Fulatika Maxaafa 14
14
1Ookkoo'n Duuchchi Woddiki Gootti Muuse hiyyee qici: 2«Isira'eelik ardi illee iima higeexxi Migidoolixxenna Diimmoxxe abbaayyaxxe oddo'n Fihiroot bira qeceece offo'laashsha kul; insa'nenna Ba'aalitseefonnike kallachcha'n abbaayya bira qecence offoluun. 3Feri'ooninna ‹Isira'eelk ardi gammoojje giddo dommi hiyyeexxi doonsa kiyya hiyya'neechcho› iso'n labba. 4Aninna Feri'oonika godoba jabeessannaxxee isinna ha'noo shorraan; yaane Feri'ooninna isike loliinke manna'n ani'a ulfinni kaddaan; Gibtseki manninna Ani Duuchchi Woddike Gootta kadennexxa ege'naan» Isira'eelik ardinna tenneenni asse.
5Gibtseke moyanjo'n Isira'eelike ardixxi me'a kulendee wodda, Feri'ooninna isik ja'laabuwwi insa'nexxee anfeemmaka yaada jijjiirreexxi «Isi no'o maa yaane assinneennen? Isira'eelk ardinna arda me'o'a wocci assinenni, no'o'a uunaammaxxa la'onna gonphennen!» Hine. 6Tennexxee ifixxa bagediinxa fadhadiinxa gaarre qophpheessedhe; ifika loliinka mannanna adhdhe ke'e. 7Jaane dhibba filendeexxa loliinxe fadhadiinxe gaarruwwanna adhdheexxi, mitte mittende'n bagediinka ajajalluwwa hedheexxa wele Gibtseke boga'n hexxeexxa fadhadiinxa gaarruwwanna lephphe. 8Duuchchi Woddiki Goottinna Gibtseke moyanjo Feri'oonika godoba jabeesse; tennexxee isinna soda'a belo me'a'neeka Isira'eelika arda gusse. 9Gibtsek manni Feri'oonik fadhaduwwinna isixxi fadhadiinxi gaarruwwa, fadhado gulufamakiirinna lekkatik manni duuchchi Isira'eelka arda gusse mareexxi abbaayati bira Ba'aalitseefonike kallachcha'n hedheeke Fihahrooti hiyyemaaba qeceece offolee'naa dhaqqabe.
10Feri'ooninna shiqee wodda, Isira'eelk ardinna tamasse uude; kunse Gibtsek manni insa'ne suruuxe dagemman; Isira'eelik manninna lumoo qico sodaateexxi Duuchchi Woddike Goottibaa raare. 11Insa'neenna Muuse hinee qici, «Gibtseke boga'n moogiinxi bakka gophendeexxetee qiilla gammoojje'n rennonaa no'oo iyyedaggeettechch? Gibtstsee'n atixxi no'oo fulcha no'aa maassiteexxe? 12Gibtse giddo he'nenna wodda qiilla gammoojje giddo rennennexxi mannii'n Gibtseke manni'a ergatemmennexxa woyyamman, ‹No'onaa'n higi, Gibtstseke manni'a ergatemmannon› hine ate'n haasonneennaki konne haaso'ammabaa?»
13Muusenna mannake'n hiisse hiyye haaso'ee qici, «Sodaatinoqqe'e! Ti'ni hitineexxi uurre; Duuchchi Woddiki Gootti ha'no'a telcho assaaxxa anjira uuddinaan; telcho konne uuddina'neeka Gibtseka manna harnga langaxxa uuddinabaan. 14Duuchchi Woddiki Gootti ha'no'a lolaan; ha'nonna sammi hiyye» insa'nee hiyye.
15Duuchchi Woddiki Goottinna Muuse, «Mayee anibaa raartaatto? Me'ashsha Isira'eelike arda'n haaso'i. 16Wodi'i lameba hacaqqi hiyyo'a siqqichcho atixxa iimi'a ke'issite abbayyit hana anga atixxa diriirsi; Isira'eelik ardinna abbaayya giddo bago buttininaa'n sa'aa'n. 17Aninna Gibtseke mannika godoba jabeessannon; Gibtsek manninna Isira'eelika arda hordofa'n duuka e'yaan; aninna Feri'ooni'ninna isike loliinke manna duuchcha'n, isixxe fadhadiinxa gaarruwwa'ninna isike fadhado gulufammake manni hana ulfaatannon. 18Ani Feri'ooni'n isixxe fadhadiinxe garre'ninna isike fadhado gulufammake manni hana ulfaatannoxxa yanna Gibtsek manni ani Duuchchi Woddike Gootta kadennexxa ege'naan» hiyye.
19Isira'eelike loliinke manni edi edo me'ammak Magenk iimik erganji illee iima higeexxi insa'nee udumii'ni dage; dimma dukkannanna iittanni edii'n kexxeexxi insa'ne uduma uurrite. 20Duumanchikinna Gibtseke mannixe oddo'ninna Isira'eelike ardixxe oddo'n hedheexxi hashsha duuchcha mitte darre'n dukkansa'n mitte darre ifa idage; tennexxee hashsha duuchcha Gibtsek loliink manni Isira'eelike manniba shiqa dande'eba'a.
21Muusenna anga ifixxa abbaayati hana diriirse; Duuchchi Woddik Gootti hashsha duuchcha jabaxxa borotixxa diidallo iyyedage'e abbaaya udumi'a hiisseexxi bakkatanna basse; wodi'ikinna lameba haccaqqi hiyye. 22Isira'eelik ardinna wodi'i insa'neeke middi bitta'ii'ni gimotishsha uurree'naa bagoke buttininaa'n abbaayya giddo me'ina'n sa'ne.#1 Qor. 10:1-2; Ibr. 11:29. 23Gibtseki manninna insa'nee gusse; Feri'oonki fadhaduwwi, Sarageeluwwinna fadhado gulufemaki duuchchi Isira'eelika manna gussa'n insa'nee udumii'n oddo abbaayatixxibaa e'ye. 24Boro fadaddi hitamma wodda Duuchchi Woddiki Gootti giiratike ifininninna dimma duumanchi giddii'n butti'a uudeexxi Gibtseke loliinka manna weekemmaashsha asse. 25Oonfe me'atee mekki hinaaqica'n, Duuchchi Woddik Gootti insa'neeke loliinke fadhadixxe gaarruwwaxxa moluwwa me'itabaashsha abide; Gibtsek manninna, «Ke'we Isira'eelike ardi edii'n baanjo; Duuchchi Woddiki Gootti insa'ne'a Gibtseka manna lolate'n hedheen» hine.
26Duuchchi Woddiki Goottinna Muuse'e wodi'i Gibtseke manna'ninna insa'neexxe fadhadiinxe garruwwa'n fadhado gulfammake insa'neeke manna'n illee iima hige buqaashsha, «Anga atixxa abbaayyat hana diriirsi» hiyye. 27Muusenna anga ifixxa abbaayyat hana diriirse; boro fadaddi hitama wodda wodi'i edike ifike boonchiba'a illee iima hige; Gibtsek manninna wode'ekenaa'n baaje; Magenikinna insa'ne abbaayya giddo hune. 28Wodi'ikinna illeema higeexxi Isira'eelika manna udumi'n hordoffa'n abbayya giddi'a e'yitemmaxxa fadhadiinxa gaarruwwa, fadhado gulufammakaa Feri'oonka loliinka manna duuchcha buqe; insa'nenaa'n mittikinna midde gateba'a. 29Isira'eelik ardi kinni wodi'i insa'neke midda bita'a'n gimotishsha uurre'na'a abbaayya giddo bago buttinaa'n me'ina'n sa'ne.
30Eetenee barra Duuchchi Woddiki Gootti Isira'eelika arda Gibtseke mannixxe anganaa'n anjire; Isira'eelik ardinna Gibtseke mannik renshi abbaayyati qarqara ibee'naa uunde. 31Isira'eelik ardinna Duuchchi Woddik Gootti Gibtseke manna'n asseexxa lumooxxa hunna uudee wodda Duuchchi Woddika Gootta sodaate; Duuchchi Woddike Gootta'ninna isika erganjo Muuse'ni amane.
Currently Selected:
Fulatika Maxaafa 14: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
