Hechos 22
22
1—'Ami ỹaqáỹa', qataxa 'ami ỹit'alpi, ỹa 'anaquiáxañiỹa da'me 'ami senapegalo.
2Ca'li demachíỹa da' dosiilo na' judío l'aqtaqa, qana'chi ỹátaqta ỹ'imaqtam so' siỹaxadipi. Qana'chi so' Pablo 'enaaco':
3—Jaỹim judío lé'ec. Ỹañoqo' di' noic Tarso 'me huáaue di' 'aléua Cilicia. Qaláxasa jaỹim ñaxatalégue na' Jerusalén, jaỹim lapaxaguenatac so' Gamaliel. Jaỹim ỹátaqta sequetelóo'te naua' laqátaxaco so'me huá'au qadapidiipi. Chan'eesa ỹátaqta na'chi 'eeta't 'uo da' ỹouoxo da' s'onataxáatapecot ñi' Dios, ỹátaqta semato'ot jañi' ỹiquidiaqte. Qana'chi sena'ama da' 'ami naỹi. 4Jaỹim ca'li ỹátaqta ỹó'o jen'me quétapegue' da'me n'aqtac 'me nec'alaxaqui, cha ỹivíd'a da' 'uo na' salaat. Qataxa saconé'uo da' secoñi' na' l'idimpi qataxa na' ỹauodipi, da' qaidi sanáaue jañi' cointáxanaxaqui. 5Qaa'le so'me lasoxola' na' netaxaỹáxanaxanecpi da' qodosápegue' ñi' Dios, qataxa ỹima jen'me laỹi nasoxola'pi, jen'me ỹañoxot da' ỹ'axat dójo', da' naqáina jen'me 'me jaỹim ỹanem jaso' nidíise 'me taỹa na' qadaỹi judiopi 'me néta'ña di' Damasco. Qana'chi jaỹim saỹá'a di'me ca'li da' s'iiná'a na' 'amaqténataxanaxaicpi, da' qaidi ñauéga na' Jerusalén, da' qoỹi'uaxan.
So' Pablo ỹ'axat da' 'éeta joca'li d'amaqtenataxan
(Hechos 9.1-19; 26.12-18)
6Qaláxasa ca'li sequétapegue' so' naq'aic, qana'chi sóxote ñadíite'uo di' Damasco, qaa'le nadíit'a nolo' laiñi, qana'chi nepeláxateta da' souáaue so' n'edáxa 'me chiỹoqo'ot na' piỹem. 7Qana'chi se'uáqaiỹi. Ỹim, qana'chi semachíỹa so' n'aqtac jaỹim 'enapéga, 'enaac: “'Am Saulo, ¿tá'nooqo'chi jaỹim 'aucáatac?” 8Chan'eesa jaỹim senataxáatac, senaac: “'Am ỹasoxola', ¿jái'chi 'am?” Qana'chi jeso'me jaỹim 'enapéga, 'enaac: “Na'chaỹim Jesús 'me jaỹim Nazaret lé'ec, na'chaỹim 'me jaỹim 'aucáatac.” 9Qana'chi saa'me ñáictapee'to, saa'me ỹauáachidiỹi so'me n'edáxa, qana'chi ỹátaqta d'oi'. Qaláxasa sa demachíta so'me jaỹim 'éetapega. 10Qana'chi jaỹim senaac: “'Am ỹasoxola', ¿jái'chogamaxa sétaaque da' séeta?” Qana'chi so' qadasoxola' jaỹim 'enapéga, 'enaac: “'Oñíseguem, qana'chi 'ocot da' 'adeuoxoc da' 'aiỹi di' Damasco. Huá'a qomle di'me, qana'chi 'am qoỹ'axátem ỹima ga'me 'ad'onataxanaxac.” 11Qaa'le jaỹim na'chi sa ñauanéegue, qá'a ỹasouaxat so' n'edáxa, qana'chi saua' ñáictapee'to jaỹim ỹacootr'aguet, cha sivída'uo di' Damasco.
12Di'me, qana'chi néta'ña so' siỹaxaua lenaxat Ananías. So'me ỹátaqta ỹalaxalégue jen'me laqátaxacpi so' Moisés. Qana'chi jen'me judiopi 'me l'acháqa' di' Damasco ỹátaqta n'óota qa'en da' n'aqtaguec so'me. 13Qana'chi so'me Ananías jaỹim nec'áta, qana'chi jaỹim 'enapéga, 'enaac: “'Am ỹaqáỹa Saulo, 'am ỹitaxa 'anauanéegue qomle.” Huá'a, qana'chi ỹitaxa ñauáachiiñi, qana'chi selot'ot so'me. 14Qana'chi so'me jaỹim 'enapéga, 'enaac: “Ñi'me netamnaxala' so'me huá'au qadapidiipi, ñi'me 'am ỹilotelégue josii'cho', qá'a sétaaque da' qaidi 'am 'auaỹáten ga'me mai'chi 'éetapeec ñi'me, qataxa qaidi 'anauá'ne' so'me 'ónaxaicaloic, qataxa qaidi 'anaquiáxana so'me da' 'am detaxaỹot. 15Qá'a 'am 'au'axat qomle so'me da' 'au'aqtaxanem ỹima na' siỹaxadipi, qataxa 'au'axat da'me 'adauanáxanaxac qataxa da' 'amachíchiỹi. 16Qana'chi naỹi ¿jái'chogamaxa 'auasáptapiỹi? 'Oñíseguem qomle, qana'chi 'am qonachiláxan, ỹátaqta 'aup'iỹá'a da' lenaxat so' qadasoxola' Jesús, qaidi qoỹapalaxa't naua' 'adoico.”
So' Pablo ỹ'axat da' 'éeta ca'li qoỹamaxa jen'me sa judiopi
17Cana'le jaỹim ñ'iỹílaxa na' Jerusalén, qana'chi sec'áte'uo ñi' tamnaxaqui da' qaidi ñitamen, qana'chi 'uo so' ỹauanáxanaxac. 18Jaỹim selá'a so' qadasoxola' Jesús, qana'chi jaỹim 'enapéga, 'enaac: “Sa 'aniỹáloxoden qomle da' 'ocá'ai na' Jerusalén, qá'a sa qoỹaconguet da' 'ad'aqtaxanaxac da' jaỹim 'au'axátetac.” 19Chan'eesa jaỹim senaac: “'Am ỹasoxola', jen'me ỹaỹáten da' jaỹim sequétaỹi ca'li ỹima jen' lemáxaquipi na' judiopi, qana'chi saconé'uo da' secoñi' ỹima jen'me ỹ'amaqtéetac da' 'onéta, qataxa salaatétac. 20Qataxa joca'li qoỹalaat di' Esteban 'me 'ad'aqtáxanaxanec, qana'chi jaỹim salquétauo nataq'en, qataxa selótapee'to naua' leuo jen'me dalaataxan.” 21Qaláxasa so' qadasoxola' Jesús jaỹim 'enapéga, 'enaac: “'Aue, 'oc qomle, qá'a ỹátaqta qaỹa'ague ga'me 'am samaxague, 'am samaxa qomle jen'me sa judiopi.”
So' huataxanaq let'a ỹitaxa ỹicoñi' so' Pablo
22Huá'a, qana'chi táchii'ña da' sa qonaquiáxana. Qana'chi so' siỹaxadipi ỹátaqta ỹ'alqátaỹi, 'enaac:
—¡N'óota da' qoỹalaat da'me siỹaxaua! ¡'Ená'te taa'le nec'alétaiỹi qoỹin!
23Qaa'le na'chi quet'ot da' ỹ'alqátaỹi so'me siỹaxadipi, qataxa ỹasaqátrapiiseguem naua' leuo qataxa na' 'aléua, 24qana'chi so' huataxanaq let'a damaxasoxolégue da' ỹitaxa qoỹanáaue so' l'acháqa' na' huataxanaqpi so' Pablo, qataxa damaxasoxolégue da' qaidi qoỹi'uaxan so'me, qaidi ỹ'axat ga' ỹ'éte'uo da' ỹ'alqatalégue so'me na' siỹaxadipi. 25Qaláxasa ca'li sóxote ỹim da' qoỹicoñida't da' sétaaque da' qoỹi'uaxan, qana'chi so' Pablo 'enaaco':
—¿Qa'chi ỹañoxoto' da' 'ami da' 'au'uaxáñii ga' romano lé'ec, da' 'uootaxa da' maliaxa sa 'anmichiỹáaque ga' huasoilégue?
26Ca'li demachí'ỹa da'me so' lecochaxaua so' huataxanaq let'a, qana'chi jec da' d'aqtaxanem so' let'a, 'enaac:
—Ma'chaxa qomle, 'ad'oỹa'aguet da' sétaaque 'aué'et, qá'a da'me siỹaxaua, da'me romano lé'ec.
27Chan'eesa so' net'a ỹic'áte'uo so' Pablo, qana'chi ỹinatétac, 'enaac:
—¿Qo'li 'eesa da' 'am romano lé'ec?
Qana'chi so' Pablo 'enaaco':
—Já'a.
28Qana'chi so' net'a 'enaaco':
—Jaỹim ỹátaqta sa lequese'egue da' seseetéetac da' qaidi jaỹim romano lé'ec.
Qaláxasa so' Pablo 'enaaco':
—Jaỹim qaamaxa ỹátaqta ỹañoqo' di'me.
29Huá'a, qana'chi so'me sétaaque da' ỹi'uaxan so'me, qana'chi nelágaxataac. Ỹivíd'a so' net'a ca'li ỹaỹáten da' so'me romano lé'ec, qana'chi so'me ỹátaqta 'uo da' loqolánaxa ỹasouaxat da' ỹicoñideta't so' Pablo.
So' Pablo qoỹasoxona'aguet so' net'alpi 'me ỹ'étac na' lasoxocpi na' judiopi
30So' nolo' laqáỹa, qana'chi so'me net'a sétaaque da' ỹaỹáten ga' 'éeta jen' judiopi da' nauténa so' Pablo. Chan'eesa naqa't naua' leque'te, qana'chi 'enapéga da' ỹí'et so' lemáxac so' lasoxola'pi na' netaxaỹáxanaxanecpi, nataq'en ỹima so' net'alpi 'me ỹ'étac na' nasoxocpi. Qaama'le nauégueegue so' Pablo da' qoỹanóoue so' dasot'a't.
Currently Selected:
Hechos 22: PLGNT93
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
Hechos 22
22
1—'Ami ỹaqáỹa', qataxa 'ami ỹit'alpi, ỹa 'anaquiáxañiỹa da'me 'ami senapegalo.
2Ca'li demachíỹa da' dosiilo na' judío l'aqtaqa, qana'chi ỹátaqta ỹ'imaqtam so' siỹaxadipi. Qana'chi so' Pablo 'enaaco':
3—Jaỹim judío lé'ec. Ỹañoqo' di' noic Tarso 'me huáaue di' 'aléua Cilicia. Qaláxasa jaỹim ñaxatalégue na' Jerusalén, jaỹim lapaxaguenatac so' Gamaliel. Jaỹim ỹátaqta sequetelóo'te naua' laqátaxaco so'me huá'au qadapidiipi. Chan'eesa ỹátaqta na'chi 'eeta't 'uo da' ỹouoxo da' s'onataxáatapecot ñi' Dios, ỹátaqta semato'ot jañi' ỹiquidiaqte. Qana'chi sena'ama da' 'ami naỹi. 4Jaỹim ca'li ỹátaqta ỹó'o jen'me quétapegue' da'me n'aqtac 'me nec'alaxaqui, cha ỹivíd'a da' 'uo na' salaat. Qataxa saconé'uo da' secoñi' na' l'idimpi qataxa na' ỹauodipi, da' qaidi sanáaue jañi' cointáxanaxaqui. 5Qaa'le so'me lasoxola' na' netaxaỹáxanaxanecpi da' qodosápegue' ñi' Dios, qataxa ỹima jen'me laỹi nasoxola'pi, jen'me ỹañoxot da' ỹ'axat dójo', da' naqáina jen'me 'me jaỹim ỹanem jaso' nidíise 'me taỹa na' qadaỹi judiopi 'me néta'ña di' Damasco. Qana'chi jaỹim saỹá'a di'me ca'li da' s'iiná'a na' 'amaqténataxanaxaicpi, da' qaidi ñauéga na' Jerusalén, da' qoỹi'uaxan.
So' Pablo ỹ'axat da' 'éeta joca'li d'amaqtenataxan
(Hechos 9.1-19; 26.12-18)
6Qaláxasa ca'li sequétapegue' so' naq'aic, qana'chi sóxote ñadíite'uo di' Damasco, qaa'le nadíit'a nolo' laiñi, qana'chi nepeláxateta da' souáaue so' n'edáxa 'me chiỹoqo'ot na' piỹem. 7Qana'chi se'uáqaiỹi. Ỹim, qana'chi semachíỹa so' n'aqtac jaỹim 'enapéga, 'enaac: “'Am Saulo, ¿tá'nooqo'chi jaỹim 'aucáatac?” 8Chan'eesa jaỹim senataxáatac, senaac: “'Am ỹasoxola', ¿jái'chi 'am?” Qana'chi jeso'me jaỹim 'enapéga, 'enaac: “Na'chaỹim Jesús 'me jaỹim Nazaret lé'ec, na'chaỹim 'me jaỹim 'aucáatac.” 9Qana'chi saa'me ñáictapee'to, saa'me ỹauáachidiỹi so'me n'edáxa, qana'chi ỹátaqta d'oi'. Qaláxasa sa demachíta so'me jaỹim 'éetapega. 10Qana'chi jaỹim senaac: “'Am ỹasoxola', ¿jái'chogamaxa sétaaque da' séeta?” Qana'chi so' qadasoxola' jaỹim 'enapéga, 'enaac: “'Oñíseguem, qana'chi 'ocot da' 'adeuoxoc da' 'aiỹi di' Damasco. Huá'a qomle di'me, qana'chi 'am qoỹ'axátem ỹima ga'me 'ad'onataxanaxac.” 11Qaa'le jaỹim na'chi sa ñauanéegue, qá'a ỹasouaxat so' n'edáxa, qana'chi saua' ñáictapee'to jaỹim ỹacootr'aguet, cha sivída'uo di' Damasco.
12Di'me, qana'chi néta'ña so' siỹaxaua lenaxat Ananías. So'me ỹátaqta ỹalaxalégue jen'me laqátaxacpi so' Moisés. Qana'chi jen'me judiopi 'me l'acháqa' di' Damasco ỹátaqta n'óota qa'en da' n'aqtaguec so'me. 13Qana'chi so'me Ananías jaỹim nec'áta, qana'chi jaỹim 'enapéga, 'enaac: “'Am ỹaqáỹa Saulo, 'am ỹitaxa 'anauanéegue qomle.” Huá'a, qana'chi ỹitaxa ñauáachiiñi, qana'chi selot'ot so'me. 14Qana'chi so'me jaỹim 'enapéga, 'enaac: “Ñi'me netamnaxala' so'me huá'au qadapidiipi, ñi'me 'am ỹilotelégue josii'cho', qá'a sétaaque da' qaidi 'am 'auaỹáten ga'me mai'chi 'éetapeec ñi'me, qataxa qaidi 'anauá'ne' so'me 'ónaxaicaloic, qataxa qaidi 'anaquiáxana so'me da' 'am detaxaỹot. 15Qá'a 'am 'au'axat qomle so'me da' 'au'aqtaxanem ỹima na' siỹaxadipi, qataxa 'au'axat da'me 'adauanáxanaxac qataxa da' 'amachíchiỹi. 16Qana'chi naỹi ¿jái'chogamaxa 'auasáptapiỹi? 'Oñíseguem qomle, qana'chi 'am qonachiláxan, ỹátaqta 'aup'iỹá'a da' lenaxat so' qadasoxola' Jesús, qaidi qoỹapalaxa't naua' 'adoico.”
So' Pablo ỹ'axat da' 'éeta ca'li qoỹamaxa jen'me sa judiopi
17Cana'le jaỹim ñ'iỹílaxa na' Jerusalén, qana'chi sec'áte'uo ñi' tamnaxaqui da' qaidi ñitamen, qana'chi 'uo so' ỹauanáxanaxac. 18Jaỹim selá'a so' qadasoxola' Jesús, qana'chi jaỹim 'enapéga, 'enaac: “Sa 'aniỹáloxoden qomle da' 'ocá'ai na' Jerusalén, qá'a sa qoỹaconguet da' 'ad'aqtaxanaxac da' jaỹim 'au'axátetac.” 19Chan'eesa jaỹim senaac: “'Am ỹasoxola', jen'me ỹaỹáten da' jaỹim sequétaỹi ca'li ỹima jen' lemáxaquipi na' judiopi, qana'chi saconé'uo da' secoñi' ỹima jen'me ỹ'amaqtéetac da' 'onéta, qataxa salaatétac. 20Qataxa joca'li qoỹalaat di' Esteban 'me 'ad'aqtáxanaxanec, qana'chi jaỹim salquétauo nataq'en, qataxa selótapee'to naua' leuo jen'me dalaataxan.” 21Qaláxasa so' qadasoxola' Jesús jaỹim 'enapéga, 'enaac: “'Aue, 'oc qomle, qá'a ỹátaqta qaỹa'ague ga'me 'am samaxague, 'am samaxa qomle jen'me sa judiopi.”
So' huataxanaq let'a ỹitaxa ỹicoñi' so' Pablo
22Huá'a, qana'chi táchii'ña da' sa qonaquiáxana. Qana'chi so' siỹaxadipi ỹátaqta ỹ'alqátaỹi, 'enaac:
—¡N'óota da' qoỹalaat da'me siỹaxaua! ¡'Ená'te taa'le nec'alétaiỹi qoỹin!
23Qaa'le na'chi quet'ot da' ỹ'alqátaỹi so'me siỹaxadipi, qataxa ỹasaqátrapiiseguem naua' leuo qataxa na' 'aléua, 24qana'chi so' huataxanaq let'a damaxasoxolégue da' ỹitaxa qoỹanáaue so' l'acháqa' na' huataxanaqpi so' Pablo, qataxa damaxasoxolégue da' qaidi qoỹi'uaxan so'me, qaidi ỹ'axat ga' ỹ'éte'uo da' ỹ'alqatalégue so'me na' siỹaxadipi. 25Qaláxasa ca'li sóxote ỹim da' qoỹicoñida't da' sétaaque da' qoỹi'uaxan, qana'chi so' Pablo 'enaaco':
—¿Qa'chi ỹañoxoto' da' 'ami da' 'au'uaxáñii ga' romano lé'ec, da' 'uootaxa da' maliaxa sa 'anmichiỹáaque ga' huasoilégue?
26Ca'li demachí'ỹa da'me so' lecochaxaua so' huataxanaq let'a, qana'chi jec da' d'aqtaxanem so' let'a, 'enaac:
—Ma'chaxa qomle, 'ad'oỹa'aguet da' sétaaque 'aué'et, qá'a da'me siỹaxaua, da'me romano lé'ec.
27Chan'eesa so' net'a ỹic'áte'uo so' Pablo, qana'chi ỹinatétac, 'enaac:
—¿Qo'li 'eesa da' 'am romano lé'ec?
Qana'chi so' Pablo 'enaaco':
—Já'a.
28Qana'chi so' net'a 'enaaco':
—Jaỹim ỹátaqta sa lequese'egue da' seseetéetac da' qaidi jaỹim romano lé'ec.
Qaláxasa so' Pablo 'enaaco':
—Jaỹim qaamaxa ỹátaqta ỹañoqo' di'me.
29Huá'a, qana'chi so'me sétaaque da' ỹi'uaxan so'me, qana'chi nelágaxataac. Ỹivíd'a so' net'a ca'li ỹaỹáten da' so'me romano lé'ec, qana'chi so'me ỹátaqta 'uo da' loqolánaxa ỹasouaxat da' ỹicoñideta't so' Pablo.
So' Pablo qoỹasoxona'aguet so' net'alpi 'me ỹ'étac na' lasoxocpi na' judiopi
30So' nolo' laqáỹa, qana'chi so'me net'a sétaaque da' ỹaỹáten ga' 'éeta jen' judiopi da' nauténa so' Pablo. Chan'eesa naqa't naua' leque'te, qana'chi 'enapéga da' ỹí'et so' lemáxac so' lasoxola'pi na' netaxaỹáxanaxanecpi, nataq'en ỹima so' net'alpi 'me ỹ'étac na' nasoxocpi. Qaama'le nauégueegue so' Pablo da' qoỹanóoue so' dasot'a't.
Currently Selected:
:
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.