Utumbulilu 17
17
Lulaghilu na jando
1Chikahi Abulamu paakabhi na hyaka tisini na tisa, Bambo akumpitalili Abulamu, na kumpwaghila, “Nepani nde Chapanga Mwene Makili, ujengalyaje indela jangu na utamaje matamu gha ulongwana. 2Nanatu anandendaje lulaghilu pachilanda jangu na wehapa, nanatu ananukujonjukya bhabhelakeka bhaku nakanope.” 3Abulamu akajinimi ukutama, na Chapanga akumpwaghile, 4“Nepani ndenda lulaghilu alolu na wehapa: Wehapa anaukubha tati wa mataifa ghamaheli. 5Lihina laku ngawilohakeki kabheti Abulamu, nambu lihina laku anaulowakika Ibulahimu, maghambu nukutendiki wehapa kubha tati wa mataifa ghamaheli. 6Ananukutendaje ubya na lubheleku lwamaheli namaa, ananukutenda kubha mataifa, na bhakolongwa anabhapita kuhuma kwaku wehapa.
7“Ananulutenda lulaghilu lwangu kutamakila mileli pachilanda jangu na wehapa, na bhabhelakeka bhaku, na ibheleku yabhu, anamya Chapanga waku na Chapanga wa bhabhelakeka bhaku. 8Inchi jokapi ja Kanaani, koutama sajenu ngati ungeni, ananukupekya wehapa jibya jaku mileli, na lubheleku lwaku, nanatu anamya Chapanga wabhu.”
9Bhela, Chapanga akumpwaghi Ibulahimu, “Kwa upambala waku ikupalika kukamula lulaghilu lwangu, wehapa na bhabhelakeka bhaku kwa ndandi ja ibheleku yeihika. 10Londoni nde lulaghilu lwangu lowalukamulaje, pachilanda jangu nepani na wehapa, na lubheleku lwaku baada jaku wehapa: Kila mwanalomi pachilanda jinu anaimpalika kuheketa jando. 11Anaimpalika kuheketwa jando, na lijambu aleli analibya nginyulila ja lulaghilu pachilanda jangu nepani na mwehapa. 12Kwa ibheleku yeanaihikaje, kila mwana wa chikambaku pachilanda jinu joabhi na machobha nane anaimpalika kuheketa jando. Kila mwanalomi mu ibheleku yinu, akubhi mbelakeka wa munyumba au joahemaliki kwa mbija kuhuma kwaka ngeni, jola ambaju nga mbelakeka wako. 13Akubhi abhelakiki munyumba jaku au ahemaliki kwa mbija jaku, anaimpalika kuheketa jando. Lulaghilu lwangu mu hyegha yinu analukubha lulaghilu lwa mileli. 14Kila mwanalomi jwangakuheketa jando anaatengakika na bhandu bhaki, maghambu anaabya ahekiti lulaghilu lwangu.”
15Kabhete Bambo akumpwaghi Ibulahimu, “Kwa upambala waka nhwanu waku Salai, ngawandohi kabhete lihina laki Salai, nambu lihina laki analowakika Sala. 16Ananumpengalyaje, na ananukupekya mwana kwake, ena, ananumpengalya Sala, najombi anaakubha mabhu wa mataifa ghamaheli, na bhakolongwa bha makabila gha bhandu anabhapita kwake.”
17Ibulahimu akachikimi ukutama, akahekiki na kupwagha muntima waki, “Bho, iwezikana le mundu wa hyaka mia jimu kubheleka mwana? Bho, na Sala joabhi na hyaka tisini le aweza kubheleka mwana?” 18Panihapa Ibulahimu akumpwaghi Chapanga, “Anangati Ishimaeli najombi akashiliki mbengalelu jaku!”
19Bhela Chapanga akayangike, “Ngabhela! Nambu nhwanu waku Sala anaakubhelakya mwana wa chikambaku, nanau wandoha lihina laki Isaka. Nanatu anandenda lulaghilu lwangu lutamakyaje kwaki kubha lulaghilu lwa mileli kwa ndandi jaki na babhelakeka bhaki bhabhihikaje. 20Kwa upambala waka Ishimaeli nukujowine, ananumpengalyaje, na ananuntenda akubha na lubheleku lwamaheli na ananunjonjukyaje namaa ubhalangiku waki. Anaakubha tati wa bhatawala komi na bhabheli, nanatu ananuntendaje akubha litaifa likolongwa. 21Nambu lulaghilu lwangu lola ananulutenda kutamakila kwaka Isaka, ambaju Sala anaakubhelakyaje mu chaka chechihika mu chikahi ngati chenjeno.” 22Bhela, Chapanga paakajomwi kulongela na Ibulahimu, akabhokike kuhuma kwaka Ibulahimu.
23Mu lichobha lela lela, Ibulahimu akuntoliki mwana waki Ishimaeli na bhokapi bhabhabhelakiki munyumba jaki papamu na bhabhahemaliki kwa mbija yake, kila mwanalomi wa munyumba jaki, akabhahekiti jando, ngati Chapanga moakumpwaghile. 24Chikahi Ibulahimu paakahekitwi jando, akabhi na hyaka tisini na tisa. 25Na mwana waki Ishimaeli akabhi na hyaka komi ja itatu chikahi paakahekitwi jando. 26Ibulahimu na mwana waki Ishimaeli bhakahekitwi jando mu lichobha lela lela. 27Kila mwanalomi munyumba jaka Ibulahimu, papamu na bhokapi bhabhabhelakiki munyumba jaki au bhabhahemaliki kwa mbija yaki kuhuma kwaka ngeni, bhakahekitwi jando papamu naku.
Currently Selected:
Utumbulilu 17: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
