Fulatika Maxaafa 18
18
Yootor Muuseba Mare
1Midiyaamik qeesichchi, Muusexxe areki anni Yootori Magen Muuse'anna Isira'eelke ardi'a asseexxa duuchcha, Duuchchi Woddik Goottinna Isira'eelika arda Gibtsee'n hitta fulcheexxa laqe.
2Muuse are ifixxa Sippoora illee iima hiissee wodda anni isik, Yootori iseenna isexxa lame labbaxxa oose adhdhe.#Fula. 2:21-22. 3Muuse «Annafeeke boga'n ani keessummatemman» hiyyati ifike angafi beltika summa Gershoom hiyye fulche.#Erga. Huj. 7:29. 4Iittann «Anke annik Magen anke gargaarsanjo, Feri'oonike wolaantichchanaa'ni anee'e anjireen» hiyya'n langake ifike beltika summa Eli'eezer#18:4 Eli'eezer hiyya Ibrititotike laagadinni Magen gargaareen hiyyaten hiyye fulche.
5Muusexxe arek anni, Yootori Muusexxe arenninna isexxe lame labbaxe oosenn welti isi hedheeba qiilla gammoojje giddo Mageniinxe kooba bira dage. 6Yootorinna Muuse'ni «Ani atixxe arek anni atixxe lame labbaxxe oosenni welti atibaa dagate'ni hedheneni» hiyya'n dhaansa dhaame. 7Muusenna ifixxe areka anna qophedho'a fule; heeshshi hiyyeexxi isoonna sunqedhe; nage'akanna weli aa'neechchi uduma dunkaane giddi'a e'yine; 8Muusenna Mageni Isira'eelixxe hiyyeexxi Feri'ooni'ninna Gibtseke arda'n asseexxa duuchcha, orake'n insa'ne'n gelteexxa rakko duuchchanna Magenikinna insa'ne hitta anjireexxa ifixxe areke anna'n kule. 9Yootorinna Duuchchi Woddik Gootti insa'ne Gibtseke mannixxa anganaa'n anjirat Isira'eeli'a asseexxa eloxxa yaane duuchcha laqeexxe gammade. 10Yootorinna «Feri'ooninaa'ninna Gibtseke ardixxe anganaa'n ha'noo gatiseeka Duuchchi Woddika Gootta galati geyo! Ookkone ardanna Gibtseke mannixxe anganaa'nin fulcheeka Duuchchi Woddika Gootta galati geyo! 11Isira'eelika arda hollati abideemmake duuchcha'n tennee assemaxxe, Duuchchi Woddiki Gootti wele magenuwwa duuchchinaa'n lumoke kadeexxa ta'a ege'nenne.» 12Ookkoneechchi uduma Muusexxe areki anni Yootorinna ciincatika tolchanna wele tolchuwwa Magenoke shiqishe, Aarooninna Muusexxe areke anninni welti Magen edo waasa indo'a Isira'eelike akeekisanjuwwi duuchchinn welt dage.
Akeekake Manxa Baalonsema
(Lan. 1:9-18)
13Langabaro gorsa Muuse ardinxe yaane'n muro'a ofo'le; ardikinna gorsinaa'n galgal qico'n Muuseke qarqara'n uurre'emman. 14Muusexxe arek anninna Muuse ardake'n assa'neexxa duuchcha uudeexxi, «Tinni ardake'n assitaattexxi yaane maachcho? Manni gorsii'n galgal qico'n qarqara atike'n uurre'na'aa mayee atinni calli ofoldatto?»
15Muusenna are ifixxike anna'n hiisse haaso'e hiyyee qici, «Ardi Mageno qortete aniba dagaan. 16Weli gonpheexxi yaane hexxoole aniba idanga; aninna elqe kayyinge manjixxe oddo'n murennexxi Mageniinxa aadanna seera insa'ne'n kulanon.»
17Muusexxe arek anninna hiyyeexxi hiisse iso'n haaso'ee qici, «Tinni ati assitaattexxi yaane eloxxebaan. 18Atinna atiba daga'neek kunni ardi ifi calla kurbu assitinaan; tinni huje ate'n lumooshsha a'urtaaxxen; atinn calli dandeettattoxxebaan. 19Ta'a gorsa anka adhdhite hiyyaannexxa laqi; Magen atinn hedhaan; atinna Magen edo ardiinxe tukke kadi; insa'nexxa weli gonphenna Mageni edo shiqishshi. 20Mageniinka seeranna ajaja insa'ne'aa barachchiisi, me'inaaka oranna assinaaxxa yaane insa'ne'n leellish. 21Yaane kinni, dande'a afeeke manna duuchchanaa'n fili; insa'nenna Mageno sodaataakeerra, addatemeekeerra, seerbeloxxa la'o gibaakera kadowwaal; insa'nenna kuma ajajallo, dhibba ajajallo, onde tomme ajajallonna tomme ajajallo assite hariir. 22Insa'nenna duuchchi wodda ardiinxe yaane'n murrowwaal; lumolla yaanuwwa atibaa iyyedangowwaal; shiixxaro yaanuwwa insa'ne ifi'anni murrowwaal; konnee qicinni insa'ne atee huje gargaarrammaxxee atenaa'ni ba'o shollexxaan. 23Atinna tenne assitottole Mageninna ate ajajo'oole, atinna gonphe ifinaa'n hoyyedha dandettatton; kunni ardi duuchchinna nage'iginni hadi'aa illee iima higaan» hiyye.
24Muusenna ifixxe areke annixxa laqeexxi isi hiyyeexxa duuchcha asse. 25Muusenna Isira'eelike ardi duuchchi giddii'n dande'a afeeka manna fildetexxi arda duuchchi hanna kuma ajajallo, dhibba ajajallo, onde tomme ajajallonna tomme ajajallo assite hariir. 26Insa'nenna duuchchi wodda ardinxe yaane'n murte murati ergatemme; a'urtaaxxa yaanuwwa Muusebaa iyyedange, yaane kinni shollaxxa yaanuwwa umo insa'negenninni murre.
27Muusenna ifixxe areka anna geegessee'na'a isinna ifike bogibaa illee iima hige.
Currently Selected:
Fulatika Maxaafa 18: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
