Najə̄ kə́ Majə yā Jeju ń Luk ndang ní 9
9
Jeju əla ngé ndóō yá̰a̰ yān kə́ kutə gidə i jōó gə̄
(Á̰a̰ī Mat 10.5-15; Mark 6.7-13)
1Jeju ɔsə dɔ ngé ndóō yá̰a̰ yān kə́ kutə gidə i jōó gə̄ naā tə́, ba adə̄də́ ndūn ō, tɔ́gə ō, kadə̄ tə̄ɓān̄ ndíĺ kə́ majaĺ gə̄ malang ō, kadə̄ rāān̄ kadə̄ rɔ̄ ngé mo̰y gə̄ ngáā ō. 2Gō tə́ anī ni-əladə́ kənī mbēr̄ najə̄ kə́ dɔ *Ɓē ko̰o̰ yā Nə́ɓā tə́ ō, tɔ̄l̄ mo̰y tə́ dɔ de gə̄ tə́ ō. 3Ədadə́ na:
Dan ń ā āwī anī, ī-lōōī kun yá̰a̰ mbā kə́ tītə̄ kāgə̄ tɔ́sə̄, aláa ngong mbā, aláa mápa yā rāā sádə̄ tə́, aláa nar. Sḭḭ̄ kógə̄ḿ kógə̄ḿ malang ní, ādī deē kógə̄ḿ o̰ō̰ kūbə̄ dɔ naā tə́ jōó alé. 4Kújə́ kə́ rá nəkɔ́ ń ā údiī kemeé ní, ī-ndiī tū tə́ bátə́ kadə̄ ḭ́ḭīneé mbā. 5Ba ré de gə̄ əhɔn̄sí kə̄ rɔ̄də́ tə́ aĺ anī ī-teēī kɔ̄ɔ́ kem ɓēé ba ī-*gógī bumbə́rú kə́ njasí tə́: Nge n noō i yá̰a̰ kɔjə tə́ tām̄ yādə́ tə́.
6Ngé ndóō yá̰a̰ gə̄ ní aw̄n̄. Nin̄-njə̄rān̄ kə gō ngán ɓē gə̄ malang ɔjən̄neé Najə̄ kə́ Majə ō, rāān̄neé adə̄ rɔ̄ ngé mo̰y gə̄ ngáā kə gō loo gə̄ malang ō.
Herod sōl̄
(Á̰a̰ī Mat 14.1-12; Mark 6.14-29)
7Yá̰a̰ gə̄ malang ń rāān̄ yá̰á̰ ní Herod nge ko̰o̰ ɓē oō, banī ni-ger̄ najə̄ mandang kə́ yā ra dɔ tə́ alé, tām̄ de kə́rēý gə̄ ədan̄ na Jeju na i Ja̰a̰ ń oy ní n na ndól̄ dan de kə́ koy gə̄ tə́ ní ō, 8ngé kə́rēý gə̄ ədan̄ na i *Eli n na tél teē hɔy kə rɔ̄də́ tə́ ní ō, ngé kə́ rang gə̄ ədan̄ na Jeju na i deē kógə̄ḿ kə́ dan *ngé koō ta kə́ jóo gə̄ tə́ n na oy tá ndól̄ ní ō.
9Anī Herod əda na:
Ja̰a̰ ní, i mā n m-ādə̄ əjan̄ míndən kɔ̄ɔ́ ní, ba deē nəkɔ́ ń toō ń m-ōō najə̄ kə́ beē gə̄ dɔn tə́ toō ní i náā ō? Adə̄ a sāā ka̰a̰n.
Jeju adə̄ de gə̄ dūbú mí gə̄ yá̰a̰ kəsa
(Á̰a̰ī Mat 14.13-21; Mark 6.30-44; Ja̰a̰ 6.1-14)
10Dan ń ngámbang kəla gə̄ tél reē ugə̄n̄ anī, ɔjən̄ Jeju gotə yá̰a̰ malang ń aw̄ rāān̄ ní. Ni ɔydə́ aw̄ sedə́ kə kéŕdə́ kadə ɓē kə́ a ɓārə́n̄ na i Betsaida tə́. 11Kósə de gə̄ gerə̄n̄ gōdə́ adə̄ aw̄n̄ gōdə́ tə́. Ni-əhɔdə́ kə̄ rɔ̄n tə́ majə. Ɔr̄ najə̄ kə́ dɔ *Ɓē ko̰o̰ yā Nə́ɓā tə́ sedə́ ō, rāā adə̄ rɔ̄ ngé mo̰y gə̄ ń gḛyn̄ i kadə̄ yā rāā sedə́ ní ngáā ō.
12Banī loo a tíbə i mbée. Adə̄ ngé kə́ kutə gidə i jōó gə̄ reēn̄ rɔ̄n tə́ ba ədanən̄ na:
Ə́dá kósə de gə̄ ādə̄ aw̄n̄ kə̄ kem ɓē bo gə̄ tə́ ō, kə̄ kem ngán ɓē gə̄ kə́ gidə tə́ gə̄ tə́ ō, kadə̄ əngen̄ yá̰a̰ tū tə́ əsan̄ ō, əngen̄ loo ton̄neé ō. Tɔdɔ̄ loo ń jə-ndiī tū tə́ toō i loo kə́ ɓē gətóo tū tə́.
13Banī ni-tél ədadə́ na:
Sḭḭ̄ kɔ́ gə̄ ādīdə́ yá̰a̰ ādə̄ əsan̄.
Anī nin̄-tél ədanən̄ na:
Mápa yājí i mí beē ngóy ō, kānjə̄ yājí i jōó beē ngóy ō, ní ī-gḛy i kadə̄ j-aw̄ jə-mang yá̰a̰ kəsa tām̄ yā kósə de gə̄ ń toō tə́ a?
14De kə́ dəngam gə̄ asən̄ deē dūbú mí. Anī Jeju əda ngé ndóō yá̰a̰ yān gə̄ na kə gángə̄n̄ de gə̄ kə gō ɓūtə̄də́ gēé kutə mí kutə mí, ba kadə̄ ndin̄ nang tə́.
15Nin̄-rāān̄ tītə̄ ń noō, adə̄ tə́ndān̄ de gə̄ nang tə́ malang. 16Jeju taā mápá kə́ mí gə̄ ní ō, kānjə̄ kə́ jōó gə̄ ní ō, ba ənī kumən kə̄ dɔɔ́, tɔ́r̄ tan dɔ tə́ pá tá gān̄g naā tə́ adə̄ ngé ndóō yá̰a̰ yān gə̄ kadə̄ nə̄ɓōn̄ kósə de gə̄ ɓáý. 17Nin̄ malang əsan̄ yá̰a̰ ní ndānə̄n̄. Tá gotə ń na̰y ní ɔyn̄ rosə dōbə̄ kutə gidə i jōó ɓáý to̰.
Piyer əda na Jeju na i Kərist
(Á̰a̰ī Mat 16.13-19; Mark 8.27-29)
18Ndɔ̄ kógə̄ḿ tə́ Jeju a ndɔ̄ȳ Nə́ɓā kə kérneé, ba i ngé ndóō yá̰a̰ yān gə̄ ngóy n i seneé, anī ni-dəjedə́ na ké kósə de gə̄ ədan̄ na ni i náā wa.
19Anī nin̄-tél ədanən̄ na:
De kə́rēý gə̄ ədan̄ na ḭ̄ na i Ja̰a̰ Batistə ō, ngé kə́rēý gə̄ na ḭ̄ na i *Eli ō, kə́ madə̄ gə̄ na i kə́ kógə̄ḿ dan *ngé koō ta kə́ jóo gə̄ tə́ ń oyn̄ ní n na ndól̄ ō. 20Jeju dəjedə́ na: Ba sḭḭ̄ kɔ́ gə̄ ní ə́daī na mā i náā tā? Anī Piyer əda na:
Ḭ̄ i *Kərist.
Jeju əda najə̄ kə́ dɔ koyn tə́ ō ndólə̄n tə́ ō
(Á̰a̰ī Mat 16.20-28; Mark 8.30-9.1)
21Jeju tāādə́ kə́ tɔ́gɔ́ na kə ədan̄ deē kógə̄ḿ gotə najə̄ ní sḛ́ý alé. 22Ba ədadə́ to̰ na:
I gáŕ kadə̄ Ngōn̄ Deē a̰a̰ tápə̄ ngá̰ý ō, kadə̄ *kum kɔɔ̄ gə̄, kə ngol gə̄ kə́ dɔ *ngé tun̄ yá̰a̰ gə̄ tə́, kə ngé ndóō de gə̄ ndū najə̄ gə̄ mbātə́nən̄ ō, i gáŕ kadə̄ tɔ̄l̄nən̄ ō, ba kə ndɔ̄ kə́ nge ko̰ mətá anī i gáŕ kadə̄ ni a ndól̄.
23Gō tə́ anī ni-əda de gə̄ malang na:
Ré deē kógə̄ḿ gḛy reē gōḿ tə́ anī, adə̄ kɔ́ɔ̄ əya̰ róbə yān kɔ̄ɔ́ ō, ndi dɔ rɔ̄n tə́ kə ndɔ̄ gə̄ yā kətō kāgə̄ kə́ dēsə́ yān ō, ba un róbə́ ń mā m-úń ní. 24Tɔdɔ̄ deē ń a sāā kadə̄ n-udə kɔ̄ɔ́ aĺ ní kɔ́ɔ̄ a udə. Ba deē ń ndigə kudə kɔ̄ɔ́ tām̄ yāḿ mā tə́ ní, kɔ́ɔ̄ a ajə. 25Ré deē ənge dɔ nang malang kə taá ba tḭ̄ḭ̄ ta rɔ̄n kɔ̄ɔ́, aláa nujə rɔ̄n kɔ̄ɔ́ ní a teēn i rí? 26Deē ń rɔ̄n sɔlə̄n tām̄ yāḿ tə́ ō, tām̄ yā najə̄ yāḿ gə̄ tə́ ō ní, dan ń Ngōn̄ Deē a tél yā reē kem *kɔsə gɔn yān tə́ ō, yā Bɔbə̄ Ngōn̄ tə́ ō, yā *de kə́ dɔ rā̰ tə́ kə́ táĺ gə̄ ō anī, rɔ̄n a sɔlə̄n tām̄ yā kɔ́ɔ̄ tə́ ō. 27Ādə̄ m-ə́dásí, de kə́rēý gə̄ dan de gə̄ ń ran̄ laā tə́ toō a a̰a̰n̄ *Ɓē ko̰o̰ yā Nə́ɓā pá tá a oyn̄ ɓáý.
Kɔsə gɔn yā Ngōn̄ Nə́ɓā
(Á̰a̰ī Mat 17.1-8; Mark 9.2-8)
28Asə ndɔ̄ sɔ́sɔ́ gō najə̄ gə̄ ń noō tə́ anī, Jeju un Piyer ō Ja̰a̰ ō Jakə ō aw̄ sedə́ dɔ mbalá yā ndɔ̄ȳ. 29Dan ń ni-ndi a ndɔ̄ȳ Nə́ɓā anī ta kumən tél tūr̄ kə́ rang kɔ̄ɔ́ ō, kūbə̄ kə́ rɔ̄n tə́ ndɔ̄bə̄ ndaa ngóńg ngóńg ō. 30-31Anī kə̄ ta jī tə́ noō de kə́ koy kɔ̄ɔ́ gə̄ jōó teē ran̄ kem kɔsə gɔn kə́ dɔ rā̰ tə́, a ɔrə̄n̄ najə̄ seneé dɔ koy ń a rāā yā koy tə́ *Jerusalem yā tɔ̄ləń ta kəla yān ní. De gə̄ ní i Moijə ō *Eli ō. 32Piyer nin̄ kə madə̄n gēé ɓīīn̄ kə́ oyn̄ mámák kɔ̄ɔ́. Banī nin̄-ndólə̄n̄ anī a̰a̰n̄ kɔsə gɔn yā Jeju ō, de kə́ jōó gə̄ ń ran̄ rɔ̄n tə́ ní ō. 33Dan ń de gə̄ ní a rāān̄ yā tḭ̄ḭ̄ naā ní anī Piyer əda Jeju na:
Ngoljí, majə kadə̄ jə-ndiī laā ngá̰ý. Ādə̄ j-udiī kújə tandā gə̄ mətá, kógə̄ḿ yāí ō, kógə̄ḿ yā Moijə ō, kógə̄ḿ yā Eli ō. Tan a ɔr̄ najə̄ banī nəkɔ́ ger̄ kum najə̄ ń a ɔr̄ ní alé.
34A ɔr̄ najə̄ kə́ tan tə́ ɓáý anī kil̄ man̄ kógə̄ḿ reē rāā ndíl dɔdə́ tə́. Dan ń a udən̄ kə̄ dan kil̄ man̄ tə́ anī ɓōĺ asədə́ nák. 35Anī deē kógə̄ḿ ɔr̄ najə̄ dan kil̄ man̄ tə́ əda na:
Ni ń toō i Ngōnə̄ḿ ń m̄-gə̄rān ní, ōōī najə̄ yān!
36Dan ń deē ní ɔr̄ najə̄ oy anī i Jeju ngóy n ra kə kérneé ní. Dan ngeé ń noō tə́ ní ngé ndóō yá̰a̰ gə̄ teēn̄ tadə́ mḛḛ dɔ yá̰a̰ gə̄ ń a̰a̰n̄ tə́ ní alé.
Jeju tə̄ɓā ndíĺ kə́ majaĺ kem ngōn̄ kógə̄ḿ tə́ kɔ̄ɔ́
(Á̰a̰ī Mat 17.14-18; Mark 9.14-27)
37Teē kə ndɔ̄ kə́ noō dan ń nin̄-risən̄ kɔ̄ɔ́ dɔ mbalá anī kósə de kə́ ngá̰ý gə̄ ɔjən̄ no Jeju. 38Anī deē kógə̄ḿ dan kósə de gə̄ tə́ un ndūn kə̄ dɔɔ́ ngá̰ý ɔrə̄ń najə̄ əda na:
Ngoljí, m̄-rāāī ɓɔ́ ba ə̄nī kumií dɔ ngōnə̄ḿ tə́, tɔdɔ̄ ni i ngōnə̄ḿ kə́ kal kógə̄ḿ beē! 39Ni-ndi ɓáa ndíĺ kógə̄ḿ a ɔsə seneé, adə̄ ḭḭ rétə́ gēé ɓáa a tə́gā kɔŕ ō, ndíĺ ní rāān adə̄ dā̰n a ndām̄ ngangan ō, tan əɓa húūlú mbuk mbuk ō, kem ndíĺ ní ngəra loo teē tə́ kɔ̄ɔ́ kemən tə́ ō, ré əya̰n ɓáa ngōn̄ ní tél a to i ragəja kɔ̄ɔ́ ō. 40m̄-rāā ngé ndóō yá̰a̰ yāí gə̄ ɓɔ́ kadə̄ tə̄ɓānən̄ banī dum̄də́ kɔ̄ɔ́.
41Anī Jeju əda na:
Sḭḭ̄ de kə́ kōnīí laā kə́ ngé taā kem aĺ gə̄, kə́ ngé rāā yá̰a̰ majaĺ gə̄, kə m̄-ndi sesí ō, kə m̄-tə́gā taḿ dɔsí tə́ ō i bátə́ ta kə́ rá? Gō tə́ anī ni-tél əda dəngam ní na: Ī-reē kə ngōnīí ní kə̄ laā.
42Ngōn̄ a reē kə̄ rɔ̄n tə́ ɓáý anī ndíĺ kə́ yḛr ní un ənīn nang tə́ tul ō, rāān adə̄ dā̰n ndām̄ ngangan ō. Banī Jeju ndán̄g ndíĺ kə́ yḛr ní ba rāā adə̄ ngōn̄ ní adə̄ rɔ̄n ngan̄g ō, tél adə̄n kə bɔbə̄neé gogə́ ō. 43Tɔ́gə yā Nə́ɓā kə́ ngá̰ý ń toō ɔr kumdə́ malang.
Jeju tāā najə̄ koyn ɓáý to̰
(Á̰a̰ī Mat 17.22-23; Mark 9.30-32)
Dan ń kəla rāā Jeju a yáā de gə̄ malang ɓáý anī, ni-əda ngé ndóō yá̰a̰ yān gə̄ na:
44Najə̄ ń m-ā m-ə́dásí toō, ī-ngɔ̄mī dɔsí tə́ majə: A əlan̄ Ngōn̄ Deē jī de gə̄ tə́.
45Banī nin̄-gerə̄n̄ kum alé. Kum i kə́ mundə̄ kadə̄ dum̄ dɔdə́ ō, tá nin̄-ɓōlə́n̄ dəje Jeju najə̄ dɔ tə́ kɔ̄ɔ́ ō.
I náā n i de kə́ bo ngá̰ý ní?
(Á̰a̰ī Mat 18.1-5; Mark 9.33-37)
46Nin̄-nējə̄n̄ naā najə̄ dɔ yá̰á̰ kógə̄ḿ tə́ ədan̄ na: I náā n i kə́ bo ngá̰ý dandə́ tə́ ní? 47Jeju ń ger̄ gír̄ kə́ kemdə́ tə́ ní, un ngōn̄ kə́ dūú kógə̄ḿ əndān rɔ̄n tə́ ngɔr, 48ba ədadə́ na:
Deē ń əhɔ ngōn̄ kə́ dūú ń toō kə̄ rɔ̄n tə́ najə̄ yāḿ mā tə́ ní, əhɔm̄ i mə̄kɔ́ kə̄ rɔ̄n tə́. Ba deē ń əhɔm̄ kə̄ rɔ̄n tə́ ní, əhɔ i deē ń əlam̄ mā ní kə̄ rɔ̄n tə́. Tɔdɔ̄ i deē ń dūú tɔȳsí malang ní n i de kə́ bo tɔȳsí malang ní.
Deē ń i madə̄ ba̰ā̰sí aĺ ní kɔ́ɔ̄ i sesí
(Á̰a̰ī Mark 9.38-40)
49Ja̰a̰ un najə̄ ɔr̄, əda na:
Ngoljí, j-a̰a̰ deē kógə̄ḿ a tə̄ɓā ndíĺ kə́ majaĺ gə̄ kə rīí ba jə-nāā kɔgə̄n, tɔdɔ̄ ni-un gōí sejí alé.
50Banī Jeju əda na:
Ī-lōōī kɔgə̄n, tɔdɔ̄ deē ń i madə̄ ba̰ā̰sí alé ní, kɔ́ɔ̄ i sesí.
De gə̄ mbātə́n̄ kəhɔ Jeju kə̄ rɔ̄də́ tə́
51Dɔ ndɔ̄ ń kadə̄ ɔrə̄n̄neé Jeju dɔ nang tə́ kɔ̄ɔ́ yā kaw̄ seneé dɔ rā̰ tə́ ní to ngɔr. Anī Jeju utə̄ kumən njarara ba un róbə ta kaw̄ *Jerusalem. 52Ni-əla de gə̄ kété non tə́. Ngámbang kəla gə̄ ní əsōn̄ róbó, anī aw̄ a udən̄ kem ɓē yā Samari gə̄ kógə̄ḿ tə́ yā rāā loo tū tə́ tām̄ yān tə́. 53Banī de kə́ kem ɓē ní tə́ gə̄ mbātə́n̄ kəhɔn kə̄ rɔ̄də́ tə́, tɔdɔ̄ ni-aw̄ i kə̄ *Jerusalem. 54Dan ń ngé ndóō gə̄ ń i Jakə nin̄ kə Ja̰a̰ ní a̰a̰n̄ beé anī, ədan̄ na:
Kɔ́ɔ̄ɓē, ī-gḛy kadə̄ j-əda kadə̄ hor teē dɔ rā̰ tə́ reē róōdə́ malang a?
55Banī Jeju tūr̄ rɔ̄n kə̄ rɔ̄də́ tə́ ba ibədə́. 56Gō tə́ anī nin̄-ɔtə aw̄n̄ kə̄ ɓē kə́ rang tə́.
Ngé gə̄ ń gḛyn̄ kun gō Jeju ní
(Á̰a̰ī Mat 8.19-22)
57Dan ń nin̄ i róbó anī deē kógə̄ḿ əda Jeju na:
Ká āw̄ i kə̄ rá gə̄gē anī, m-ā m-ún gōí.
58Anī Jeju tél ədan na:
Njā̰ gə̄ aw̄n̄ kə bəlodə́ gə̄ ō, yel̄ kə́ dɔɔ́ gə̄ aw̄n̄ kə ɓēdə́ gə̄ ō, banī Ngōn̄ Deē aw̄ kə loo kə́ yā kəla dɔn tū tə́ alé.
59Gō tə́ anī ni-əda de kə́ rang na:
Ún gōḿ! Anī deē ní tél ədan na:
Ādə̄ m-āw̄ m̄-dubə̄ bɔbə́ḿ pá tá.
60Banī Jeju ədan na:
Ə́yá̰ ngé gə̄ ń oyn̄ kɔ̄ɔ́ ní ādə̄ dubə̄n̄ nīń yādə́ gə̄, ba ḭ̄, āw̄ ɔ́jə de gə̄ najə̄ kə́ dɔ *Ɓē ko̰o̰ yā Nə́ɓā tə́.
61De kə́ rang ədan ɓáý to̰ na:
Kɔ́ɔ̄ɓē, m-ā m-ún gōí, ba ādə̄ m-āw̄ m̄-rāā ngééḿ gə̄ lápə́ya tá m̄-tél.
62Anī Jeju ədan na:
Deē ń əga jīn dɔ kɔsə ndɔr̄ man̄g tə́, ba tél a mbel kə̄ gogə́ ɓáý to̰ ní, i de kə́ rāānən̄ tām̄ yā *Ɓē ko̰o̰ yā Nə́ɓā tə́ alé.
Currently Selected:
Najə̄ kə́ Majə yā Jeju ń Luk ndang ní 9: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad
Najə̄ kə́ Majə yā Jeju ń Luk ndang ní 9
9
Jeju əla ngé ndóō yá̰a̰ yān kə́ kutə gidə i jōó gə̄
(Á̰a̰ī Mat 10.5-15; Mark 6.7-13)
1Jeju ɔsə dɔ ngé ndóō yá̰a̰ yān kə́ kutə gidə i jōó gə̄ naā tə́, ba adə̄də́ ndūn ō, tɔ́gə ō, kadə̄ tə̄ɓān̄ ndíĺ kə́ majaĺ gə̄ malang ō, kadə̄ rāān̄ kadə̄ rɔ̄ ngé mo̰y gə̄ ngáā ō. 2Gō tə́ anī ni-əladə́ kənī mbēr̄ najə̄ kə́ dɔ *Ɓē ko̰o̰ yā Nə́ɓā tə́ ō, tɔ̄l̄ mo̰y tə́ dɔ de gə̄ tə́ ō. 3Ədadə́ na:
Dan ń ā āwī anī, ī-lōōī kun yá̰a̰ mbā kə́ tītə̄ kāgə̄ tɔ́sə̄, aláa ngong mbā, aláa mápa yā rāā sádə̄ tə́, aláa nar. Sḭḭ̄ kógə̄ḿ kógə̄ḿ malang ní, ādī deē kógə̄ḿ o̰ō̰ kūbə̄ dɔ naā tə́ jōó alé. 4Kújə́ kə́ rá nəkɔ́ ń ā údiī kemeé ní, ī-ndiī tū tə́ bátə́ kadə̄ ḭ́ḭīneé mbā. 5Ba ré de gə̄ əhɔn̄sí kə̄ rɔ̄də́ tə́ aĺ anī ī-teēī kɔ̄ɔ́ kem ɓēé ba ī-*gógī bumbə́rú kə́ njasí tə́: Nge n noō i yá̰a̰ kɔjə tə́ tām̄ yādə́ tə́.
6Ngé ndóō yá̰a̰ gə̄ ní aw̄n̄. Nin̄-njə̄rān̄ kə gō ngán ɓē gə̄ malang ɔjən̄neé Najə̄ kə́ Majə ō, rāān̄neé adə̄ rɔ̄ ngé mo̰y gə̄ ngáā kə gō loo gə̄ malang ō.
Herod sōl̄
(Á̰a̰ī Mat 14.1-12; Mark 6.14-29)
7Yá̰a̰ gə̄ malang ń rāān̄ yá̰á̰ ní Herod nge ko̰o̰ ɓē oō, banī ni-ger̄ najə̄ mandang kə́ yā ra dɔ tə́ alé, tām̄ de kə́rēý gə̄ ədan̄ na Jeju na i Ja̰a̰ ń oy ní n na ndól̄ dan de kə́ koy gə̄ tə́ ní ō, 8ngé kə́rēý gə̄ ədan̄ na i *Eli n na tél teē hɔy kə rɔ̄də́ tə́ ní ō, ngé kə́ rang gə̄ ədan̄ na Jeju na i deē kógə̄ḿ kə́ dan *ngé koō ta kə́ jóo gə̄ tə́ n na oy tá ndól̄ ní ō.
9Anī Herod əda na:
Ja̰a̰ ní, i mā n m-ādə̄ əjan̄ míndən kɔ̄ɔ́ ní, ba deē nəkɔ́ ń toō ń m-ōō najə̄ kə́ beē gə̄ dɔn tə́ toō ní i náā ō? Adə̄ a sāā ka̰a̰n.
Jeju adə̄ de gə̄ dūbú mí gə̄ yá̰a̰ kəsa
(Á̰a̰ī Mat 14.13-21; Mark 6.30-44; Ja̰a̰ 6.1-14)
10Dan ń ngámbang kəla gə̄ tél reē ugə̄n̄ anī, ɔjən̄ Jeju gotə yá̰a̰ malang ń aw̄ rāān̄ ní. Ni ɔydə́ aw̄ sedə́ kə kéŕdə́ kadə ɓē kə́ a ɓārə́n̄ na i Betsaida tə́. 11Kósə de gə̄ gerə̄n̄ gōdə́ adə̄ aw̄n̄ gōdə́ tə́. Ni-əhɔdə́ kə̄ rɔ̄n tə́ majə. Ɔr̄ najə̄ kə́ dɔ *Ɓē ko̰o̰ yā Nə́ɓā tə́ sedə́ ō, rāā adə̄ rɔ̄ ngé mo̰y gə̄ ń gḛyn̄ i kadə̄ yā rāā sedə́ ní ngáā ō.
12Banī loo a tíbə i mbée. Adə̄ ngé kə́ kutə gidə i jōó gə̄ reēn̄ rɔ̄n tə́ ba ədanən̄ na:
Ə́dá kósə de gə̄ ādə̄ aw̄n̄ kə̄ kem ɓē bo gə̄ tə́ ō, kə̄ kem ngán ɓē gə̄ kə́ gidə tə́ gə̄ tə́ ō, kadə̄ əngen̄ yá̰a̰ tū tə́ əsan̄ ō, əngen̄ loo ton̄neé ō. Tɔdɔ̄ loo ń jə-ndiī tū tə́ toō i loo kə́ ɓē gətóo tū tə́.
13Banī ni-tél ədadə́ na:
Sḭḭ̄ kɔ́ gə̄ ādīdə́ yá̰a̰ ādə̄ əsan̄.
Anī nin̄-tél ədanən̄ na:
Mápa yājí i mí beē ngóy ō, kānjə̄ yājí i jōó beē ngóy ō, ní ī-gḛy i kadə̄ j-aw̄ jə-mang yá̰a̰ kəsa tām̄ yā kósə de gə̄ ń toō tə́ a?
14De kə́ dəngam gə̄ asən̄ deē dūbú mí. Anī Jeju əda ngé ndóō yá̰a̰ yān gə̄ na kə gángə̄n̄ de gə̄ kə gō ɓūtə̄də́ gēé kutə mí kutə mí, ba kadə̄ ndin̄ nang tə́.
15Nin̄-rāān̄ tītə̄ ń noō, adə̄ tə́ndān̄ de gə̄ nang tə́ malang. 16Jeju taā mápá kə́ mí gə̄ ní ō, kānjə̄ kə́ jōó gə̄ ní ō, ba ənī kumən kə̄ dɔɔ́, tɔ́r̄ tan dɔ tə́ pá tá gān̄g naā tə́ adə̄ ngé ndóō yá̰a̰ yān gə̄ kadə̄ nə̄ɓōn̄ kósə de gə̄ ɓáý. 17Nin̄ malang əsan̄ yá̰a̰ ní ndānə̄n̄. Tá gotə ń na̰y ní ɔyn̄ rosə dōbə̄ kutə gidə i jōó ɓáý to̰.
Piyer əda na Jeju na i Kərist
(Á̰a̰ī Mat 16.13-19; Mark 8.27-29)
18Ndɔ̄ kógə̄ḿ tə́ Jeju a ndɔ̄ȳ Nə́ɓā kə kérneé, ba i ngé ndóō yá̰a̰ yān gə̄ ngóy n i seneé, anī ni-dəjedə́ na ké kósə de gə̄ ədan̄ na ni i náā wa.
19Anī nin̄-tél ədanən̄ na:
De kə́rēý gə̄ ədan̄ na ḭ̄ na i Ja̰a̰ Batistə ō, ngé kə́rēý gə̄ na ḭ̄ na i *Eli ō, kə́ madə̄ gə̄ na i kə́ kógə̄ḿ dan *ngé koō ta kə́ jóo gə̄ tə́ ń oyn̄ ní n na ndól̄ ō. 20Jeju dəjedə́ na: Ba sḭḭ̄ kɔ́ gə̄ ní ə́daī na mā i náā tā? Anī Piyer əda na:
Ḭ̄ i *Kərist.
Jeju əda najə̄ kə́ dɔ koyn tə́ ō ndólə̄n tə́ ō
(Á̰a̰ī Mat 16.20-28; Mark 8.30-9.1)
21Jeju tāādə́ kə́ tɔ́gɔ́ na kə ədan̄ deē kógə̄ḿ gotə najə̄ ní sḛ́ý alé. 22Ba ədadə́ to̰ na:
I gáŕ kadə̄ Ngōn̄ Deē a̰a̰ tápə̄ ngá̰ý ō, kadə̄ *kum kɔɔ̄ gə̄, kə ngol gə̄ kə́ dɔ *ngé tun̄ yá̰a̰ gə̄ tə́, kə ngé ndóō de gə̄ ndū najə̄ gə̄ mbātə́nən̄ ō, i gáŕ kadə̄ tɔ̄l̄nən̄ ō, ba kə ndɔ̄ kə́ nge ko̰ mətá anī i gáŕ kadə̄ ni a ndól̄.
23Gō tə́ anī ni-əda de gə̄ malang na:
Ré deē kógə̄ḿ gḛy reē gōḿ tə́ anī, adə̄ kɔ́ɔ̄ əya̰ róbə yān kɔ̄ɔ́ ō, ndi dɔ rɔ̄n tə́ kə ndɔ̄ gə̄ yā kətō kāgə̄ kə́ dēsə́ yān ō, ba un róbə́ ń mā m-úń ní. 24Tɔdɔ̄ deē ń a sāā kadə̄ n-udə kɔ̄ɔ́ aĺ ní kɔ́ɔ̄ a udə. Ba deē ń ndigə kudə kɔ̄ɔ́ tām̄ yāḿ mā tə́ ní, kɔ́ɔ̄ a ajə. 25Ré deē ənge dɔ nang malang kə taá ba tḭ̄ḭ̄ ta rɔ̄n kɔ̄ɔ́, aláa nujə rɔ̄n kɔ̄ɔ́ ní a teēn i rí? 26Deē ń rɔ̄n sɔlə̄n tām̄ yāḿ tə́ ō, tām̄ yā najə̄ yāḿ gə̄ tə́ ō ní, dan ń Ngōn̄ Deē a tél yā reē kem *kɔsə gɔn yān tə́ ō, yā Bɔbə̄ Ngōn̄ tə́ ō, yā *de kə́ dɔ rā̰ tə́ kə́ táĺ gə̄ ō anī, rɔ̄n a sɔlə̄n tām̄ yā kɔ́ɔ̄ tə́ ō. 27Ādə̄ m-ə́dásí, de kə́rēý gə̄ dan de gə̄ ń ran̄ laā tə́ toō a a̰a̰n̄ *Ɓē ko̰o̰ yā Nə́ɓā pá tá a oyn̄ ɓáý.
Kɔsə gɔn yā Ngōn̄ Nə́ɓā
(Á̰a̰ī Mat 17.1-8; Mark 9.2-8)
28Asə ndɔ̄ sɔ́sɔ́ gō najə̄ gə̄ ń noō tə́ anī, Jeju un Piyer ō Ja̰a̰ ō Jakə ō aw̄ sedə́ dɔ mbalá yā ndɔ̄ȳ. 29Dan ń ni-ndi a ndɔ̄ȳ Nə́ɓā anī ta kumən tél tūr̄ kə́ rang kɔ̄ɔ́ ō, kūbə̄ kə́ rɔ̄n tə́ ndɔ̄bə̄ ndaa ngóńg ngóńg ō. 30-31Anī kə̄ ta jī tə́ noō de kə́ koy kɔ̄ɔ́ gə̄ jōó teē ran̄ kem kɔsə gɔn kə́ dɔ rā̰ tə́, a ɔrə̄n̄ najə̄ seneé dɔ koy ń a rāā yā koy tə́ *Jerusalem yā tɔ̄ləń ta kəla yān ní. De gə̄ ní i Moijə ō *Eli ō. 32Piyer nin̄ kə madə̄n gēé ɓīīn̄ kə́ oyn̄ mámák kɔ̄ɔ́. Banī nin̄-ndólə̄n̄ anī a̰a̰n̄ kɔsə gɔn yā Jeju ō, de kə́ jōó gə̄ ń ran̄ rɔ̄n tə́ ní ō. 33Dan ń de gə̄ ní a rāān̄ yā tḭ̄ḭ̄ naā ní anī Piyer əda Jeju na:
Ngoljí, majə kadə̄ jə-ndiī laā ngá̰ý. Ādə̄ j-udiī kújə tandā gə̄ mətá, kógə̄ḿ yāí ō, kógə̄ḿ yā Moijə ō, kógə̄ḿ yā Eli ō. Tan a ɔr̄ najə̄ banī nəkɔ́ ger̄ kum najə̄ ń a ɔr̄ ní alé.
34A ɔr̄ najə̄ kə́ tan tə́ ɓáý anī kil̄ man̄ kógə̄ḿ reē rāā ndíl dɔdə́ tə́. Dan ń a udən̄ kə̄ dan kil̄ man̄ tə́ anī ɓōĺ asədə́ nák. 35Anī deē kógə̄ḿ ɔr̄ najə̄ dan kil̄ man̄ tə́ əda na:
Ni ń toō i Ngōnə̄ḿ ń m̄-gə̄rān ní, ōōī najə̄ yān!
36Dan ń deē ní ɔr̄ najə̄ oy anī i Jeju ngóy n ra kə kérneé ní. Dan ngeé ń noō tə́ ní ngé ndóō yá̰a̰ gə̄ teēn̄ tadə́ mḛḛ dɔ yá̰a̰ gə̄ ń a̰a̰n̄ tə́ ní alé.
Jeju tə̄ɓā ndíĺ kə́ majaĺ kem ngōn̄ kógə̄ḿ tə́ kɔ̄ɔ́
(Á̰a̰ī Mat 17.14-18; Mark 9.14-27)
37Teē kə ndɔ̄ kə́ noō dan ń nin̄-risən̄ kɔ̄ɔ́ dɔ mbalá anī kósə de kə́ ngá̰ý gə̄ ɔjən̄ no Jeju. 38Anī deē kógə̄ḿ dan kósə de gə̄ tə́ un ndūn kə̄ dɔɔ́ ngá̰ý ɔrə̄ń najə̄ əda na:
Ngoljí, m̄-rāāī ɓɔ́ ba ə̄nī kumií dɔ ngōnə̄ḿ tə́, tɔdɔ̄ ni i ngōnə̄ḿ kə́ kal kógə̄ḿ beē! 39Ni-ndi ɓáa ndíĺ kógə̄ḿ a ɔsə seneé, adə̄ ḭḭ rétə́ gēé ɓáa a tə́gā kɔŕ ō, ndíĺ ní rāān adə̄ dā̰n a ndām̄ ngangan ō, tan əɓa húūlú mbuk mbuk ō, kem ndíĺ ní ngəra loo teē tə́ kɔ̄ɔ́ kemən tə́ ō, ré əya̰n ɓáa ngōn̄ ní tél a to i ragəja kɔ̄ɔ́ ō. 40m̄-rāā ngé ndóō yá̰a̰ yāí gə̄ ɓɔ́ kadə̄ tə̄ɓānən̄ banī dum̄də́ kɔ̄ɔ́.
41Anī Jeju əda na:
Sḭḭ̄ de kə́ kōnīí laā kə́ ngé taā kem aĺ gə̄, kə́ ngé rāā yá̰a̰ majaĺ gə̄, kə m̄-ndi sesí ō, kə m̄-tə́gā taḿ dɔsí tə́ ō i bátə́ ta kə́ rá? Gō tə́ anī ni-tél əda dəngam ní na: Ī-reē kə ngōnīí ní kə̄ laā.
42Ngōn̄ a reē kə̄ rɔ̄n tə́ ɓáý anī ndíĺ kə́ yḛr ní un ənīn nang tə́ tul ō, rāān adə̄ dā̰n ndām̄ ngangan ō. Banī Jeju ndán̄g ndíĺ kə́ yḛr ní ba rāā adə̄ ngōn̄ ní adə̄ rɔ̄n ngan̄g ō, tél adə̄n kə bɔbə̄neé gogə́ ō. 43Tɔ́gə yā Nə́ɓā kə́ ngá̰ý ń toō ɔr kumdə́ malang.
Jeju tāā najə̄ koyn ɓáý to̰
(Á̰a̰ī Mat 17.22-23; Mark 9.30-32)
Dan ń kəla rāā Jeju a yáā de gə̄ malang ɓáý anī, ni-əda ngé ndóō yá̰a̰ yān gə̄ na:
44Najə̄ ń m-ā m-ə́dásí toō, ī-ngɔ̄mī dɔsí tə́ majə: A əlan̄ Ngōn̄ Deē jī de gə̄ tə́.
45Banī nin̄-gerə̄n̄ kum alé. Kum i kə́ mundə̄ kadə̄ dum̄ dɔdə́ ō, tá nin̄-ɓōlə́n̄ dəje Jeju najə̄ dɔ tə́ kɔ̄ɔ́ ō.
I náā n i de kə́ bo ngá̰ý ní?
(Á̰a̰ī Mat 18.1-5; Mark 9.33-37)
46Nin̄-nējə̄n̄ naā najə̄ dɔ yá̰á̰ kógə̄ḿ tə́ ədan̄ na: I náā n i kə́ bo ngá̰ý dandə́ tə́ ní? 47Jeju ń ger̄ gír̄ kə́ kemdə́ tə́ ní, un ngōn̄ kə́ dūú kógə̄ḿ əndān rɔ̄n tə́ ngɔr, 48ba ədadə́ na:
Deē ń əhɔ ngōn̄ kə́ dūú ń toō kə̄ rɔ̄n tə́ najə̄ yāḿ mā tə́ ní, əhɔm̄ i mə̄kɔ́ kə̄ rɔ̄n tə́. Ba deē ń əhɔm̄ kə̄ rɔ̄n tə́ ní, əhɔ i deē ń əlam̄ mā ní kə̄ rɔ̄n tə́. Tɔdɔ̄ i deē ń dūú tɔȳsí malang ní n i de kə́ bo tɔȳsí malang ní.
Deē ń i madə̄ ba̰ā̰sí aĺ ní kɔ́ɔ̄ i sesí
(Á̰a̰ī Mark 9.38-40)
49Ja̰a̰ un najə̄ ɔr̄, əda na:
Ngoljí, j-a̰a̰ deē kógə̄ḿ a tə̄ɓā ndíĺ kə́ majaĺ gə̄ kə rīí ba jə-nāā kɔgə̄n, tɔdɔ̄ ni-un gōí sejí alé.
50Banī Jeju əda na:
Ī-lōōī kɔgə̄n, tɔdɔ̄ deē ń i madə̄ ba̰ā̰sí alé ní, kɔ́ɔ̄ i sesí.
De gə̄ mbātə́n̄ kəhɔ Jeju kə̄ rɔ̄də́ tə́
51Dɔ ndɔ̄ ń kadə̄ ɔrə̄n̄neé Jeju dɔ nang tə́ kɔ̄ɔ́ yā kaw̄ seneé dɔ rā̰ tə́ ní to ngɔr. Anī Jeju utə̄ kumən njarara ba un róbə ta kaw̄ *Jerusalem. 52Ni-əla de gə̄ kété non tə́. Ngámbang kəla gə̄ ní əsōn̄ róbó, anī aw̄ a udən̄ kem ɓē yā Samari gə̄ kógə̄ḿ tə́ yā rāā loo tū tə́ tām̄ yān tə́. 53Banī de kə́ kem ɓē ní tə́ gə̄ mbātə́n̄ kəhɔn kə̄ rɔ̄də́ tə́, tɔdɔ̄ ni-aw̄ i kə̄ *Jerusalem. 54Dan ń ngé ndóō gə̄ ń i Jakə nin̄ kə Ja̰a̰ ní a̰a̰n̄ beé anī, ədan̄ na:
Kɔ́ɔ̄ɓē, ī-gḛy kadə̄ j-əda kadə̄ hor teē dɔ rā̰ tə́ reē róōdə́ malang a?
55Banī Jeju tūr̄ rɔ̄n kə̄ rɔ̄də́ tə́ ba ibədə́. 56Gō tə́ anī nin̄-ɔtə aw̄n̄ kə̄ ɓē kə́ rang tə́.
Ngé gə̄ ń gḛyn̄ kun gō Jeju ní
(Á̰a̰ī Mat 8.19-22)
57Dan ń nin̄ i róbó anī deē kógə̄ḿ əda Jeju na:
Ká āw̄ i kə̄ rá gə̄gē anī, m-ā m-ún gōí.
58Anī Jeju tél ədan na:
Njā̰ gə̄ aw̄n̄ kə bəlodə́ gə̄ ō, yel̄ kə́ dɔɔ́ gə̄ aw̄n̄ kə ɓēdə́ gə̄ ō, banī Ngōn̄ Deē aw̄ kə loo kə́ yā kəla dɔn tū tə́ alé.
59Gō tə́ anī ni-əda de kə́ rang na:
Ún gōḿ! Anī deē ní tél ədan na:
Ādə̄ m-āw̄ m̄-dubə̄ bɔbə́ḿ pá tá.
60Banī Jeju ədan na:
Ə́yá̰ ngé gə̄ ń oyn̄ kɔ̄ɔ́ ní ādə̄ dubə̄n̄ nīń yādə́ gə̄, ba ḭ̄, āw̄ ɔ́jə de gə̄ najə̄ kə́ dɔ *Ɓē ko̰o̰ yā Nə́ɓā tə́.
61De kə́ rang ədan ɓáý to̰ na:
Kɔ́ɔ̄ɓē, m-ā m-ún gōí, ba ādə̄ m-āw̄ m̄-rāā ngééḿ gə̄ lápə́ya tá m̄-tél.
62Anī Jeju ədan na:
Deē ń əga jīn dɔ kɔsə ndɔr̄ man̄g tə́, ba tél a mbel kə̄ gogə́ ɓáý to̰ ní, i de kə́ rāānən̄ tām̄ yā *Ɓē ko̰o̰ yā Nə́ɓā tə́ alé.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad