Jɔŋ 1

Klai nɔ bɛ mbʉ Kəŋgie təmə liʼ-i ghɔ fɛ

1Nyii nɔ nə kə̂ chìi wʉʉnəmbikə, tʉ Wo ndə bə kə́ tíi ɔ nə mbʉ Kəŋgie nɔʼ nə bɛ ghɔ, ghɔŋ Nyii kə́ bɛ mɔʼɔ, mbʉ Kəŋgie bɔŋ-kə́-leʼ bɛ Nyii. 2Nyii nɔ nə kə̂ chìi wʉʉnəmbikə, ghɔŋ mbʉ Kəŋgie kə bɛ mɔʼɔ. 3Bə nɔ nə chìi fɔbə inchəŋ tíŋ hə bɔ̌ŋ ɔŋ, kaʼ kʉ̌ʉ byúu mbəŋ-ɛŋ, təmə fɔbɛʼkə bɛ ghɔ ndə i bɛ ghɔ fɛ. 4Məchímbi nɔ gwè hə kəghɔ-mbʉ-Kəŋgie, ndə i bɛ kɛʼɛ tʉ bʉəməsʉʉ bənchəŋ. 5Mbʉ kɛʼɛ báa mu kənjəŋ təmə mbʉ kənjəŋ mə lʉ́əŋhə fɛ.

6Nyii tə́ŋ wobɛʼ bə kə́ tíi ɔ nə Jɔŋ ndə ɔ̃ kɔ́ muu. 7Ɔ gwè ndə məshyíi bʉə te mbʉ kɛʼɛ mbɔ bʉə bənchəŋ chʉʼ bɛ́ŋ mbʉ kɛʼɛ tíŋ hə bɔ̌ŋ ɔŋ. 8Mbəŋ-ɛŋ nə mbəŋ-ɛŋ kə bɛ mbʉ kɛʼɛ fɛ, ɔ nɔ nə gwè bə ndə məkwə́ʼ tʉ bʉə te mbʉ kɛʼɛ. 9M̃bʉ ŋkɛŋ kɛʼɛ ndə i ŋɔ́ʼhə shʉ wotəmiyɔŋ nɔ kə gwè mu kəwʉʉnəmbi.

10Ɔ nɔ nə bɛ mu kəwʉʉnəmbi, bə chìi wʉʉnəmbikə tíŋ hə bɔ̌ŋ ɔŋ bɔŋ təmə wʉʉnəmbikə chèʼnə ɔŋ fɛ.

11Ɔ gwè tʉ bʉə-bi təmə bʉə-bi bɛ́ŋ ɔŋ fɛ. 12Bɔŋ tʉ bʉə bənchəŋ ndə bɔ̂ŋ kə lʉ̀ ɔ mu fyii-bɔŋ, tʉ bʉə ndə bɔ̂ŋ kə bɛ́ŋ ɔŋ, ɔ kɔ́ ghʉəʼkə tʉ bɔŋ ndə məbɛ vâa-Nyii. 13Təmə bə bí bɔŋ bə ndə məbí kəlɔŋ fɛ, byuunɔ ndə ŋkʉʉnə tʉʉ woməsʉʉ fɛ, byuunɔ ŋkʉʉnə tʉʉ woləŋ fɛ, bɔŋ bɛ nə ŋkʉʉnə-tʉʉ-Nyii.

14Nɔ, mbʉ Kəŋgie gwè bə̀ŋ woməsʉʉ chí kəwʉʉnəmbi-fɛ̄ŋ mu bʉʼʉ, bʉʼʉ bɔŋ-nɔʼ-leʼ nyíɛ məgʉə-e, məgʉ́ə ndə ɔ kie ndə mbyu Vaa imɔʼ kəghɔ Tie-e, ɔ kie buuŋjyu ghɔŋbə ŋgie-shʉəŋ-kə ilə́ŋnə. 15Jɔŋ gwè ndə məkwə́ʼ tʉ bʉə te nə mbʉ kəŊgie, kə́ tíi ghɔ̀ŋ mbɔ, “Nɔ bɛ ɔ nɔ ndə mɔ kə́ kwə́ʼ te ɔ le, kə́ ghɔ̀ŋ mbɔ, ‘Wo ndə ɔ bu gwè hə bɔ̌ŋ mɔ, nɔ gʉ́ə chàa mɔ, bʉʼka ɔ nɔʼ nə fəŋ bɛ, bə buŋ kə bí mɔ.’ ”

16Bʉʼka ndəŋ mbʉ buuŋjyu ləŋnə ndə ɔ kie, bʉʼʉ bənchəŋ nɔʼ kie biʼbə ndəŋ biʼbə. 17Bʉʼka Nyii nɔ nə kɔ́ nuʼ tíŋ hə bɔ̌ŋ Mushi, ɔ bɔŋ kɔ́ buuŋjyu ghɔŋbə ŋgie-shʉəŋ-kə tíŋ hə bɔ̌ŋ Jiso Klai. 18Wo chʉʼ nə nyíɛ Nyii fɛ, bɔŋ yaʼkɛŋ mbʉ mbyu Vaa ndə bɛ haʼ ɔ ndə ɔ bɛ Nyii bɔŋ-kə́-leʼ bɛ mbʉə mbʉ Tie, ɔ nɔʼ chìi bʉʼʉ kínə mbʉ Nyii.

Jɔŋ ndə ɔ̃ kɔ́ muu kwə́ʼ te Jiso

(Matia 3:1-12; Mak 1:1-8; Luk 3:1-18)

19Nɔ bɛ nukə nɔ ndə Jɔŋ kə kwə́ʼ te Jiso ndʉʉ ndə bəntəŋbəshʉ-bʉə-Juu kə tə́ŋ bʉəfɛ̀ʼndɛŋNyii ghɔŋbə vâafɔʼɔ mu njaafɛ̀ʼndɛŋNyii, bɔ̂ŋ gwè Jɛlosalɛŋ bíʼtə tʉ ɔŋ mbɔ, “A bɛ nda?” 20Ɔ kwə́ʼ tʉ bɔŋ ntaa təmə sʉ̀ʼtə ŋgiekə fɛ, ghɔ̀ŋ mbɔ, “Mɔ kaa mbʉ Wo ndə Nyii Kùŋ Tə́ŋ fɛ.” 21Bɔ̂ŋ bíʼtə tʉ ɔŋ mbɔ, “A bɛ nda ndʉʉghɔfii le? A bɛ Ɛlaja mɛ?” Ɔ bə̀ŋhə mbɔ, “Mɔ kaa ɔ fɛ.” “A bɛ mbʉ yʉkəŋgieNyii mɛ?” Ɔ bə̀ŋhə mbɔ, “Mbee.” 22Bɔ̂ŋ bíʼtə tʉ ɔŋ mbɔ, “A bɛ nda le? Baʼa nɔ kie ndə məgɛ̀ byʉ̀hə ŋgiekə tʉ bʉə ndə bɔ̂ŋ tə́ŋ baʼa. A gìe mbuka te ŋwɔŋ-aŋ le?”

23Ɔ ghɔ̀ŋ mbɔ,

“Mbəŋ-ɔŋ nɔ bɛ mbʉ gyʉʉ ndə i tʉʼ tíi mu kwɔŋkəyəŋnə#1:23 Kwɔŋkəyəŋnə fɛ̄ŋ nɔ tʉʼ dʉ̀ʼ yəŋkə ndə i yə̀ŋhə daa təmə muu kə́ bɛ chɔ fɛ, təmə fɔyubə kə́ bʉ̀ʉ chɔ fɛ. kə́ ghɔ̀ŋ mbɔ, ‘B̈ii shʉ̀tə fia Tiekətʉ, b̈ii shʉ̀tə fiatə-i, ï tə́nə ndyʉndyʉ.’

Haʼ ndə Adaya mbʉ yʉkəŋgieNyii kə ghɔ̀ŋ le.”#1:23 Adaya 40:3.

24Mbʉ bʉə-ntəŋ ndə bʉə-Falasi kə tə́ŋ bɔŋ le, 25bíʼtə tʉ Jɔŋ mbɔ, “Chìi ka a kə́ kɔ́ muu ndʉʉghɔfii tʉ bʉə le, kaʼ bɛ mbɔ a gòʼ təmə bɛ mbʉ Wo ndə Nyii Kùŋ Tə́ŋ fɛ, byuunɔ Ɛlaja fɛ, byuunɔ mbʉ yʉkəŋgieNyii fɛ?” 26Jɔŋ bə̀ŋhə tʉ bɔŋ mbɔ, “Mɔ nɔ tʉʼ kɔ́ bə muu tʉ bii, bɔŋ wo nɔ tə́nə mu bii ndə bii kínə ɔŋ fɛ. 27Ɔ nɔ bɛ wo ndə ɔ tʉʼ gwè hə bɔ̌ŋ mɔ, mɔ kʉ̀ʼnə wo ndə məyɔ̀ʼ ghyʉʉ-bətakwu-tə-i fɛ.” 28Nubə-ɔ̄ŋ nɔ nə fyú hə mu Bɛtani njəŋ ŋgwɛŋ Jodaŋ, kəyəŋ ndə Jɔŋ kə́ kɔ́ muu chɔ tʉ bʉə.

Jiso, mbʉ Vaabinjyʉʉ-Nyii

29Mbi kʉ̂ʉ sɛŋ fíi, ɔ nyíɛ Jiso, ɔ kə́ gwè nə mbʉə e, ɔ ghɔ̀ŋ mbɔ, “B̈ii nyíɛ, mbʉ Vaabinjyʉʉ Nyii, ndə ɔ sʉ̀ bʉ̂ʼʉ-bʉə-kəwʉʉnəmbi! 30Nɔ bɛ mbəŋ-ɛŋ nɔ ndə mɔ kə́ kwə́ʼ te ɔ le mbɔ, ‘Wobɛʼ nɔ bu gwè hə bɔ̌ŋ mɔ ndə ɔ gʉ́ə chàa mɔ, bʉʼka ɔ nɔ nə fəŋ bɛ, bə buŋ nə bí mɔ.’ 31Mbəŋ-ɔŋ nə mbəŋ-ɔŋ, kə chèʼnə ɔŋ fɛ, mɔ nɔ kə gwè kə́ kɔ́ muu tʉ bʉə ndə məchìi bʉə-Isilɛ kínə ɔŋ.”

32Jɔŋ fʉ̀ʼtə mbʉ bənu te ɔ ghɔ̀ŋ mbɔ, “Mɔ nɔ nyíɛ LyʉʉhəNyiikə ndə ɔ shíʼ hə yuo nə tambʉətə gwè dùʼ ndəŋ ɔŋ. 33Mbəŋ-ɔŋ nə mbəŋ-ɔŋ, kə chèʼnə ɔŋ fɛ, bɔŋ wo ndə ɔ kə tə́ŋ mɔ ndə məgwè kɔ́ bə muumə-ɔ̄ŋ tʉ bʉə nɔ nə ghɔ̀ŋ tʉ mɔ mbɔ, ‘Wo ndə a bu nyíɛ mbʉ kəLyʉʉhə shíʼ gwè dùʼ ndəŋ ɔŋ káa chɔ, nɔ bɛ wo ndɔ ɔ bu kɔ́ muu ndə bɛ LyʉʉhəNyiikə tʉ bʉə.’ 34Mɔ nɔʼ nyíɛ bɔŋ-kə́-leʼ kwə́ʼ te ɔ mbɔ nɔ bɛ mbʉ VaaNyii nɔ.”

Jiso tíi fəŋ vâafɔʼɔ-bi

35Mbi kʉ̂ʉ sɛŋ bìʼ fíi, Jɔŋ kə́ tə́nə ghɔŋbə vâafɔʼɔ-bi bəbûu mu vâafɔʼɔ-bi, 36ɔ lɛ́nə Jiso ndə ɔ tʉʼ tòʼ gwè, ghɔ̀ŋ mbɔ, “B̈ii nyíɛ, Vaabinjyʉʉ Nyii!” 37Mbʉ vâafɔʼɔ-bi bəbûu yʉ́ ndə Jɔŋ gìe yɔ̄ŋ-yə, bɔ̂ŋ gɛ̀ hə bɔ̌ŋ Jiso. 38Jiso kíahə ŋwɔŋ-ɛŋ nyíɛ ndə bɔ̂ŋ tʉʼ gwè hə bɔ̌ŋ ɔŋ, ghɔ̀ŋ tʉ bɔŋ mbɔ, “Bii tʉʼ kʉ́ʉ nda?” Bɔ̂ŋ tíi ɔ mbɔ, “Labi”, ndə mbʉ yie bɛ mbɔ chicha, bíʼtə tʉ ɔŋ mbɔ, “A tʉʼ chí fa?”

39Ɔ bə̀ŋhə tʉ bɔŋ mbɔ, “B̈ii gwè, bii bu nyíɛ.” Bɔ̂ŋ gɛ̀ nyíɛ yəŋkə ndə ɔ kə́ chí chɔ, ghɔŋ bɔŋ chí mɔʼɔ yɔ̂ŋ-ghɔ̄, bʉʼka ŋgwɔʼmbi nɔ nə bɛ ndə bəchî kwi ndʉʉbuumbi.

40Mbyu vaafɔ̀ʼ mu vâafɔʼɔ-Jɔŋ bəbûu ndə ɔ kə yʉ́ kwə́ʼ Jɔŋ, gɛ̀ hə bɔ̌ŋ Jiso le, nɔ nə bɛ Andolo, liŋ Samu Bita. 41Ɔ fəŋ gɛ̀ tʉ Samu liŋ-iŋ ghɔ̀ŋ tʉ ɔŋ mbɔ, “Baʼa nɔʼ nyíɛ mbʉ Wo ndə Nyii Kùŋ Tə́ŋ,” ndə i bɛ mbɔ Klai.

42Ɔ gwè nə nɔŋ tʉ Jiso. Jiso lɛ́nə ɔŋ ghɔ̀ŋ mbɔ, “A nɔ bɛ Samu vaa-Jɔŋ, bə bɔŋ bu kə́ tíi a nduɔ nə Kafa,” ndə i bɛ mbɔ Bita#1:42 Kafa leʼnə Bita nɔ bɛ yie imɔʼ ndə i bɛ mbɔ “ŋgoʼ .”.

43Mbi kʉ̂ʉ sɛŋ fíi, Jiso kə́ kʉ́ʉ ndə məfyú gɛ̀ mu Galili, nyíɛ Fili ghɔ̀ŋ tʉ ɔŋ mbɔ, “Gwè hə bɔ̌ŋ mɔ.” 44Fili nɔ nə lɔ̀ hə Bɛsieda, kə́ bɛ yəŋkwɛʼtəŋkə ndə Andolo ghɔŋ Bita lɔ̀ hə chɔ. 45Fili nyíɛ Natania, ghɔ̀ŋ tʉ ɔŋ mbɔ, “Baʼa nɔʼ nyíɛ ɔŋ ndə Mushi ghɔŋbə bʉəyʉkəŋgieNyii kə nyɔ̀ʼ mu ŋwɔʼnə-Nyii te ɔ le, ɔ nɔ bɛ Jiso ndə ɔ lɔ̀ hə Nasalɛ, kə́ bɛ vaa-Jɔsɛ.” 46Natania bə̀ŋhə tʉ ɔŋ mbɔ, “Bəkɔ fɔ-jyujyubɛʼ-kə fyú hə mu Nasalɛ mɛ?” Fili bə̀ŋhə tʉ ɔŋ mbɔ, “Gwè nyíɛ.” 47Jiso nyíɛ Natania, ɔ kə́ gwè mbʉə ɔ, ɔ kwə́ʼ tʉ ɔŋ ghɔ̀ŋ mbɔ, “B̈ii nyíɛ! Ndə ŋgie-shʉəŋ-kə, nɔ bɛ wo-Isilɛ nɔ təmə lɛɛŋkə chɔ fɛ!” 48Natania bíʼtə tʉ ɔŋ mbɔ, “A kínə mɔ təka?” Jiso bə̀ŋhə tʉ ɔŋ mbɔ, “Fili nɔ nə kə́ tíi a, a kə́ tə́nə tiɛŋ kətyʉ-fik le, tʉ mɔ nɔʼ nyíɛ aŋ.” 49Natania bə̀ŋhə tʉ ɔŋ mbɔ, “Labi, a nɔ bɛ mbʉ VaaNyii! A nɔ bɛ Fɔŋ-bʉə-Isilɛ!” 50Jiso bə̀ŋhə tʉ ɔŋ mbɔ, “A bɛ́ŋ bʉʼka mɔ ghɔ̀ŋ mbɔ mɔ nɔʼ kə nyíɛ aŋ tiɛŋ kətyʉ-fik mɛ? A bu bìʼ nyíɛ ibɛʼ-yə nu-shʉ́əshʉ́ə-bə ndə i chàa bɔ̄ŋbə.” 51Ɔ ghɔ̀ŋ tʉ ɔŋ mbɔ, “M̈ɔ kɛŋ shyíi bii nə shʉəŋ mbɔ bii bu nyíɛ ndə yuo bu ŋɔ́ʼnə, bʉəntəŋNyii kə́ kóʼ gɛ̀ yuo bɔŋleʼ shíʼ hə ndəŋ Vaa-Woməsʉʉ.”

Currently Selected:

Jɔŋ 1: bvm

Highlight

Copy