Utumbulilu 39
39
Yusufu na nhwanu waka Potifa
1Bhela, Yusufu akatolakiki mbaka ku Misili, najombi Potifa, mtumika waka Falao, na nkolongwa wa manjolinjoli ghaki, mundu wa ku Misili, akunhemili kuhuma mu mabhoku gha Bhaishimaeli bhabhakundetiki ku Misili. 2Bambo Chapanga akabhili papamu na Yusufu, najombi akaneng'anili namaa, Yusufu akabhi atumika munyumba jaka bambo waki Mmisili. 3Potifa akaweni kubha Bambo Chapanga akabhili papamu na Yusufu, na kubha Bambo Chapanga anjangatila kila chindu cheahenga Yusufu. 4Bhela, Yusufu akapalakiki namaa palongi jaka Potifa, panihapa akuntendiki kubha mtumika waki. Akumbekiki kubha njemalela wa nyumba jake, na hindu yokapi yeakabhi nayu akaibhekiki mu mabhoku ghaka Yusufu. 5Kutumbula chikahi chenihechi Potifa paakumbekiki Yusufu kubha njemalela wa nyumba jaki na hindu yokapi, Bambo Chapanga akajipengalili nyumba jaka Potifa kwa ndandi jaka Yusufu. Bambo Chapanga akachipengalili kila chindu cheakabhi nachu Potifa, munyumba na kungonda. 6Potifa akundekili Yusufu kujemalela kila chindu cheakabhi nachu, Yusufu paakabhi ajendalela kujemalela, Potifa ngacheakabhili na ndandi ja kumanya chindu chokapi chela, nambu chilebhi chaki mweni pela.
Yusufu akabhi nkombu mnyahi, akabhi na makili na sula jinyahi. 7Bhela, pachapetiki chikahi, nhwanu waka Potifa akuntokuli Yusufu, na kumpwaghila, “Uhikaje, ughonila na nepani kihyegha.” 8Nambu Yusufu akakanike. Akumpwaghi mbomba jola, “Lingalyaje, nepani nakabya ngati chiongozi, bambo wangu ngacheahusika na chindu chokapi chela munyumba jenjeno, kila chindu cheabhi nachu ambeki nepani. 9Pani panyumba njeta joabhi na lujiniku lukolongwa kupeta nepani, wala bambo wangu ngacheanhibhalili chindu chokapi chela nambu wehapa pela, maghambu wehapa nde nhwanu wake. Bho, ananhweza bhole kuhenga lihoku likolongwa ngati aleli na kunhokela Chapanga?” 10Hata ngati mbomba hoju akajendalili kumpembalela Yusufu lichobha kwa lichobha, nambu Yusufu akakaniki kughonela naku kihyegha, wala kubha naku pambipe.
11Lichobha limu Yusufu akajingili mkati ja nyumba kuhenga mahengu ghake, wala ngachepabhili na mtumika jongi jokapi jola mkati ja nyumba jela. 12Bhela, nhwanu waka Potifa akakamwili ingobhu jeakawati Yusufu, na kumpwaghila, “Uhikaje tughonila na nepani kihyegha!” Nambu Yusufu akundekili ingobhu jaki mumabhoku ghaka mbomba jola, na kupita kunja ja nyumba jela koni akakembalaje. 13Mbomba jola paakaweni kubha Yusufu akundekili ingobhu jaki mumabhoku ghaki, na kutilila kunja, 14akabhalohiki bhatumika bha munyumba jaki, na kubhapwaghila, “Ndingalyaje! Atuletili mundu Muebulania nahuli atulongamaje. Akajingili munyumba moni, nahuli aghonila na nepani kihyegha, nambu nepani nakatehi kujamalila. 15Paakajowini njobhela ya kujopa ujangatilu, akajilekiki ingobhu jaki kwangu, na kutilila kunja.”
16Bhela, mbomba jola akajibhekiki ingobhu jela mbaka Potifa, bambo waka Yusufu paakakelawiki panyumba. 17Akundandili ndomi waki lijambu leniheli, akapwaghaje, “Mtumwa Muebulania joundetiki kwitu jola, akajingili kwangu nahuli anongamaje. 18Nambu chikahi pela panajamalile, akajilekiki ingobhu jaki kwangu, na kutilila kunja.”
19Bhela, bambo waka Yusufu paakajowini malobhi ghanihagha, akapwaghike, “Bhenibhela nde mtumwa waku moandendile,” na inyela yaka Potifa yakajonjukike. 20Potifa akuntoliki Yusufu, na kumbeka muchifungo, pandu pabhakongakiki bhakongeka bhaka nkolongwa, najombi akabhi monihomo. 21Bambo Chapanga akabhili papamu na Yusufu, akumpengalili na akuntendiki kupalakika palongi jaka nkolongwa wa chifungo. 22Bhela, nkolongwa wa chifungo akumbekiki Yusufu akubha nkolongwa wa bhakongeka bhokapi papamu na kujemalela mambu ghokapi ghaghahengakiki muchifungu mola. 23Nkolongwa wa chifungu hoju ngacheakajemalili kabhete chindu chokapi chela chechakabhili pahi ja ujemalelu waka Yusufu, ndandi Bambo Chapanga akabhi papamu na Yusufu, maghambu Bambo Chapanga akabhi papamu na Yusufu kwa kila chindu cheakahengike.
Currently Selected:
Utumbulilu 39: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
