Joni 2

Mabhiko Okulobolana kuKana

1Nezhuba lyatatu kwakaba namabhiko kuKana muGalili, akale amai baJesu bakabelipo. 2Jesu nabalayijwa babe, bakaba bakokwa kumabhiko okulobolana. 3Iwaini payakapela, amai baJesu bakati kwaali, “abachina iwaini.”

4Jesu wakati kwabali, “Imwi mai, zwinani nami yezwi? Unshaji wangu aujanu waswika.” 5Amai babe bakati kubashingi, “Itani zwose zwaachamubuja.” 6Pakalepo, kwakaba kuli imbiya jamabwe ishanu nemwempela, jikabigwa yopo, jili jabaJuda songalilo wabo pakuchenesa, imwe neimwe inyamula malita angaba izana. 7Jesu wakati kubashingi, “Izhajani imbiya nevula.” Bakajizhaja imbiya kuti fwampi. 8Wakati kwabali, “Ngweno tekani imwe musenge kuntungamili wamabhiko.” Nezwo bakasenga. 9Untungamili wamabhiko paakalabila ivula, yakababa iwaini. Aajakaziba kuti yava kupi (kojoba bashingi bakabateka ivula bakabezwiziba). Untungamili wamabhiko wakashoba undoboli, 10akati kwaali, “Unhu wose unosotanga apa iwaini imbuya, kooti kana banhu banwa basungunuka, ndipo pakunobuzwa iwaini imbi, asi imwi mwalondota iwaini imbuya kujine kube ngweno.”

11Yechi chitondejelo chotanga chakatiwa naJesu kuKana muGalili. Wakatondejela lukujo lulwe, balayijwa babe bakadimbwa mwaali.

12Mushule mwezwo wakenda kuKapenaume namai babe nabanakwaina babe nabalayijwa babe, yoko bakanogala mazhuba mashoma.

Jesu unonda kuTempeli

(Mateo 21:12,13; Luka 19:45,46)

13Miliya yePasika yabaJuda yakababa pelyo akale Jesu wakenda kuJelusalema. 14Mutempeli wakawana yabo baluba betengesa ingombe, imhwizi, inkwilimba nabanochincha imali beligele pamatebuli abo. 15Wakakosha iswipu yoluji, akabatata bose mutempeli, nemhwizi, nengombe jabo, akatataula imali yaabo baluchincha imali, akapindimula matebuli abo. 16Wakabuja yabo bakabetengesa inkwilimba kuti, “Bhisani zwinhu yezwi yopa, musite ingumba yaTate bangu ibe ingumba yokutengesela.” 17Balayijwa babe bakalangalila kuti kwakabakakwalwa kuti, “Kusungwalila ingumba iyo kuchandilya moyo.”

18BaJuda bakati kwaali, “Ngechipi chitondejelo chaungatitondeje kuti ini uta yezwi?” 19Jesu wakabashandula akati, “Kolomolani itempeli yeli, asi mumazhuba matatu ndolibakulula kabili.”

20BaJuda kova beti, “Kwakatola makole makumi mana ana mashanu nelimwempela kuti kubakwe itempeli yeli, asi ungalibaka mumazhuba matatu na?”

21Koga iye itempeli lyaakabeleba umbili uwe. 22Nezwo paakamuswa kubafi balayijwa babe bakakumbulukwa kuti wakabazwileba yezwi akale bakadimbwa mundebo nomumawhi akalebwa naJesu.

Jesu Unaluzibo Nobunhu Bwabanhu

23Ngweno paakabeli muJelusalema kumiliya yePasika, banji bakadimbwa munaiye pabakabona zwitondejelo zwaakata, 24koga Jesu aajakabimba nabo, nokuti waluziba bunhu bwabanhu, 25nezwo aajakabeda busumikiji bonhu, nokuti iye waluziba zwaluba zwili munhu.

Currently Selected:

Joni 2: LTP

Highlight

Copy