Matiyu 8
8
Kǝnan Yesu thlǝ hatǝfa tarkwai kaɗi
1Kǝ ɓak Yesu kaha ǝ nggwalan, nggommǝn nafchǝ terchan parakandǝ ndi. 2Chat yowun nefa tǝ hatǝfa tarkwai fa, ɓakan kǝmɗi Yesu kop kan ha kǝ pangngǝnan. Ndakan wa, “Chinda, maa ǝ nggiminfa, no mbahǝn chitǝ kaɗ chiɗchiɗ.”
3Panan kǝ Yesu herˈyan ha tǝkankan her fa, nakan ndat wa “Nggǝmani, kǝ nen chǝɗchǝɗ.” Chat kǝɗuyu, kǝnkǝ hatǝfa tarkwaiˈyan kaɗi. 4Ndangkǝ Yesu wa, “Suku ndiˈchan, kǝ mbuˈen chikawun ǝnɗi sǝɓcha wa. Paɗ ɗu kǝ pǝneen fatyo pangnda, tǝ paɗ kǝ firin kǝnaupafǝn kǝɗ ǝnɗi mbuˈtǝ kusiˈ i Musa. Kǝ chin kǝɗu kǝthlǝm sǝnnandǝ tandǝs wa, chuchi fee kaɗ chǝɗchǝɗ.”
Kǝnan Yesu mafati kappa thlǝ yandi Romawech kaɗi
(Luk 7:1-10)
5Kǝ yim kǝ Yesu kǝ mǝrǝɓ Kaparnahum, chat yowun kapa thlǝ yaandi Romawecha ɓakan kǝmɗiyan. Shiyankan Yesu kǝ kǝsanchi sǝ. 6Ndakan wa, “Chinda, maafatinchi mǝthlan ɗuk wiri, mbahǝn wa tǝɓǝrtǝha wa. Mǝthlan saa ɓahtǝ kaan.”
7Ndang kǝ Yesu wa, “Ni ɗǝt kǝ kǝnandǝ kaɗi.”
8Chat kapa thlǝ yaanan i Romawechaˈan nggǝman kan wa, “Chinda chaˈwisi kǝ ɓen kyeurinchi wa, ndiku ndak, maafatinchi nan kǝndǝ kaɗi. 9Kǝthlǝm nggǝt paɗ nechi hur heri yowuna, tǝpaɗ fǝ yaanchǝs ǝ hur herinchi. Thlǝ ndanchi thleya wa, ‘Ɗu,’ chat kǝ ɗa. Yowun paɗ kǝ ndani wa, ‘Ɓo,’ chat ɓakan. Kǝ ndani maafatinchi wa, ‘Chu ǝn kǝɗa,’ chat chikan.”
10Kǝ sǝkkǝ Yesu kǝɗu, chat fǝrankan saka inda. Ndang kan fee nech para ndǝ yuwa, “Kittaˈan nati mbuˈowunda, ǝ hur Israˈila tamwi mbǝs thlǝ fǝrkit tǝ alkǝtfǝ kǝɗ thleya wa. 11Kittaˈan nggǝt sǝnowundǝsi, ndat wa, terchan hur fǝ fǝr kitcha kǝɗ weˈtǝ thleya, nandǝ ɓat ǝ mǝt che farta, tǝ mǝt hǝmǝn farta. Kǝ chok ndǝ ha, kǝ sǝmnda mǝt nggomnda nat tǝ Ibrahim, Ishaku tǝ Yakubu, ǝ kutǝrakti hulafǝrta. 12Fee chefee tahsanda kuturakti Farta, paɗ karndǝ fǝr kit, na fee cham tandǝ kesh, kǝ hur wuthla. Mǝɗi na fee tǝta tǝ kang wanthlancha.”
13Chat tǝɓǝrkǝ Yesu ha, ndang kan kapa thlǝ yaandi Roma taˈan wa, “Ɗu kaɗi, na fee chuta kǝɗ ǝnɗi fǝrtu kit.” Chat kǝɗuyu maafaɗan i kapa thlǝ yaanan kǝnkan kaɗi.
Kǝnan Yesu man nu Biturus kaɗi
(Mar 1:29-31; Luk 4:38-39)
14Kǝ yim kǝ Yesu keuri Biturus, chat nakan man nu Biturus ɗuk, tǝ hatǝfa ɓǝɓɓa thlǝfanchi ha. 15Chat tǝkankan herˈyan fa, kalkǝ hatǝfa ɓǝɓɓiˈan ndǝ ha. Thlaˈkan fǝrangkan Yesu ɗǝsǝmnda.
Kǝnan Yesu nafchǝ kaɗ terchan
(Mar 1:32-34; Luk 4:40-41)
16Kǝ wulkǝ mǝta, nafchǝ ɓangkandǝ Yesu fee tǝ hwaˈarchǝf terchan. Paɗ rǝkankan hwaˈarchaˈan kesh fiyanda tǝ shenuˈtǝ ndak. Kǝnan kan nat fee kaɗ nech haˈchan. 17Tǝ chit kǝɗu, ndiiɗantǝ ǝnɗi ha mbuˈtǝ fee tǝ me i thlǝ shenuˈtǝ tǝ yahti Farta Ishaya. Ndat wa,
“Tǝran tǝ huhuthl kak tamǝn kaɗi,
kǝnan kan hatǝfechˈyamǝn kaɗi.”
Fee ndech wa nandǝ para Yesu
(Luk 9:57-62)
18Kǝ nak Yesu kapa nggomndi nafcha taurandǝ ha, ɗǝfkan kǝ cheendǝ kesh kǝ kǝlaar kufi thlaa. 19Chat ǝ yowun thlǝ chaˈandǝ kusiˈ i Musa kaɗi ɓakan kǝmɗi Yesu, ndakan wa, “Thlǝ chaˈandǝ nafchǝ har, nii parawechi nat kǝ mǝɗi natu ɗǝta.”
20Nggǝman kǝ Yesu wa, “Charuˈcha tǝ kwichiyandǝsi, ɗiicha tanda tǝ mǝt minchiyanda. Paɗ Waˈi Nefa mǝt mǝndǝyansi arta wa.”
21Yowun hur kǝmsichiyan ndang kan wa, “Chinda suku kwaɗǝn kǝɗi la thlohandǝ papa, kǝni ɓat parawechi.”
22Paɗ ndang kǝ Yesu wa, “Paro nenchi, malan mǝmatecha kǝ thlohandǝ mǝmatech ˈyanda.”
Thlaran Yesu rǝnni er ha
(Mar 4:35-41; Luk 8:22-25)
23Kǝ yimkǝ Yesu kǝ hur kwombawal, parak kǝmsichiyan ndi. 24Sǝn wandǝs wa, thlaˈkǝ rǝnna ǝ kufiˈan kaan, nak ˈyaman thlaˈta nakan yimndǝ kǝ hur kwombawal taˈan. Paɗ Yesu mǝthlan saˈ ena. 25Ɗǝk Kǝmsichaˈan nahnanda ndang kanda wa, “Chinda, hǝrraˈamǝndǝn, namǝn tǝktǝ ha.”
26Nggǝman kan tanda wa, “Kǝthlǝm mǝ nat wun lekǝt kǝɗu, kun fǝ fǝr kit ngguɗyeh?” Kǝnan thlaˈta yanan kan rǝnniˈan tǝ pǝrti ˈyam kufiˈan ha, chat nggaskǝ mǝɗan kǝmma.
27Nafcha sakandak inda ndakanda wa, “Weˈtǝ nafmǝ thleya, thla chika rǝnna ta pǝrti ˈyam kufa fǝrandǝ maanda?”
Kǝnan Yesu nafchi kaɗ chap naa whaˈarchi fiyanda
(Mar 5:1-20; Luk 8:26-39)
28Kǝ saˈkan kǝ heshi kufi thla ǝ thle Gadarawa. Nafchǝ chap tǝ hwaˈarchǝfa chekandǝ kesh mǝɗi thlǝ thlohandǝ fee mǝmatecha, ɗǝkandǝ mbǝs ndi. Chok ndǝ kǝ ǝna lekǝt kaan mbahǝn wu yowun mbǝrtǝ ha tǝ minni wa. 29Chat kǝɗuyu hwakanda ndaka nda wa, “Mǝpuchǝ tǝ nggaˈan, chǝ Waˈi Farta? Tǝ ɓen kǝthlǝm kǝ fireˈinchin ɓahta kǝn wanshengnan saˈta wa?”
30Kǝ pang ngguɗyeh paɗ, fowun kapa chaap kǝllanggarchǝs tandǝ parata. 31Hwaˈarchaˈan shiyan kandǝ Yesu ndaka nda wa, “Maa ǝ cheˈǝnchǝn kesh, pǝkko nggaˈan kǝ hur chaap kǝllanggǝrchiɗa.”
32Ndangkan tanda wa, “Pǝɗama.” Chat chekandǝ kesh yimkandǝ kǝ hur chaap kǝllanggarchaˈan. Nat chaap kǝllanggarchaˈan rakakandǝ tǝ weshet fa firewh kandǝ kaha tǝ mii chichangngǝnɗi nech hwengnga yimkandǝ kǝ hur hawurtaˈan. Tǝkkandǝ ha hur ˈyaman. 33Fǝ para kǝllanggarchaˈan rakakanda, yimkandǝ kǝ mǝrɓan, chat mbuˈkandǝ kusheˈtaˈan nat, tǝ ǝnɗi sǝɓchǝ tǝ nafchiɗi naa hwaˈarchǝ fiyanda. 34Chat nafchi mǝrɓan chekandǝ kesh kǝ mbǝs Yesu. Kǝ nakandǝ ndi, shiyankanda kǝ maltǝ thle mǝt ˈyandǝ ha.
Currently Selected:
Matiyu 8: GQA
Highlight
Share
Copy
Want to have your highlights saved across all your devices? Sign up or sign in
©2025 Luke Initiative for Scripture Translation
Matiyu 8
8
Kǝnan Yesu thlǝ hatǝfa tarkwai kaɗi
1Kǝ ɓak Yesu kaha ǝ nggwalan, nggommǝn nafchǝ terchan parakandǝ ndi. 2Chat yowun nefa tǝ hatǝfa tarkwai fa, ɓakan kǝmɗi Yesu kop kan ha kǝ pangngǝnan. Ndakan wa, “Chinda, maa ǝ nggiminfa, no mbahǝn chitǝ kaɗ chiɗchiɗ.”
3Panan kǝ Yesu herˈyan ha tǝkankan her fa, nakan ndat wa “Nggǝmani, kǝ nen chǝɗchǝɗ.” Chat kǝɗuyu, kǝnkǝ hatǝfa tarkwaiˈyan kaɗi. 4Ndangkǝ Yesu wa, “Suku ndiˈchan, kǝ mbuˈen chikawun ǝnɗi sǝɓcha wa. Paɗ ɗu kǝ pǝneen fatyo pangnda, tǝ paɗ kǝ firin kǝnaupafǝn kǝɗ ǝnɗi mbuˈtǝ kusiˈ i Musa. Kǝ chin kǝɗu kǝthlǝm sǝnnandǝ tandǝs wa, chuchi fee kaɗ chǝɗchǝɗ.”
Kǝnan Yesu mafati kappa thlǝ yandi Romawech kaɗi
(Luk 7:1-10)
5Kǝ yim kǝ Yesu kǝ mǝrǝɓ Kaparnahum, chat yowun kapa thlǝ yaandi Romawecha ɓakan kǝmɗiyan. Shiyankan Yesu kǝ kǝsanchi sǝ. 6Ndakan wa, “Chinda, maafatinchi mǝthlan ɗuk wiri, mbahǝn wa tǝɓǝrtǝha wa. Mǝthlan saa ɓahtǝ kaan.”
7Ndang kǝ Yesu wa, “Ni ɗǝt kǝ kǝnandǝ kaɗi.”
8Chat kapa thlǝ yaanan i Romawechaˈan nggǝman kan wa, “Chinda chaˈwisi kǝ ɓen kyeurinchi wa, ndiku ndak, maafatinchi nan kǝndǝ kaɗi. 9Kǝthlǝm nggǝt paɗ nechi hur heri yowuna, tǝpaɗ fǝ yaanchǝs ǝ hur herinchi. Thlǝ ndanchi thleya wa, ‘Ɗu,’ chat kǝ ɗa. Yowun paɗ kǝ ndani wa, ‘Ɓo,’ chat ɓakan. Kǝ ndani maafatinchi wa, ‘Chu ǝn kǝɗa,’ chat chikan.”
10Kǝ sǝkkǝ Yesu kǝɗu, chat fǝrankan saka inda. Ndang kan fee nech para ndǝ yuwa, “Kittaˈan nati mbuˈowunda, ǝ hur Israˈila tamwi mbǝs thlǝ fǝrkit tǝ alkǝtfǝ kǝɗ thleya wa. 11Kittaˈan nggǝt sǝnowundǝsi, ndat wa, terchan hur fǝ fǝr kitcha kǝɗ weˈtǝ thleya, nandǝ ɓat ǝ mǝt che farta, tǝ mǝt hǝmǝn farta. Kǝ chok ndǝ ha, kǝ sǝmnda mǝt nggomnda nat tǝ Ibrahim, Ishaku tǝ Yakubu, ǝ kutǝrakti hulafǝrta. 12Fee chefee tahsanda kuturakti Farta, paɗ karndǝ fǝr kit, na fee cham tandǝ kesh, kǝ hur wuthla. Mǝɗi na fee tǝta tǝ kang wanthlancha.”
13Chat tǝɓǝrkǝ Yesu ha, ndang kan kapa thlǝ yaandi Roma taˈan wa, “Ɗu kaɗi, na fee chuta kǝɗ ǝnɗi fǝrtu kit.” Chat kǝɗuyu maafaɗan i kapa thlǝ yaanan kǝnkan kaɗi.
Kǝnan Yesu man nu Biturus kaɗi
(Mar 1:29-31; Luk 4:38-39)
14Kǝ yim kǝ Yesu keuri Biturus, chat nakan man nu Biturus ɗuk, tǝ hatǝfa ɓǝɓɓa thlǝfanchi ha. 15Chat tǝkankan herˈyan fa, kalkǝ hatǝfa ɓǝɓɓiˈan ndǝ ha. Thlaˈkan fǝrangkan Yesu ɗǝsǝmnda.
Kǝnan Yesu nafchǝ kaɗ terchan
(Mar 1:32-34; Luk 4:40-41)
16Kǝ wulkǝ mǝta, nafchǝ ɓangkandǝ Yesu fee tǝ hwaˈarchǝf terchan. Paɗ rǝkankan hwaˈarchaˈan kesh fiyanda tǝ shenuˈtǝ ndak. Kǝnan kan nat fee kaɗ nech haˈchan. 17Tǝ chit kǝɗu, ndiiɗantǝ ǝnɗi ha mbuˈtǝ fee tǝ me i thlǝ shenuˈtǝ tǝ yahti Farta Ishaya. Ndat wa,
“Tǝran tǝ huhuthl kak tamǝn kaɗi,
kǝnan kan hatǝfechˈyamǝn kaɗi.”
Fee ndech wa nandǝ para Yesu
(Luk 9:57-62)
18Kǝ nak Yesu kapa nggomndi nafcha taurandǝ ha, ɗǝfkan kǝ cheendǝ kesh kǝ kǝlaar kufi thlaa. 19Chat ǝ yowun thlǝ chaˈandǝ kusiˈ i Musa kaɗi ɓakan kǝmɗi Yesu, ndakan wa, “Thlǝ chaˈandǝ nafchǝ har, nii parawechi nat kǝ mǝɗi natu ɗǝta.”
20Nggǝman kǝ Yesu wa, “Charuˈcha tǝ kwichiyandǝsi, ɗiicha tanda tǝ mǝt minchiyanda. Paɗ Waˈi Nefa mǝt mǝndǝyansi arta wa.”
21Yowun hur kǝmsichiyan ndang kan wa, “Chinda suku kwaɗǝn kǝɗi la thlohandǝ papa, kǝni ɓat parawechi.”
22Paɗ ndang kǝ Yesu wa, “Paro nenchi, malan mǝmatecha kǝ thlohandǝ mǝmatech ˈyanda.”
Thlaran Yesu rǝnni er ha
(Mar 4:35-41; Luk 8:22-25)
23Kǝ yimkǝ Yesu kǝ hur kwombawal, parak kǝmsichiyan ndi. 24Sǝn wandǝs wa, thlaˈkǝ rǝnna ǝ kufiˈan kaan, nak ˈyaman thlaˈta nakan yimndǝ kǝ hur kwombawal taˈan. Paɗ Yesu mǝthlan saˈ ena. 25Ɗǝk Kǝmsichaˈan nahnanda ndang kanda wa, “Chinda, hǝrraˈamǝndǝn, namǝn tǝktǝ ha.”
26Nggǝman kan tanda wa, “Kǝthlǝm mǝ nat wun lekǝt kǝɗu, kun fǝ fǝr kit ngguɗyeh?” Kǝnan thlaˈta yanan kan rǝnniˈan tǝ pǝrti ˈyam kufiˈan ha, chat nggaskǝ mǝɗan kǝmma.
27Nafcha sakandak inda ndakanda wa, “Weˈtǝ nafmǝ thleya, thla chika rǝnna ta pǝrti ˈyam kufa fǝrandǝ maanda?”
Kǝnan Yesu nafchi kaɗ chap naa whaˈarchi fiyanda
(Mar 5:1-20; Luk 8:26-39)
28Kǝ saˈkan kǝ heshi kufi thla ǝ thle Gadarawa. Nafchǝ chap tǝ hwaˈarchǝfa chekandǝ kesh mǝɗi thlǝ thlohandǝ fee mǝmatecha, ɗǝkandǝ mbǝs ndi. Chok ndǝ kǝ ǝna lekǝt kaan mbahǝn wu yowun mbǝrtǝ ha tǝ minni wa. 29Chat kǝɗuyu hwakanda ndaka nda wa, “Mǝpuchǝ tǝ nggaˈan, chǝ Waˈi Farta? Tǝ ɓen kǝthlǝm kǝ fireˈinchin ɓahta kǝn wanshengnan saˈta wa?”
30Kǝ pang ngguɗyeh paɗ, fowun kapa chaap kǝllanggarchǝs tandǝ parata. 31Hwaˈarchaˈan shiyan kandǝ Yesu ndaka nda wa, “Maa ǝ cheˈǝnchǝn kesh, pǝkko nggaˈan kǝ hur chaap kǝllanggǝrchiɗa.”
32Ndangkan tanda wa, “Pǝɗama.” Chat chekandǝ kesh yimkandǝ kǝ hur chaap kǝllanggarchaˈan. Nat chaap kǝllanggarchaˈan rakakandǝ tǝ weshet fa firewh kandǝ kaha tǝ mii chichangngǝnɗi nech hwengnga yimkandǝ kǝ hur hawurtaˈan. Tǝkkandǝ ha hur ˈyaman. 33Fǝ para kǝllanggarchaˈan rakakanda, yimkandǝ kǝ mǝrɓan, chat mbuˈkandǝ kusheˈtaˈan nat, tǝ ǝnɗi sǝɓchǝ tǝ nafchiɗi naa hwaˈarchǝ fiyanda. 34Chat nafchi mǝrɓan chekandǝ kesh kǝ mbǝs Yesu. Kǝ nakandǝ ndi, shiyankanda kǝ maltǝ thle mǝt ˈyandǝ ha.
Currently Selected:
:
Highlight
Share
Copy
Want to have your highlights saved across all your devices? Sign up or sign in
©2025 Luke Initiative for Scripture Translation