মাথিয়াস 3

আসনান দাতা যোহানেসঘী প্রাচার

(মার্কুশ ১:১-৮; লুকাস ৩:১-৯, ১৫-১৭; যোহান ১:১৯-২৮)

1একাবাকি আসনান দাতা যোহানেস যিহুদীয়াঘী মরু খুরিনু বার্চাসকি ই কাত্থা বাঃআরকি প্রাচার নানা লাগিয়াস, 2“গুনহান্তী কায়ান কির্তা, কারনে মের্খা রাঃজী হেদ্দে আর্সিয়া কেরা!” 3ই যোহানেসঘী বারেনু নাবী যিশাইয়স বাচ্কা রাঃচাস,

“মরু খুরিনু অর্তোস গাডরারারকি আখতা লাগদাস,

‘নিম উর্বাসঘী বার্না ডাহারেন সাপড়া,

আসঘী বার্না ডাহারেন সোজহা নানা।#3:3 যিশাইয় ৪০:৩।’”

4যোহানেস উটঘী লোমতী কামেচ্কা কিচরী আত্তা লাগিয়াস আউর কাড়মানু চাপটাঘী পেটোয়ার আত্তা লাগিয়াস। আস বোকখো আউর জাংগালতা তিনী রাশি অনা মোঃখা লাগিয়াস। 5যিহুদীয়ান্তা, জেরুশালেমতা আউর যার্দান খাড়ঘী আশেপাশেন্তা হোর্মা আলার আসঘী হেদ্দে বারা লাগিয়ার। 6আর তাংগা তিংগা গুনহান তেংগেরারকি যার্দান খাড়নু আসনান হোওয়া হেল্লেরার। 7যোহানেস একাবাকি এরিয়াস যে, ঢের ফারীশীর আউর সদ্দুকীর আসঘী হেদ্দে আসনান হোওনা খাতরী বার্চার, আবাকী যোহানেস আরিন বাঃচাস, “নেররেঘী গুষ্ঠিন্তা আলারো! ধার্মেসঘী একা দান্ডে এত্তারকি বারা লাগি, আদিন্তী ভোংগারকি কালাগে ই লুর নিমাগে নে চিচ্চা? 8নিম যে গুনহান্তী কায়া কির্তাচ্কার, আদিঘী দাও খান্‌জপা নিমহা জীয়ানু এদা। 9নিম ইয়াদ আম্বা নানা যে, নিম আব্রাহামেসঘী গুষ্ঠিন্তা আল। এন নিমান বাঃআ লাগদান, ই পাখনা গুটঠিন্তীহু ধার্মেস আব্রাহামেসঘী গুষ্ঠিন কামআ অংগোদাস। 10মান্নেঘী মুলিনু টোংগে লাগাবাচ্কাম রাঃয়ী। একা মান্নেনু দাও খান্‌জপা মাল খান্‌জি, আদিন খান্ডারকি চিচ্চিনু লেভেরনা চিইনা মানো। 11নিম কায়া কির্তাচ্কার বাঃআরকি এন নিমান আম্মেনু আসনান চিইয়া লাগদান, মুন্দা নে এংগানতিহু সাওয়াংগিয়া, আস বারা লাগদাস। এন আসঘী নাগরানহু চেডনাঘী লায়েক মালদান। আস নেমহা বোলতানু আউর চিচ্চিনু নিমান আসনান চিওস। 12আসঘী ক্ষেক্ষানুম কেতের রাঃয়ী; আস তাংহা খান্‌জপা নাবনা আড্ডান পারিস্কার নানোস আউর খান্‌জপান ডোলনু খোড়োস, মুন্দা একাবাকিহু মাল তিভরী আন্নে চিচ্চিনু আস কুড়ডোন অল্দোস চিওস।”

যীশুস আসনান হোচ্চাস

(মার্কুশ ১:৯-১১; লুকাস ৩:২১-২২)

13আঃ সামাই যীশুস আসনান ইন্‌জিরনা খাতরী গালীলতি যার্দান খাড়ঘী ধাসড়েনু যোহানেস হেদ্দে বার্চাস। 14মুন্দা যোহানেস আসিন ই বাঃআরকি মানা নানা লাগিয়াস, “এংগানুম নিংহায় হেদ্দে আসনান ইন্‌জিরনা দারকার; আউর নিন বারেচ্কায় এংহা হেদ্দে?” 15আবাকী যীশুস যোহানেসিন বাঃচাস, “আক্কুন এন্নেম মানা চিইয়া, কারনে ধার্মে পাত্তাচ্কান ই লেখাম নামান পুরা নান্না দারকার।” আবাকী যোহানেস যীশুসিন আসনান চিইনা খাতরী রাজি মান্‌জাস। 16যীশুস একাবাকি আসনান হোওয়ারকি চোওচাস আবাকীম মের্খা খোল্লোরা কেরা। আঃ সামাই ধার্মেসঘী নেমহা বোলতাস পেরোয়াঘী লেখা এত্তার বারারকি আসঘী মাইয়া অক্কিয়া, 17আবাকী মের্খান্তী ই বাচান মেন্দরা, “ইসিম এংহায় চোনহা খাদ্দেস, ইসঘী মাইয়া এন ঢের খুশমারকান।”

Currently Selected:

মাথিয়াস 3: kru-Beng-BD

Highlight

Copy