Mateo 5

Jesús ndaꞌ xkiꞌs Dios yek yiꞌ

(Lc. 6:20-23)

1Lo senꞌ mbwiꞌ Jesús men toz tir mdyop, Jesús mdonke nda yek yiꞌ nde mdob xaꞌ tya. Zyasa re xin'te'd Jesús mbike gax lo Jesús, 2nde mdobte Jesús mbloꞌ Xaꞌ xkiꞌs Dios, nchab Xaꞌ:

3—Nabeꞌz toz nda re men mne xaꞌ nakinꞌ xaꞌ Dios, tak re xaꞌ ya yote tenꞌ nyebeꞌ Dios.

4Nabeꞌz toz nda re men jwanꞌ nchonꞌ, tak re xaꞌ ya ko nale Dios lazoꞌ xaꞌ.

5Nabeꞌz toz nda re men nadoꞌ nak, tak re xaꞌ ya kayaꞌ izyo ak chanꞌ xaꞌ.

6Nabeꞌz toz nda re men jwanꞌ dib nzo lazonꞌ nchalas wiꞌ xaꞌ jwanꞌ galꞌ li Dios, tak re xaꞌ ya nix yo lazonꞌ.

7Nabeꞌz toz nda re men jwanꞌ nzo yalndlyat lazonꞌ, tak re xaꞌ ya lyat lazoꞌ Dios xaꞌ.

8Nabeꞌz toz nda re men ngenta jwanꞌ narax lazonꞌ, tak re xaꞌ ya twiꞌpa xaꞌ Dios.

9Nabeꞌz toz nda re men jwanꞌ ndli sa nabeꞌz kwe re men, xaꞌ ya kole Dios xinꞌ Dios.

10Nabeꞌz toz nda re men senꞌ ne ndyak xaꞌ, lo nchuꞌbla men xkap xaꞌ kwent ndli xaꞌ jwanꞌ galꞌ lo Dios, xaꞌ ya yote tenꞌ nyebeꞌ Dios.

11Nabeꞌz toz nda re goꞌ senꞌ, ni xin men xis goꞌ, nchuꞌbla men goꞌ nde nkeꞌ xaꞌ yalke yek goꞌ re jwanꞌ naꞌnakta goꞌ kwent ndli lazoꞌ goꞌ na. 12Blyen goꞌ nde nale blo lazoꞌ goꞌ, tak naro toz jwanꞌ li goꞌ gan lo beꞌ. Tak taga mchuꞌbla xaꞌ re xaꞌ mbrid xkiꞌs Dios pola.

Ted lo izyo

13Goꞌ nak xaja ted lo izyo. Per tez leꞌ ted nanasigtay, ¿xamod ak nasiga tib gob sa li rsin men na? Ya naꞌlitraꞌ sinꞌ na, kobiy xaꞌy nde tya tob ni men xis ney.

Xni lo izyo

14´Goꞌ nak xaja xni lo izyo. Ti yez jwanꞌ nzi yek yiꞌ naꞌnyed kas loy. 15Nek thib men nantobta xaꞌ ti ki kandil nde tow xaꞌ xibeꞌ yek ney, cheꞌla gap ntob xaꞌy sa toxniy lo re men nzo yo. 16Tagaꞌ goꞌ, bli goꞌ jwanꞌ wen sa wiꞌ re men jwanꞌ ndli goꞌ, tamod ak goꞌ xni lo xaꞌ, sa wen ni xaꞌ xis Xud goꞌ ndob lo beꞌ.

Jesús ndloꞌ ley

17´Naꞌlid goꞌ xgab ke leꞌ na ndal sa kib na re ley mkeꞌ Moisés nde re jwanꞌ mbloꞌ re xaꞌ mdaꞌ xkiꞌs Dios pola. Naꞌndalta na sa kib nay, leꞌn ndal sa lin reta jwanꞌ nchaba. 18Nde galꞌ diꞌs nin lo goꞌ, laja benꞌ nzi izyo nde beꞌ, nek tib punt nde nek thib letr lo ley naꞌrita axta kebeꞌ ak reta jwanꞌ ndablo ak. 19Jwanꞌ nasa xanya ti men naꞌxobyekta ti yalnyebeꞌ lud nge ni lo ley, nde tagaꞌ mod ndloꞌ xay lo xagaꞌ men li mena, xaꞌ ya lud tak lo yalnyebeꞌ lo beꞌ. Leꞌ xaꞌ jwanꞌ nxobyeka nde taga ndloꞌ xaꞌy lo men, xaꞌ ya ak xaꞌ ndak toz tenꞌ nyebeꞌ Dios. 20Naya na ni lo goꞌ, tez nalid goꞌ mas jwanꞌ galꞌ ke lo re maestr nchak ley nde lo re xaꞌ fariseo, naꞌlid goꞌ gan yote goꞌ lo yalnyebeꞌ lo beꞌ.

Jesús ndloꞌ jwanꞌ nak yalnayiꞌ

(Lc. 12:57-59)

21´Goꞌ mne, Moisés nchab lo re xaꞌ gox: "Nakujta goꞌ men, tez cho xaꞌ kuj ta men xaꞌ, nchap xaꞌ yalke, nde ya xaꞌ liz yiꞌb." 22Leꞌ na ni lo goꞌ tez cho xaꞌ nayiꞌ lo ta men xaꞌ, xaꞌ ya nchap yalke nde ya xaꞌ liz yiꞌb. Leꞌ xaꞌ jwanꞌ nixin lo ta men xaꞌ, xaꞌ ya yo xkena yolow. Nde xaꞌ jwanꞌ mbez lo ta men xaꞌ: ne yek la, xaꞌ ya ya lo bel lenꞌ yeꞌr abil. 23Jwanꞌ nasa tez ndenoa jwanꞌ yon taꞌa lo Dios, nde tenꞌ nkayaꞌ xaꞌ yon tya nteꞌlas la, nchap la yalke lo ta men la, 24blaꞌ jwanꞌ yon ta ndenoa ya lo tenꞌ nkayaꞌ xaꞌ yon nde nerla wa tsalꞌ diꞌs lo ta men la, seraꞌ yed la nde taꞌa chanꞌ la lo Dios.

25Tez leꞌ xaꞌ ndebeyonoa mbeꞌ xaꞌ la yolow, laja ndo rop goꞌ ned pken ptoyal diꞌs kon xaꞌ, sa naꞌtaꞌyad xaꞌ la lo Juez. Nde tez naꞌtad lia, leꞌ Juez taꞌyaꞌa lo xa' nak sin' nde xa' nak sin' na' keꞌ xaꞌ la lizyiꞌb. 26Nde nipaꞌ na loa naryoꞌted la tya axta kebeꞌ kix la re nak jwanꞌ ndab la.

Jesús ndloꞌ narax nak re xaꞌ ngeteno xaꞌ nakta salꞌ xaꞌ

27´Goꞌ mne Moisés nchab lo re xaꞌ gox: "Naꞌgaxnod goꞌ xaꞌ jwanꞌ nanakta salꞌ goꞌ." 28Per na ni lo goꞌ tez xanya ti xaꞌ ngwiꞌ lo ti ngol nanakta salꞌ xaꞌ nde ndyablaꞌs xaꞌ gaxno xaꞌ ngol, xaꞌ ya ngoxnola xaꞌ ngol lenꞌ lazoꞌ xaꞌ.

29´Tez ngudlo ban la ndli nchab la lo jwanꞌ narax, blotey nde blobiy, tak mas wen tyaꞌb ti ngudloa ke dib la ya yeꞌr abil. 30Nde tez yaꞌ ban la ndli nchab la lo jwanꞌ narax, bchoy nde blobiy, tak mas wen tyaꞌb ti yaꞌa ke dib la ya yeꞌr abil.

Jesús ndloꞌ xa nak lo ndlaꞌ ta men

31´Taga nchab Moisés pola:

"Tez cho xaꞌ ndlaꞌ ngolꞌ naꞌ, ndablo toxkwaꞌ xaꞌ ti yes jwanꞌ ndej mblaꞌ xaꞌ ngol. 32Per na ni lo goꞌ, xaꞌ jwanꞌ ndlaꞌ ngol naꞌ, tez nakte lo ngoxno ngol xaga mbiꞌ, cheꞌ ngechep xaꞌ ngol li ngol yalke gaxno ngol xaꞌga mbiꞌ. Nde xaꞌ jwanꞌ nselyaꞌ kon ngol ta mblaꞌ la mbiꞌ ya, yalkegaꞌ naka lo xaꞌ.

Narax nak tob ro men Dios lo keꞌyek men ti jwanꞌ

33´Nde taga mne goꞌ xa nchab Moisés lo re xaꞌ gox pola: "Naꞌlat la lia re jwanꞌ mkeꞌyek la, cheꞌla bli reta jwanꞌ mkeꞌyek la lo Dios." 34Per na ni lo goꞌ, naꞌtobrod goꞌ nek tib jwanꞌ senꞌ nkeꞌyek goꞌ li goꞌ ti jwanꞌ. Naꞌtobrod goꞌ beꞌ, tak tya ndob Dios. 35Nek tobro goꞌ izyo, tak tya ndob ni Dios, nek tobro goꞌ Jerusalén, tak leꞌy nak yez chanꞌ Rey ro. 36Neka yek la natobrot la, tak naꞌakta li nagat la o li nakis la nek tib yisyek la#5:36 "tak naꞌakta li nagat la o li nakis la nek tib yisyek la." Diꞌs reꞌ toyala yen mena ti mod re: Nak naꞌakta li yeꞌn men lazoꞌ men nde naꞌakta li gox men lazoꞌ men. . 37Senꞌ gab goꞌ ti jwanꞌ, tez tli goꞌy, gab goꞌ "liney" nde tez mne goꞌ nalid goꞌy, gab goꞌ "naꞌlitney", tak tez tobro goꞌ masra jwanꞌ, jwanꞌ re' nde lo jwan' narax.

Keꞌ lazoꞌ men re xaꞌ jwanꞌ nakap nak lo men

(Lc. 6:27-36)

38´Goꞌ mnela nchab Moisés pola: "Tez cho ti xaꞌ koꞌ ngudlo ti men, noga xaꞌ ya ryoꞌ ti ngudlonꞌ, nde tez cho ti xaꞌ gab ti kele men, noga xaꞌ ya gab ti kelenꞌ." 39Per na ni lo goꞌ: Naꞌaknayid goꞌ lo xaꞌ jwanꞌ nayiꞌ lo goꞌ, cheꞌla tez cho keꞌy kwat ban la, pta' tedib kwat la. 40Nde tez cho xaꞌ nchalas yano xaꞌ la yolow, sa kib xaꞌ camis la, noga chamar la pta' lo xaꞌ. 41Tez cho xaꞌ ndo nyebeꞌ loa wea chanꞌ xaꞌ ti mil metr, beꞌy chop mil metr. 42Nde cho xaꞌ nyab jwanꞌ loa, btaꞌy. Tez cho xaꞌ nyaꞌb prest loa, bkwanꞌ na ka xaꞌ.

43´Taga mbin goꞌ mbez men:

"Bkeꞌ lazoꞌa ta men la nde byiꞌno re xaꞌ nayiꞌ loa." 44Per na ni lo goꞌ: bkeꞌ lazoꞌ goꞌ re xaꞌ jwanꞌ nakap nak lo goꞌ, blileyꞌ goꞌ re xaꞌ nixin xis goꞌ, naxut gok goꞌ lo xaꞌ nakap nak lo goꞌ nde mnaꞌb goꞌ lo Dios por re xaꞌ xkap ngetenke xis goꞌ. 45Tamod sa ak goꞌ xinꞌ Xud goꞌ ndob lo beꞌ, tak Xaꞌ ndaꞌ xni lo men wen nde lo men xkap, nde ntelꞌ Xaꞌ yi lo men galꞌ ngete nde men narax ngete. 46Per tez goꞌ nkeꞌ lazoꞌ goꞌ benꞌta re xaꞌ jwanꞌ nkeꞌ lazonꞌ goꞌ, ¿cho kwan li goꞌ gan? Wiꞌ goꞌ nea, taga ndli re xaꞌ jwanꞌ nya'b tmi low. 47Nde tez benꞌta lo wes goꞌ ni goꞌ dyux lonꞌ, ngen kwan jwanꞌ ro toz ngeli goꞌ, axta re xaꞌ nanzolod Dios ndli jwanꞌ na. 48Jwanꞌ nasa galꞌ gok goꞌ, xa galꞌ nak Xud goꞌ ndob lo beꞌ.

Currently Selected:

Mateo 5: zpt

Highlight

Copy