Kubhoka 36

1“Bhela Bezaleli na Oholiabu, papamu na kila mundu Bambo Chapanga joampekihi umanyi na uwezu wa kumanya ntundu wa kuhenga mahengu ghokapi gha kuchenga Pandu Pahuhu bhakahengiki kila chindu ngati Bambo Chapanga moalaghalakile.”

Bhandu bhaleta nhupu yamaheli

2Bhela Musa akabhalohiki Bezaleli na Oholiabu, na kila mundu joabhili na umanyi ambau Bambo Chapanga akabhili ampekihi uwezu na joakabhi apala mweni kuhika na kuhenga lihengu. 3Bhanihabha bhakajopalili nhupu yokapi kuhuma kwaka Musa ambayu Bhaizilaeli bhakabhili bhailetiki kwa ndandi ja lihengu la pa Lihema Lihuhu. Nabhombi bhandu bhakajendalili kundetela Musa nhupu kwa kupala bhene kila lukela. 4Bhandu bhokapi bhabhabhili na umanyi bhabhakabhili bhahenga lihengu la kila ntundu la Pandu Pahuhu bhakapiti mundu kuhuma mu lihengu laki leakabhi alihenga, 5nabhombi bhakumpwaghi Musa, “Bhandu bhaleta hindu yamaheli nakanopi kupeta yela yeipalika kwa lihengu leatulaghalakile Bambo Chapnga tutendaje.”

6Panihapa Musa akabhohiki lilaghalakilu, nabhombi bhakapeliki lilaghalakilu heli mu likambi lokapi, bhakapwaghaje, “Mundu jokapi akubhi mwanalomi au mbomba ngayileta kabhete chindu chokapi kwa ndandi ja nhupu ja Pandu Pahuhu.” Bhenibhela nde bhandu mobhakahibhalakiwi kuleta nakanopi, 7maghambu hindu yebhakaletiki yakabhili yamaheli kupeta hindu yela yeikabhi ipalika kuhengela lihengu leniheli lokapi.

Kulenganakela Lihema Lihuhu

Kubhoka 26:1-37

8Akanalomi bhokapi bhabhabhili na umanyi bhakalenganakili Lihema Lihuhu kwa mapazia komi gha ingobhu jinyahi jihuhu jejilokakiki wichu kwa uzi wa langi ja buluu, zambalau na langi jikeli, na kulokakeka wichu picha ya makelubi mu mapazia ghanihagha. 9Kila lipazia analikubhaje na ulachu wa mita komi na ibheli, na upana wa mita ibheli. Mapazia ghanihagha ghakubhaje na chipemu chimu. 10Bhakalombanishi mapazia nhwanu ghakubhaje lipazia limu, na akaghalombanishi mapazia nhwanu ghangi ghala ghakubhaje lipazia limu. 11Bhakalenganakili ikamulilu ya chitambala cha buluu mu ujomukelu wa lipazia la kujomukela la chipandi cha kutumbula, kabhete chipandi cha ujomukelu cha lipazia la kabheli bhakatendiki bhelabhela. 12Bhelabhela bhakabhekiki ikamulilu hamsini mu lipazia la kujomulela la chipandi cha kutumbula na hikamulilu hamsini yengi mu lipanzia la kujomulela la chipandi cha kabheli, ikamulilu yokapi yakatei kulingalanila. 13Panihapa bhakalenganakili ikobhakelu hamsini ya zahabu, nahuli kuhuta mapazia papamu, na kutenda Lihema kubha limu.

14Bhelabhela bhakalenganakili mapazia komi na jimu kwa mangoma gha imbuhi kwa ndandi ja kuliyekalela Lihema. 15Kila lipazia lakabhili na ulachu wa mita komi na itatu, na upana wa mita ibheli. Mapanzia ghokapi komi na jimu hagha ghakabhili na chipemu chimu. 16Bhela bhakaghalombini mapazia nhwanu papamu, na mapazia sita papamu. 17Bhela bhakabhekiki hikamulilu hamsini mu ujomukelu wa lipazia la kujomulela la chipandi cha kutumbula, na hikamulilu hamsini mu ujomukelu wa lipazia la chipandi cha kabheli. 18Bhelabhela bhakalenganakili ikobhakelu hamsini ya shaba, na kuibheka mu hikamulilu hamsini yela nahuli kulombanesha hipandi ibheli ya mapazia yela na kutenda kubha lipazia limu la kuliyeka Lihema. 19Bhela bhakalenganakili chiyekalelu cha lihema kwa hingumba ya mambeleli makambaku yeijeghaliki langi jikeli, na panani ja chihibhalakilu hechi akayekalili chingumba cha hinyama ya mumachi.

20Bhela bhakalenganakili ngelakete ya nkongu wa mshita kwa ndandi ja kujemakela Lihema. 21Kila ngelakete jakabhili na ulachu wa mita ncheche, na upana wa sentimita sitini na sita. 22Kila ubau ukabhili na pandu pabheli papapitalile, kwa ndandi ja kuilombanesha. Bhenibhela nde mbau yokapi moyapalakile kulenganakeka mbau yokapi ya Lihema. 23Bhela bhakalenganakili mapali ishilini gha upambala wa kunkachi wa Lihema, 24na hitamilu yaki alubaini ya madini gha feza ya kubheka pahi ja mapali, hitamilu ibheli kwa kila lipali limu, nahuli kukamulakila pandu pabheli papapitalile. 25Upambala wa kungondi wa Lihema, bhakalenganakili mapali ishilini, 26na hitamilu yaki alubaini ya madini gha feza ya kubheka pahi ja mapali, hitamilu ibheli kwa kila lipali limu. 27Bhakalenganakili mapali sita kwa kila ujomukelu, upambala wa kolijibhi lyobha wa Lihema, 28bhelabhela bhakalenganakili mapali ghabheli na kughajemeka munkeghi ja Lihema upambala wa kunyuma. 29Mapali ghabheli hagha ghakalombanishwi kutumbula pahi, na kwa panani ghakalombanishwi mu peti ja kutumbula, na mapali gha kona yokapi ibheli ghakatei kulengana. 30Bhela kukabhili na mapali nane na hitamilu komi na sita ya madini gha feza, ibheli pahi ja kila lipali.

31Bhela bhakalenganakili fitu ya nkongu wa mshita, nhwanu kwa ndandi ja mapali gha upambala ghumu wa Lihema, 32na nhwanu kwa ndandi ja mapali gha upambala ghongi, na nhwanu kwa ndandi ja mapali gha upambala wa kunyuma ja Lihema, kolijibhi lyobha. 33Bhakalenganakili mpengu wa pachilanda ghoukajomukili pachilanda ja Lihema, ambau ukapetiki pachilanda kuhuma ku ujomukelu ghumu mbaka ujomukelu ghongi pachilanda ja mapali. 34Bhakaiyekalili nguzu heyi kwa zahabu, kabhete bhakalenganakili peti ya zahabu yeyakamulakile mipengu heji. Kabhete bhakayekalili mipengu heji kwa zahabu.

35Bhakalenganakili lipazia la ingobhu jinyahi jihuhu, jejalokakiki wichu kwa uzi wa langi ja buluu, zambalau na langi jikeli, na bhakalokiki wichu picha ya makelubi mu lipazia heli. 36Bhelabhela bhakalenganakili mapali nchechi gha nkongu wa mshita, akaipakiki zahabu na kuijeghela ikobhakelu ya zahabu. Bhelabhela bhakalenganakili hitamilu nchechi ya madini gha feza. 37Pundyangu wa Lihema bhakalenganakili lipazia la ingobhu jinyahi jihuhu, lelilokakiki wichu kwa uzi wa langi ja buluu, zambalau, na langi jikeli. 38Bhelabhela bhakalenganakili mapali nhwanu kwa nkongu wa mshita na kughayeka kwa zahabu. Mapali ghanihagha ghakabhili na chikobhakelu cha zahabu, na kila chimu chakabhili na hitamilu nhwanu ya shaba.

Currently Selected:

Kubhoka 36: MpBV

Highlight

Compare

Copy