Luka 16
16
Kingana ki munkebi wu mvwilu wumadyela
1Yesu wuta dyaka ku milongoki myandi ti: «Bakala dimosi dimvwama diba na munkebi wu mvwilu andi, bantu bayiza mufunda ti mvwilu andi kena bunganga. 2Bu kamutumisa, wumuteedidi ti: “Nki nina kwe yuwingi mu ngeye e? Nyadila bonso bu wusadidi mvwilu ani, mu dyambu ti waabwesa ba munkebi wu mvwilu ani ko.” 3Munkebi wu mvwilu wuta ku nsye mutima andi ti: nki kwandi ndendi sa, mu dyambu ti mfumu ani wuna nkatula mu kisalu e? Kusala mfuba e? Nina ngolo ko, na sa mundombila e? Mbo nayena nsoni. 4Ha! Nzebi nki naasa, mwanki bantu ba ntambulanga mu zinzo zawu tala ti bankatudi mu kisalu ki munkebi wu mvwilu. 5Mboki ni katumisa wumosi-wumosi mu yobobo bedi defa mfumu andi. Wuta ku wuntete ti: kikwa wuna defa mfumu ani e? 6Wuvutula ti: nkama di bidunda bi mafuta ma olive. Munkebi wu mvwilu wumuteela ti: bonga kipapila kyaku, zakala munswalu, sonika makumatanu. 7Wuteela ku wuhiika ti: Ngeye, kikwa wuna defa e? Wuvutula ti nkama di zingoto zibele. Ni kamuteela ti: Bonga kipapila kyaku na sonika: makuminana. 8Mfumu wusiika munkebi andi wumbi mu mpila madyela makabaka mu huna. Mu dyambu ti, bantu ba nza beyiyi bavudidi madyela na baala bakwe zinganga mu kya ku Nzambi mu nzakululu yi yawu na yawu.
9Yesu wubateela dyaka ti: “Meno ebu nina luteela: bakeeno zinkayi mu bimvwama bi babakidi mu nzila zimbi, mwanki mu ntangu yi byaahwa, balutambula mu zinzo zi mimvu ka mimvu.” 10Muntu wu wukwikama mu mwa kima kifyoti, wudi mpe wukwikama mu kima kinene. Muntu wulembolo ba na ludedomo mu mwa kima kifyoti, kadi mpe na lunungu ko mu kima kinene. 11Tala ti lulembakani mu ba bakwikama mu bimvwama bi bakulu mu nzila zimbi, nani kwandi waaluhaana bimvwama bi kedika e? 12Tala ti lubedi bakwikama mu bima bingana ko, nani waaluhaana bi yebende e?
13Kunani kisadi kilendi sadila mfumu zole ko. Mu dyambu ti, mbo kabela wumosi na waatya wuhiika, hoti mbo kayekama ku wumosi na mbo kanyafuna wuhiika. Lulendi sadila ha kimosi Nzambi na mbongo ko.»
Ndongolo zi Yesu zi mumpila-mumpila
(Mat 11.12-13; 5.31-32; Mlk 10.11-12)
14Bafalisi batiidi mbongo, bedi seha Yesu, bu bedi yuwa misamu bemyomyo mimvimba. 15Yesu wubateela ti: «Luna kiyenikisa ba lunungu ha ntadisi yi bantu, kansi Nzambi zebi mitima myeno, mu dyambu ti kima kikwe yenikanga mfunu ha meso ma bantu, kidi kisafuka ha meso ma Nzambi.
16Masonama mu Misiku mi Mose na mimbikudi mitatamana natee mu ntangu yi Yoane Mbotiki, yiba ntangu yi Misiku mi Mose na mimbikudi. Ku manima, natee mu ntangu beyiyi, musamu wumbote wu kimfumu ki Nzambi wuna samunwanga. Wonso muntu wuna sadila ngolo mu kota momo. 17Yulu na butoto byaazimbala nayaki-yaki, kansi ka mwa kisono kimosi ki Misiku kilendi katuka ko.
18Dyonso bakala dyaakuma mukento andi, mboki kwedidi wuhiika, sadidi kinsuza, mpe bakala dyaakwela mukento wuba kumini ku makwela ku mulumi andi, sadidi mpe kinsuza.
Kingana ki muntu wu mvwama na Lazalo
19Kuba na bakala dimosi di mvwama, dyedi lwatanga binkutu bintoko na bintalu beni, bilumbu bimvimba mu kyese na mu minkembo kedi bye hyokisilanga. 20Ha mwelo nzo andi, haba na muwelo wumosi nkumbu andi Lazalo. Nitu andi yimvimba, yiba na zimputa. 21Wedi tyanga mu dya mfumfula zedi bwanga ku nsye meza ma mvwama. Kansi bambwa ni bedi kwiza mu hendanga mputa zandi. 22Muwelo wuyiza fwa, mboki zimbazi zi munata ha ntadisi yi Abalahami. Mvwama mpe wuyiza fwa na bamuzika. 23Ku nsi yi bafwa, kwama kukwingi kedi yenanga, bu kasendola meso, wuyena kukula, Abalahami wuba na Lazalo ha ntendo andi. 24Buna wulokana ti: “Tata Abalahami, mfwila nkenda na fidisa Lazalo kadobika nsongi yi mulembo andi mu mamba mwanki kambodika ludimi, mu dyambu ti kwama nina yena mu kati di milaka mi tiya bemimi.” 25Kansi Abalahami wumuvutudila ti: Mwana ani, bambuka moyo ti ngeye wuba na bimvwama bibingi mu kizingu kyaku, mpe Lazalo wuba mu zimpasi zizingi. Bwabu yandi tambudi mbombolo. Kansi ngeye wu mu kati di kwama. 26Mboki, ha kati-kati dyeto na yeno bulu di nsisi dihoho, mwanki ho yobobo batiidi mu kwiza ku ludi, balendi hyoka ko, bumosi mpe ku yobobo baa neeno koko, ka balendi sabuka ku tudi ko. 27Mvwama wuta ti: “Mulemvo aku tata! Nina kulomba, wufidisa Lazalo ku nzo yi tata ani, 28mpangi zitanu zinani koko, kabanatina kimbangi mwanki yawu mpe balembolo kwiza ku kibuka bekiki kina kwama kukwingi.” 29Kansi Abalahami wumuvutudila ti: “Mpangi zaku ba na Mose na Mimbikudi mu balwengisa. Babayuwila!” 30Mvwama wumuteela dyaka ti: “Kani, tata Abalahami, tala ti muntu fumini ku nsi yi bafwa wenzi bayenikina, mbo baviluka.” 31Kansi Abalahami wumuvutudila ti: “Tala ti bayuwidi Mose na mimbikudi ko, batambula ko, kati muntu ni kafuma ku nsi yi bafwa.”»
Currently Selected:
Luka 16: dde Ddo
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
