Títo̱ 3
3
Xó jaꞌyoo rí ma̱ju̱wá tsí wéje̱ a̱kui̱ín ná inuu Jesukrísto̱
1Arathúu̱n mbá xúgíi̱n rí ma̱xámbumúu̱ rí mu̱ni̱ꞌñá-mijnée̱ rí mi̱ꞌthán-ñájúu̱n gúne̱ thúngaa jamí xa̱bo̱ ñajun. Xúꞌkhue̱n máꞌ rí gune̱-mbáníi̱ rí nithúu̱n, jamí ga̱ju̱wée̱ꞌ xawi rí muni̱i̱ mbá xúgíí inii rí máján. 2Mu̱xúthee̱n rí xkawe̱ꞌ ga̱jma̱á numuu nimbáa, ni máꞌ ma̱xátsa̱ñúu̱ gajmíi̱ xa̱bo̱. A̱ꞌkhue̱n gakon, gíꞌmaa rí ma̱ꞌne gamakuu̱n jamí mu̱xrígú-mijnée̱ ná inúú mbá xúgíin xa̱bo̱.
3Numuu rí ikháanꞌ mangáanꞌlóꞌ ninindxa̱ꞌlóꞌ xa̱bo̱ tsí júgoo inúú nákhí wajyúú. Nijñaguáanꞌlóꞌ jamí nindáti̱gáanꞌlóꞌ xómá yumbáá waꞌtsi̱in kajngó mune̱ rí nandoo xuñúú jamí mbá xúgíí inii rí xkawe̱ꞌ. Nijuwalóꞌ awúun rí xkawe̱ꞌ jamí rí tsixígu̱ꞌ, xúꞌkhue̱n máꞌ najiꞌníi xa̱bo̱ e̱ꞌne̱lóꞌ jamí najiꞌnáaꞌlóꞌ juꞌya-mijnálóꞌ. 4Xómáꞌ Ana̱ꞌlóꞌ tsí naꞌne-jríñáaꞌlóꞌ, nisngájmee̱ rí májáan a̱kuii̱n, jamí rí nandoo̱ jaꞌñúu̱ xa̱bo̱ numbaa. 5Neꞌne-jríñáa̱ꞌlóꞌ, ra̱ꞌkhá ga̱jma̱á numuu rí máján ne̱ꞌne̱lóꞌ, rí ga̱jma̱á numuu rí niñáwíin a̱kuii̱n jaꞌyalóꞌ. Neꞌne-jríñáa̱ꞌlóꞌ ga̱jma̱á numuu rí neꞌne mba̱a̱ a̱kuii̱n jaꞌyoo̱ aꞌkhánlóꞌ. Xkuaꞌnii neꞌne Ana̱ꞌlóꞌ rí ma̱gu̱ma-nuxáanꞌlóꞌ jamí rí ma̱nindxa̱ꞌlóꞌ xa̱bo̱ nuxi̱inꞌ ga̱jma̱á majñu̱u̱ Xu̱u̱ꞌ. 6Ana̱ꞌlóꞌ naꞌne rí ma̱nújngoo rámuu rí mu̱dríguíilóꞌ Xu̱u̱ꞌ ga̱jma̱á majñu̱u̱ Jesukrísto̱, tsí naꞌne-jríñáaꞌlóꞌ. 7Niꞌnii̱ rúꞌkhue̱n numuu rí maphú nandoo̱ jaꞌyalóꞌ, ikhaa jngó maꞌthán Ana̱ꞌlóꞌ rí nánda̱a̱ aꞌkhánlóꞌ, jamí a̱ꞌkhue̱n rí ma̱goo ma̱juwalóꞌ mbá jámuu, xómá rí guáꞌthi̱ínlóꞌ ga̱jma̱á mbá jañii a̱kia̱nꞌlóꞌ. 8Maphú gakon ajngáa rí na̱tha̱a̱nꞌ ge̱jyoꞌ, ikhaa jngó nandoꞌ rí ma̱xáta̱tsi̱ꞌñáá rí narasngúu̱n ríge̱ꞌ, kajngó tsí nanimbu̱únꞌ juyáá Ana̱ꞌlóꞌ muxna-mijnée̱ tsiakhe̱ rí muni̱i̱ rí máján. Gisngáá ríge̱ꞌ rí phú máján jamí nambáñúú ne̱ mbá xúgíin xa̱bo̱.
9I̱ndo̱ó máꞌ ma̱xáta̱xu̱ꞌdá-mina̱ꞌ ga̱jma̱á numuu gisngáá tsiskágu̱nꞌ, ná nusngáá xa̱bo̱ ga̱jma̱á numuu mbiꞌñúú táta̱-xi̱ꞌñálóꞌ wajyúú, ná najiꞌníi jamí na̱tsa̱ñu̱ú xa̱bo̱ ga̱jma̱á numuu xtángoo drígo̱o̱ Moisés. Numuu rí nda̱a̱ mbá jayu rí gíꞌdoo numuu rúꞌkhue̱n ni máꞌ tsímbáyúu̱ ne̱. 10Xí mbáa naꞌne rí mu̱xpi̱ꞌtha̱-mijná xa̱bi̱i Ana̱ꞌlóꞌ, ataxpríguíi̱ mbóó o a̱jma̱ nothon. Xí tsídxawuu̱n, ataxkriya̱a̱ꞌ rixa̱á. 11Numuu nathayáá máꞌ rí mbáa xa̱bo̱ tsí xkuaꞌnii, niniñuu̱ máꞌ gisngáá rí gakon jamí aꞌkhúu̱n máꞌ ikhaa̱ ñajuun rí naxná-máꞌáa̱n.
Rí nitháán Títo̱ ma̱ꞌne
12Ído̱ gáxu̱ꞌmáa Artéma̱s rí ma̱ꞌga gáꞌyaaꞌ o Tíki̱ko̱ mbo̱ꞌ, mbá nacha̱ máꞌ gátha̱ne̱ rí mi̱dxa̱ꞌ gátha̱yo̱ꞌ ná xuajen Nikópo̱li̱s, numuu rí ikhín ni̱ꞌgí-mina̱ꞌ rí ma̱xtáá mbá xúgíí go̱nꞌ rí naꞌne ngúwán. 13Athane̱ mbá xúgíí rí na̱ꞌnga̱a̱ꞌ rí ma̱ta̱mbáyíí Séna̱s tsí naꞌthán-makoo rí naꞌthán xtángoo, ga̱jma̱á Apólo̱s, kajngó nda̱a̱ nitháan rí gáꞌñúu̱ ná magóo̱ jamba̱a̱. 14Xkuaꞌnii kajngó ma̱ma̱ñúú a̱ngia̱nꞌlóꞌ mangiin mune̱ rí máján, jamí mu̱mbáñúu̱ tsí ndaꞌñúú, kajngó ma̱xáꞌne rí nda̱a̱ mbá jayu numuu rí júwe̱e̱ꞌ.
15Nu̱ra̱xi̱ín mbá xúgíin tsí xtáá gajmíꞌ ge̱jyoꞌ. Na̱ra̱xi̱in mangúúnꞌ a̱ngia̱nꞌlóꞌ a̱ꞌkhue̱n tsí nandúún juyalóꞌ.
Ana̱ꞌlóꞌ gáꞌne-tsakun-rámáaꞌlaꞌ mbá xúgiáanꞌlaꞌ. Xkuaꞌnii gáꞌne.#3.15 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «Xkuaꞌnii gáꞌne».
Currently Selected:
Títo̱ 3: tcf
Highlight
Copy
Compare
Share
Want to have your highlights saved across all your devices? Sign up or sign in
© 2025 SIL Global. Creative commons license CC BY-SA.