Fulatika Maxaafa 29
29
Qeesetixxa Woyyooma
(Lew. 8:1-36)
1«Qeesummati ani'a ergatemo'a insa'ne'a woyyonsitotta assitattoxxi yaane konneechchinni butti'a hexxeexxe: fafa afebaaka mitte jibichchanna lame gedhebiinxa korbeeyye aadhi. 2Gamami e'yebaaxxa eloxxe dinnetixxe bullexxa kebbo, zayiteti qushshemeka xaltanna zayite burendeeka hephphaka xalta xaltisi. 3Konne duuchchinga mitte qore'n uggitettexxi jibichchakanna lame gedhebinxe korbeeyyenni shiqishi. 4Ookkoneechchi uduma Aarooniinna labbaxxa oose ifixxa afenshatike dunkaanbaa iyyedagati wodi'ik insa'ne anshe'ne anshi. 5Seemmuwwatanna aaxxettexxi Aarooni'ni oddeess; qolo, efuudixxa#29:5 Efuude Umi qeesichchi oddo'waaxxe qamisenna yookaan qomatixxe seemman. Isixxe qomatixxe kiise'ninna urminna tumi hiyyendaake Magenxa fedhii qodhatike kadeek mi'i itti giddo uggemaan. qamise, efuudi'ninna qomatixxa kiise iso'n oddeess; efuudenna angatixxe ogen giissemeeke sabbatinni iso'n ka'lshi. 6Ruufatanna isike umo'n uggitettexxi woyyichcha kallachcha ruufati welt abidis. 7Hariirtetixxa zayite aaxxe umo isike'n cossite hariir. 8Osse isixxanna idagettexxi qoluwwa insa'ne'n oddeess. 9Uminxa gullenna insa'ne'n uggi; ookkonechchi uduma Aarooninna isixxa labbaxxa oose sabbatuwwa insa'ne'n ka'lishi; qeesummatinna duuchhci woddi'a insa'nexxe aada kaddaan; konne qicini Aarooniinna oose isixxa labbaxxa hariirtatton.
10«Ookkone jibichchanna afenshatike dunkaan edo idagati Aarooninna oosse isixxi labbaxxi anga insa'nexxa jibichchiinke umo'ni hana ugginowwaal. 11Konne jibichchanna afenshatike dunkaaniinxe baxxe'n Duuchchi Woddike Gootti edo gorra'i. 12Ookkone jibichchixxe mundee'ni aaxxettexxi tolchimalchiinke gaafuwwi hana atixxe qubanni fifixi; gatteexxa mundenna tolchimalchi hunda duni. 13Ookkoneechchi uduma godobi giddira duuchcha'n hedheeka ha'yo duuchcha, tidhoti hana hexxeexxa saapha, lamiinxa kalattuwwa qarqarake'n hedheeke ha'yinn welt aaxxettexxi tolchimalchi hana ciinceess. 14Yaane kinni ookkone jibichchiinka maala, goga isikanna indaammabaaka godobi giddiira kaanbet gadhi darre gubi; kunninna cubbotike tolchan.
15«Lame gedhebiinxe korbeeyyenaa'ni mitte aaxxettexxi Aarooninna isixxe labbaxxe oose isike umi hana anga ifixxa ugguraan. 16Ookkone gedhebiinka korbeessanna gorra'i; munde isixxanna aaxxettexxi tolchimalchoke'n duuchchii darre'n fifixi. 17Ookkone korbeessanna kukkuttettexxi godobi giddiiranna lekkuwwa isixxa anshitettexxi, umo isikeninna wele shiixxaramma maaluwwinn welt uggi. 18Ookkoneechchi uduma ookkone gedhebiinka korbeessa hedheeshshanni tolchimalchii hana ciinceessi; kunninna Duuchchi Woddike Gootti'a ciincatike tolocha fishshaake foolenna Duuchchi Woddike Gootti'a giirati shiqaake tolchan.#Efe. 5:2; Fil. 4:18.
19«Wele gedhebiinka korbeessa aaxxettexxi Aarooninna oose isixxi labbaxxi anga ifixxa korbeessinke umo'n uggitaan. 20Ookkone korbeessanna gorra'i; munde isixxenaa'n aaxxettexxi Aaroonixxe'ninna labbaxxe isixxe osexxe middixxe manshuwwake kasa'n, insa'ne middixe anguwwaxxe abuguduwwa'n middixxe insa'nexxe lekkuwwake abugudduwwa'n buurtatton; ookkonneechch uduma eettene munde tolchimalchoke'n hana duuchchin darre'n fiffixi. 21Ookkone tolchimalchi hana hexxeexxe mundenaa'ninna hariirtetixxe zayitenaa'ni aaxxettexxi Aarooni'ninna isixxe seemma'n, iittanni isixxe labbaxxe oose'ninna insa'nexxe seemmuwwa'n fiffixxi; ookkoneechchi udma isinna isixxe labbaxxi oose iittanni insa'nexxi seemmuwwa woyyittete kaddaan.
22«Ookkone gedhebiinke korbeessixxa ha'yo, duba, godobi giddira'n hedhemmaka moorro'o, tidhotika saapha, lamiinxa kalattuwwanna, iseke qarqara'n hedheeka moorro'onna middika ha'yo aadhi; kunni qeesummatike gedhebiinke korbeessan. 23Duuchchi Woddike Gootti edo qorete'n hexxeexxe gamami belo ra'issemeeka xalta, kebbo, zayiteti qushshemeeka xaltanna, hephphaka xalta aadhi. 24Konne duuchchinga Aaroonixxe'ninna isixxe labbaxxe oosexxe anguwwa'n uggitettexxi lele'misatike tolchixxee Duuchchi Woddike Gootti edo konne duuchchiinga lele'misi. 25Okkonneechchi uduma insa'nexxe anganaaa'n aaxxetettexxi ciincatike tolchinni welt Duuchchi Woddike Gootti'a fishshake foole kado'a tolchimalchi hana ciincesi; kunninna Duuchchi Woddika Gootti'a giirati shiqaake tolchan.
26«Aaroonixxe qeesumma'a ookkone gedhebiinke korbeessixxa corme aaxxettexxi lele'misatike tolchixxee Duuchchi Woddike Gootti edo isee lele'misi; kunninna atike qoobbo kadaan.
27«Aaroninna ifixxe labbaxxe oosexxe qeesumma'a gedhebiinke korbeessiinka maala gargar foy. Tenne lele'misendeexxa cormenna shiqemmaka haye 28Aarooni'aanna isixxe labbaxxe oose'a duuchchi woddike Isira'eelik ardike qoobbo kadaak konneten; isinna mittummatike tolchanaa'n Isira'eelik ardi Duuchchi Woddike Gootti'a shiqishaaken.
29«Aaroonixxi woyyitte seemmuwwa isixxe horte'a kaddaan; tinninna insa'ne tenne seemmuwwanni hariiremeexxi qeesoomo'aten. 30Qeesoomeexxi isixxe bakka'n tukke kadaakinna ergatemo'a woyyichcha boncho'n e'yaak belt isik tenne seemmuuwwa torbaane barra oddo'waan.
31«Qeesoomatika ookkone gedhebiinka korbeessa aaxxettexxi maala isika woyyitte bakka'n gafi. 32Aarooninna isixxi labbaxxi oose afenshatike dunkaanixxe baxxe'n ookkone korbeessika maalanna eettene qore giddo hexxeexxa kebbo indowwaal. 33Insa'ne qeesuma'aanna insa'nexxe woyyooma'a cubbo bidhdhatike kade'emmaka konne tolchuwwa indowwaal; Kunni tolchiwwi woyyichchake kademmaxxe weli ayyinna iso itoqqe'e. 34Qeesoomatike gedhichchike maalinaa'n yookaan ookkone xaltinaa'n soodaa qico'n gataak hedheexxe kaddoole giirate'n gubi; woyyichchake kadeemmaxxeenna itemiyyo hasissabaan.
35«Qeesooma torbaane barra'n muuxati Aarooni'ninna isixxe labbaxa oose'a ate ajajennaxxa duuchcha insa'ne assi. 36Cubbo bidhdhatee kadaaka mitte jibichcha cubbotike tolchi'a barra barra'ninni tolchi; tochimalchokeenna birat tolchimalchokanna ca'a assi; woyyoomaashshanna hariir. 37Torbaane barra tolchimalchoke birtettexxi iso'o woyyoons; Ookkoneechchi uduma tolchimalchi iikki hara woyyichchake kadaan; iso'o kisaak duuchchinna woyyichchake kadaan.
Galgalka Tolcha
(Lak. 28:1-8)
38«Barra barra'n waaldebexxong tolchimalchi hana tolchitattolchi konneechchinni butta hedheechchon: mitte woggaka lame gedhebiinka buruusuwwa. 39Mitte gedhebiinka buruusa gorsa langaka galgala tolchi. 40Siretike gedhebiinke buruusinni welti mitte kiilo eloxxa bulle miicende ca'a assendeexxa mitte liitire zayiteni welti qushshitettexxi mitte liitire woyinenni ha'watike tolchi'a shiqishi. 41Langaka gedhebiinka buruusa gorsa shiqemmake qicika midhatixxa bullenna ha'watike tolchinni welt galgala tolchi; kunninna fishshake foolenna Duuchchi Woddike Gootti'a qiirati shiqaake tolchchan. 42Kunni cincatike tolchi Duuchchi Woddike Gootti edo afenshatike dunkaanixxe baxxe'n daggaaxxe ila ila'n duuchchi woddi'a assemaan; aninna ookko atinni afeme'e ate'n haaso'annon. 43Ookkonna Isira'eelike ardinni afemannon; itti bakkanna anke gaachchanninni woyyittete kaddaan. 44Tennexxee afenshatika dunkaananna ookkone tolchimlacho ani woyyichchake assannon; qeese kande ani'a ergatemmo'a Aarooniinna isixxa labbaxa oose woyyoonsanno. 45Isira'eelike ardixxe oddo'ninna hose galannon; insa'neke Magenonna kadannon. 46Oddo insa'nexxe'n hose galonna'a Gibtsee'n insa'ne fulchchennek ani Duuchchi Woddike Gootta insa'neke Mageno kadennexxanna egennaan. Ani Duuchchi Woddike Gootti insa'neke Magenon.
Currently Selected:
Fulatika Maxaafa 29: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
