Fulatika Maxaafa 26
26
Taabotinke Galdumika Dunkaana
(Fula. 36:8-38)
1«Eloxxe suqendeexxe layinoxxe kirren, iimixxe bifanni, baddeessitettinna dhiille kirrenni giissendeexxe tomme layinoka golo afeeka taabotinke galdumika dunkaana giiss; goluwwa konne hana angatixxe ogeke hujalli kirubeele gobe giisowwaal. 2Mitti mitting seemmatik goli wele qixxe kadowwaal qeerrinne lame tommenna shoole ciqile, godoba shoole ciqilenna gamisa kadowwaal. 3Onde seemmatika golo welti genci assite gobi, wele gateeka ond seemmatk golo iittanni welti gence assi. 4Ookkonne welt genci assemeke mitte seemmati golike kasa'n iimixxe bifaxxa qubbuwwa uggi; wele mitteba gence assemeeke seemmatike golike kasa'ninna iittanni assi. 5Onde tomme qubbuwwa mitte seemmatike golike kasa'n uggi; onde tomme qubbuwwanna langake seemmatike golike kassa'n uggi; qubbuwwatinna welinaa'n mitte mittetike kallachcha'n hexxaan. 6Ookkoneechchi uduma mitte taabotinke galdumike dunkaana kado'a ookkone seemmatika goluwwa onde tomme worqetixxa hookkuwwa giissite mitte mittik abidis.
7«Taabotinka galdumike dunkaana iimii'n buqaaka tommenna mitte re'etixxe ordaka seemmatika golo giiss. 8Mitti mittinge tommenna mitti seemmatike goluwwi welixxe kadowwaal; qeerrinni sase tomme ciqile godobikinna shoole ciqile kadowwaal. 9Onde seemmatika goluwwa mitte mittik genci assi; iittanni jaane goluwwanna mitte mittik gencassite jiyaka dachchaassettexxi edii'n dunkaanake'n lebi. 10Ookkone welt gencassemeeke seemmat golike mitte darreke kasa'n onde tomme qubbuwwa, iittanni wele darreke seemmati golike kasa'ninna onde tomme qubbuwwa uggi. 11Ookkoneechchi uduma mitte taabotinke galdumike dunkaana kado'a ookkone seemmati goluwwa onde tomme sageettotike sibljuwwixxa hookkuwwa giissite mitte mittik abidis. 12Hojjatike qeerrinninna gatemmak dunkaanike seemmatike goluwwik gamis, dunkaani udumi'n rarra'owaal. 13Ookkone dunkaanike seemmatika goluwwi lamiinge kassuwwinaa'n qeerrinni mitte ciqele afeeke kadaan; gateekiir taabotiinke galdumike dunkaanika kassuwwa buqaake kadeexxi rarra'owwaal. 14Duunkana buqo'a diimooka halliinseeka goga giiss, isi hana lebatika aseqoxaka goga giiss.
15«Waaccotike haqichchiinka utuphuwwa taabotinke galdumi'a giissi. 16Mitti mittiniinge utuphiki qeerrinni tomme ciqile, godobi mittenna gamisa ciqile kadowwaal. 17Mitte mittenga utupha mittik abidisatee laminge'n qube qube hexxowwaal; duuchchinge utuphuwwa'n iittanni assi. 18Taabotinke galdumike dunkaani'a bita'i darree'n lame tomme utuphuwwa giiss. 19Lame tomme utuphuwwi hundanna shoole tomme birrete sibiljika lekkenjo giiss; lami utuphi weli abidaashsha mitti mittingi utuphi lame lekka afaashsha giissi. 20Wele darre'n taabotinke galdumike dunkaanke midda'n lame tomme utuphawwa giiss. 21Mitte mittenge utuphi hunda lame lame lekkanjo kadena'a shoole tomme lakkanjo giissi. 22Dhidhim darre'n taabotinke galdumike dunkaan uduma jaane utuphuwwa giiss. 23Udumi darre'n taabotinke galdumike kasi'a lame utuphuwwa giiss. 24Kone lame kasa'n hedheek utuphuwwi buttii'ni iimi qico'n lameke kadeexxi mitte qube giddo welt gence hiyyaake kadowwaal; lamiinge kasuwwa'ninna konnee qicinni giiss. 25Tennexxe saddeet uttuwwanna tommenna jaan birretike sibljik lekkanjo kadeexxi, mitte mittenge utuphi'a lame lame lekkanjo kadaan.
26«Tommenna onde waaccotika danqarisanjuwwa giissi: onde, taabotinke galdumike mitte darreke uttuphiwwi'a, 27Taabotinke galdumike wele darreke uttuphuwwi'a onde danqarsanjuwwa; taabotinke galdumi uduma dhidhimi darre'n hedheeke utuphuwwi'a onde danqarsanjuwwa giiss. 28Oddotik danqarisanji utuphuwiinke dagalsanji kasakenaa'ni kasiin qico'n sa'owwaal. 29Konne utuphuwwa worqeti buqi; danqarisanjinxe danqarema'anna worqetixxa qubuwwa giiss; konne danqarsanjuwwakanna worqeti buqi.
30«Taabotinke galdumika dunkaana eettene koobati hana uudettaxxe fakke'n oti.
31«Seematika golonna iimatixxe bifaka, baddeessittetika dhiille shimalakanna suqendeexxe eloxxe layinoka giiss; angatixxe ogeki hujallinna kurubeel itti gobe giissowwaal. 32Isoonna worqeti buqemeke waaccotike haqichchikanna shoole birretike sibljke lekkanjo'n uurre'eeke shoole utuphuwwa'n, worqetixxe hookonni rarraas. 33Ookkonne seemmatika golokanna eettene hookkuwwa'n rarraas; dhuga kulatika taabotanna giddi darre'n uggi; iikki seemmatik golinna woyyitte bakkanna woyyo woyyitte bakka gargar hissaake ha'no'a kadowwaal.#Ibr. 6:19; 9:3-5. 34Ookkoneechchi uduma woyyo woyyitte bakka giddo dhuga kulatike taaboti hana ookkone cubbo biratika tuphanjo uggi. 35Ookkone beeranna taabotinke galdumike dunkaani giddo middi darre'n, seemmatike goli gadhi darre uggi; xassiinka ofo'lisanjonna isike kallachcha'n bita'i darre'n uggi.
36«Dunkaaniinxe e'yatixxe hula'a iimatixxe bifaka, baddeessittekanna dhiille shimalikanna suqendeexxe eloxxe layinoka, angatixxe ogeke hujalli gobeme giissemeeka seemmatika golo giiss. 37Konne seemmatike goluwwi'anna worqetixxa hookkuwwanna worqeti buqemeeka, waaccotike haqichchika onde utuphuwwa giissi; isiri'aanna onde lekkanjuwwa huji.
Currently Selected:
Fulatika Maxaafa 26: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
