Kubhoka 18
18
Yesulu anjendela Musa
1Bhela Yesulu, mpenganyambiku wa ku Midiani, nkowanu waki Musa, akajowini kila chindu Chapanga cheakuntendili Musa na Bhaizilaeli, bhandu bhake, ntundu Bambo Chapanga moabhabhokihe Bhaizilaeli kuhuma ku inchi ja Misili. 2Bhela Yesulu, koni akabya na Sipola, nhwanu waka Musa, ambaju Musa akabhi ankelawihe kwaka tati waki, akapiti kwaka Musa, 3papamu na bhana bhabheli bhaka Musa. Lihina laka mwana wa kutumbula akalowakiki Gelishomu, kwa kubha Musa akapwaghiki, “Nepani mili nungeni mu inchi ja kigheni.” 4Wa kabheli akalowakiki Eliezeli, kwa kubha Musa akapwaghiki, “Chapanga waka tati wangu akanyangatili, nahuli nganikomakeka na Falao.” 5Yesulu, nkowanu waka Musa, papamu na bhana bhabheli bhaka Musa na nhwanu waki bhakapiti kwaka Musa kulipololu hoku, pandu paakabhili atama pambipi na chitombi chaka Chapanga. 6Yesulu akabhili antumiki ntenga kwaka Musa, kupwagha, “Nepani Yesulu, nkowanu waku nhikiki kwaku na nhwanu waku, na bhana bhaku bhabheli.” 7Henu Musa akapitiki kunja na kujenda kunjopalela nkowanu waki, akachikimi na kunkumbatila. Bhakalamukanili na kujingila mulihema. 8Musa akundandili nkowanu waki mambu ghokapi Bambo Chapanga ghaantendili Falao na Bhamisili kwa ndandi ja Bhaizilaeli, na kubhokana na mang'ahiku ghokapi ghabhahimangini naghu mwindela na ntundu Bambo Chapanga moabhakengalile. 9Yesulu akahekalili namaa kujowana mambu ghokapi manyahi Bambo Chapanga ghaakabhatendili Bhaizilaeli kwa kubhabhoha mu mabhoku gha Bhamisili. 10Yesulu akapwaghike, “Alumbalikaje Bambo Chapanga, joakakukengalili wehapa kuhuma mu mabhoku gha Bhamisili na Falao! Alumbalikaje Bambo Chapanga joabhakengalili bhandu kuhuma mu mabhoku gha Bhamisili! 11Henu manyi kubha Bambo Chapanga nde nkolongwa kupeta ichapanga yokapi, kwa ndandi abhakombwili bhandu abhabha mu mabhoku gha Bhamisili ambabhu bhakuntendili kwa ujeuli.” 12Panihapa Yesulu, nkowanu waka Musa, akaletiki nyambiku ja kujochakeka na nyambiku hengi nahuli kumbokeha Chapanga, najombi Haluni papamu na bhazee bhokapi bha Izilaeli, bhakahikiki kula chilebhi papamu na Yesulu nkowanu waka Musa kwa ndandi ja kundumbalila Chapanga.
Kuhaghuliwa kwa bhatemula
Kombukombu la Tolati 1:9-18
13Chilabhu jaki, Musa akatemi kutemula mahakau gha Bhaizilaeli, nabhombi bhakabhi bhajemiki kumyongolota kutumbula lukela mbaka pakamihe. 14Yesulu nkowanu waka Musa, paakaghaweni mambu ghokapi Musa ghaakabhili abhahengela Bhaizilaeli, akapwaghike, “Maghambu kike ubhahengela bhandu abhabha anana? Kwa ndandi kiki wehapa ukubha mtemula wa bhandu abhabha kanjika jako, koni bhandu abhabha bhajemiki kukuyongolota kutumbula lukela mbaka pakamihe?”
15Musa akamuyangike, “Ndenda anana maghambu bhandu bhahika kwangu kunalukila mapalu ghaka Chapanga. 16Bhandu bhabheli anabhakomine, bhahika kwangu nepani, na nepani ndemula mundu na mundu na kubhabhola amuli na shelia yaka Chapanga.”
17Henu Yesulu akumpwaghi Musa, “Lijambu aleli leutenda nga wicho. 18Wehapa papamu na bhandu bhabhakuhikila habha anamulitendaje kutonda waka. Lihengu nde lakutopa namaa kwaku, ngauwezi kulihenga kanjika jako. 19Nyowanyaje nepani, nukupekeha ushauli, najombi Chapanga na akubhaje papamu na wehapa. Ikupalika wehapa ukubhaje wa kubhajemalela bhandu palongi jaka Chapanga, na kumpelakela matakilu ghabhu kwaki. 20Ubhabholaje amuli na shelia, kabhete ubhabholaje ntundu wa kutama na kuhenga lihengu lebhapalika kulihenga. 21Nambu uhaghulaje bhandu bhabhaweza kukujangatila pachilanda ja Bhaizilaeli bhokapi, bhandu bhabhunjojabhela Chapanga, bhandu bhalongwana bhabhahakalila ngolukelu, ubhahaghulaje bhakubhaje ihongozi panani ja bhandu maelufu, bhandu mamia, bhandu hamsini hamsini na bhandu makome. 22Ubhabhekaje bhakubhaje bhatemula bha bhandu kwa chikahi chokapi, nambu ubhapwaghilaje bhakuletilaje wehapa kila lihakau lelinonwipe, ghaghapepwiki bhaghatemulaje bhene. Kwa indela jeniheji anautendaje chibwahila chaku kubha cha kupepuka, kwa ndandi anabhakubhaje papamu na wehapa. 23Ngati anautendiki bhenibhela, na ngati Chapanga anaakulaghalakili bhenibhela, wehapa ngawitonde, na bhandu bhanihabha bhokapi anabhawezaje kukelabhuka kunyumba yabhu koni matakilu ghabhu ghajomwike.”
24Musa akunjowanili Yesulu, nkowanu waki, na kutenda kila chindu cheakapwaghike. 25Musa akabhahawili bhandu bhabhaweza kunjangatila kuhuma kwa Bhaizilaeli bhokapi, na kubhatenda kubha ihongozi bha bhandu, ihongozi panani ja bhandu maelufu, bhandu mamia, bhandu hamsini hamsini na bhandu makome. 26Nabhombi bhakabhili bhatemula bha bhandu kila lichobha. Mahakau makolongwa bhakumpelakili Musa, nambu ghala machoku machoku bhakaghatemwi bheni.
27Panihapa Musa akatabhukini na Yesulu, nkowanu waki, najombi Yesulu akakelawiki ku inchi jake.
Currently Selected:
Kubhoka 18: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
