ရှာန်လုကာ 9
9
အခန်း (၉)
သာဝကရှစ်နူဘန်းကလိန်းဟူးဒေတာတ်နာန်ဘင်းနာ
(ရှာန်မဿဲ ၁၀:၅-၁၅။ ရှာန်မာကု ၆:၇-၁၃)
1မာန်းရာတ်ရအာမှါခ့်ခါ ကိုယ်တော်ကား သာဝကရှစ်နူဘန်းကလိန်းဟူးဒေ ကော်ဘန်း အမဲဘင်းနနူတေဒေ ငါတ်ပူရန်ကွန်းယောက် ကမာရောဂါတေဒေ ကယာစိန်းဒင် တန်ခိုးအာဏာတေဒေ အီမှာ။ 2စီးမှါခ့်ခါ ကိုယ်တော်ကား အန်တာတ်တေ ဘုရားရှာန်ဘင်းသာသနာတော်အကြောင်းဒေ ဟောသကာဒင်ယောက် အနင်းမဲဘင်းဆိတ်တာတ်တေ နင်းမဲကွန်းအတွာတ် တာတ်နာန်မှာ။ 3ကိုယ်တော်ကား အန်တာတ်တေ “ဟနိမ်ခရီးလာန်ဒင်အတွာက် ဟမာန်ကဆဲ အလာရာန်ဆာ။ တောင်ဝှေ့၊ ရှီထောင်း၊ ယုတ်တင်အူဒင်တေ၊ ဖူးတေ၊ ဆာန်ဆုန်အပိုတေဒေ အလာရာန်ဆာ။ 4ဟာဘင်းမြို့ဘေစါန်းငှေါဒီ ဟနိမ်ဆာန်ကြီးမှါခ့်ခါ ဟနိမ်တေ ဟော်ဝါဟော်ဝါကား ဟိန်ကျေမ်းဘေနင်းဒင် ကြိုဆိုသဘန်းကား အန်ဘင်းမြို့ဟက် အပူမချန်း အန်ဘင်းကျေမ်းဘေ တည်းသကြီး။ 5အန်နိမ်စါန်းငှေါဒီ သမီဆာတာတ်ကား ဟနိမ်တေ အကြိုဆိုသဘန်းကား အန်တာတ်မြို့ဟက် ပူရီမှါခ့်ခါ အန်တာတ်တေ ဆတီးအီဘင်းအနေယောက် ဟနိမ်တာဘင်းဖုန်ဒေ ခါသအက်ပပဲကြီး#9:5 ဂျူးသမီဆာတာတ်အတွာတ်ကား တာဘေ ကပ်နင်းဘင်း ဖုန်တေဒေ ခါသအက်နာ ငှေါဘင်းကား အန်ဘင်းအရပ်ပင်း သမီဆာတာတ်ယောက် အပတ်သက်သဝါးညယ် အဓိပ္ပာယ်လူမှာ။ အဘင်းဘေ အန်နိမ်အွန်ဘင်းကား အန်ဘင်းမြို့ဘင်း သမီဆာတာတ်တေ ဘုရားရှာန်အပြစ်အီဘန်းကာ တပယ့်တော်တာတ်ယောက် ဟာနိမ်ဆဲ အဆိုင်သဝါးငှေါဘင်းတေ ကာလားထှာမှာ။” ညယ် မိန့်သမှာ။ 6အမှာတွာတ် အန်တာတ်ရီးဒါး အန်ဘင်းဟက် ပူဒီပဲဘန်းနာ ထိန်ငှါစီး ထိန်ငှါ လာန်ကြီးဘန်း ဘုရားရှာန်ဘင်းသာသနာတော်အကြောင်း ဆတာန်းမလဲတေဒေ ဟောသကာဘန်းနာ နေရာတိုင်းဘေရီးဒါး အနင်းမဲဘင်းသမီဆတာတ်တေ ကယာကွန်း ကုသအီမှာ။
ရှာန်းပလာန်ရှာဟေရုဒ်အဆေင်ဆာတ်ဖါတ်ပင်း
(ရှာန်မဿဲ ၁၄:၁-၁၂၊ ၆:၁၄-၂၉)
7အန်၌မှါခ့်ခါ ဂါလိလဲပြေတေ အုပ်ချုပ်သဘင်း ရှာန်းပလာန်ရှာဟေရုဒ်ကား ကိုယ်တော်ယေရှုအွန်ဘင်းနာတေဒေ သက်ပူမှါခ့်ခါ ဟိန်ကား အဆေင်တေဆာတ်ဖါတ်လာန်ဘဲမှာ။ ဟမာန်တွာတ်ငှေါဘန်းတာတ်ငှေါ စယ်ယာဘင်းသမီဆာတာတ်ကား ဝဲငွတ်ပင်းမာန်းဂလာအွန်အီဘင်း အိုးဆကြီးယောဟန်ကား ရှီးလားဟက် စားဟာန်းပိန်ညယ် ငှေါကြီးဘန်း 8အခြားဘင်း သမီဆာတာတ်ကား ပရောဖက်ဧလိယ ပြန်သဘန်းပေါ်သဟာန်းပိန်ညယ် ငှေါကြီးနိမ် စယ်ယာရီးဒါး မာအယ်ဘင်း ပရောဖက်တေနောင်းဟက် ဟော်ဝါ အဆာတ်စားဟယ်မှာညယ်လည်းကောင်း ငှေါနင်းကြီးဘင်းအတွာတ်ထှာမှာ။ 9အန်နိမ်စါန်းငှေါဒီ ရှာန်းပလာန်ရှာဟေရုဒ်ကား “ငါကား ယောဟန်ဟလာန်းတေ တွတ်စိန်းဒင် အမိန့်အီရီစီးဘန်းဘင်းအတွာတ် အရာတ် အန်နိမ်သက်ပူနင်းဘင်း ဆိတ်ကား ဟာဟမဲကား” ညယ် ငှေါဘန်း ကိုယ်တော်ယေရှုတေ ကတုံန်ကာတ်နင်းမှာ။
သမီဆာငါးထောင်တေနောပ့်ယုတ်ပင်း
(ရှာန်မဿဲ ၁၄:၁၃-၂၁။ ရှာန်မာကု ၆:၃၀-၄၄။ ရှာန်ယောဟန် ၆:၁-၁၄)
10သာဝကတာတ် ထုတ်ခါန်းရီမှါခ့်ခါ အန်တာတ်အွန်နီဘင်းနာတေဒေ ကိုယ်တော်ယေရှုပါ လျှောက်တာန်သကြီးမှာ။ စီးမှါခ့်ခါ ကိုယ်တော်ကား သာဝကတာတ်တေ၌ဆာကော်ဘန်း ဗက်ဇဲဒမြို့ပါလာန်ကြီးမှာ။ 11အန်နိမ်စါန်းငှေါဒီ အန်ဘင်းအကြောင်းတေဒေ သမီဆာကလောင်းတုံန်းတာတ်ကား သက်ပူကြီးမှါခ့်ခါ ကိုယ်တော်ဟလိန်းဘေ ဒီရာတ်ကြီးမှာ။ ကိုယ်တော်ရီးဒါး အန်တာတ်တေ ကြိုဆိုသဘန်း ဘုရားရှာန်ဘင်းသာသနာတော်အကြောင်းတေ ဟောသကာစီးဘန်းနာ အနင်းမဲဘင်းဆိတ်တာတ်တေဒေရီဒါး နင်းမဲကွန်းအွန်အီမှာ။
12ညနေစောင်းဒီဘင်းအတွာတ် သာဝကရှစ်နူဘန်း ကလိန်းဟူးတာတ်ကား ကိုယ်တော်ပါထုတ်ကြီးရီဘန်း “ကိုယ်တော်၊ အဘင်းအရပ်ကား သမီဆာထုတ်လားစစ်ပင်းအရပ်ထှာဘင်းအတွာတ် အဘင်းသမီဆအုပ်တုံန်းတေ အဘင်းပိုက်ပေငှါဘင်း ထိန်တေပါ တာတ်နာန်။ အန်တာတ်ကား တည်းသဒင်နရာယောက် ယုတ်တင်တေလိုသမှာ” ညယ် လျှောက်တာန်သမှာ။
13အန်နိမ်စါန်းငှေါဒီ ကိုယ်တော်ကား “ဟနိမ်၌ဆာ အန်တာတ်တေ ယုတ်တင်စားနူစားနာအီရာန်” ညယ် မိန့်သမှာ။ အန်၌မှါခ့်ခါ အန်တာတ်ရီးဒါး “အလေဘေကား ပေါင်မုန့်ရှရှာ ဟာဟုတ်ယောက် တာန်းငှါကလိန်းနူ၌ ငှါလား။ အလေကား အဘင်းသမီဆာဆွန်ကွန်းအတွာတ် ယုတ်တင်တေဒေ အမီးရာငှါးငှေါဘန်းကာ အလေဘေကား ယုတ်တင်တေကွန်းဂွန်း အဘိုဝါး” ညယ် လျှောက်သပဲမှာ။
14အန်ဘင်းဘေငှါဘင်း သမီဆာအုပ်တုံန်းကား ဟလောဝါတေဟိုင် ငါးထောင်နီးနီးငှါမှာ#9:14 သမီဆာငါးထောင် - အန်ဘင်းဘေ အီရှီတေ၊ ရှရှာတေဒေ အအန်သပဲရား။။ အန်၌မှါခ့်ခါ ကိုယ်တော်ကား ဟိန်တပယ့်တော်တာတ်တေ “တစ်စုတေ သမီဆာငါးဆယ်စီ ထုံးစိန်းယုတ်အာန်” ညယ် မိန့်သမှာ။ 15တပယ့်တော်တာတ်ရီးဒါး ကိုယ်တော်မိန့်သဘင်းအတိုင်း သမီဆတာတ်တေ ထုံးစိန်းယုတ်မှါခ့်ခါ သမီဆတာတ်ရီးဒါး ထုံးကြီးမှာ။ 16စီးမှါခ့်ခါ ကိုယ်တော်ကား ပေါင်မုန့်ဟာဟုပ်ယောက် တာန်းငှါကလိန်းနူတေ လာဘန်းနာ ဟမုခ်ပါငါန်းပန်းယူဘန်း#9:16 ဟမုခ် - ဟမုခ်စေါက်ပါ ငါန်းဘန်းယူမှာငှေါဘင်းနာကား ရွှေမြို့တော်ပါ မျှော်သဘန်းယူလားထှာမှာ။ ယုတ်တင်တေအတွာတ် ဘုရားရှာန်ဘင်း ကျေးဇူးတော်တေ ချီးမွမ်းသမှာ။ စီးမှါခ့်ခါ ကိုယ်တော်ကား ပေါင်မုန့်ယောက်တာန်းငှါဒေ စဲဘန်း သမီဆတာတ်တေ မံအီတင်အတွာတ် တပယ့်တော်တာတ်တေအီမှာ။ 17သမီဆာတာတ်အားလုံးကား ကျဲကွန်းယုတ်စီးမှါခ့်ခါ တပယ့်တော်တာတ်ကား ယုတ်လားကျန်သဘင်းနာတေဒေ ကွန်နာန်မှါခ့်ခါ ကုန်ဟာန်းရှစ်နူဘန်း ကလိန်းဟုတ်ဖိန်းကွန်း လူမှာ။
ပေတရုဝန်ခံသဘင်း
(ရှာန်မဿဲ ၁၆:၁၃-၂၀။ ရှာန်မာကု ၈:၂၇-၃၀)
18ရအာမှါခ့်ခါ ကိုယ်တော်ယေရှုဟော်ဝါဆာ ဆုစိန်နင်းမှါခ့်ခါ ကိုယ်တော်ဘင်း တပယ့်တော်တာတ်ရီးဒါး ကိုယ်တော်ယောက်အတူတူ ငှါနင်းကြီးမှာ။ အန်၌မှါခ့်ခါ ကိုယ်တော်ကား အန်တာတ်တေ “သမီဆာတာတ်ကား ငါတေဟာဟမဲညယ် ငှေါနင်းကြီးဒေ” ညယ် စိန်ယူရာန်မှာ။
19အန်တာတ်ရီးဒါး “စယ်ယာကား ကိုယ်တော်ဒေ ဝဲငွတ်ပင်းမာန်းဂလာအွန်အီဘင်း အိုးဆကြီးယောဟန် ရှီးလားဟက် အဆာတ်စားဟာန်းရီမှာညယ် ငှေါကြီးမှာ။ တခြားဘင်းဆိတ်တာတ်ကား ကိုယ်တော်ဒေ ပရောဖက်ဧလိယညယ်ရီး ငှေါကြီးမှာ။ စယ်ယာရီးဒါး မာအယ်ဘင်း ပရောဖက်တေနောင်းဟက်ဟော်ဝါ အဆာတ်စားဟာန်းရီမှာညယ်ရီး ငှေါနင်းကြီးမှာ” ညယ် လျှောက်တာန်သကြီးမှာ။
20အန်၌မှါခ့်ခါ ကိုယ်တော်ကား အန်တာတ်တေ “ဟနိမ်ရီးဒါး ငါတေ ဟာဟမဲညယ် ထာန်သကြီးဒေ” ညယ် စိန်ယူမှာ။ ပေတရုရီးဒါး “ကိုယ်တော်ကား ဘုရားရှာန်တာတ်နီဘင်း မေရှိယထှာမှာ” ညယ် ပြန်သဘန်း လျှောက်တာန်သမှာ။
21စီးမှါခ့်ခါ ကိုယ်တော်ကား အဘင်းအကြောင်းတေဒေ ဟာဟမဲတေဆဲ အငှေါကွန်းတင်းကြပ်သဘန်း တားမြစ်တာန်မှာ။
ရှီးလားခံသထှာကူဘင်းနာတေကြိုသဘန်းငှေါဘင်း
(ရှာန်မဿဲ ၁၆:၂၀-၂၈။ ရှာန်မာကု ၈:၃၀-၉:၁)
22ကိုယ်တော်ကား ဟိန်တပယ့်တော်တာတ်တေ “သမီဆာဆားတော်ကား ဒုက္ခတေကလောင်းတုံန်းခံသထှာဘန်း ဂျူးသမီဆာဟလာန်းစါတ်တုံန်းတေ၊ ဂျူးပုရောဟိတ်ဟလာန်းစါတ်တုံန်းတေယောက် ကျမ်းကျိန်းပေါ့ပင်း အိုးဆကြီးတာတ် ငြာမ်းသဘင်းတေ ခံသထှာကူ။ ဟိန်ကား သာန်းရှီးခံသထှာဘန်းနာ ဆွန်းရာတ်ထုတ်ပင်းမာန်းရာတ်ပေ အဆာတ်စားဟာန်းရီကူ” ညယ် မိန့်တော်မူသမှာ။
ကိုယ်ဘင်းတာပ်ပါးကပ်ပင်းတိုင်တေဖဲကြီး
23စီးမှါခ့်ခါ ကိုယ်တော်ကား သမီဆတာတ်တေ “ငါဘင်း တပယ့်တော်ထှာကာတ်ပင်း ဟာဟမဲစါန်းငှေါဒီ ကိုယ်ဘင်းအကျိုးဒေတက်ပန်း ကိုယ်ဘင်း တာပ်ပါးကပ်ပင်းတိုင်ဒေ မာန်းရာတ်၌တိုင်း ဖဲဘန်းနာ#9:23 ကိုယ်ဘင်းတာပ်ပါးကပ်ပင်းတိုင်ဒေ ဖဲငှေါဘင်းအဓိပ္ပာယ်ကား ကိုယ်တော်ယေရှုခေတ်ပေ တာပ်ပါးကပ်ပင်းတိုင်ဘေ ဆိန်ကလာပ်သန်းကပ်ပန်း သာန်းရှီးခံသထှာဘင်းဆိတ်ကား သာန်းရှီးခံသထှာကူဘင်းနေရာထုတ်ကွန်း တာပ်ပါးကပ်ပင်းတိုင်ဒေ ဖဲဘန်းလာန်ထှာမှာ။ အန်ဘင်းဘေ ကိုယ်တော်ယေရှုကား ဟိန်နောက်လိုက်ထှာကာတ်ပင်းဆိတ်ကား ဒုက္ခဆာန်းရဲယောက် ရှီးဒင်အဆာန်တာန့်ထှာနင်းထှာကူညယ် ငှေါလားထှာမှာ။ ငါဟလိန်းဘေ ဒီယာတ်ရန်ဘင်းဆိတ်ထှာထှာကူ။ 24ဟမာန်တွာတ်ငှေါဘန်းတာတ်ငှေါ ကိုယ်အဆာတ်တေ ကယ်သကာတ်ပင်း ဟာဟမဲစါန်းငှေါဒီ အန်ဘင်းဒေ ဆုံးရှုံးသကြီးထှာကူ။ အန်နိမ်စါန်းငှေါဒီ ဟာဟမဲစါန်းငှေါဒီ ငါအတွာတ်ယောက် ကိုယ်အဆာတ်တေ စွန့်သဘင်းဆိတ်ကား ဟာ၌မှါခ့်ခါစဲအရှီးဘင်းအဆာတ်တေ လူကူ။ 25ဟနိမ်ကားကမ္ဘာဟုတ်အာလုံးတေ ပိုင်သလူကြီးဒီဒါး ဟာ၌မှါခ့်ခါစဲအရှီးဘင်းအဆာတ်တေ ဆုံးရှုံးသထှာဘန်းကား ဟမာန်အကျိုးငှါကူတေ။ 26ဟဟာဟမဲစါန်းငှေါဒီ ငါယောက် ငါဘင်းတရားတူးတေဒေ ငြာမ်းသဘန်းကား သမီဆာဆားတော်ရီးဒါး ဟိန်ဘင်း အရောင်အဝါ၊ အဝါဘုရားရှာန်ဘင်းအရောင်အဝါ၊ မြင့်မြတ်သဘင်း မဲဘင်းဟမန်းတာတ် အရောင်အဝါတေယောက် ကမ္ဘာစောက်ပေ ကြွဒီမှါခ့်ခါရီးဒါး အန်တာတ်ကား နောက်လိုက်တေထှာမှာငှေါဘင်းဒေ ငါငြာမ်းသကူထှာမှာ။
27ဟနိမ်တေ ငါချီလားတေငှေါထှာဘန်းကား အဘင်းဘေစပ်နင်းဘင်း သမီဆာစယ်ယာကား ဘုရားရှာန်ဘင်းသာသနာတော်တေ အကတုံန်လူညယ် ရှီးကလားအချီရား” ညယ် မိန့်တော်မူသမှာ။
ကိုယ်တော်ယေရှု ပုံစံပြောင်းသလာန်ဘဲဘင်း
(ရှာန်မဿဲ ၁၇:၁-၈။ ရှာန်မာကု ၉:၂-၈)
28အန်နိမ်မိန့်သစီးဘန်း ကောင်ရာတ်မှါတ်မှါခ့်ခါ ကိုယ်တော်ကား ပေတရု၊ ယောဟန်ယောက် ယာကုပ်တာတ်တေ ကော်ဘန်း ဆုစိန်ဒင် ကယာစောက်ပါ ကြွသကြီးရာန်မှာ။ 29ကိုယ်တော်ဆုစိန်နင်းမှါခ့်ခါ ကိုယ်တော်ဘင်းမန်းပုံစံတေ ပြောင်းဒီဘန်းနာ ဟိန်ဘင်း ဆာန်ဆုန်တေရီးဒါး အကြီးကျယ်လုံးဘန်း ရားနင်းနာန်မှာ။ 30စီးမှါခ့်ခါ ပရောဖက်မောရှေယောက် ပရောဖက်ဧလိယတာတ် ဗြုန်းစားတုံန်းပေါ်ဒီဘန်း ကိုယ်တော်ယောက်အတူတူ တူးသပေါက်ကြီးမှာ။ 31အန်တာတ်ကား ဘုရားရှာန်ဟက်ဒီဘင်း အရောင်အဝါတေယောက်ယားဘန်း အမှါတ်ကြီ ကိုယ်တော်ကား ဂျေရုဆလင်မြို့ဘေ ရှီးခံသဘန်း ဘုရားရှာန်ဘင်း အလိုတော်တေ ပြေ့စုံမှန်ကန်ဒီကဘန်းဘင်းတေ ကိုယ်တော်ယေရှုယောက်အတူတူ ငှေါနင်းကြီးမှာ။ 32အန်ကားအချိန်ဘေ ပေတရုယောက် တခြားတပယ့်တော်ကလိန်းဟူးကား အကြီးကျယ် အေ့ပ်ပါတ်ပွတ်နင်းကြီးမှာ။ အန်နိမ်စါန်းငှေါဒီ အန်တာတ်မင်နီမှါခ့်ခါ ကိုယ်တော်ယေရှုဟက် အရောင်အဝါတေ ပူနင်းဘင်းနာတေ ကတုံန်ကြီးမှာ။ အန်တာတ်ကား ကိုယ်တော်ယောက်အတူတူ စပ်ပန်းနင်းကြီးဘင်း သမီဆာကလိန်းဟူးတေရီးဒါး ကတုံန်ရာန်မှာ။ 33စီးမှါခ့်ခါ ပရောဖက်မောရှေယောက် ဧလိယတာတ်ကား ကိုယ်တော်ယေရှုဟက် ပူလာန်ဘဲကြီးမှါခ့်ခါ ပေတရုကား ကိုယ်တော်ဒေ “အိုးဆကြီး၊ အလေ အဘင်းဘေ ငှါနင်းထှာလားကား အကြီးကျယ်မဲမှာ။ အလေ ကိုယ်တော်အတွာတ် တဲဟုတ်အာ၊ ဧလိယအတွာတ် တဲဟုတ်အာ၊ မောရှေအတွာတ် တဲဟုတ်အာ စုစုပေါင်း ဆွန်းဟုတ်စာပန်းအီကူ” ညယ် လျှောက်တာန်သမှာ။ အန်နိမ်စါန်းငှေါဒီ ဟိန်ကား ဟိန်ကောက်ဟိန် ဟာနိမ်ငှေါရာန်မှာငှေါဘင်းနာတေ အမိန်းရှာတ်ခါး။
34ပေတရု အန်နိမ်လျှောက်တာန်သနင်းမှါခ့်ခါ ဟာန်းချီတုံန်းကား ပေါ်ဒီဘန်း အန်တာတ်တေ အွပ်ပန်းနင်းဆွန်နာန်မှာ။ အန်တာတ်ကား ဟာန်းချီအရိပ်ပေ ထုတ်အာန်မှါခ့်ခါ စါတ်နင်းကြီးရာန်မှာ။ 35အန်၌မှါခ့်ခါ ဟာန်းချီဟက် “အဘင်းဆိတ်ကား ငါမယ်ပဲဘင်း ငါဆာထှာမှာ။ ဟိန်တူးဒေသက်ကြီး” ညယ် ဆကလားပူရီမှာ။ 36အန်ဘင်းဆကလားပူစီးမှါခ့်ခါ အန်တာတ်ကား ကိုယ်တော်ယေရှုတစ်ပါးတည်းတေဆာ ကတုံန်ကြီးဘန်းလား။ အန်တာတ်ကား အန်တာတ်ကတုံန်ရီဘင်းအကြောင်းတေဒေ အန်ဘင်းမာန်းရာတ်တေမှါခ့်ခါ#9:36 အန်ဘင်းမာန်းရာတ်တေ - အန်ဘင်းမာန်းရာတ်တေငှေါဘင်းနာကား ကိုယ်တော်ရှီးလားဟက် အဆာတ်စားဟာန်းရီဘင်းအချိန်ထုတ်ကွန်းဒေ ငှေါလားထှာမှာ။ ဟာဟမဲတေစဲ ဟမာန်စဲအငှေါညယ် ယူရှီရှီနင်းကြီးမှာ။
အမဲဘင်းနနူဒေငါတ်ပူပင်း
(ရှာန်မဿဲ ၁၇:၁၄-၁၈။ ရှာန်မာကု ၉:၁၄-၂၇)
37နောက်မာန်းရာတ်မှါခ့်ခါ ကိုယ်တော်ယေရှုယောက် တပယ့်တော်ဆွုန်ဟူးတာတ်ကား ကယာစောက်ဟက် ဆပ်နီမှါခ့်ခါ သမီဆာကလောင်းတုံန်းကား ကိုယ်တော်ဒေ ကတုံန်တင်အတွာတ် ဒီကြီးမှာ။ 38စီးမှါခ့်ခါ သမီဆာကလောင်းတုံန်းနောင်းဟက် ဟော်ဝါကား ကိုယ်တော်ဒေ “အိုးဆကြီး၊ ငါဆာဒေ ယူအီတင်အတွာတ် ငါတောင်းပါန်သမှာ။ ဟမာန်တွာတ်ငှေါဘန်းတာတ်ငှေါ ဟိန်ကား ငါဘေငှါဘင်းဆာဟော်ဝါရှာ ထှာဘင်းအတွာတ် ထှာမှာ။ 39ဟိန်ကား အမဲဘင်းနနူကပ်ပန်းနင်းဘင်းအတွာတ် ဗြုန်းစားတုံန်းငှေါနိမ် အလန့်တကြား ဟာတ်ခါမှာ။ အန်ဘင်းအမဲဘင်းနနူကား ဟိန်လာန်တစ်ကိုယ်လုံး ဆန်သပန်းနာ ဆတွန်းနောင်းဟက် ဆပေါ့တေရီးဒါး ပူရီကွန်းအွန်ဟာမှာ။ အန်ဘင်းအမဲဘင်းနနူကား ဟိန်ဒေ အကြီးကျယ်ကနာစိန်းဘန်း အမြဲတမ်းငှေါနိမ် ဆာန်ဘန်းနင်းမှာ။ 40ငါကား ကိုယ်တော်ဘင်းတပယ့်တော်တာတ်တေ အန်ဘင်းအမဲဘင်းနနူဒေ ငါတ်ပူစိန်းဒင် တောင်းပန်သောဒီဒါး အန်တာတ်အအွန်ရန်နား” ညယ် ဟာတ်ပန်း လျှောက်တာန်သမှာ။
41အန်၌မှါခ့်ခါ ကိုယ်တော်ကား တပယ့်တော်တာတ်တေ “အို ယုံကြည်သလားအဘိုဘန်း အမဲဘင်းအပြစ်တေယောက် ဖိန်းနင်းကြီးဘင်းသမီဆတာတ်။ ငါကား ဟနိမ်ယောက်အတူတူ ဟာနယ်မှါခ့်ကွန်းနင်းဘန်း ဟနိမ်တေ သည်းခံသထှာယုတ်ကူတေ။ စီးမှါခ့်ခါ ကိုယ်တော်ယေရှုကား အန်ဘင်းဆိတ်တေ နာန်ဘင်းဆာတေ ငါပါကော်ရီ” ညယ် မိန့်သမှာ။
42အန်ဘင်းရှရှာဒီနင်းမှါခ့်ခါ အမဲဘင်းနနူကား ဟိန်ဒေ ကာစောက်ပေပေါ်စိန်းဘန်း လာန်တစ်ကိုယ်လုံးတေ ဆန်သစိန်းမှာ။ အန်နိမ်စါန်းငှေါဒီ ကိုယ်တော်ရီးဒါး အမဲဘင်းနနူဒေ အန်ဘင်းရှရှာဟက် ပူလာန်ဘဲကွန်း အမိန့်အီရာန်မှာ။ ဟိန်ကား ရှရှာဒေ မဲဟာန်းရီကွန်းကုသအီစီးဘန်း ဟိန်အဝါပါ အပ်သဟာန်းရာန်မှာ။
ရှီးထှာကူဘင်းနာဒေဒုတိယအကြိမ်မိန့်သဘင်း
(ရှာန်မဿဲ ၁၇:၂၂-၂၃။ ရှာန်မာကု ၉:၃၀-၃၂)
43သမီဆ၌တိုင်းရီးဒါး ဘုရားရှာန်ဘင်း ကြီးမြတ်သဘင်းတန်ခိုးတော်တုံန်းတေဒေ ကတုံန်ကြီးလူဘင်းအတွာတ် အံ့ဩသနင်းကြီးမှာ။ ကိုယ်တော်ယေရှုအွန်ဘင်းနာတေဒေ သမီဆာတေကား အံ့ဩသဘန်းနင်းကြီးမှါခ့်ခါ ကိုယ်တော်ကား ဟိန်တပယ့်တော်တာတ်တေ 44“ဟနိမ် ငါငှေါဘင်းနာတေဒေ အာရုံစိုက်သဘန်းသက်ကြီး။ သမီဆာဆားတော်ကား ရန်သူတာတ်သဟူးပါ အပ်သလားခံသထှာကဘန်း” ညယ် မိန့်တော်မူသမှာ။ 45အန်နိမ်စါန်းငှေါဒီ တပယ့်တော်တာတ်ကား ကိုယ်တော်ငှေါဘင်းတူး အဓိပ္ပာယ်ဒေ အနားလည်သကြီးရား။ ဟမာန်တွာတ်ငှေါဘန်းတာတ်ငှေါ အန်ဘင်းတူးငှေါကာတ်ပင်းတေ အန်တာတ်အနားသလည်ရန်ကွန်း ကဆွန်းပဲဘင်းအတွာတ်ထှာမှာ။ အန်တာတ်ကား အနားလည်သကြီးဒီဒါး ကိုယ်တော်ဒေ အစိန်ယူကြီးစာတ်အား။
အကြီးမြတ်ဆုံးသမီဆာ
(ရှာန်မဿဲ ၁၈:၁-၅။ ရှာန်မာကု ၉:၃၃-၃၇)
46စီးမှါခ့်ခါ တပယ့်တော်တာတ်ကား အန်တာတ်နောင်းဟက် ဟာဟမဲကား အကြီးမြတ်ဆုံးထှာမှာငှေါဘင်းနာတေ စသဘန်းငြာမ်းသနင်းကြီးမှာ။ 47ကိုယ်တော်ကား အန်တာတ်ဟမာန်တေ တွေးသနင်းမှာငှေါဘင်းနာတေ မိန်းရှာတ်ခါဟွန် ရှရှာဟော်ဝါတေကော်ဘန်း ဟိန်ပိုက်ပေ စပ်စိန်းယုတ်မှာ။ 48စီးမှါခ့်ခါ ကိုယ်တော်ကား ဟိန်တပယ့်တော်တာတ်တေ “ငါအတွာတ်ယောက် အဘင်းရှရှာနိမ် သမီဆဒေ လက်ခံသဘင်းဟာဟမဲစါန်းငှေါဒီ ငါတေရီးဒါး လက်ခံသဘင်းဆိတ်ထှာမှာ။ ငါတေလက်ခံသဘင်း ဟာဟမဲစါန်းငှေါဒီ ငါတေတာတ်နီဘင်း ဘုရားရှာန်ဒေ လက်ခံသဘင်းဆိတ်ထှာမှာ။ ဟမာန်တွာတ်ငှေါဘန်းတာတ်ငှေါ ဟနိမ်နောင်းဟက် ကိုယ်ကောက်ကိုယ်ကာ နိမ့်ချသဘင်းဆိတ်ကား အကြီးမြတ်ဆုံးသမီဆာထှာမှာ” ညယ် မိန့်တော်မူသမှာ။
ဟနိမ်တေ အဆန့်ကျင်သဘင်းဆိတ်
(ရှာန်မာကု ၉:၃၈-၄၀)
49စီးမှါခ့်ခါ ယောဟန်ကား “အိုးဆကြီး၊ အိုးဆကြီးနာမယ်တေ နပ်ပန်း အမဲဘင်းနနူဒေ ငါတ်နင်းဘင်းသမီဆာဟော်ဝါတေ အလေကတုံန်ရီမှာ။ အလေဟိန်ဒေ တားသဒင် အွန်နီမှာ။ ဟမာန်တွာတ်ငှေါဘန်းတာတ်ငှေါ ဟိန်ကားအလေနောင်းဟက် သမီဆာ အချီဘင်းအတွာတ် ဟိန်ဒေ တားမြစ်သည်မှာ” ညယ် လျှောက်တာန်သမှာ။
50အန်၌မှါခ့်ခါ ကိုယ်တော်ကား “ဟိန်ဒေ အတားသကြီးဆာ။ ဟမာန်တွာတ်ငှေါဘန်းတာတ်ငှေါ ဟနိမ်တေ အဆန့်ကျင်သဘင်းဆိတ်ကား ဟနိမ်ပါဘင်း သမီဆာထှာမှာ” ညယ် မိန့်သမှာ။
ရှမာရိတန်သမီဆတာတ်ကားကိုယ်တော်ဒေငြာမ်းပယ်သဘင်း
51စီးမှါခ့်ခါ ကိုယ်တော်ကား ရွှေမြို့တော်ပါ လာန်ဟာန်းကူဘင်းအချိန် ထံနီဘင်းအတွာတ် ဟိန်ကား ဂျေရုဆလင်မြို့ပါ လာန်ဒင်အဆေင်ဆုံးဖြတ်တာန်မှာ။ 52ကိုယ်တော်ကား စေတမန်စယ်ယာတေ ဟိန်ထာတ်အရာန် ရှမာရိပြေဘင်း ထိန်ထိန်ငှါပါတာတ်ပန်း ဟိန်ယောက် တခြားဘင်းဆိတ်တာတ်အတွာတ် အကုန်လုံးအဆာန်တာန့်ထှာစိန်းကွန်း ပြာန်ဆာန်သစိန်းယုတ်မှာ။ 53အန်နိမ်စါန်းငှေါဒီ ကိုယ်တော်ကား ဂျေရုဆလင်မြို့ပါ ဟလာန်းတည်သဘန်း လာန်နင်းဘင်းအတွာတ် အန်ဘင်းထိန်ဘေနင်းကြီးဘင်း သမီဆတာတ်ကား ကိုယ်တော်ဒေ အကြိုဆိုသကြီးရား။ 54ယာကုပ်ယောက် ယောဟန်တာတ်ကား အန်ဘင်းထှာရာန်ဘင်းနာတေ သက်ပူမှါခ့်ခါ “အရှာန်၊ အလေကား ဟမုခ်စောက်ဟက် ဝါမ်တေအက်စိန်းဘန်း အန်တာတ်တေ ဖြတ်ဆီးသဒင် ဘုရားရှာန်ဘေ လျှောက်တာန်သထှာကလဲ”#9:54 စယ်ယာဘင်းဂရိကျမ်းတေဘေဘင်း စာပိုဒ်တွောပ်လားဘေ “ပရောဖက်ဟေရှာယအွန်နီဘင်းအတိုင်း” ညယ်ငှေါဘင်းကျိန်းတေစါန်းပဲကြီးမှာ။ ရာဇဝင်ချုပ် ဒု ၁:၁၀-၁၂ ညယ် လျှောက်တာန်သမှာ။ 55ကိုယ်တော်ကား အန်တာတ်ပါလှည့်သဘန်း ဆုံးမသမှာ။#9:55 စယ်ယာဘင်းဂရိကျမ်းကျိန်းတေဘေ အန်ဘင်းကျမ်းကျိန်းအပိုဒ် မန်းဘေ “သမီဆာဆားတော်ကား သမီဆတာတ်အဆာတ်တေ ဖြတ်ဆီးသဒင်ကြွဒီလားအချီညယ် ကယ်တာန်သဒင်ထှာမှာ” ညယ်ဘင်း ကျမ်းပိုဒ်တေ စါန်းပဲမှာ။ 56စီးမှါခ့်ခါ ကိုယ်တော်ယောက် တပယ့်တာတ်ကား တခြားထိန်ထိန်းနူပါ လာန်ပဲကြီးမှာ။
တပယ့်တော်ထှာကာတ်ပင်းဆိတ်ဆွုန်ဟူး
(ရှာန်မဿဲ ၈:၁၉-၂၂)
57ကိုယ်တော်ယောက် တပယ့်တော်တာတ် လာန်ဘင်းလမ်းဘေ သမီဆာဟော်ဝါကား ကိုယ်တော်ယေရှုတေ “ကိုယ်တော်လာန်ကူဘင်း နေရာတိုင်းဘေ ငါဒီယာတ်ကူ” ညယ် လျှောက်သမှာ။
58အန်၌မှါခ့်ခါ ကိုယ်တော်ကား “ပုတ်ခါးကြည်ဘေကား သဟွာမ်ငှါဘန်း အူစိတ်ဆာတေဘေကား အအုံငှါမှာ။ အန်နိမ်စါန်းငှေါဒီ သမီဆာဆားတော်ဘေကား ဟလာန်းချသဒင် နေရာစဲအဘိုဝါး” ညယ် မိန့်သမှာ။
59စီးမှါခ့်ခါ ကိုယ်တော်ကား တခြားဘင်းသမီဆာဟော်ဝါဒေ “ငါဟလိန်းဘေ ဒီရာတ်” ညယ်မိန့်သမှာ။ အန်နိမ်စါန်းငှေါဒီ အန်ဘင်းဆိတ်ကား “အရှာန်၊ ငါတေအရာန် ကျေမ်းပါလာန်ဟာန်းစိန်းယုတ်။ ငါအဝါရှီးစီးမှါခ့်ခါ ဟိန်ဒေ နွတ်စီးဘန်းကား ငါ ဒီဘန်း ကိုယ်တော်ဟလိန်းဘေဒီရာတ်ကူ” ညယ်လျှောက်တာန်သမှာ။
60ကိုယ်တော်ကား ဟိန်ဒေ “အဆေင်ရှီးဘန်းနင်းကြီးဘင်းဆိတ်တာတ်ကား အန်တာတ်နောင်းဟက် လာန်ရှီးနင်းဘင်းဆိတ်တာတ်တေ နွတ်စိန်းရာန်။ အန်နိမ်စါန်းငှေါဒီ နာန်ကား ဘုရားရှာန်ဘင်းသာသနာတော်အကြောင်းတေ သမီဆတာတ်နင်း ဟောသကာအီထှာကူ” ညယ် မိန့်သမှာ။
61တခြားဘင်းဟော်ဝါရီးဒါး “အရှာန်၊ ငါကား ကိုယ်တော်ဟလိန်းဘေ ဒီရာတ်ကူ။ အန်နိမ်စါန်းငှေါဒီ ငါကျေမ်းပါအရာန် လာန်ဟာန်းဘန်း ငါကျေမ်းဆိတ်တာတ်တေ နှုတ်ဆက်သဒင်အခွာမ်းအီယုတ်” ညယ် လျှောက်တာန်သမှာ။
62ကိုယ်တော်ကား “လပါးထွန်ဘင်း ထွန်ကိုင်းတေငါတ်ပန်း ဟလိန်းပါ ယူဟာန်းဟာဘင်းသမီဆာကား ဘုရားရှာန်ဘင်းသာသနာတော်အတွာတ် အသုံးအဆာန်ငှါး” ညယ် မိန့်တော်မူသမှာ။
Currently Selected:
ရှာန်လုကာ 9: ZKD
Highlight
Share
Copy
Want to have your highlights saved across all your devices? Sign up or sign in
Kadu Bible by Beyond Translation is licensed under Creative Commons Attribution-ShareAlike 4.0 License.
