လုကာ 4
4
အခန် (၄)
ကိုယ်တော်ယေရှု ခံဘာတအော်
(မဿဲ ၄:၁-၁၁။ မာကု ၁:၁၂-၁၃)
1ထွို့မဲ့ ကိုယ်တော်ယေရှုဒွို အိုဝေ့တိုနောင် ဉာဏ်ရောင်တော်တန်ခိုတော်ထွို့ အိုဂျော်ဒန်သျှီ့လိုးကု ကျိန်းချာဒါ့ထွို့မဲ့ နောင်ဉာဏ်ရောင်တော်တအွမ့်ခူထွို့ လေးလေ နွိုင့်ကန္တာရကု။ 2ခံချွော်မာရ်နတ်တအော် ခမ်လန်အွယ့်ကုပါ ကြာတွို့ မငြီးအန်လွီစီ့အာ့။ အွယ့်ငြီးဖုန်းကု အာဒွို အန်ဟတအန်တကျွိုကျွို အွယ့်ကြားမဲ့ အွယ့်ငြီးဖုန်း ထွိုင်ပွမ်းခါ့ ဘာတဝီထန်တာ။
3မာရ်နတ်အွယ့် “နားနုဲင့် မေဒေါင့် ပျန့်ဗွယ်ဖရာဖုခုအွယ့် ဒေါင့်လုံဒွိုးဘာ ဖီပျန့်ထန် တကိုးလုဲင်” ဒေါင့်ကိုယ်တော်နိန်းအွယ့်။
4အွယ့်ခါ့ ကိုယ်တော်ယေရှုအွယ့် “လိတ်ကျမ်ကုဒီ့ နေ့ထန်စေးကန်း ‘ပလူးဒွို ဆက်အိုမွမ့်တာနောင် တအန်အဘာတာဟို့ လီမေဟာ’ နိန်းအွယ့်” မိန့်နိန်းအွယ့်။
5ထွို့မဲ့ မာရ်နတ်အွယ့် ဟောင့်ထန်ကိုယ်တော် ခေါင့်နာ့ စွိုင်းလောင်ထွို့ နေ့ဖီလူးတွို့ ကန်ကားကအိုဒါ ကမ်ဖာလောင် အခိန်းအစင်ကု။ 6မာရ်နတ်အွယ့် “တန်ခိုအာဏာ ကားကအိုနောင် ဘုန်စည်စိမ်ဖုန်း ကဖီစေးကန်းဒါငါးဒွို ငါးဘာသဖီလမား ငါးဖီဒါ အွယ့်ကြားမဲ့ ငါးအီဖီတိုနား။ 7အွယ့်ကြားမဲ့ နားမေကုတ်ခူဝယ်ငါးအွယ့် ငါးအီဖီနား တာဒွိုးဟိုကားကအို” ဒေါင့်ကိုယ်တော်နိန်းအွယ့်။
8ဒေါင့်မာလဲ့ ကိုယ်တော်ယေရှုအွယ့် “အီဝယ်ဘာဘို့ ကပျန့်ဒါနားဗွယ် ဗွယ်ဖရာအပါးတိုးဟို့၊ ထမ်ဘာဘို့ အာအမှုတော်ဟို့ လိတ်ကျမ်ကုဒီ့ နေ့ထန်စေးကန်းနိန်းအွယ့်” ပြန်ဖရေချာဒါ့ မာရ်နတ်နိန်းအွယ့်။
9ဒါ့အလိုင် မာရ်နတ်အွယ့် ဟောင်လေးကိုယ်တော် ဂျေရုဆလင်ဝိန်းကုကအိုဒါ ဗိမာန်တော် ခမ်လန်အစွိုင်းစွက်ကုထွို့ “နားနုဲင့် မေပျန့်ယွမ်တို ဗွယ်ဖရာဖုခုလဲ့ အိုဒွိုးကုထွို့ တန်ဗုတ်လင်းလုဲင်။ 10ကွက်တဟနာမေဒေါင့်ဘာအွယ့် လိတ်ကျမ်ကုဒီ့
‘ဗွယ်ဖရာဒွို မိန့်ကွင်စေးကန်းတို လွှော်ဒေဝါဖုန်း
ဖီကကာကွယ်နား အွယ့်ကြားမဲ့ နားအီစာ့ဘာ လီမေဟာ။
11နားခင်ဖုန်း ဖီကျန်ခွိုင်းဘာမာနောင်လုံဖုန်းမာ
အာကာ အီဖို့ပင်စေးကန်းတိုနောင် အာကာကျွော့်ဖုန်း’ နေ့ထန်စေးကန်းနိန်းအွယ့် မေဟနောဝ်”
ဒေါင့်နိန်းအွယ့်။
12အွယ့်ခါ့ ကိုယ်တော်ယေရှုအွယ့်လဲ့ “ကျမ်ကုဒီ့ နေ့ထန်စေးကန်း ကျန်လ့ဟ နားဗွယ်ဖရာနိန်းအွယ့်” ပြန်မိန့်ဒေါင့်ချာဒါ့ နိန်းအွယ့်။
13မာရ်နတ်အွယ့်လဲ့ အော်ကိုယ်တော်အမျိုမျိုထွို့ အိုကိုယ်တော်ဆောင့် စစွာ့ထန်ကေ့ထွို့မဲ့ အိုပွိုင်းဒါ့ အခါခို။
ကိုယ်တော်ယေရှု တေမိုးတ့အမှုတော် ဂါလိလဲနယ်ကု
(မဿဲ ၄:၁၂-၁၇။ မာကု ၁:၁၄-၁၅)
14ထွို့မဲ့ ကိုယ်တော်ယေရှုအွယ့် ကြွာ့ကျိန်းချာဒါ့ ဂါလိလဲကန်ကု နောင်ဉာဏ်ရောင်တော်တန်ခိုတော်။ အာစတင်းဖုန်းဒီ့လဲ့ တွိုကျွက်လေတွို့ ရပ်ဒေသအရပ်ရပ်ကု။ 15ကိုယ်တော်ယေရှုအွယ့် ထွိုင်ဟိုစွမ့်တာ ဓမ္မာရုံဖုန်း#4:15 ဂျူးပလူးအမျာဖုန်း အိုစုဝေထွို့ ဆုတောင်ဝယ်တာ၊ ဖတ်ထွို့ နာချွော့် လိတ်ကျမ်ဖုန်းနောင် ဆုံဖြတ်တရာ ဖာစာရေကိစ္စဖုန်းတာ ကစုံဒါ အဆောက်အဦးကုခါ့ လူထုပရိသတ်ဖုန်း ကားကအိုအွယ့် အန်ဖရာလိုကာအာ။
နာဇရက်ဝိန်းစာဖုန်း ငြင်းပေလိုကာ ကိုယ်တော်
(မဿဲ ၁၃:၅၃-၅၈။ မာကု ၆:၁-၆)
16ထွို့မဲ့ ကိုယ်တော်ယေရှုအွယ့် ပြန်ကြွာ့ကျိန်းချာဒါ့ အာကဒူစို့ဒါ နာဇရက်ဝိန်းကု။ မငြီးဆောက်တေတာငြီးကု#4:16 မငြီးဆောက်တေတာငြီးဒွို ပျန့်တို မငြီးဘ့အန်နွူ့ငြီးနျန်းထွို့ ဂျူးပလူးမျိုဖုန်းတာ ပျန့်တို အပတ်ကု ကန်စာ့စွက်ငြီး။ မငြီးဆောက်တေတာဒွို အပတ်ကု ဂျူးပလူးမျိုအိုနာတာထွို့ ဝယ်ဘုရာခိန်း ပျန့်တို မငြီးအရေဒူ။ ကိုယ်တော်အွယ့် လေးတွိုလေး ဓမ္မာရုံကု နောင်အာအိုလေး တစေစေထွို့ အာအွယ့် အီဖတ်လိတ်ကျမ်တာ အာအိုထွိုင်ထန်တာ အွယ့်ကုပါ။ 17ပလူးအိုပွိုင်းဓမ္မာရုံစာအွယ့် ဖီလေး အရိယာဆူတော်ကောင်ဟေရှာယ လိတ်ကျမ်ထု အွယ့်ကြားမဲ့ ကိုယ်တော်အွယ့်ဘောင့်ထွို့ ဖတ်ထန်။
18လိတ်ကျမ်ကု ကတျန်စေးကန်းဒါဒီ့ “ဗွယ်ဖရာဉာဏ်ရောင်တော်ဒွို အိုကိုတိုနောင်ငါး။
ကွက်တဟနာမေဒေါင့်ဘာအွယ့် ဖီကဟိုဒေါင့်ဖီ ဆင်ရယ်စာဖုန်း မင်္ဂလာစတင်းခိုတာ
ဗွယ်ဖရာဒွို လွိုက်ရွေငါး အွယ့်ကြားမဲ့ဟနေ။
ဖီကကြော်ငြာဖီ ပလူးအိုခံ့ထောင်စာဖုန်း ဖီကလ့ တလွှတ်ငင်ချမ်စာခွင်၊
ပလူးမေးသျှီ့စာဖုန်း မေးဖီပြန်သျှီချာဒါ့နောင်
ပလူးအိုခံစာဘာ တခုဲင်ဆင်ရယ်စာဖုန်းဒွို အကြောင် မိုးလွှတ်လိထွို့ခရာတာ ဗွယ်ဖရာဒွို အန်ကြွ့လင်းလိထွို့ငါး။
19အခိန်းကာလဒွိုးဘာဒွို
ပျန့်တို ဗွယ်ဖရာဒွို နေ့ပြ အာမဟာကရုဏာတော်အခိန်းတို” နိန်းအွယ့်ဟနေ။
20ထွို့မဲ့ ကိုယ်တော်အွယ့် ထူ့ချာဒါ့ လိတ်ကျမ်ထွို့ ဖီချာဒါ့ ပလူးအပလားပလားထွို့ အိုနင်းလင်းတာခိန်း ပလူးကအိုဒါ ဓမ္မာရုံကုကားကအိုအွယ့်လဲ့ ဟွိုင့်ကြိုင်လိုကာကိုယ်တော်။ 21ထွို့မဲ့ ကိုယ်တော်အွယ့် ရှင်နေ့ဖီ အာကဖတ်နေ့ဒါ လိတ်ကျမ်ဖုန်းဒီ့ “နားက့ကဟွမ့်ဘာဒါ ကျမ်ပိုဒ်ဒွို ပျန့်ထန်ယွမ်လိထွို့ ဟန်ငြီးကု” နိန်းအွယ့်ဟနေ။ 22ပလူးကအိုဒါ အွယ့်ကုပါစာ ကားကအိုအွယ့် အန်ဖရာလိုကာကိုယ်တော်ထွို့ အိုဟွမ့်ဆန်လိုကာ ကိုယ်တော်ကမိန့်ဒါငိုထွို့ “အာဒွို ယောသပ်ဖုခုမေဟနောဝ်” အချင်ချင် ဒေါင့်လိုကာနိန်းအွယ့်။
23ကိုယ်တော်အွယ့်လဲ့ “နားက့ဒွို ‘ဘစီဆရာဒွို ကုကီချာတိုးနန်တိုးလုဲင်’ ဗွမ့်နောင်ငိုကပ်ကအိုစေးကန်းဒါနိန်းအွယ့် ‘ကပျန့်ဒါ နားဇာတိဝိန်းတိုး ဒွိုးကုပါလဲ့ မိုးမိုးနောင် က့အိုဟွမ့်ဘာဒါ နားကမိုးဒါ အမှုဖုန်း ကပေရနောင်ဝိန်းကုဒီ့လုဲင်’ အီဒေါင့်လိုကာငါးနိန်းအွယ့်” မိန့်နိန်းအွယ့်ထွို့
24ထွို့မဲ့ ကိုယ်တော်အွယ့် “ငါးမေဒေါင့်ဘာအမှန်ဒွို အရိယာဆူတော်ကောင် လမားမားခယောဝ်း ပလူးအာဇာတိဝိန်းတိုးကုစာဖုန်းဒွို လီလက်ခံကာဟာ။ 25ငါးမေဒေါင့်ဘာထိုင်ဒါ့ အမှန်ဒွို အရိယာဆူတော်ကောင် ဧလိယကျူကု ကန်ခေါင်တွို့တာ အန်တွမ့်နိန်းခွယ်အာ့ အွယ့်ကြားမဲ့ ကန်အကန်လူး အိုခံလိုကာဘာ တအိုဝီဒဏ်ခိန်းခါ့ အစ္စရေးကန်ကုဒွို မယ်မုဲင်ဖုန်း အိုဟေတန်။ 26ဗွယ်ဖရာဒွို အန်ကြွ့လေးဟ ဧလိယ ဖီကကူညီဖီ အစ္စရေးကုကအိုဒါ မယ်မုဲင်ဖုန်းဆောင့်ထွို့ ကြွ့လေးဖီဘို့ ဖီကကူညီဖီ ဇိဒုန်ဝိန်းဆောင့် ဇရတ္တဝိန်းကု ဂျူးပလူးမျိုလီမေဟဒါ မယ်မုဲင်အပလားဆောင့်။ 27အရိယာဆူတော်ကောင် ဧလိရှဲကျူခါ့လဲ့ အစ္စရေးကန်ကုအွယ့် နူနာရောဂါစာဖုန်း အိုဟေတန်။ ဒေါင့်မာလဲ့ လွို့ထွို့ ကပျန့်ဒါ ဆီးရီးယားကန်စာ ပလူးကနျန်းဒါ နေမန်အွယ့်ပလားထွို့#4:27နေမန်ဒွို ပျန့်တို ပလူးအိုဆီးရီးယားကန်ကု ဂျူးပလူးမျိုလီမေဟဒါ ပခူကန်လငါ့စာအပလားတိုဟနေ။ ကုဖီဟ လမားမား” မိန့်လင်းနိန်းအွယ့်။
28ထွိုင်ဟွမ့် ကိုယ်တော်ကဒေါင့်ဒါငိုဖုန်းထွို့ ပလူးအိုဓမ္မာရုံကုဖုန်း ကားကအိုအွယ့် သ့ဒွိုင်ထန်ယွမ်ကာတွို့တာထွို့ 29တထွိုင်ထန်ထွို့ ဝါစွာ့ထန်ကာကေ့ ကိုယ်တော် နာဇရက်ဝိန်းခူနောင့်ကုထွို့ အိုခေါင့်လှိုင်လောင်ထွို့ အီဖီထူလင်းတာ ဟောင့်လေးလိုကာ ကိုယ်တော် ဝိန်းကအိုစို့ဒါ ခေါင့်နာ့ကု။ 30ဒေါင့်မာလဲ့ ကိုယ်တော်အွယ့် ဖြတ်ပလူးကျွိုခါကုထွို့ စကြွာ့လေးကေ့။
ဝါစွာ့ထန် မိစ္ဆာတလီခိုဟ
(မာကု ၁:၂၁-၂၈)
31ထွို့မဲ့ ကိုယ်တော်အွယ့် လေးတွိုလေ ဂါလိလဲဒေသကု ကအိုဒါ ကပေရနောင်ကုထွို့ မငြီးဆောက်တေတာငြီးကု ဟိုစွမ့်ဖီပလူးဖုန်း ဗွယ်ဖရာတရာငို ဓမ္မာရုံကု။ 32ကိုယ်တော်အွယ့် ဟိုစွမ့်နောင် အခွင်အာဏာ အွယ့်ကြားမဲ့ ပလူးဖုန်းအွယ့် ဟွမ့်ဆန်ယွမ်လိုကာတွို့ အာစွမ့်တာဖုန်း။
33ဓမ္မာရုံကုအွယ့် ပလူးခံဘာ မိစ္ဆာတလီခိုဟ အိုပူစေးကန်းစာ အိုအပလား။ ပလူးအွယ့်ပလားအွယ့် 34“နာဇရက်ဝိန်းစာ ယေရှု၊ နား အင်းမိုးက့ တဟနာ။ နား အီလေယားကေ့ က့နောဝ်။ နားနုဲင့်ပျန့်လမာဒွို က့အိုသိ။ နားနုဲင့် ပျန့်တို ပလူးအိုဗွယ်ဖရာဆောင့်ထွို့ ကကြွာ့လင်းဒါ ပလူးစွိုင်းမြတ်စာတို” အိုဒေါင့်က့စင် ကိုယ်တော်နိန်းအွယ့်။
35အွယ့်ခါ့ ကိုယ်တော်ယေရှုအွယ့် “အိုကျွော်ကျွော်တာ၊ အိုအာကုစစွာ့ထန်ချန်းလုဲင်” ထွိုင်ဖီအမိန့်နိန်းအွယ့်ထွို့ အလိုင်ချင် မိစ္ဆာတလီခိုဟအွယ့် ဖီမိုးလင်ပိုင်း ပလူးအွယ့်ပလားဟန်လောင် ပလူးအမျာခါကုထွို့ မိုးစာဟထွို့ စစွာ့ထန်ကေ့။
36ပလူးကားကအိုဒါ ဓမ္မာရုံကုအွယ့်လဲ့ ဟွမ့်ဆန်လိုကာထွို့ “နုဲင့်ဒို ငိုနိန်းမာလေစီ့။ မေဝါစွာ့ထန်ထွို့မိစ္ဆာတလီခိုဟဒွို စစွာ့ထန်ဘာတွို့ အခွင်အာဏာနောင် တန်ခိုဒွို ချန်းအိုအို အာဆောင့်လုဲင်” အချင်ချင်ဒေါင့်လိုကာနိန်းအွယ့်။ 37ထွို့မဲ့ စတင်းဆိုင်နောင်ကိုယ်တော်ဖုန်းဒွိုလဲ့ ကျွက်ကျက်လေတွို့တာ ဒေသအဘာလူးကု။
ကုဖီ ပလူးစာ့ဟေတန်ဖုန်း
(မဿဲ ၈:၁၄-၁၇။ မာကု ၁:၂၉-၃၄)
38ကိုယ်တော်အွယ့် အိုဓမ္မာရုံကု စစွာ့ထန်ထွို့ ထွိုင်ကြွာ့လေးရှိမုန်ယွမ်ကုခိန်း ရှိမုန်သျှီ့အွယ့် အိုစာ့ဒူတာအွယ့်ကြား ပလူးဖုန်းအွယ့် ကျွူ့လျှောက်လိုကာကိုယ်တော် ဖီကကုဖီအာ။ 39အွယ့်ကြားမဲ့ ကိုယ်တော်အွယ့် လေးအိုထွိုင်တာ ပမွော်အွယ့်ပလားဆောင့်ထွို့ တစာ့ရောဂါ ဖီတမာကေ့တာ ထွိုင်ဖီအမိန့်ခါ့ အာအွယ့်ပြန်ခရွိုင်ထန်ချာဒါ့ထွို့ တထွိုင်စွူတွို့တာ အလိုင်ချင်ထွို့ အန်ထွူ့လေဖီ အာကာတအန်။
40ထွိုင်တွိုမွိုင်နွူးခိန်းခါ့ ဟောင့်လေလိုကာ ပလူးစာ့ အိုပျန့်ဒါ ရောဂါအမျိုမျိုစာဖုန်းဟေတန် ကိုယ်တော်ဆောင့် အွယ့်ကြားမဲ့ အာအွယ့် ဒင်ထန်ကျွော့် ပလူးစာ့ အပလားပလားကျားလောင်ထွို့ ကုတမာဖီကေ့ ရောဂါဝေဒနာဖုန်း။ 41မိစ္ဆာတလီခိုဟဖုန်းအွယ့်လဲ့ အိုပလူးဖုန်းကု စစွာ့ထန်ကာကေ့ထွို့ “နားနုဲင့် ပျန့်တို ဗွယ်ဖရာဖုခု” က့လိုကာနိန်းအွယ့်။ ကိုယ်တော်ယေရှုဒွို အကြောင်ပျန့် မေရှိယဒွို အာကာအိုသိ အွယ့်ကြားမဲ့ ကိုယ်တော်အွယ့် ရေးစေးကန်းကေ့အာကာ ဖီကျန်ဒေါင့်မာ နိန်းအွယ့်မာ။
ဟိုစွမ့်တာ ဂါလိလဲကန်ကု
(မာကု ၁:၃၅-၃၉)
42ဒါ့အငြီး မွိုင်ထွိုင်လီ့ခါ့ ကိုယ်တော်အွယ့် စစွာ့ထန်ကေ့ ရပ်အိုယားနောင်ပလူးကု။ ဒေါင့်မာလဲ့ လူထုဖုန်းအွယ့် စကွင်တွဲ့လိုကာထွို့ ထွိုင်မို့လိုကာခါ့ တောင်ပလန်လျှောက်လိုကာ အိုအာကာဆောင့် ဖီကျန်စစွာ့ထန်ကေ့မာတာ။ 43ဒေါင့်မာလဲ့ ကိုယ်တော်အွယ့် “ငါးဒွို ဝိန်းလငါ့ဖုန်းလဲ့ ဖီကစဟိုဖီပါ ကပျန့်ဒါမင်္ဂလာစတင်းခို ဗွယ်ဖရာသာသနာတော်#4:43ကဒေါင့်ဒါ ဗွယ်ဖရာသာသနာတော်ဒွို ဘာသရေနေ့တို ဗွယ်ဖရာတအုပ်စို ကမ်ဖာဟန်ယာလောင်ကုထွို့ နောင်အကျိုဆွက်အွယ့် ပျန့် တနာခံ အာတအုပ်စိုဖုန်း ကအိုဒါက့သသာကုခရာတိုဟနေ။ အကြောင်ခရာဖုန်း နောင်နိန်ဒွိုးတာမဲ့ ဗွယ်ဖရာဒွို အန်ကြွ့လင်းငါးဟနေ” မိန့်လေနိန်းအွယ့်။ 44ထွို့မဲ့ ကိုယ်တော်ယေရှုအွယ့် ဟိုဆွက်လေဒါ့တာ ယုဒကန်ကုကအိုဒါ ဓမ္မာရုံဖုန်းကု။
Currently Selected:
လုကာ 4: KVT
Highlight
Share
Copy
Want to have your highlights saved across all your devices? Sign up or sign in
Lahta Bible by Beyond Translation is licensed under Creative Commons Attribution-ShareAlike 4.0 License.
