2 Xa̱bo̱ Korínto̱ 9
9
1Xómáꞌ rí mu̱mbáñúúlaꞌ xa̱bi̱i Ana̱ꞌlóꞌ tsí júwa̱ꞌ ná Jerusalén rá, ni tsíꞌyóo máꞌ rí ma̱tháán ná i̱yi̱i̱ꞌ ríge̱ꞌ ga̱jma̱á numuu rúꞌkhue̱n. 2Numuu nda̱yo̱o̱ mújúnꞌ máꞌ rí ju̱ya̱a̱ a̱kia̱nꞌlaꞌ rí mu̱mbáyíílaꞌ, Jamí phú na̱ku̱xí-mina̱ꞌ ga̱jma̱á numalaꞌ ná inúú a̱ngia̱nꞌlóꞌ tsí júwa̱ꞌ ná numbaa Masedónia̱ ge̱jyoꞌ. Ni̱thúu̱nlo̱ꞌ rí ikháanꞌlaꞌ tsáanꞌ juwalaꞌ ná numbaa Akáya̱ a̱ꞌkhue̱n, rí asndo nákhí máꞌ timbá tsigu juwa-na̱ma̱ñalaꞌ rí mu̱mbáyíílaꞌ. Ído̱ ni̱dxawíi̱n rí xkuaꞌnii, i̱tha̱án máꞌ mbaꞌii̱n na̱wa̱ꞌa̱ a̱kuíi̱n rí mu̱mbáyíi̱ mangii̱n. 3Ikhaa jngó, na̱xu̱ꞌmíilo̱ꞌ a̱ngia̱nꞌlóꞌ tsíge̱ꞌ, kajngó ma̱juwalaꞌ xawi xómá rí ni̱tha̱nlo̱ꞌ ga̱jma̱á numalaꞌ, jamí ma̱xágájnuu gamakuꞌ rí ni̱tha̱n rí máján ga̱jma̱á numalaꞌ. 4Ra̱ꞌkhá magóó mbá tikhuun xa̱bo̱ numbaa Masedónia̱ ga̱jma̱á nindxu̱ꞌ a̱ꞌkhue̱n, jamí mbuyáa̱ rí na̱nguá juwalaꞌ xawi gáꞌne. A̱ꞌkhue̱n rí phú ma̱ti̱yu̱ꞌ rí ni̱tha̱n rí máján ga̱jma̱á numalaꞌ, jamí xúꞌkhue̱n máꞌ phú ma̱ti̱ya̱ꞌlaꞌ mangáanꞌlaꞌ gáꞌne. 5Ikhaa jngó, ikhúúnꞌ ni̱ju̱mu̱ꞌ rí ginii jayu ndaꞌyóo rí ma̱xu̱ꞌmíi a̱ngia̱nꞌlóꞌ tsíge̱ꞌ rí magóo̱ gúyalaꞌ, kajngó mu̱mbáyálaꞌ rí mu̱wa̱a rí ni̱xu̱ꞌdá-mijnálaꞌ máꞌ rí mu̱xna̱laꞌ. Xkuaꞌnii kajngó, ma̱ri̱gá máꞌ xawi rí ju̱ya̱a̱ a̱kia̱nꞌlaꞌ rí mu̱xna̱laꞌ, jamí ra̱ꞌkhá máꞌ numuu rí ikháanꞌxo̱ꞌ nu̱tsu̱dáanꞌlaꞌxo̱ꞌ gáꞌne.
Tsí naꞌdu mba̱a̱, mba̱a̱ máꞌ gáguu̱ mangaa
6Ga̱rmáꞌáan a̱kia̱nꞌlaꞌ ríge̱ꞌ: Tsí na̱nguá máꞌ mba̱a̱ iꞌdu, na̱nguá máꞌ mba̱a̱ rí maguu̱ mangaa. Xómáꞌ tsí naꞌdu mba̱a̱, mba̱a̱ máꞌ rí maguu̱ mangaa. 7Mbámbáa gáxná xómá niꞌgí-mina̱ꞌ ná awúun a̱kui̱in rí maxná. Ma̱xáxnée̱ ga̱jma̱á sia̱nꞌ, ni máꞌ ga̱jma̱á tsiakhe̱, numuu rí Ana̱ꞌlóꞌ phú nandoo̱ jaꞌyoo̱ xa̱bo̱ tsí gagi a̱kui̱in naxná. 8Jamí Ana̱ꞌlóꞌ gíꞌdoo̱ tsiakhe̱ rí ma̱ꞌnii̱ rí jámba̱ miꞌtsú ma̱nújngo-rámuu ma̱ri̱gá mbá xúgíí inii rí ndaꞌyálaꞌ. A̱ꞌkhue̱n rí ma̱xáꞌyálaꞌ nitháan rí ma̱juwamalaꞌ, jamí asndo ma̱pi̱ꞌdúun gúne̱laꞌ kajngó ma̱goo mu̱mbáñúúlaꞌ i̱ꞌwíin xa̱bo̱. 9Xómá ka̱ma naꞌthán ná i̱yi̱i̱ꞌ ajngóo Ana̱ꞌlóꞌ:
«Phú mba̱a̱ rí gíꞌdoo̱ nixpíꞌtháa̱ nixnúu̱ tsí ngíníi,
jamí jámba̱ miꞌtsú naꞌnii̱ rí máján».#9.9 Ajngáa ríge̱ꞌ na̱ꞌkha̱ ná I̱yu̱u̱ꞌ ajmúú 112.9.
10Ana̱ꞌlóꞌ naxnúu tsíga xa̱bo̱ tsí naꞌdu, jamí naꞌnii̱ rí ma̱ri̱gá guma kajngó ma̱kuiꞌtsii̱. Ikhaa̱ máꞌ maxnálaꞌ mbá xúgíí tsíga rí ndaꞌyóo mu̱dulaꞌ mangáanꞌlaꞌ, xúꞌkhue̱n máꞌ ma̱ꞌnii̱ rí mba̱ꞌya ne̱, kajngó phú ma̱jma̱a̱ rí máján gúne̱laꞌ. 11Xkuaꞌnii kajngó ma̱guaꞌdáálaꞌ mbá xúgíí inii rí máján, kajngó ma̱goo mu̱xna̱laꞌ mba̱a̱ rí guáꞌdáálaꞌ. Ído̱ rí ikháanꞌxo̱ꞌ mu̱ꞌguá ju̱ya̱ꞌxo̱ꞌ mbúkha̱a̱ rí mu̱wa̱a gúne̱laꞌ, phú mbaꞌiin a̱ngia̱nꞌlóꞌ mu̱rígu̱u gamaku inuu Ana̱ꞌlóꞌ.
12Numuu rí ga̱jma̱á majñu̱u̱ xtambáyú ríge̱ꞌ, ra̱ꞌkhá máꞌ i̱ndo̱ó nu̱xna̱laꞌ rí ndaꞌñúú xa̱bi̱i Ana̱ꞌlóꞌ, rí rúꞌkhue̱n ma̱ꞌne rí phú mbaꞌii̱n mu̱rígu̱u gamaku inuu Ana̱ꞌlóꞌ. 13Ikhii̱n phú mune̱-mba̱a̱ Ana̱ꞌlóꞌ, numuu rí ga̱jma̱á majñu̱u̱ xtambáyú ríge̱ꞌ, rí phú mba̱a̱ mambáñúu̱ ikhii̱n jamí tsí i̱ꞌwíin xa̱bo̱ mangaa. Mbuyáa̱ rí ikháanꞌlaꞌ nu̱ne̱-mbáníílaꞌ rí naꞌthán ajngáa máján ga̱jma̱á numuu Krísto̱. 14Xúꞌkhue̱n máꞌ ikhii̱n muthán-jáñíi̱ Ana̱ꞌlóꞌ ga̱jma̱á numalaꞌ, tsáanꞌ phú nandúu̱n juyalaꞌ ga̱jma̱á numuu rí ra̱ꞌkhá tháán mba̱a̱ rí máján nixnálaꞌ Ana̱ꞌlóꞌ. 15Núma̱aꞌ la Ana̱ꞌlóꞌ ga̱jma̱á numuu rí nixnálóꞌ, rí tsíꞌngo̱o̱ ajngálóꞌ mu̱ꞌthánlóꞌ xáne jaꞌnii.
Currently Selected:
2 Xa̱bo̱ Korínto̱ 9: tcf
Highlight
Copy
Compare
Share
Want to have your highlights saved across all your devices? Sign up or sign in
© 2025 SIL Global. Creative commons license CC BY-SA.