Mateo 15
15
Ga' ỹisepaxanaqtet da' l'óiỹaxac ga' siỹaxaua
(Marcos 7.1-23)
1Qana'chi 'uo na' nichíi'uo so' Jesús na' fariseopi qataxa jen' dapaxaguenataxáatapeec na' laqátaxacpi so' Moisés 'me chiỹoxogue da' Jerusalén. Qana'chi qoỹinatétac jeso'me, qoỹinaac:
2—¿Tá'nooqo'chi na' 'adapaxaguenatacpi da' sa ỹalaxalégue jeda'me n'onataguec jeso'me huá'au qadet'alpi? Qá'a jen'me sa ỹipaguelégue da' lasoxoc da' qoỹiỹoi' naua' noua' da' 'uootaxa ỹamtaa'le dequé'e ga' siỹaxaua.
3Qaláxasa so' Jesús nataq'en ỹinat jeso'me siỹaxadipi, 'enaaco':
—'Ami nataq'en ¿tóoqo'chi da' sa 'aualaqailóo'te naua' lamaxasóxonaxaco ñi' Dios, na'chidáta da' mai'chi 'oquíit'apee'to naua' 'an'onataguecódii'? 4Qá'a ñi' Dios damaxasoxolégue joca'li da' naq'áita: “Ỹátaqta 'uo da' 'enec 'auen ga' 'adet'a qataxa jaga' 'adat'e.” Qataxa nataq'en 'eet'oi: “Ga' ỹisouen ga' let'a 'uootaxa jaga' lat'e, qaa'le jega'me qoỹalaat.” 5Qaláxasa 'ami 'aviñíitapega da' ga' siỹaxaua ỹañoxot da' 'enapéga ga' let'a 'uootaxa jaga' lat'e da' naq'áita: “Sa 'am 'te da' 'am ỹicochiỹa, qá'a ỹima jen' jaỹim huet'ot sóxote da' sanem ñi' Dios.” 6Qana'chi gamachaqaiga siỹaxaua, da' 'uootaxa l'aqtac dójo', qana'chi sa ỹiuen da' lecochiỹa ga' let'a, 'uootaxa jaga' lat'e. Naqaida da' 'oñíita, da' mai'chi 'oquiỹiỹi da' ladic da' 'an'onataguiquii, jeda'me ỹichoxot da' 'ami ỹátaqta qaỹa ga' náỹi 'aviñii jeda'me lamaxasóxonaxac ñi' Dios. 7¡'Ami 'me 'aviñíitapega da' 'ami lec'óqo'te ñi' Dios! Ỹátaqta 'ami tachiilo jeda'me ỹidíñi joca'lio' so' Dios l'aqtáxanaxanec, lenaxat Isaías, 'me 'enaaco':
8Jénjo' siỹaxadipi 'éetapega jaỹim ỹi'ỹoxodéetac,
qaláxasa jañi' liquidiaqte ỹátaqta soqoỹoqót'a qa'en jaỹim.
9Ỹisamaxasáỹi da' jaỹim ỹ'étec da' li'ỹoxodénataxanaxac,
qá'a naua' lapaxaguenataxanaxaco, jenaa'me mai'chi laqátaxaco na' 'chi siỹaxadipi.
10Qana'chi ỹiỹáxanooue so' siỹaxadipi da' nichíiuo, qana'chi 'enapego', 'enaaco':
—Ỹa 'anaquiáxañiỹa da' ỹ'aqtac, qataxa 'auaỹáchiñiit'eguet qomle: 11Ỹima jen' ỹalic ga' siỹaxaua, sa naqáina da' ỹisepaxanaqtet da' l'óiỹaxac. Na'chínata jen'me l'aqtacpi 'me chiỹaqapégooue na' nedégaxat 'me naqáina da' ỹisepaxanaqtet da' l'óiỹaxac.
12Qana'chi saua' lapaxaguenataqa so' Jesús nichíide'uo jeso'me, qana'chi qoỹinapego', qoỹinaaco':
—¡Jen' fariseopi ỹátaqta dalemata ca'li demachíỹa dójo' 'ad'aqtac!
13Qaláxasa so' Jesús 'enaaco':
—Jagamachaqaga 'epaq 'me sa ỹaañi joca'li ñi' ỹit'a 'me net'ague da' piỹem, qana'chi jaga'me qonapoiséguem qomle. 14Tadeeto' sa 'te qomle da' 'auqochíiỹa na' fariseopi. Qá'a jen'me qanam qataxa lasélaxala' jen'me qanampi. Qana'chi ga' qanam da' 'uootaxa ỹacona'aguet jega'me 'ená'am qanam, qana'chi jegaa'me tadínỹi jaga' l'aite.
15Qana'chi so' Pedro 'enapego' so' Jesús, 'enaaco':
—Ỹa qo'mi 'au'axatema jega' náỹi dójo' 'aualoqtenaxáatapega.
16Qana'chi so' Jesús 'enaaco':
—¡Qa'chi nataq'eno' da' 'oñíita sa 'auaỹáchiñiỹo' dójo'! 17¿Sa 'auaỹáchiñiỹo' da' ỹima jen' ỹalic ga' siỹaxaua, jen'me tánỹi jan' letá'am, ỹim, qana'chi ỹinoxonéegue? 18Qaláxasa jen' l'aqtacpi 'me chiỹaqáaue na' nedégaxat, jen'me chiỹaqá'ña jañi' liquidiaqte. Naqáina jen'me ỹisepaxanaqtet jega'me. 19Qá'a jañi' liquidiaqte, na'chañi jañi' chiỹaqa'nỹet jen'me sa nó'in neenataxacpi 'me 'eet'oi: Qoỹalaat ga' naqáỹa, qoleuauátac jaga' sa noua, nequeséeguetaxac, necacháxac, noqovínaxanaxac, qataxa nesouenaxanaxac. 20Naqáina jen'me da' ỹisepaxanaqtet da' l'óiỹaxac ga' siỹaxaua. Qaláxasa dójo' niqui'ỹáxac, 'uootaxa sa qoỹipaguelégue da' lasoxoc da' qoỹiỹoi' naua' noua', jeda'me sa naqaida da' ỹisepaxanaqtet ga' siỹaxaua.
Jaso' chiỹaqáiỹi ỹauo ỹ'amaqten so' Jesús
(Marcos 7.24-30)
21Qana'chi so' Jesús cá'ai di' huét'a, qana'chi taỹa so' 'aléua 'me sa qaỹáaque di' noic Tiro qataxa Sidón. 22Qana'chi jaso' ỹauo 'me Canaán lase 'me néta'ña di' 'aléua, jaso'me janac, ỹ'alqatalégue so' Jesús, 'enaaco':
—¡'Am ỹisaliaxanec 'me 'am lec'óxot so' net'a David, jaỹim 'auchoxoden qomle! Jañi'me ỹale 'uo so' lé'ec nataqtáqaic, jañi'me ỹátaqta let'ádaic da' ne'queténaxac.
23Qaláxasa so' Jesús sa ỹ'ateguet jaso'me. Qana'chi saua' lapaxaguenataqa jana'j, nachoxodéetrapecot jeso'me, 'enapega'salo:
—Ỹa 'auanem ga' ỹiỹáxataaque, péga, qo'mi nec'átetalóo'te jana'me, ỹ'alqata't.
24Qana'chi so' Jesús 'enaaco':
—Ñi' Dios nedot'a't da' jaỹim namaxa jen' Israel lec'oqtepi 'me 'ená'am jaga' n'aanaxate 'me ỹisómtac.
25Qaláxasa jaso' ỹauo nichíi'uo, qana'chi ỹisocoto naua' liliictel so' Jesús. Qana'chi 'enaac:
—¡'Am ỹisaliaxanec, jaỹim 'alcochiỹa qomle!
26Qana'chi so' Jesús 'enapego':
—Sa ỹiỹamaxañi da' qoỹacona ga' jaloq na' nec'oqtepi, ỹim, qana'chi qoỹasaxáaue ga' pioxodipi.
27Qaláxasa jaso'me 'enapego':
—Já'a, 'eesa, 'am ỹisaliaxanec, qaláxasa ỹivíd'a nataq'en na' pioxodipi da' ỹalic jen' jaloq lesochi 'me n'áqañi jega'me liqui'ỹáxala' ga' ladi'pi.
28Qana'chi so' Jesús 'enapego':
—¡'Am ỹauo, ỹátaqta 'eesa da' jalcote da' 'adepé'e! Naỹi ỹátaqta ỹipaquíchiỹi qomle jega'me 'onétapeec.
Qana'chi joca'li 'chi qoỹan da' n'aqtac, qana'chi jaso' lec'oqte jaso' ỹauo sóxote ỹiméegue.
So' Jesús nataden so' jalcote leuaxaicpi
29So' Jesús cá'ai di' huét'a, qana'chi quet'ot so' loxogue jaso' peróna lat'édai 'me huá'ña di' Galilea. Ỹim, qana'chi ỹic'ádisee'ma jeso' soqoỹoqóchisee'mec 'aléua, qana'chi ñíiñi. 30Qana'chi ỹátaqta jalcote so' siỹaxadipi nec'áte'uo so' huét'a jeso'me. Qana'chi qonauéctauo jen'me qaỹa 'te lichi laqáỹa, qataxa jen' qanam, qataxa jen' qaỹaua naua' l'aqtaqa, qataxa na' qaỹa 'te louaq laqáỹa, qataxa jalcote na' laỹi leuaxaicpi. Qana'chi qoỹacho'to naua' lichil so' Jesús, qana'chi jeso'me nataden ỹima jeso'me leuaxaicpi. 31Qana'chi so' siỹaxadipi ỹátaqta ỹ'aalátapeec, ỹasouaxat da' ỹauáachiỹi na' qaỹaua naua' l'aqtaqa, qaa'le detaqa, qataxa na' qaỹa 'te louaq laqáỹa, qaa'le 'uo na' louaq laqáỹa, qataxa na' qaỹa 'te lichi laqáỹa, qaa'le 'uo na' lichi laqáỹa, qataxa jen' qanam, qaa'le nauáachiiñi. Huá'a, qana'chi qoỹi'ỹoxodéetac ñi' let'a Dios jen' lec'oqtepi so' Israel.
So' Jesús ỹiqui'ỹáxan so' cuatro mil siỹaxadipi
(Marcos 8.1-10)
32Qana'chi so' Jesús ỹiỹáxanoovlo saua' lapaxaguenataqa. Qana'chi 'enapegalo', 'enaaco':
—Ỹátaqta sanomt'eguet da' ỹichoxodénataxanaxac jénjo' siỹaxadipi, qá'a sóxote tres naua' noloqo'te da' jaỹim huet'asop, qataxa jen'me qaỹa ga' jaloq. Jaỹim sa siỹamaxaden da' 'uootaxa samaq jen'me da' 'uootaxa maliaxa sa dequé'e, qá'a sa ỹiuénaaque da' 'uo ga' copete na' naq'aic.
33Qana'chi saua' lapaxaguenataqa 'enapega'to':
—¿Hua'ago' ga' senqáta da' sauanáxa ga' ỹalic jen'me ỹátaqta sa lec'óxotolec siỹaxadipi, qá'a jénjo' souqát'a ỹátaqta qaỹa ga' netalégue?
34Qana'chi so' Jesús 'enaaco':
—¿Jái'chogamaxa laỹóqte' gaua' 'ansee'chídii' paa'ñi 'me huo'oi?
Qana'chi jesaa'me 'enapega'to':
—Huo'oi diaua' sietole qataxa diaua' sa 'amaqtáchi níỹoqolqa.
35Qana'chi jeso'me ỹamaxalégue so' siỹaxadipi da' nalégue na' 'aléua. 36Qana'chi ỹaconalo saua' siete pan qataxa saua' níỹa', qana'chi ỹanot da' netónaxac ñi' Dios. Ỹim, qana'chi necolaxachidíñi saua' paa'ñi, qana'chi ỹanoovlo saua' lapaxaguenataqa. Qana'chi jesaa'me ỹaadóoue so' siỹaxadipi. 37Qana'chi ỹima so' siỹaxadipi dequé'e qataxa ỹima nodáxaicpi. Ỹim, qana'chi qonáto so' n'iỹóxotpi, qoỹachaỹilo saua' siete nachóxonaxaqui' canasta, ỹátaqta saqachiilo. 38Jeso'me ỹimat da' liqui'ỹáxac cuatro mil siỹaxadipi. Qaláxasa sa qonaloqten so' ỹauodipi qataxa na' ñoqolqapiolec. 39Joca'li ỹim, qana'chi so' Jesús nip'iỹíitapegue' so' siỹaxadipi, qana'chi huenóchiinỹi jaso' nilicota, qana'chi ỹic'áta di' 'aléua lenaxat Magdala.
Currently Selected:
Mateo 15: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
Mateo 15
15
Ga' ỹisepaxanaqtet da' l'óiỹaxac ga' siỹaxaua
(Marcos 7.1-23)
1Qana'chi 'uo na' nichíi'uo so' Jesús na' fariseopi qataxa jen' dapaxaguenataxáatapeec na' laqátaxacpi so' Moisés 'me chiỹoxogue da' Jerusalén. Qana'chi qoỹinatétac jeso'me, qoỹinaac:
2—¿Tá'nooqo'chi na' 'adapaxaguenatacpi da' sa ỹalaxalégue jeda'me n'onataguec jeso'me huá'au qadet'alpi? Qá'a jen'me sa ỹipaguelégue da' lasoxoc da' qoỹiỹoi' naua' noua' da' 'uootaxa ỹamtaa'le dequé'e ga' siỹaxaua.
3Qaláxasa so' Jesús nataq'en ỹinat jeso'me siỹaxadipi, 'enaaco':
—'Ami nataq'en ¿tóoqo'chi da' sa 'aualaqailóo'te naua' lamaxasóxonaxaco ñi' Dios, na'chidáta da' mai'chi 'oquíit'apee'to naua' 'an'onataguecódii'? 4Qá'a ñi' Dios damaxasoxolégue joca'li da' naq'áita: “Ỹátaqta 'uo da' 'enec 'auen ga' 'adet'a qataxa jaga' 'adat'e.” Qataxa nataq'en 'eet'oi: “Ga' ỹisouen ga' let'a 'uootaxa jaga' lat'e, qaa'le jega'me qoỹalaat.” 5Qaláxasa 'ami 'aviñíitapega da' ga' siỹaxaua ỹañoxot da' 'enapéga ga' let'a 'uootaxa jaga' lat'e da' naq'áita: “Sa 'am 'te da' 'am ỹicochiỹa, qá'a ỹima jen' jaỹim huet'ot sóxote da' sanem ñi' Dios.” 6Qana'chi gamachaqaiga siỹaxaua, da' 'uootaxa l'aqtac dójo', qana'chi sa ỹiuen da' lecochiỹa ga' let'a, 'uootaxa jaga' lat'e. Naqaida da' 'oñíita, da' mai'chi 'oquiỹiỹi da' ladic da' 'an'onataguiquii, jeda'me ỹichoxot da' 'ami ỹátaqta qaỹa ga' náỹi 'aviñii jeda'me lamaxasóxonaxac ñi' Dios. 7¡'Ami 'me 'aviñíitapega da' 'ami lec'óqo'te ñi' Dios! Ỹátaqta 'ami tachiilo jeda'me ỹidíñi joca'lio' so' Dios l'aqtáxanaxanec, lenaxat Isaías, 'me 'enaaco':
8Jénjo' siỹaxadipi 'éetapega jaỹim ỹi'ỹoxodéetac,
qaláxasa jañi' liquidiaqte ỹátaqta soqoỹoqót'a qa'en jaỹim.
9Ỹisamaxasáỹi da' jaỹim ỹ'étec da' li'ỹoxodénataxanaxac,
qá'a naua' lapaxaguenataxanaxaco, jenaa'me mai'chi laqátaxaco na' 'chi siỹaxadipi.
10Qana'chi ỹiỹáxanooue so' siỹaxadipi da' nichíiuo, qana'chi 'enapego', 'enaaco':
—Ỹa 'anaquiáxañiỹa da' ỹ'aqtac, qataxa 'auaỹáchiñiit'eguet qomle: 11Ỹima jen' ỹalic ga' siỹaxaua, sa naqáina da' ỹisepaxanaqtet da' l'óiỹaxac. Na'chínata jen'me l'aqtacpi 'me chiỹaqapégooue na' nedégaxat 'me naqáina da' ỹisepaxanaqtet da' l'óiỹaxac.
12Qana'chi saua' lapaxaguenataqa so' Jesús nichíide'uo jeso'me, qana'chi qoỹinapego', qoỹinaaco':
—¡Jen' fariseopi ỹátaqta dalemata ca'li demachíỹa dójo' 'ad'aqtac!
13Qaláxasa so' Jesús 'enaaco':
—Jagamachaqaga 'epaq 'me sa ỹaañi joca'li ñi' ỹit'a 'me net'ague da' piỹem, qana'chi jaga'me qonapoiséguem qomle. 14Tadeeto' sa 'te qomle da' 'auqochíiỹa na' fariseopi. Qá'a jen'me qanam qataxa lasélaxala' jen'me qanampi. Qana'chi ga' qanam da' 'uootaxa ỹacona'aguet jega'me 'ená'am qanam, qana'chi jegaa'me tadínỹi jaga' l'aite.
15Qana'chi so' Pedro 'enapego' so' Jesús, 'enaaco':
—Ỹa qo'mi 'au'axatema jega' náỹi dójo' 'aualoqtenaxáatapega.
16Qana'chi so' Jesús 'enaaco':
—¡Qa'chi nataq'eno' da' 'oñíita sa 'auaỹáchiñiỹo' dójo'! 17¿Sa 'auaỹáchiñiỹo' da' ỹima jen' ỹalic ga' siỹaxaua, jen'me tánỹi jan' letá'am, ỹim, qana'chi ỹinoxonéegue? 18Qaláxasa jen' l'aqtacpi 'me chiỹaqáaue na' nedégaxat, jen'me chiỹaqá'ña jañi' liquidiaqte. Naqáina jen'me ỹisepaxanaqtet jega'me. 19Qá'a jañi' liquidiaqte, na'chañi jañi' chiỹaqa'nỹet jen'me sa nó'in neenataxacpi 'me 'eet'oi: Qoỹalaat ga' naqáỹa, qoleuauátac jaga' sa noua, nequeséeguetaxac, necacháxac, noqovínaxanaxac, qataxa nesouenaxanaxac. 20Naqáina jen'me da' ỹisepaxanaqtet da' l'óiỹaxac ga' siỹaxaua. Qaláxasa dójo' niqui'ỹáxac, 'uootaxa sa qoỹipaguelégue da' lasoxoc da' qoỹiỹoi' naua' noua', jeda'me sa naqaida da' ỹisepaxanaqtet ga' siỹaxaua.
Jaso' chiỹaqáiỹi ỹauo ỹ'amaqten so' Jesús
(Marcos 7.24-30)
21Qana'chi so' Jesús cá'ai di' huét'a, qana'chi taỹa so' 'aléua 'me sa qaỹáaque di' noic Tiro qataxa Sidón. 22Qana'chi jaso' ỹauo 'me Canaán lase 'me néta'ña di' 'aléua, jaso'me janac, ỹ'alqatalégue so' Jesús, 'enaaco':
—¡'Am ỹisaliaxanec 'me 'am lec'óxot so' net'a David, jaỹim 'auchoxoden qomle! Jañi'me ỹale 'uo so' lé'ec nataqtáqaic, jañi'me ỹátaqta let'ádaic da' ne'queténaxac.
23Qaláxasa so' Jesús sa ỹ'ateguet jaso'me. Qana'chi saua' lapaxaguenataqa jana'j, nachoxodéetrapecot jeso'me, 'enapega'salo:
—Ỹa 'auanem ga' ỹiỹáxataaque, péga, qo'mi nec'átetalóo'te jana'me, ỹ'alqata't.
24Qana'chi so' Jesús 'enaaco':
—Ñi' Dios nedot'a't da' jaỹim namaxa jen' Israel lec'oqtepi 'me 'ená'am jaga' n'aanaxate 'me ỹisómtac.
25Qaláxasa jaso' ỹauo nichíi'uo, qana'chi ỹisocoto naua' liliictel so' Jesús. Qana'chi 'enaac:
—¡'Am ỹisaliaxanec, jaỹim 'alcochiỹa qomle!
26Qana'chi so' Jesús 'enapego':
—Sa ỹiỹamaxañi da' qoỹacona ga' jaloq na' nec'oqtepi, ỹim, qana'chi qoỹasaxáaue ga' pioxodipi.
27Qaláxasa jaso'me 'enapego':
—Já'a, 'eesa, 'am ỹisaliaxanec, qaláxasa ỹivíd'a nataq'en na' pioxodipi da' ỹalic jen' jaloq lesochi 'me n'áqañi jega'me liqui'ỹáxala' ga' ladi'pi.
28Qana'chi so' Jesús 'enapego':
—¡'Am ỹauo, ỹátaqta 'eesa da' jalcote da' 'adepé'e! Naỹi ỹátaqta ỹipaquíchiỹi qomle jega'me 'onétapeec.
Qana'chi joca'li 'chi qoỹan da' n'aqtac, qana'chi jaso' lec'oqte jaso' ỹauo sóxote ỹiméegue.
So' Jesús nataden so' jalcote leuaxaicpi
29So' Jesús cá'ai di' huét'a, qana'chi quet'ot so' loxogue jaso' peróna lat'édai 'me huá'ña di' Galilea. Ỹim, qana'chi ỹic'ádisee'ma jeso' soqoỹoqóchisee'mec 'aléua, qana'chi ñíiñi. 30Qana'chi ỹátaqta jalcote so' siỹaxadipi nec'áte'uo so' huét'a jeso'me. Qana'chi qonauéctauo jen'me qaỹa 'te lichi laqáỹa, qataxa jen' qanam, qataxa jen' qaỹaua naua' l'aqtaqa, qataxa na' qaỹa 'te louaq laqáỹa, qataxa jalcote na' laỹi leuaxaicpi. Qana'chi qoỹacho'to naua' lichil so' Jesús, qana'chi jeso'me nataden ỹima jeso'me leuaxaicpi. 31Qana'chi so' siỹaxadipi ỹátaqta ỹ'aalátapeec, ỹasouaxat da' ỹauáachiỹi na' qaỹaua naua' l'aqtaqa, qaa'le detaqa, qataxa na' qaỹa 'te louaq laqáỹa, qaa'le 'uo na' louaq laqáỹa, qataxa na' qaỹa 'te lichi laqáỹa, qaa'le 'uo na' lichi laqáỹa, qataxa jen' qanam, qaa'le nauáachiiñi. Huá'a, qana'chi qoỹi'ỹoxodéetac ñi' let'a Dios jen' lec'oqtepi so' Israel.
So' Jesús ỹiqui'ỹáxan so' cuatro mil siỹaxadipi
(Marcos 8.1-10)
32Qana'chi so' Jesús ỹiỹáxanoovlo saua' lapaxaguenataqa. Qana'chi 'enapegalo', 'enaaco':
—Ỹátaqta sanomt'eguet da' ỹichoxodénataxanaxac jénjo' siỹaxadipi, qá'a sóxote tres naua' noloqo'te da' jaỹim huet'asop, qataxa jen'me qaỹa ga' jaloq. Jaỹim sa siỹamaxaden da' 'uootaxa samaq jen'me da' 'uootaxa maliaxa sa dequé'e, qá'a sa ỹiuénaaque da' 'uo ga' copete na' naq'aic.
33Qana'chi saua' lapaxaguenataqa 'enapega'to':
—¿Hua'ago' ga' senqáta da' sauanáxa ga' ỹalic jen'me ỹátaqta sa lec'óxotolec siỹaxadipi, qá'a jénjo' souqát'a ỹátaqta qaỹa ga' netalégue?
34Qana'chi so' Jesús 'enaaco':
—¿Jái'chogamaxa laỹóqte' gaua' 'ansee'chídii' paa'ñi 'me huo'oi?
Qana'chi jesaa'me 'enapega'to':
—Huo'oi diaua' sietole qataxa diaua' sa 'amaqtáchi níỹoqolqa.
35Qana'chi jeso'me ỹamaxalégue so' siỹaxadipi da' nalégue na' 'aléua. 36Qana'chi ỹaconalo saua' siete pan qataxa saua' níỹa', qana'chi ỹanot da' netónaxac ñi' Dios. Ỹim, qana'chi necolaxachidíñi saua' paa'ñi, qana'chi ỹanoovlo saua' lapaxaguenataqa. Qana'chi jesaa'me ỹaadóoue so' siỹaxadipi. 37Qana'chi ỹima so' siỹaxadipi dequé'e qataxa ỹima nodáxaicpi. Ỹim, qana'chi qonáto so' n'iỹóxotpi, qoỹachaỹilo saua' siete nachóxonaxaqui' canasta, ỹátaqta saqachiilo. 38Jeso'me ỹimat da' liqui'ỹáxac cuatro mil siỹaxadipi. Qaláxasa sa qonaloqten so' ỹauodipi qataxa na' ñoqolqapiolec. 39Joca'li ỹim, qana'chi so' Jesús nip'iỹíitapegue' so' siỹaxadipi, qana'chi huenóchiinỹi jaso' nilicota, qana'chi ỹic'áta di' 'aléua lenaxat Magdala.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.