Rut 4
4
Boas tetu dale-uu
1Boas laa le damat ha'e tama laa sidadi i maderi le u'u. Lee vati u'u, mekei-naan noor ta maderi putu odi soru dale-uu. Raat-rata, mane iso ke buta Boas soru la Rut dale, u ta dia direitu ‘selo tagotu’ odi lebo kaben o Rut, maselo pio u'u. I Boas via u odi dale, “Ambou! Mai maderi udi le kade'e! A manara soru o kiti.” I ambou u'u mos la maderi le u'u. 2I Boas via mekei-naan noor atu sagulu pio sidadi u'u, odi sai testamunha odi dale, “Am-na'i roo mai maderi le kade'e odi se'i dale-uu kade'e.” I roo mos la maderi.
3Boas dale sai laa nii ambou ke dia direitu ‘selo tagotu’ Rut, dale, “Ambou, kiti veki nurat rae nuba iso ke kiti familia Elimeleke ni'i, ka? Muno, aipiil iso rae salae, Elimeleke laa rae Moab, i u mate le rae Moab. Agora nii vee faluk Noemi galelu vali pio kano'o mai see, i manara fa'an rae u'u. 4Pli'i ple'u, a mos nurat dale: bloi desi a nee panaa muno la ambou, pita ambou batu dia direitu odi ‘selo tagotu’ odi bua rae u'u. Pita ambou o Elimeleke tata iso. I see ambou manara ala rae u'u, dale mege, le mekei-naan noor o atu noor ver kade'e sii oe, odi roo sai magees testamunha. Mas se ta'i, dale mege le testamunha noor sii oe, pita a manara ala. Dara lob-loba ambou ta dia direitu muno. Mas se ambou bra'i, direitu u'u nee mai a.”
I ambou mataar, “Loba see. A taa ala.”
5I Boas mataar pita, “Te lebo kasiit, mas ambou tenki nurat, se aipiil iso kiti ala rae u'u pio tia Noemi, kiti mos tenki kaben o vine pio rae Moab, gala Rut. Pita Rut ta kaben o Elimeleke nii ana Malon ke mate see. Ple'u ambou tenki kaben o Rut, odi nee ana o ubu-ana le nii laki Malon ke mate see, i ple'u, nii riku-soi o rae u'u tee sai pio nii familia.”
6I ambou u'u mataar, “Se ple'u, tee lebo kasiit, a bra'i ala. Pita se a ala, kau riku-soi o kau ana sai ambou Elimeleke nii ana o nii ubu-ana. Ple'u, bloi desi a tee lebo ala. Bloi desi ali Boas ta selo tagotu rae u'u i kaben o vine u'u laa.”
7(Le tempu muno, aipiil iso atu Israel manara nee roo sii direitu ‘selo tagotu’ odi atu selo ala, atu u'u sai nii sinelus bai-seri i nee le atu selo. Iso u'u magees sinal iso tok de, atu u'u nee nii direitu.)#Deuteronomio 25:9
8I le tempu u'u, ambou u'u nee nii direitu laa Boas dale, “Kiti ta ala rae u'u,” i ambou mos sai nii sinelus bai-seri nee laa Boas.
9I Boas dale laa mekei-naan noor o atu ma'o mege vere u'u dale, “Kimi ma'o sai testamunha le aer iso kade'e. Direitu kade'e madou mai a see. A nee panaa mege dale, a ‘selo tagotu’ see Noemi nii riku-soi pio Elimeleke o nii ana mane noor, Kilion o Malon ke mate bali see. 10Kau manara telos ta rae kade'e, pita a mos kaben o vine atu pio rae Moab, Rut u'u, Malon nii vee faluk, pita a dia ‘direitu selo tagotu’ see. I kami ruu nii ana lebo sai Malon nii ana o ubu-ana. Magees plee kade'e, Malon nii familia o atu vere sidadi tee baligu nii gala. Kimi ta sai testamunha le aer iso kade'e.”#Deuteronomio 25:5-6
11I mekei-naan noor vere sidadi u'u o atu ma'o mege ke maderi putu le u'u mataar dale, “Loba riko! Kami eto riko o kami mat. Kami ta sai testamuha.
Vine iso ke tama le kiti umo,
NAI Maromak punu la u sai magees Rakel o Leia.
Pita atu Israel ma'o mai pio loruu sii ana o ubu-ana.
NAI Maromak punu kiti sai atu ha'e le Efrata,
i sai atu gala bloi le sidadi Belem.#Jenesis 29:31
12Negi ha'e la NAI Maromak nee le kiti ana pio vine vek nan sae u'u,
odi kimi ruu eto ana o ubu-ana dotu,
magees kiti tata-beinan Peres nii ana o ubu-ana,
Peres u'u ta Judá o Tamar nii ana.”#4:12:Tamar tee loos atu Israel. U kaben o Judaa odi nee ana o ubu-ana la nii laki iso ke mate see. Lise la Jenesis 38.
Boas o Rut eto ana
13I Boas kaben o Rut. Aipiil Boas o Rut mori putu, NAI Maromak nee bensa la loruu odi Rut lebo isi-ruu. I Rut maderi api ana mane iso.
14Maderi api bali ma'o, vine seri vere Belem nee panaa le Noemi dale,
“Kiti talo'o la NAI Maromak!
Pita NAI nee le kiti ubu-ana iso,
ana u'u ta ‘selo tagotu’ kiti.
Odi aer-airu ana u'u lebo sai atu ha'e le rae Israel.
15I ana u'u
veki punu kiti senti an vine vali
I ana u'u
veki posi mat le kiti aipiil iso kiti makei see!
Pita kiti vine veu iso ke maderi api kiti ubu-ana u'u,
matani bali nii domin le kiti see.
Vine veu iso u'u,
U bloi desi vali ana mane vou-ruu.”
16Noemi kasapu bali ana u'u i kuidadu magees nii ana riko.
17I vine noor vere sidadi u'u soru dale, “Agora Noemi magees dia vali ana mane.” I vine noor u'u nee gala le ana u'u ‘Obede’.
Aipiil iso Obede ha'e mai, u dia ana mane iso gala Jessé. I Jessé dia ana mane iso gala David, iso ke sai Liurai.
18Ple'u, ta ke tata-beinan Peres nii ana o ubu ana noor:
Peres nii ana ta Esron.
19Esron nii ana ta Raun.
Raun nii ana ta Aminadabe.
20Aminadabe nii ana ta Nason.
Nason nii ana ta Salmon.
21Salmon nii ana ta Boas.
Boas nii ana ta Obede.
22Obede nii ana ta Jessé.
Jessé nii ana ta liurai David.
Currently Selected:
Rut 4: BTKD
Highlight
Share
Copy
Want to have your highlights saved across all your devices? Sign up or sign in
Wycliffe Timor-Leste © 2025 Wycliffe Bible Translators Inc