Utumbulilu 43
43
Bhabheli bhaka Yusufu bhakelabhuka kujenda kabhete ku Misili
1Injala jakajendali kubha ngolongwa mu inchi ja Kanaani. 2Bhela, pabhakajomwili kula chilebhi chokapi chebhahumiki nachu ku Misili, tati wabhu akabhapwaghile, “Nkelabhukaje ku Misili mkahemala chilechi chengi nakanope.”
3Nambu Yuda akumpwaghi tati wake, “Mundu jola akatulaghalaki namaa, akapwaghaje, ‘Ngamwimoni sula sangu kabhete, mbaka nhwika na nnung'una winu Benyamini pambane.’ 4Ngati anaujetakili nnung'una witu Benyamini ajendaje papamu na tepani, anatujendaje kukuhemalela chilebhe. 5Nambu ngati anaukaniki ngayijenda, na tepani ngatujende, maghambu mundu jola akatupwaghili, ‘Ngamwimoni sula sangu kabhete, mbaka nhwika na nnung'una winu pambane.’ ”
6Izilaeli akalalukile, “Bho, maghambu kiki mnetili mang'ahiku aghagha kwa kumpwaghila mundu jola kubha mbi na nnung'una winu jonge?”
7Bhakayangike, “Mundu jola akatulalukili mambu gha mkati namaa panani jitu na panani ja bhalongu bhitu. Akatulalukile, ‘Bho, tati winu le akali mwome? Bho, mbi le na nnung'una winu jonge?’ Tepani tukumuyangiki malalukilu ghaki pela. Bho, tukaweza bhole kumanya kubha akabya apwaghiki, ‘Mundeta nnung'una winu pambane?’ ”
8Panihapa Yuda akumpwaghi Izilaeli, tati wake, “Untuma nkombu papamu na nepani, natatu anatubhokaje, nahuli tepani na wehapa papamu na bhana bhitu tuwezaje kubha tabhome, wala ngatwipotela. 9Nepani namwete ananolakyaje lukwali lwake, wehapa winaya nepani. Ngati nganundeti kabheti kwaku, na kumbeka palongi jaku, anangubha nemi na hatia mu matamu ghangu ghokapi. 10Kwa ndandi tukabhi ngachetukabhakile kubhoka, chakaka tukabya tupiti na kukelabhuka mala pabhele.”
11Bhela, Izilaeli tati wabhu akabhapwaghile, “Ngati anaipalika kubha bhenibhela, ntenda anana, ntolaje mahunu manyahi ghakumu gha inchi jitu mu mifuku jino, na mukumpelakyaje mundu jola ngati nhupu: Muntolila mahuta gha nkwachu machokopi, busi njokopi, ubane, manemane, jozi na lozi. 12Ntolaje madini gha feza mala pabheli mumabhoku ghino, na madini gha feza ghala ghaghakelawike mundomu ja magunila ghinu nkelabhuhaje, pangi akakelawihi kwa kujewa. 13Muntola na nnung'una wino, na mbokaje mkelabhuka kwaka mundu hoju mala punkamu. 14Chapanga Joabhi na Makili na anjangatyaje kupata chiha palongi jaka mundu hoju, andekakyaje ndongu winu jongi jola na Benyamini nkelabhuka papamu. Kwangu nepani ngati anabhapotili bhana bhangu, leka bhapotilaje.”
15Bhela, bhandu habha bhakaitoliki nhupu yela, bhakatoliki na madini gha feza ghala mala pabheli mumabhoku ghabhu, na Benyamini, na kubhoka. Pabhakahikiki ku Misili, bhakapiti na kujema palongi jaka Yusufu. 16Chikahi Yusufu paakumbweni Benyamini papamu nabhu, akumpwaghi mlonda wa nyumba jake, “Ubhapelaka bhandu abhabha kunyumba jango. Ukachinjaje chinyama na kuandaa chilebhe, maghambu bhandu abhabha anabhakula chilebhe cha muhi papamu na nepani.” 17Mlonda jola akahengiki ngati Yusufu moakumpwaghile, akabhatoliki bhandu bhala na kubhapeleka kunyumba jaka Yusufu.
18Bhela bhandu habha bhakajowipi namaa pabhakapelikwi kwaka Yusufu. Bhakapwaghanile, “Tuletakiki pambani kwa ndandi ja madini gha feza ghala ghaghakelawiki mu magunila ghitu mala ja kutumbula. Apala kutulapula na kutuweza, na kututola tepani kubha bhatumwa, na kughatola maponda ghito.” 19Bhakunheghalili mlonda wa nyumba jaka Yusufu jola, na kulongela naku pundyangu wa nyumba. 20Bhakapwaghaje, “Pepakoku bambo, tepani tukahikiki pambani mala ja kutumbula kuhemela chilebhe. 21Nambu patwahikiki panyumba ja bhaghene, tukabhopwili magunila ghitu, na kila jumu witu akajiweni mbija jaki mundomu wa ligunila lake, chipemu chela chela chetaletike. Bhela tepani tutehi kuikelabhuha. 22Bhelabhela tuletiki na mbija yenge nahuli tuhemala chilebhe. Ngachetumanyi kubha nde nane joakabhekiki mbija heyi mu magunila ghito.”
23Akabhapwaghile, “Lukwale lukubha kwino. Chapanga winu, najombi nde Chapanga waka tati winu, jonihoju nde joankelabhukile mbija heyi mu magunila ghino, nepani nde nenajopalile mbija hino.” Panihapa akabhaletili Simeoni.
24Mundu jola akabhaletiki bhandu bhala kunyumba jaka Yusufu, na kubhapekeha machi gha kuchamba magholu ghabhu, na kughapekeha maponda ghabhu chilebhe. 25Bhakaandii nhupu yabhu wichu nahuli bhumpekya Yusufu chikahi paanahikaje muhe, maghambu bhakajowini kubha anabhakula chilebhi konihoko. 26Chikahi Yusufu paakahikiki kunyumba, bhakundetili nhupu yela yeyakabhili mumabhoku ghabhu munyumba jake, na kunchikamila mbaka pahi. 27Yusufu akabhalalukili hali yabhu, na kupwagha, “Tati winu, hokomundu jombwaghila jola, alama lelo? Bho, akali mwome?”
28Bhakapwaghike, “Mtumika waku, tati witu, alama na akali mwome.” Bhela bhakachikimi mbaka pahi kwa kuntopela.
29Yusufu paakalingalili na kumbona Benyamini, nnung'una waki, mwana waka mabhu waki, akalalukile, “Bho, ajoju le nde nnung'una winu wa kujomukela, jomkambwaghi malobhi ghake?” Panihapa akapwaghike, “Chapanga akujangatyaje, mwanango.” 30Yusufu akabhokiki pandu pala manyata, maghambu mtima waki ukumboni chilolu namaa nnung'una wake, akalondiki pandu pa kulelela. Akajingili muchumba chaki, na kulela monihomo. 31Paakachambiki pamihu jaki, akapitiki kunja koni alihibhalila, akapwaghaje, “Ndeta chilebhe.” 32Bhakumbekili Yusufu chilebhi chaki kanjika jake, na bhalongu bhaki kanjika jabhu, na Bhamisili bhabhakuliki papamu nabhu kanjika jabhu, maghambu Bhamisili ngabhakaweziki kula papamu na Bhaebulania, maghambu lakabhi nde lihakalilu kwa Bhamisili. 33Bhalongu bhaka Yusufu bhakabhi bhatami pahi kwa kujengalela hyaka yabhu, kutumbula mbelakeka wa kutumbula mbaka wa kujomukela, bhakalingalanili bheni kwa bheni kwa kukangacha. 34Bhakapekiwi pandu pa chilebhe kuhuma pameza jaka Yusufu, nambu akajonjukili pandu paka Benyamini mala pahanu nakanope kupeta ya bhange. Bhela, bhakakunywiki, na kuhekalela papamu naku.
Currently Selected:
Utumbulilu 43: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
