Oyohana 9
9
Oyesu do Ongo oye ni Amo wo Ofiyi ni Ogege
1Ni Oyesu ya shigbo ni, omongo oye ni amo wofiyi ni. 2Awogboso doka mo, <<Inofoza, anoho yo ozalabi, ongo mani la kwe inanu kpa adanu, ni amo wo ofiyi ni?>>
3Oyesu kamo, <<Ongo mani kwe inanu kpa ada nu pini yozalabi lalo, omani ke gbodagye shini ase na moza ni Owuso ya gege koya bwebe ko ongo mani. 4Owotiri shini na yoko kase ni tumoleho ni. Anani ni otu bi walo ni. Otu yawa biba ni ashishe ya yoko lo ni. 5Byoni ntayayo yese ni, nwo oyoyu kese.>>
6Ni Oyesu ka mani, otehe shokpagye, oyikwabo kweyi oyi nyo ongo mani iyi. 7Oka danu mo, <<Ga yi na ibwu ko Osiluwa,>> ikweyi nu wo Oleho. Ebeni ongo ni ga niyi, kweyi okwikye go ole ya mebe.
8Awase ni bagye kwo kpa awase ni ba mo ni kwotu ko doka mo, <<Omani wo ongo ni ya yagye kweyi ya boza ni ona lo?>> 9Ashini kase kamo owanu.
Ashini kamo, <<Aayi, obyanu kin la.>>
Anu ke mo, <<Ami la.>>
10Adoka mo, <<Oyamoji niyi wo gwa?>>
11Okyogwu mo, <<Ongo ni aba yogwu mo Oyesu pini kwabo ka agye kweyi nyumiyi. Okadami mo na gi ibwu ko Osiluwa ga niyi. Ebeni ngga na, kweyi nmebe.>>
12Adoka mo, <<Ongo mani ye ebenya?>> Okamo, <<Ngye lo.>>
Awofarisi Bwikpo ko Ogege mani
13Abyo ongo ni wo ofiyi oni webe ka Awofarisi. 14Eno ni Oyesu kwabo ka agye kweyi gwofiyi mani iyi ni we eno ko minyo. 15Awofarisi ki do ongo mani okamo oyamoji ome iyi nu gwa. Ongo ni kamo, <<Okwabo ka agye nyumiyi, kweyi ngga niyi, kweyi nmebe.>>
16Ashini ka Awofarisi kamo, <<Ongo mani bwebe ko Owuso lalo, koni oyoza ni ono wobi ni Eno ko Minyo.>>
Ashini kase ke duwoka mo, <<Inozalabi yamoji ya gege ko yawoza ki igbashi mani?>> Bwebe ni okwunu wa kepa.
17Ogwejeji nu akyikwikye gebe kofiyi mani kweyi akamo, <<Oji ni ogbo ko ka ikweyi nu? Awo pini ogwawo iyi la.>>
Ongo oni kyogwu mo, <<Owinobane.>>
18Kwikyikyeni Ase ko Oyahuda kyogwu mo owofiyi ome agwani iyi lalo, gbishini atoleho gebe kene kpa ada ko ongo mani. 19Aduwoka mo, <<Omani woyi kala la? Anu pini ala mo wo ofiyi la? Yamoji ni oya mebe anani?>>
20Inanu kpa adanu kamo, <<Aha gye mo owoyi ka aha la, aha ki gye mamo wofiyi. 21Owe ni oke bwu ome oya mebe nabani, kwase ni gwaniyi ni aha gye lo. Ala doka. Owoyi leke kelo, ona ka dala okwunu nu.>> 22Inanu kpa adanu ka mani ikweyi koni aba yoshi ka Ase ko Oyahuda, ikweyi koni Ase ko Oyahuda kwobonu gbela mo kpiri kase ni kyogwu mo Oyesu wo Okristi aba yo ongma shekpa ka Ase ko Oyahuda. 23Ozani ya ni ene kpa ada nu kamo, <<Owo oyi leke kelo, ala doka.>> ni oma.
24Aki yongo ni amo wofiyi mani ogwu wa komwepa kweyi aka danu mo, <<Shokoyi do Owuso moya kokwokwoshi! Aha gye mongo ni dawogege mani winozalabi la.>>
25Okyogwu mo, <<Owinozalabi kwe owe lo, nggye lo. Oje kponu pini nggye la. Gbikyikye nwwofiyi, anani ke nyya mebe!>>
26Ebeni adoka mo, <<Oyo moji? Oya moji gwawiyi?>>
27Okyogwu mo, <<Nkela mani dala wa ala ke zakpaha lo. Ojiya ni ala ba yimu ko pwo ko omwepa? Ala ba yimu ko wawogboso mamani la?>>
28Ebeni awoteyi ko Oyahuda sesa kotata mo, <<Awo dawo pini winogboso ongo mani la! Aha wawogboso Omusa la! 29Agye mo Owuso kela do Omusa, ongo mani ke agyebe ni obwanu wa ni lo.>>
30Ongo ni kyogwu mo, <<Anani owoza kigbashi! Ala gyebe ni obwanu wa ni lo, oke gwamiyi. 31Ahagye kamo Owuso ya pwela kawinozalabi lo. Oya pwela kase ni ya yoshi ko Owuso kweyi ki ya yoza ni oya yimu ni la. 32Bwikyikyo kese ashishe pwo mo ashe gwiyi kase ni amo wofiyi ni wa lo. 33Owoni ongo mani bi bwebe ko Owuso lalo, obi ya gege ya yoza mani lo.>>
34Aka danu mo, <<Awo ni amo ipu kozalabi ni, kweyi mo wa fahoza?>> Kweyi anenya.
Opwiyi Ipu ko Omaku
35Oyesu pwo mo anenya, kweyi ishini opyo ni, okamo, <<Okyogwu kpo Oyi ka Asuse?>>
36Ongo oni doka mo, <<Adole, owanoho? Kadami shini na kyogwu kpanu.>>
37Oyesu kamo, <<Anani omo wa, anu pini ya kela kpawo ma.>>
38Ebeni ongo oni kamo, <<Adole, nkyogwu,>> Kweyi ogeyagye danu.
39Oyesu kamo, <<Nwwese mani kowa kepwo la, nwwa shini ofiyi na mebe kweyi ase ni ba mebe ni na pwiyi.>>
40Ashini ka Awofarisi ni bebeni kpanu ni pwela mani kweyi adoka mo, <<Oji, aha wofiyi mamani ona?>>
41Oyesu kamo, <<Owoni ala bi wofiyi, ala bi ba gbozalabi lo, byonabani ke ni ala mala ba mebe ni, ozalabi kala yaba.>>
Currently Selected:
Oyohana 9: ALA
Highlight
Share
Copy
Want to have your highlights saved across all your devices? Sign up or sign in
THE WORD FOR THE WORLD INTERNATIONAL, THE WORD FOR THE WORLD NIGERIA
