Fulatika Maxaafa 16
16
Meenanna Gogorre
1Isira'eelike ardixxi tuuta duuchchi Gibtseke boginaa'n fuldeexxe langake agenjixxe tommenna ondixxe barra'n Eeliminaa'n kexxeexxi Eelimixxenna Siinaxxe oddo'n hexxeexxe Siina hiyyendaaxxe qiilla gammojje'n dagge. 2Eettene qiilla gammojje giddo Isira'eelike ardixxi duuchchiinxi tuuta adhdhunda'n Muuse'ninna Aarooni'n 3hitee qici: «Maalla galfatixxe odolcho qarqara ofolleennexxi hansennexxa ita, itaa dandeennaannan, Gibtseenni Duuchchi Woddike Goottixxe anga'n rennuunnadu! Ha'no kinni tinni tuuta duuchcha solo'ik muddo'a kaba iyyedaggineen» hine.
4Duuchchi Woddiki Goottinna Muuse'e, «Ani kunse iimatenaa'n ita ha'no'a gansiisona'aten; ardikinna barra barra'n fula'n eettene barra'a geyaa qico bukki assedhowwaal; tennenni insa'ne seera anka heqqe'naa'neexxanna heqqedha gonpha'neexxa insa'nee hega uudannon.#Yoh. 6:31. 5Jiyaxxe barra'n kinni wele barra'n bukki asse'nammakixxa lame anga bukki asse'nowaal» hiyye.
6Tennexxe'e Muusenna Aaroon Isira'eelike arda duuchcha'n hinee qici, «Gibtseke boginaa'n ha'noo fulcheek Duuchchi Woddike Gootta kadeexxa dokko galgala egendinaan, 7Iso'ni adhdhundinemmaxxa laqemmaxxe'e gorsa Duuchchi Woddike Goottika gaachchanna uudinaan; ha'no no'o'n adhdhundina'eek no'ota maachcho?» Hine. 8Muuse haaso'a safee hiyyee qici: «Iso'ni adhdhundinemmaxxa laqemmaxxe'e dokko galgala ittinaaka maalla gorsanna hassine qicika waasa ha'no'aa uwwaa wodda Duuchchi Woddike Gootta kadeexxa egendinaan; no'ota maachcho? Ha'no adhdhundineeki no'o'nitebaan, Duuchchi Woddike Gootta'nite malee» hiyye.
9Muusenna Aarooni'n « ‹Adhdhuma ha'nooxxa laqemmaxxee'e Duuchchi Woddike Gootti edo shiqqe› hitettexxi Isira'eelike ardixxe tuuta duuchcha'n» kuli hiyye. 10Aarooninna Isira'eelike ardixxe tuuta duuchcha'n haaso'aamma wodda, ardikinna alba qiilla gammoojjebaa wirri hiyye'eeman; ookkonna Duuchchi Woddike Goottik gaachchanni duumanchi giddo leelle. 11Duuchchi Woddiki Goottinna Muuse hiyyee qici: 12«Isira'eelike ardixxa adhdhuma ani laqeennen; insa'ne'n, ‹Telcho galgala arishsho e'yito'a hexxee'na'a maala ittinaan; soodo gorsanna waasa ittinaan; ookkoneechchi uduma ani Duuchchi Woddike Gootta ha'nooke Mageno kadennexxa egendinaan› hiyyeen hite kul.»
13Eettenee galgala gogorre daggeexxi olla'a ookkone'n wo'mite; gorsa olla'a ookkonexxe qarqara'ni woji eelleemman. 14Wojikinna ba'aa wodda silliqemeeke qorrishsha hedheexxi dhabbeme'e qooli qoolinni hedheechchi hephphalchi ookkone qiilla gammoojjeke buttin hana leelle. 15Isira'eelk ardinna konneelcho uudee wodda maachcho kadeexxa ege'na gophemmaxxee weli'aanni weli «Kunnichchi maachcho? Kunnichcho maachcho?» Hiyye.
Muusenna, «Kunnichchi Duuchchi Woddiki Gootti ittino'a ha'no'a uwweeke waasan.#1 Qor. 10:3. 16Duuchchi Woddiki Gootti ajajeeka ajaja konneechchi butta hedheeken: ‹Mitti mitting itaa qicika bukki assedhowwaal; ha'nookee dunkaani giddo hedheeke mannixxe qixxen'n mitte mittengee mittenna gamisa goomere#16:16 Tinninna laakosa 18:32:33 iitanni 36ke'n borresende'eenMitte kiilonna gamisa gomore lame liitire yookaan mitte kiilonna gamisaken bukki assedhdhe› » hiyyee Duuchchi Woddiki Gootti ajajeedheen.
17Isira'eelk ardinna insa'ne'n hiyyendemmashshanni asse; mitti mitti birasa'eeka, mitti mitti hee'noka adhdhe. 18Insa'nenna bukki assineeka Gomori hiyyemaake mikisanjinni minikee wodda birasa'eeka bukki asseedheekikinna birsa'eeke kadeba'a; heenoka bukki asseedheekinna heenoke kadeba'a; mitti mitting itaa qicika calla qocedhe.#2 Qor. 8:15. 19Muusenna insa'nee «Ayyinna konnenaa'ni soodi'a mittekanna gatlsoqqe'e» hiyye. 20Yaane kinni mitti mitti Muuse hiyyeexxa laqa gibeexxi bukki assedhemmakenaa'n soodi'a gatilse; gatilsinemmakinna langaxxe barraxxa gorsa corroqo'e; bobe; tennexxee Muusenna insa'ne'n mufate. 21Gorsa gorsa mitti mittingi ittaa qicka ifi ifia'a bukki asse; arishsho eebbitamma wodda butta gatemmak duuchchi baqe.
22Jiyaxxe barra'n mitti mittingi wele barruwakenaa'n lame anga bukki assende; tuutat qiconaa'ni lame anga bukki asse'naamani: tennee yaanenna arda akeekkammaxxi akeekisano duuchcha iikki akeekisanjuwwinna dangeexxi tennee Muuse'n kulle.#Fula. 20:8-11. 23Isinna insa'ne'n «Duuchchi Woddik Gootti hiyya'nee qici ‹Soodi Duuchchi Woddike Gootti'a woyyichcha Edi Sanbata kademmaxxee hafuura adhdhatixxe barra kaddaashsha Duuchchi Woddiki Gootti ajaje'een. Tennexxee kossitinaaka kosse; gaffinaaka gaffe; gateeka masse; soodi'aanna ugge› » hiyye. 24Tennexxe Muuse ajajemmaashshanni isoonna soodi qico'ni uggine; gateekinna bobeba'a yookaan corroqo'e ba'aan. 25Muusenna, «Konne'e telchonni itte; telchi Duuchchi Woddike Gootti'a Edi Sanbata kademmaxxee isoo buttinake'n affinabaan. 26Isoo jaane barra bukki assexxinaan; torbaxxe Edi Sanbatixxe barra'n kinni mittelchinna afemabaan.»
27Torbaxxe barra'n mitti mitti manni iso'o bukki assecca fuleexxi gophe. 28Duuchchi Woddiki Goottinna Muusee, «Haani qica'ni ajajuwwa ankanna seera anka heqqedha gibbina? 29Duuchchi Woddiki Gootti ha'no'aa edi sanbata uwweexxa qalbeeffatte; tennexxeten jiyaxxe barra'n lame barra'a geltaaxxa ita ha'no'a uwwa'neechch; torbaxxa barra mitti manji hedheeke minenaa'ni gadhi'a fulebaangi turowwaal» hiyye. 30Tennexxee ardi torbaxxa barra hafuura adhdhe.
31Isira'eelik ardinna eettene ita «Menna»#16:31: Menna: Ibrititotike laagadinni Menna hiyya «Kunnichchi maachcho» hiyyatishshaten hiyye ye'e; isenna dinbilaaletixxe gummashsha gola'liteexxi xe'me giddo malebik ra'isendeexxe bulletixxe kebboshshatemman.#Lak. 11:7-8. 32Muusenna, «Duuchchi Woddiki Gootti ajaja hiyyee qici: ‹Ani ha'noo Gibtseke boginaa'n fulchenne wodda qiilla gammoojje giddo ittino'a uwwennaxxa ita uundaashsha mitte kiilonna gamisa menna dagaaxxe ila'aa massemowwaal.› » 33Muusenna Aarooni'i, «Odolcho mitte aaxxe'e mitte kiilonna gamisa kadaaka menna ise giddo ugge; daggaaxxe ila'aa turo'a Duuchchi Woddiki Gootti edo ugge» hiyye. 34Duuchchi Woddiki Gootti Muuse ajajemmashshanni Aarooni menna heqqemaashsha Kakotike Taaboti edo ugge. 35Isira'eelik ardinna ifi'a hedhaake Kenaanike boga'n geyaa qico shoole tomme wogga menna ite; Kenaanike bogixxa gabala gennaa qico'n menna inde. 36Gomor hiyyemaak mikisanji elfa hiyyemaake mikisanjixxa tommixxe angan.
Currently Selected:
Fulatika Maxaafa 16: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
