Yoane 2

Makwela ku Kana

1Kilumbu ki tatu, ku mbanza yi Kaana mu kizunga ki Ngalili, kuba na mukembo wu makwela, mpe ngudi yi Yesu wuba koko. 2Ku mukembo bewowo batumisa mpe Yesu na milongoki myandi. 3Vinu bu diyiza hwa, ngudi yi Yesu wumuteela ti: «Basidi na vinu ko.» 4Kansi Yesu wumuvutudila ti: «Mama, nkye musamu ngeye na meno e? Ntangu ani yafweni ko.» 5Ngudi andi wuteela bisadi ti: «Sadileeno mimvimba mi kaaluteela.»

6Huma behoho haba na bisiku bisambanu bihiduku mu matadi, byedi sadilanga Bayudayo mu kivedisa. Kisiku kimosi kilendi kota nkama di zilitele zi mamba. 7Yesu wuta ku bisadi ti: «Teboleeno bisiku bebyobyo mu mamba.» Ni batebola byo. 8Mboki wubateela ti: «Bwabu tekoneeno mamba bemomo na nateeno mo ku muntwadisi wu mukembo.» Ni bamunatina mo. 9Muntwadisi wu mukembo wubimba mamba makitukidi vinu. Kazaba ko kwedi mafuma, kansi bisadi biteka mamba bazaba. Ni hahoho katumisina kikwedi, 10wumuteela ti: «Konso muntu, vinu dimbote kakwe teka kabulanga, mboki bantu bu bamana kolo, wubaheeni vinu dilembolo toma ba dimbote. Kansi ngeye swekidi kwaku vinu dimbote natee ntangu beyiyi!»

11Bwabobo bu tonina bimangu bi Yesu, mu kimangu ki kasa ku mbanza yi Kaana, mu kizunga ki Ngalili. Wulonkisa nkembo andi, na milongoki myandi mimukwikila.

12Mboki wukulumuka ku mbanza yi Kapenawumi ha kimosi na ngudi andi, na mpangi zandi zi babakala, na milongoki myandi. Kansi mwa ndambu yi bilumbu kwandi baba koko.

Yesu wukuma bantu mu nzo-Nzambi

(Mat 21.12-13; Mlk 11.15-17; Luk 19.45-46)

13Mukembo wu Pake wu Bayudayo wuba bela-bela, mpe Yesu wutomboka ku Yelusalemi. 14Ku nzo-Nzambi wuyena mintekisi mi zingombe, mameme na mabembe, mpe na bantu baba bazakala ha meza mawu bedi hyakisanga mbongo. 15Ni hahoho, kahidikila kikoti mu misinga misyeto ni kedi kwe bakumi bamvimba mu nzo-Nzambi, na mameme na zingombe. Wusangimisa mbongo zi mihyakisi mpe wumwangisa meza mawu, 16na wuta ku mintekisi mi mabembe ti: «Katuleeno bimvimba byo haha, mpe ka lukitulandi nzo yi Tata ani zandu dyeno ko.» 17Milongoki myandi mibambuka moyo ti basonika: Vema di luzolo lwani mu dyambu di nzo aku dyaanyengisa bonso tiya.

18Kansi Bayudayo bamufuula ti: «Nkye kidimbu kingitukulu lendi tusila mu tulonka ti, ngeye wuu na luve mu sa bobo e?» 19Yesu wubavutudila ti: «Bwonzomoneeno nzo-Nzambi beyiyi, mbo nabwesa tunga yo mu bilumbu bitatu.» 20Bayudayo bamuteela ti: «Mvula makumi maya na sambanu basa mu tunga nzo-Nzambi beyiyi, bwabu ngeye mu bilumbu bitatu waatedimisa yo e?» 21Kansi nzo-Nzambi yi kedi zonzila ni nitu andi. 22Ni hahoho, Yesu bu kafuluka mu bafwa, milongoki myandi mibambuka moyo mu misamu mi kata, mpe mikwikila mu Masonama na mu myo mizonza Yesu.

Yesu zebi mutima wu muntu

23Mu ntangu yiba Yesu ku Yelusalemi ku mukembo wu Pake, babingi bamukwikila bu bedi yena bidimbu bingitukulu bi kedi hidika. 24Kansi Yesu kabasila kivuvu ko, mu dyambu ti bamvimba wubazaba, 25na kaba na nsatu ko ti bamuteela bwedi muntu kadi, mu dyambu ti zebi mii ku nsye mutima wu muntu.

Currently Selected:

Yoane 2: dde Ddo

Highlight

Copy