Utumbulilu 15
15
Chapanga atenda lulaghilu na Abulamu
1Paghapetiki mambu ghanihagha, lilobhi laka Chapanga lakunhiki Abulamu mu mabhono, lakapwaghaje, “Ngawijoghopa! Abulamu! Nepani nde ngau jaku. Nhupu jaku anajibya ngolongwa namaa.”
2Nambu Abulamu akapwaghike, “Wenga wa Bambo Chapanga, bho, anaumbekya kike na nepani ngachemi na mwana, na joanapwelilaje nyumba jangu nde Eliezeli wa ku Damasko?” 3Abulamu akajendali kupwagha, “Lingalya! Ngacheumbeki mwana, na mtumika joabhelakiki munyumba jangu nde joanakubha mpwelelu wangu.”
4Bhela, lilobhi laka Bambo lakunhiki Abulamu lakapwaghaje, “Mundu ajoju ngaikubhi mpwelelu waku ng'o, nambu mwana joanaapitaje mu chibhunu chaku nde joanakubha mpwelelu waku wehapa.” 5Panihapa Chapanga akundetiki Abulamu kunja na kumpwaghila, “Ulingalyaje kunani kumahunde na ubhalanga ndondwa, ngati anauweza kuibhalanga. Bhenibhela nde bhabhelakeka bhaku mobhibhelila bhamaheli.”
6Abulamu akunhobhali Bambo, na Bambo akumbalangili lijambu lenu kubha ajetakaliwi palongi jaki.
7Kabhete akumpwaghile, “Nepani nde Bambo Chapanga, nenukuletiki kuhuma ku Uli, muchi wa Bhakalidayo, nahuli nukupekya inchi jenjenu ujipwelilaje.”
8Nambu Abulamu akapwaghike, “Wenga wa Bambo Chapanga, anamanya bhole kubha anambwelilaje inchi jenjeno?”
9Panihapa Bambo akumpwaghi Abulamu, “Unetilaje litoli limbomba la hyaka itatu, na imbuhi jimbomba ja hyaka itatu, na limbelele likambaku la hyaka itatu, na ngunda na injebha.” 10Abulamu akundetili Bambo hinyama yeniheyi yokapi, akaighangiki ipandi ibheli, na kuibheka ipandi heyi kulengana na chijaki, nambu hijuni ngacheaghangike. 11Bhela ngwahe yakametili panani ja inyama heyi, nambu Abulamu akaitopwile.
12Lyobha palakabhi lijibhila, Abulamu lwakunkamwi lughono lukolongwa, lubhendu lukolongwa na lwa kujoghoha lukatehi kumuyeka. 13Panihapa Bambo Chapanga akumpwaghi Abulamu, “Chakaka umanyaje kubha lubheleku lwaku analukubha lugheni ku inchi ambaju nga jabho, anabhakubha bhatumwa na kung'ahakika kwa chikahi cha hyaka mia ncheche. 14Nambu hata bhela, ananilitemulaje litaifa lela lebhalitumakyaje, pakujomukela anabhabhokaje konihoku bhakabya na hindu yamaheli. 15Nambu wehapa wamwete anautamaje kwa hyaka yamaheli, na kupotela na kutaghakika kwa lukwale. 16Bhabhelakeka bhaku anabhakelabhukaje pambani mu chibheleku cha kacheche, maghambu mahoku gha Bhaamoli ghakali ngacheghatwelili chipemu chake.”
17Chikahi lyobha palakabhi lijibhili na lubhendu kujingila, mvune ghouhuka lyohi na lumuli lolubhele moto yakapetiki pachilanda ja ipandi ya hinyama yela. 18Lichobha leniheli Bambo Chapanga akatendiki lulaghilu na Abulamu, na kumpwaghila, “Lubheleku lwaku nabhapekihi inchi janjenu, kutumbula nkoka wa Misili mbaka ku nkoka ukolongwa wa Eufulate, 19yani inchi ja Bhakeni, Bhakenizi, na Bhakadimoni, 20na Bhahiti, Bhapelizi, na Bhalefai, 21na Bhaamoli, Bhakanaani, Bhagiligashi na Bhayebusi.”
Currently Selected:
Utumbulilu 15: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
