Dadatika Maxaafa 48
48
Eefireemiinna Minaasee'e
1Tinni yaanuwwa kaddeechchi uduma, anniinxi elagonphe Yooseefi'n kulendee wodda, Yooseefi lamiinxa ifixxa oose Minaasennaa Efireemii'i adhdhe me'e. 2Ya'iqoobi'n, belti isik Yooseefi dageexxa iso'n kulendee wodda Ya'iqoobinna ifi jabeesseexxi taqeti hana ofo'le.
3Ya'iqoobinna Yooseefi'i hiyyee qici, «Duuchchiinxa dande'aaki Mageni Kenaani boga'n Looza hiyyendaaxxe bakka'n ane'n leelle eebbiseexxi, 4anee hiyyee qici, ‹Hortattoshsha atee assannon; laakkossa atikanna bira sa'issannon; heddo arduwwixxe assannon; konne boganna atibaa uduma daggaaxxe atixxe horte'a duuchchi woddi'a qadaada asse inssa'ne'a uwwannon› hiyye.#28:13-14.
5«Ani kaba dagebe'no edi darre Gibtse i'litettexxi atixxi lame oose ta'anni edi'a insa'ne anxe ooseshsha uudendaan; ani'a Efireeminnaa Minaase oose anxe Roobelishshanna Simoonishshaten. 6Insa'ne udumii'n i'litattoxxi oose kinni attinxe; yaane kinni insa'ne qadaada alfinaak dayyuwwa ifike Eefireemikenninnaa Minaaseke summinniten. 7Aninna Mesipheexoomii'n higa'n Efiraataa geyona'a shiixxoobi gataa wodda ama atixxi Raaheeli Kenaan boga'n rerte'naa yaadennen. Aninna Eefiraata'a me'ammake ori qarqara ise moogenne» hiyye. (Eefiraata tinni telcho Beetelihemi hiyyemaake boonchon.)#35:16-19.
8Isira'eelinna Yooseefixxa oose afeexxi «Kunni ayyeera?» Hiyye isoo qore.
9Yooseefinna anna ifike'n «Tinni Magen kaba ani'a uwweexxe oosen» hiyye.
Isira'eelinna, «Eebbisonnaa ani biri'a insa'nee shikki assi» hiyye. 10Ookkone wodda Isira'eeli cimotenaa'n kexxeexxa ille isixxi gophpheemmaxxee adda afeemmabaan; tennexxee Yooseefi oose ifixxa anniiba shikki asse; anni isikinna insa'nee sunqedhe hanqalfe. 11Ya'iqoobinna Yooseefii, «Ani atee langaxxa uudanno hiyye hedeennabaan; Mageni kinni atixxa oosenna anee uudiseen» hiyye. 12Yooseefinna oose ifixxa anniinke gulubonaa'n hoyyeexxi butti'a heeshi hiyye. 13Yooseefi lamiinxa oose ifixxa aadheexxi Efireemii'i ifike middi darre'n Isira'eelinaa'n bita'i darre'n, Minaasee kinni ifike bita'i darre'n Isira'elinaa'n middi darre'n sa'isse uurrise. 14Yaane kinn Isira'eeli ifixxa middixxa anga maa'nichcho belto Efireemike umi hana ugge; bita'ixxa anga ifixxa middixxe anga'ni qaxxamurseexxi angafa belto Minaaseke umi hana ugge.
15Ookkenneechchi uduma Yoosefi'i hiyyeexxi eebbisee qici,
«Annuwwi anki Abirihaaminna Yisaaqi ora isike'ni
hordonfeemmak Duuchchi Woddik Gootti,
Ani'aanna telchi qico'ni baro anke duuchcha'ni,
allalisanjo anke kade hedho anxa duuchcha heqqeek Mageni,
16Miidhensha duuchchinaa'ninni anee wodeek,
iimik erganji isi tennee oose eebbisowwaali.
Insa'nenna summa anekenni,
anke annuwwike Abirihaamikenna
Yisaaqike summinni ye'emmowwaali!
Buttate'ninna lumo qico horre birasa'nowwaal!»
17Yooseefinna ifike annixxa middixxa anga Efireemike umo'n uggee'naa uudeexxi yaade; tennexxee ifike annixxa middixxa anga Eefireemike umonaa'n hoyyeexxi Minaaseke umi hana uggo'a anniinxa anga abide. 18Yooseefinna anna ifika, «Annayyo iittatebaani; angafi konnete kademmaxxee anga atixxa middixxa isike umo'ni uggi» hiyye.
19Anni isik kinni, «Ege'neennen; anke belto ege'neennen; isinnaqqa ardake kadaan; lumokenna kadaan; kaddo malee isiki maa'nichchi dayyi isonaa'n sa'eeke kadaan, horte isixxinna gosa gosake arduwwa kaddaan» hiyyeexxi gibe. 20Isinna eettenee barra insa'nee eebbisee wodda hiyyee qici,
«Atike summinni Isira'eelik ardi iitta hiyye eebbisaan:
‹Mageni ha'noo Efireemishshannaa Minaaseshsha assaan› hiyya'n eebbisaan» hiyye eebbise.
Konne qicinni Ya'iqoobi'i Minaasenaa'n Eefireemi edo sa'isse.#Ibr. 11:21.
21Ookkoneechchi uduma Isira'eeli Yooseefii, «Anni reyannoxxi yanna shiqqe'eni; yaane kinni Mageni ha'nonni welt hedhaan; ha'nooke annuwwike bogibaa ha'noo ille iima hiissaan. 22Ani anke wolaantichchinninna anke mogidiinni Amooritotenaa'n adheenneka atike dayyuwwike qoobbinaa'n mitte anga sa'isse ati'a uwwennen.»
Currently Selected:
Dadatika Maxaafa 48: gdo
Highlight
Share
Compare
Copy
Want to have your highlights saved across all your devices? Sign up or sign in
The Word for the World International, The Word for the World Ethiopia
