लुकस 3
3
बप्तिस्मा चिऊ युहन्नास डहरे सपड़ादस
(मत्तिस ३:१-१२; मरकुस १:१-८; युहन्नस १:१९-२८)
1रोम ता कोहाँ बेलस तिबेरिअसस ही पन्दरा बछर नू पन्तियस पिलातुसस यहुदिया प्रदेस ता हाकिमस रहचस। आहबाकी हेरोद एन्टिपासस गालिल प्रदेस ता सासकस रहचस अउर आस ही तंग्ड़िस फिलिपस इतुरिया अउर तराखोनितिस प्रदेस ता सासकस रहचस, ख़ने लुसानियासस अबिलेने प्रदेस ता सासकस रहचस। 2ख़ने हन्नासस अउर कैयाफास ही हुरमी ती कोहाँ यहुदी नैगस मन्जका बेड़ा नू धर्मेस ही हुकुम फिटकी अड्डा नू जकरियास ही तंग्दस युहन्नास हेद्दे बरचा। 3युहन्नास यरदन ख़ाड़ ही चारो तरता हुरमी अड्डा गुट्ठी नू केरस की आलर गे एन्ने नना गे तेंगा हेल्लरस, “पाप ती निमा गे जियन किरतआ अउर बप्तिस्मा होआ, होले धर्मेस निम्हय नन्जका पापन छेमा ननोस।” 4एकान्ने यसायाहस अगमजानिस ही पुथी नू एन्ने लिखिरकी र' ई,
“फिटकी अड्डा नू ओन्द ओर्तोस चिच्चियार नुम बअदस,
धर्मेउर्बस ही डहरेन सपड़आ
आस ही डहरेन सोझ कमआ।
5हुरमी गड्डिन निन्दतारओ,
अउर हुरमी परता अउर ड़िप्पा गुट्ठी सइर ननतारओ,
अउर टेड़हो डहरेन सोझ ननतारओ,
अउर गड्डी डिप्पा डहरे बेस्स ननतारओ।
6होरमा आलर धर्मेस ही बछरनन एरोर।”#यसायाहस ४०:३-५
7बग्गे आलर युहन्नास हेद्दे बप्तिस्मा होआ गे बरचर। लेकिन युहन्नास आलरिन बाचस, “ए नेर्र ही ख़द्दरो, ने निमन तिंगिया निम धर्मेस तरती बरऊ दन्डे ती बछरआ ओंगोर? 8निम निम्हय पापन अम्बा की जियन किरतआ अउर बेस्स नलख एदआ। ‘निम अबराहामस ही ख़द्द#३:८ अबराहामस ही ख़द्द धर्मेस अबराहमस गे चिच्चका गच्छरना ती यहुदी आलर सोचनर का आर धर्मेस ही चज्जका आलर हिकनर। हिक्दर’ बआ की मला सोचआ हेलरआ। एन निमन बअदन, ई पखना ती हूँ धर्मेस अबराहामस ही ख़द्द कमआ ओंगोस। 9अक्कू धर्मेस ही इन्साफ ही टोंगए#३:९ धर्मेस ही इन्साफ ही टोंगए पाप ती जियन मला किरतुउर हुरमी आलरिन दोस एदआ गे अउर कड़ा सजाय चिआ गे धर्मेस सपड़ार का रअदस। मन्न ही पेन्दा नू खन्डा गे अड़सिया किर्रकी र' ई, औंगे दव ख़ंजपा मला चिऊ हुरमी मन्न खन्डरो अउर चिच्च नू हेबेड़तारओ।”
10आलर युहन्नासिन मेन्जर, “होले एम एन्देर ननोम?”
11युहन्नास आरिन बिड़दाचस की बाचस, “नेख़ाय गने दुई ठो झुला र' ई, आस मला रउर गे ओन्टन चिओस नेकआ, अउर नेख़ाय गने ओना मोख़ा गे र' ई, आर हूँ अन्नेम नना नेकआ।”
12बटी उठबुऊ आलर#३:१२ बटी उठबुऊ आलर इर रोम ता कोहाँ बेलस खतरी बटी उठबुउर यहुदी आलर रहचर। हूँ बप्तिस्मा होआ गे बरचर अउर युहन्नासिन मेन्जर, “अना गुरु, एमा गे एन्दरा नना पड़ारो?”
13आस आरिन बाचस, “निमा गे ज्या बग्गे होआ गे हुकुम चिच्चका र' ई अदिती बग्गे बटी मला होआ।”
14सिपाहिर हूँ आसिन मेन्जर, “होले एमा गे एन्दरा ननोम?”
आस आरिन बाचस, “निम आलरिन एल्चताआ की, दोस लगबआ की ढिबा अमके होआ। निम निम्हय तनखानु खुस रअके।”
15आहबाकी आलर बछाबऊ ख्रिस्तस ही आसे नू रहचर, अउर युहन्नास दुम ख्रिस्तस हिकदस बाचर की जिया नू सोचआ लगियर, 16ख़ने युहन्नास होरमारिन बाचस, “एन निमरिन अम्म लेके बप्तिस्मा चिअदन। लेकिन ओर्तोस एंग्हय ती बग्गे सवंगिया बरआ लगदस, एन तो आस ही जुता ता फिता खोल्ना जोगे ही हूँ मलकन। आस निमरिन नेम्हा बोलतस अउर चिच्च तरतू बप्तिस्मा चिओस। 17अउर आस ही ख़ेक्खा नू गोहोम बेघआ गे डगरा होच्चका रअदस। औंगे गोहोम अउर भुसिन छिनड़ोस की गोहोमन कुट्ठी नू उइय्योस अउर भुसिन तो इकला हूँ मला तेभरना चिच्च नू ओल्दोओस चोओस।”
18एन्नेकी ढेर बग्गे कत्था गुट्ठी सिखाबअतेम युहन्नास दवसमाचार आलरिन मेनताचस। 19लेकिन युहन्नास राजी ख़ापू हेरोद एन्टिपाससिन केप्पस, एन्देरगेका आस तंग्हय तंग्ड़िस ही आलिन हेरोदियासन बेन्जेरका रहचस, अउर आस बग्गे मला बेस्स नलख गुट्ठी हूँ नन्जका रहचस। 20औंगे हेरोद एन्टिपासस युहन्नासिन जेहेल नू सज्जस की अउर बग्गे कोहाँ मला बेस्स नलख नन्जस।
येसुस ही बप्तिस्मा
(मत्तिस ३:१३-१७; मरकुस १:९-११)
21एकाबिरी होरमा आलर बप्तिस्मा होआ लगियर, ख़ने येसुस हूँ बप्तिस्मा होच्चस की गोहरारआ लगियस, ख़ने मेर्ख़ा तिसिगरा, 22अउर नेम्हा बोलतस देह ही रुप नू पेरवा लेखा येसुस मइयाँ इत्तियस। ख़ने मेर्ख़ा ती एन्ने ओन्टा अवाज मेन्दरा, “निन एंग्हय चोन्हा ख़द्द हिकदय, निंग्हय ती एन बग्गे रिझिरदन।”
येसुस ही पिढ़ी
(मत्तिस १:१-१७)
23येसुस तंग्हय नलख ओरे नना हेल्लरस ख़ने आस तिस बछर ही रहचस। आलर आसिन योसेफस ही तंग्दस हिकदस बआ लगियर। योसेफस एलिस ही तंग्दस रहचस। 24एलिस मत्तातस ही तंग्दस रहचस, मत्तातस लेविस ही तंग्दस, लेविस मल्किस ही तंग्दस, मल्किस यान्नास ही तंग्दस, यान्नास योसेफस ही तंग्दस, 25योसेफस मत्ताथियासस ही तंग्दस, मत्ताथियासस आमोसस ही तंग्दस, आमोसस नहुमस ही तंग्दस, नहुमस इसलिस ही तंग्दस, इसलिस नग्गैस ही तंग्दस, 26नग्गैस माथस ही तंग्दस, माथस मत्ताथियासस ही तंग्दस, मत्ताथियासस सेमैनस ही तंग्दस, सेमैनस योसेखस ही तंग्दस, योसेखस योदास ही तंग्दस, 27योदास योआननस ही तंग्दस, योआननस रेसास ही तंग्दस, रेसास यरुबाबेलस ही तंग्दस, यरुबाबेलस सालतिएलस ही तंग्दस, सालतिएलस नेरिस ही तंग्दस, 28नेरिस मल्किस ही तंग्दस, मल्किस अद्दिस ही तंग्दस, अद्दिस कोसामस ही तंग्दस, कोसामस एलमादमस ही तंग्दस, एलमादमस एरस ही तंग्दस, 29एरस यहोसुस ही तंग्दस, यहोसुस एलिएजरस ही तंग्दस, एलिएजरस योरिमस ही तंग्दस, योरिमस मत्तातस ही तंग्दस, मत्तातस लेविस ही तंग्दस, 30लेविस सिमियोनस ही तंग्दस, सिमियोनस यहुदास ही तंग्दस, यहुदास योसेफस ही तंग्दस, योसेफस योनानस ही तंग्दस, योनानस एल्याकिमस ही तंग्दस, 31एल्याकिमस मलेआस ही तंग्दस, मलेआस मिन्नास ही तंग्दस, मिन्नास मत्ताथास ही तंग्दस, मत्ताथास नातानस ही तंग्दस, नातानस दाउदस ही तंग्दस, 32दाउदस यिसैस ही तंग्दस, यिसैस ओबेदस ही तंग्दस, ओबेदस बोअजस ही तंग्दस, बोअजस सल्मोनस ही तंग्दस, सल्मोनस नहसोनस ही तंग्दस, 33नहसोनस अम्मिनादाबस ही तंग्दस, अम्मिनादाबस आरामस ही तंग्दस, आरामस हेसरोनस ही तंग्दस, हेसरोनस फारेसस ही तंग्दस, फारेसस यहुदास ही तंग्दस, 34यहुदास याकुबस ही तंग्दस, याकुबस इसाहकस ही तंग्दस, इसाहकस अबराहामस ही तंग्दस, अबराहामस तेरहस ही तंग्दस, तेरहस नाहोरस ही तंग्दस, 35नाहोरस सरुगस ही तंग्दस, सरुगस रउस ही तंग्दस, रउस पेलेगस ही तंग्दस, पेलेगस एबेरस ही तंग्दस, एबेरस सेलहस ही तंग्दस, 36सेलहस केनानस ही तंग्दस, केनानस अर्पछदस ही तंग्दस, अर्पछदस सेमस ही तंग्दस, सेमस नुहस ही तंग्दस, नुहस लेमेखस ही तंग्दस, 37लेमेखस मतुसेलहस ही तंग्दस, मतुसेलहस हनोकस ही तंग्दस, हनोकस येरेदस ही तंग्दस, येरेदस महलालेलस ही तंग्दस, महलालेलस केनानस ही तंग्दस, 38केनानस एनोसस ही तंग्दस, एनोसस सेतस ही तंग्दस, सेतस आदमस ही तंग्दस, आदमस धर्मेस ही ख़द्दस रहचस।
Currently Selected:
लुकस 3: KRUX
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
