Fulatika Maxaafa 9
9
Horiinxa Bala
1Ookkoneechchi Duuchchii woddik Gootti Muuse hiyyee qici: «Martettexxi Feri'ooni'i, ‹Duuchchii woddik Gootti Ibiritotik Mageni hiyya'neen hitatto qici: «Anee magenoonfato'a arda anka wocci assi» hiyya'neen. 2Me'o'a wocci assa gibbetexxi hoyyitottole, 3kunse Duuchchi Woddike Goottixxi anga atike bobba'eeke hore'n: atike fadhado'n, atixxe harre'n, atike gaaluwwa'n, atike lalo'n, atike gedhebo'ninna atixxe re'e'n fuggoxxa bala iyyedaggaan. 4Yaane kinni Duuchchi Woddik Gootti Isira'eelike horixxe oddo'ninna Gibtseke horixxe oddo'n gargarunte assaan, tinninna Isira'eelike kadeek mitti horinna reyabaan› » hiyye.
5«Soodo konne boga'n Duuchchi Woddiki Gootti tenne yaane assannon» hiyyeexxi Duuchchi woddiki Gootti yanna mureedheen.
6Duuchchi woddiki Goottinna tennee yaane langaxxe barra'n asse: Gibtseke hori duuchchi mude; yaane kinni Isira'eelik hori mittikinna reyeba'a. 7Feri'ooninna kokeesinssshshs manna ergeexxi Isira'eelik hori mitti midde reyebaaxxa wo'me. Ta'anna qalbe jabeessedheexxi arda me'o'a wocci assa gibe.
Lumolla Balaqi Balaqi Hiteexxe Madaxxa Bala
8Ookkoneechchi uduma Duuchchi woddiki Gootti Muuseenna Aaroonii'i hiyyee qici: «Boosii'n bululo gunsitine aaxxineexxi Muuse Fer'iooni edo ookkonee bululo iimi'a xeerowwaal. 9Iikki bululinna Gibtseke bogi giddo duuchcha'n bukote kadaan; ookkone bogi giddo duuchcha'n hedheeke hore'n iittann manna'n balqi balqi hiteexxa mada ibisaan» hiyye. 10Insa'nenna bululo boosii'n aa'neexxi Feri'oon edo uurrine; Muusenna ookkone bululo iimi'a xeeree wodda, hore manjoke'n balqi balqi hiteexxi mada ibbe. 11Insa'ne'ninna Gibtseke manna duuchcha'n balaqqi balaqqi hiteexxi mada hexxemaxxee, gojaameeyye Muuse edo shiqa dandeetebaan. 12Yaane kinni Duuchchi woddiki Gootti Feri'oonixxa qalbe jabeesse; Duuchchi woddiki Gootti Muuse'n haaso'emmashshanni isi Muusenna Aarooni hineexxa laqabaan.
Kaadetixxa Bala
13Ookkoneechchi uduma Duuchchi woddiki Gootti Muuse hiyyee qici: «Soodo gorsa kexxe Feri'oonba martettexxi, ‹Duuchchi woddiki Gootti Ibiritotiik Magen hiyya'neen hitato qici: Ane'e magenoonfato'a arda anka me'o'a wocci assi. 14Kada gophphoole anishsha hedheek buttate'n hedhebaaxxa egendattoshsha ate'n atike ja'laabuwwa'ninna atike arda'n bala anxa duuchcha ta'a ibisannon. 15Ta'a anga anxa diriirsennexxi ateenna atika arda buttatenaa'n balleessitaaxxe balanni silan ha'no'o bire'enan. 16Yaane kinni hunna anxa ate'n leellishonnaanna anki summi butta duuchcha'n ege'nemo'a atee ke'iseennen.#Rom. 9:17. 17Ta'i qico'n ati anke arda'n ifi dukketteshshanden; me'ashshanna wocci assitebexxon. 18Tennexxee soodo, tennee yanna'ni Gibtseke ke'itonaa'n telchi qico'ni haranga ibbe ege'nedebaaxxa jabaxxa kaade gansiisannon. 19Atike gadho gateeke hore manjo'n jabaxxi kaade gandee'na'a duuchchiingechchi reyemmaxxee gadho hedheek atik horinna horattettechchi duuchchi mini'a higaashsha ajaji.› » 20Duuchchi woddike Goottika hiyyichcho sodaateekir Feri'oonik ja'laabuwwi erganjuwwa ifikanna hore ifika mini'a higaashsha assatee wiinamme. 21Duuchchi woddike Goottika haaso'a'n ga'ma'mi hiyyeekir kinni erganjuwwa ifikanna hore ifika gadhonni waale.
22Ookkoneechchi uduma Duuchchi woddiki Gootti Muuse'e, «Gibtseke bogi giddo duuchcha'ni manjoke'n, horeke'ninna ookkone boga'ni lateechcho duuchcha'n kaade gandaashsha anga atixxa iimi'a ke'issi» hiyye. 23Muusenna siqqichcho ifixxa iimi'a ke'issee wodda Duuchchi woddiki Gootti balaqakanna kaade wocci asse; banqotinna bogake'n ibbe; Duuchchi Woddiki Goottinna Gibtseke boga'n kaade gansiise. 24Kaade gande; banqottinna xalaqqisa'nemman; Gibtseke ardake kaddeexxe yannanaa'n konne bogi giddo duuchcha iitta hexxeexxi hara lumooxxi kaade gande egendebaan.#8:7; 16:21. 25Kaadetinna Gibtseke bogi giddo duuchcha'n gadho hedheechcho duuchcha hore manjo duuchcha gande; fichchi giddo hedheeka hiddichchuwwa duuchcha gande; haqichchuwwakanna qurubbi assite. 26Kaade gandeemmabaab Isira'eelik ardi hedhaammake Geesemike boga callamman.
27Feri'ooninna Muusenna Aaroonii'i ye'iseexxi hiyyee qici: «Ta'a ani cubbo hujeennen; Duuchchi Woddiki Gootti kinni qullichaken; aninna anki ardi balleessineennen. 28Kaadenna balaqi no'o'n hara bira sa'emmaxxee'e Duuchchi woddika Gootta no'o'a soodatte; me'itino'a ha'no'o wocci assannon; ta'anni edi'a ha'no kaba turatee yanna hexxebaan» hiyye.
29Muusenna iso'n hiyye hiisse haaso'ee qici, «Konne qachchi giddii'n fullenneshshanni anga iimi'a Duuchchi woddike Goottibaa farri assanon; butta Duuchchi Woddike Goottixxe kaddeexxa egendota'a balaqi uurraan; kaadetinna ta'inni elqi'a hexxabaan. 30Yaane kinni atinna atik ja'laabuwwi ta'anna Duuchchii woddika Gootta Mageno sodaattinabaaxxa ege'neennen» hiyye.
31(Talbi daraareemmaxxee so'inna deedameemmaxxee talbi so'i ganeme ba'e. 32Dinnenna darga'i udu'me'eemmaxxe'e gandebaan.)
33Muusenna Feri'oonibaa'n fuleexxi qachchakenaa'n gadhi'a me'e; angatanna Duuchchi woddike Goottibaa diriirse; balaqikinna kaade uurte; xeenikinna buttate'n gana uurrise. 34Feri'ooninna xeeni, kaadenna balaqi uurreexxa afeexxi higgeenna cubbo huje: isinna isik ja'laabuwwi godoba jabeesse'ne, 35Feri'oonik godobinna jabaate; Duuchchi Woddik Gootti Muuse'n haaso'emmashshanni Isira'eelik ardi mo'o'a wocci assebaan.
Currently Selected:
Fulatika Maxaafa 9: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
