମୁଇ ସିନ୍ତାବାଇ' ସିସେର୍ ସେର'ନେଇ
ମାତର୍ ପେ ଆଉକ୍ତୁପେ ।’ ”
18“ମାସା'ଡ'ନା ଜଅନ୍ଲା ମସୁନୁମ୍ ମଇନି' ଆକେ ଦର୍ତନିବକ୍ ସାକ୍ସେକ୍ ଡୁକୁ । ସା' ଆମାଇ ବୁତ୍ ସବ'ତା ଡ'ସେକ୍ ରେମଲେ ସୁନ'କୁ । 19ମାପ୍ରୁ ବେନ୍ଟାୟ'ସା' ସା'କୁନୁଂ ରେମନା ଉଁ'ଉଁ ଆକେ ସାକ୍ସେକ୍ ସୁମ'ଇଡ'ସେକ୍ ଡୁତା । ସା' ଜୁ, ମୁଇନ୍ଡା ଅବୁଦି ସର୍ନିବାଇ' ରେମ, ମାଇ ସିସ୍ତୁ ଲୁଲୁ'ରେମ୍ନା ମାରି ପାପ୍ବାଇ' ରେମଲେନା ବାଇଲକ୍ ଡ'ସେକ୍ ପେ ଆମାଇ ସୁନ'ତୁପେ । ମାତର୍ ଜାଜା ମାପ୍ରୁନା ବୁଦି ସବ'ସେକ୍ ଡୁତା ମା'ଏନ୍ ଜିବନ୍ବକ୍ ଜୁଲ'ନା ମା'ଏ ବାଂକୁନୁଂ ବୁଦି ବଲ୍ବାଇ' ବୁଦି ଡ'ସେକ୍ ନେଇ' ମାକ୍ତୁନେଇ' ।”
ବିସ୍ବାସ୍ ମଡିନେମ୍ ରେମଲେବକ୍ ବିସାର୍ନା ଡିନ୍ଡେମ୍ନା
(ଲୁକ 10:13–15)
20ତିର୍ଗି' ଜିସୁଲା ଇମ୍ବ'ନ୍ ଇମ୍ବ'ନ୍ ଉଂଗମେବକ୍ ଅବୁଦି କାବାକାବା ଡିନ୍ଡେମ୍ବାଇ' କାମ୍ ଡେମ' ଅସୁୟ'କୁ ଗୁତୁନ୍ ଉଂଗମ୍ନା ରେମଲେ ମା'ଏନା ପାପ୍କାମ୍ ଅଲିରାକ୍କାମ୍ ଗୁଲାଇ ଅଡକ୍ସୁଂଅଁ'ସେକ୍ ମାପ୍ରୁନ୍ବକ୍ ଆଆନ୍ଡେଇଁତାସା' ଆତୁନ୍ ଉଂଗମ୍ରେମେ ଜିସୁଲା ଗିସେକ୍ସେକ୍ ସୁଁସୁ ମୁଲାୟ' । 21ଅ କରାଜିନ୍ ଉଂଗମ୍ରେମ୍, ଅ ବେତ୍ସାଇଦାନା ଉଂଗମ୍ରେମ୍, ଆପେନ୍ ଉଂଗମ୍ନା ଆଜିଉଦିରେମଲେ ମାପ୍ରୁ ଅବୁଦି କସ୍ଟ ବେ'ତ । ମାସା'ଡ'ନା ପେନ୍ ଉଂଗମ୍ବକ୍ ନିଂ ଅବୁଦି କାବାକାବା ଡିନ୍ଡେମ୍ବାଇ' କାମ୍ ଡେମ'କୁନୁଂ ପେ ଜୁଲ'କୁପେସା'ଏସା ପେ ପେନ୍ ପାପ୍କାମ୍ ଅଡକ୍ସୁଂଅଁ'ସେକ୍ ମାପ୍ରୁନ୍ବକ୍ ଆଆନ୍ଡେଇଁତୁପେ । ମାତର୍ ଡୁ'ତୁନ୍ବାଇ' କାବାକାବାବାଇ'ନା କାମ୍ ସର ମାରି ସିଦନ୍ ଡ'କୁନୁଂ ଉଂଗମ୍ବକ୍ ନିଂ ଡେମ'ନାଏ ଗୁତୁନ୍ ଉଂଗମ୍ରେମ୍ ଜିଉଦିରେମଲେ ଆରାକ୍ ଡ'ନାସା ଗୁତୁନ୍ ଗୁଲାଇ ଜୁଲ'ସେକ୍ ମା'ଏ ନେଇ ପାପ୍କାମ୍ ଅଡକ୍ସୁଂଅଁ'ସେକ୍ ମାପ୍ରୁନ୍ବକ୍ ଆନ୍ଡେଇଁ ସାପ୍ତୁନେଇ ଡ'ସେକ୍ ଅସୁଇ'ପୁଲେଇ ବାସ୍ତାବୁରଂ ଅ'ରଇଁୟ'କୁନୁଂ ସକା ଅଲୁକ୍ସେ'ଗା ଉକ୍ସଂ ବ'ବ୍ବକ୍ ଉଇସୁର୍ସେକ୍ ଲେଇ'କୁଲାନା । 22ମାତର୍ ତିର୍ଗି'ସୁମଂ ମାପ୍ରୁ ଆରେମଲେ ବିସାର୍ନା ଡିନ୍ଡେମ୍ବେଲା ସର୍ ମାରି ସିଦନ୍ ଉଂଗମ୍ରେମ୍ବକ୍ସା ଅବୁଦି ଡନ୍ଡ୍କସ୍ଟ ବେ'ତ ମାତର୍ ଆପେ ଆଗୁଲାଇର ମା'ଏନ୍କୁରୁଂ ଅଦିକ୍ ଡନ୍ଡ୍କସ୍ଟ ବେ'ତ ଡ'ସେକ୍ ନିଂ ସୁନ'ତିଂ । 23ଅ କପର୍ନାଉମ୍ ଉଂଗମ୍ନା ରେମଲେ, ଆନେଇ ମାପ୍ରୁ ସରଗ୍ ପନ୍ତେକ୍ ଅଡାଇ'ତ ଡ'ସେକ୍ ପେ ଏତ୍ଗୁତୁପେ ଇ? ଆରାକ୍, ଆପେ ଗୁଇ'କୁନୁଂ ରେମଲେ ଡୁକୁନୁଂ ପାତାଲ ଡ'କୁନୁଂ ଜାଗା ପନ୍ତେକ୍ ଅ'ଜର'ସୁଂତ । ଜୁ, ପେନ୍ବକ୍ ଡେମ'କୁନୁଂ କାବାକାବା ଡିନ୍ଡେମ୍ବାଇ' କାମ୍ ସଦମ୍ ଉଂଗମ୍ବକ୍ ଡେମ'ନାଏ ଗୁତୁନ୍ ଉଂଗମ୍ ଆ'ନ୍ପନ୍ତେକ୍ ବଲ୍ ଡୁକୁଲାନା । 24#ମାତିଉ 10:15; ଲୁକ 10:12ମାତର୍ ତିର୍ଗି'ସୁମଂ ମାପ୍ରୁ ଆରେମଲେ ବିସାର୍ନା ଡିନ୍ଡେମ୍ବେଲା ସଦମ୍ ଉଂଗମ୍ନା ରେମଲେ ଡନ୍ଡ୍କସ୍ଟ ବାଂକୁନୁଂକୁରୁଂ ଅଦିକ୍ ପେ ଡନ୍ଡ୍କସ୍ଟ ବାମ୍ତୁପେ ଡ'ସେକ୍ ନିଂ ଆପେ ସୁନ'ତିଂ ।
ଜିସୁନ୍ବକ୍ ଉଇସେକ୍ ପୁନ୍ବାର୍ନା
(ଲୁକ 10:21–22)
25ଆଇ'ତୁନ୍ବେଲା ଜିସୁଲା ସୁନ', “ଅ ବା, ନଉ ସରଗ୍ନା ମାରି ଦର୍ତନିନା ପ୍ରବୁ । ନେଇ ଅବୁଦି ବୁଦିଗିୟାନ୍ ଡୁକୁନୁଂ ମାରି ଗୁଲାଇ ମାଗ'କୁନୁଂ ରେମଲେ ଡ'ସେକ୍ ଏତ୍କୁନୁଂ ରେମଲେନ୍କୁରୁଂ କେନ୍ ଗୁଲାଇ ରୁକ୍ସାଗ' ବୁଂଅଁ'ସେକ୍ ଗୁବୁଲେସୁଗବାଇ' ଡୁକୁନୁଂ ରେମଲେନ୍ବକ୍ ଅସୁୟ'ନସା' ଆନ ନିଂ ସୁନ୍ଡ୍ରତିଂ । 26ଅଁ'ଅଁ, ବା, ଡୁ'ତୁନ୍ଉ ଡିନ୍ଡେମ୍ପୁଲେଇ ଆନ ମୁନ୍ ଡୁକୁଗା'ସା' ନ ଡୁ'ତୁନ୍ଉ ଡେମ'ନ ।”
27 #
ଜଅନ୍ 3:35;
ଜଅନ୍ 1:18; 10:15 “ନିଂନା ବା ଗୁଲାଇ ଆନିଂ ବେଡ'ତା । ନିଂ ଜା ଡ'ସେକ୍ ନିଂନା ବାଉ ମାଗ'ତା ମାରି ଜାଏସା ଆମାକ୍ତ । ମାରି ନିଂନା ବା ଜା ଡ'ସେକ୍ ନିଂ ମାଗ'ତିଂ ମାରି ଆନିଂନା ବା ଆଜା ଅସୁଇ'ପୁଲେଇ ନିଂ ମୁନ୍ ଡେଂଗୁତିଂ ମା'ଏଉ ମାଗ'ତା ମାରି ଜାଏସା ମାଗ' ଆଡୁତା ।”
28“ଅ ଲାକାର୍କୁନୁଂ ମାରି ଅବୁଦି ସିନ୍ତାଲ'ରୁନ୍ତାଲ' ଡୁକୁନୁଂ ରେମଲେ, ପେ ଗୁଲାଇର ନିଂବକ୍ ସା'ବା । ନିଂ ଆପେ ପୁନ୍ଡାଇତିଂ । 29ନିଂନା ଞୁନଂ ପେନ୍ ବାଗ୍ବକ୍ ରିଂଆଁ ମାରି ନିଂକୁରୁଂ ପେ ମାକ୍, ମାସା'ଡ'ନା ନିଂ ଦରମ୍ରେମ୍ ମାରି ବଲ୍ରେମ୍; ପେ ଡୁ'ତୁନ୍ ଡେମ'ନା ପେନ୍ ଜିବନ୍ବକ୍ ପେ ପୁନ୍ବାର୍ ଗଂତୁପେ । 30ମାସା'ଡ'ନା ନିଂନା ଞୁନଂ ଅଲୁ ଡୁତା ମାରି ନିଂ ଡେମ୍ ଡ'କୁନୁଂ ଗୁଲାଇ ଞାପ୍ ଡୁତା ।”
Currently Selected:
ମାତିଉ 11: BFW
Highlight
Share
Copy

Want to have your highlights saved across all your devices? Sign up or sign in
CC BY-NC-ND 4.0