Utumbulilu 48
48
Yakobo abhapengalela Efulaimu na Manase
1Paghapetiki ghanihagha, Yusufu akapwaghakiki kubha tati waki atenda kulwala. Bhela, akabhatoliki bhana bhaki bhabheli, Manase na Efulaimu, na kujenda nabhu kwaka tati waki. 2Yakobo paakapwaghakiki kubha Yusufu mwana waki ahikiki kukubhona, akakangamili kujumuka, na kutama panani ja chitanda. 3Yakobo akumpwaghi Yusufu, “Chapanga Mweni Makili akambitalili ku Luzu, ku inchi ja Kanaani, na kumbengalela. 4Akambwaghile, ‘Nepani ananukutenda kubha na lubheleku lukolongwa na kukujonjukela nakanope, nanatu ananukutenda kubha libhongelu la mataifa, na ananukupekya wehapa inchi jenjenu papamu na bhabhelakeka bhaku bhajitawalaje mileli.’ ”
5Yakobo akajendali kupwagha, “Henu bhana bhaku bhabheli bhaubhapatiki pambani pa Misili mangane ja kuhika nepani, nde bhana bhango, yani, Efulaimu na Manase, anabhakubha bhangu, ngati Leubeni na Simeoni. 6Nambu bhana bhawibhelakaje palongi jabhu anabhakubha bhako, na kwa lihina la bhalongu bhabhu anabhalohakikaje mu upwelelu wabhu. 7Ndenda anana maghambu panakabhi ngelabhuka kuhuma ku Padani, mu mabhinilu ghangu Laheli akapotili mu inchi ja Kanaani patukabhi tukali tujendale na mwanja, patukabhi pambipi kuhika ku Efulati. Bhela, nakuntaghiki konihoko, punkeghi ja indela jejijenda ku Efulati,” yani Beselehemu.
8Izilaeli akabhaweni bhana bha chikambaku bhaka Yusufu, na kupwagha, “Bho, abhabha aka nane?”
9Yusufu akamuyangiki tati wake, “Abhabha nde bhana bha chikambaku ambabhu Chapanga ambekihi nakabya pambane.”
Panihapa Izilaeli akapwaghike, “Ubhaleta kwangu nahuli nabhapengalyaje.” 10Bhela mihu ghaka Izilaeli ghakabhi ngacheghabhona wichu kwa ndandi ja kusejeka, na akaweni kwa mang'ahiko. Panihapa Yusufu akabhaletiki bhana bhaki pambipi na tati wake, na Izilaeli akabhajobhatile. 11Izilaeli akumpwaghi Yusufu, “Chakaka ngachenaholalili kukubhona pamihu jaku kabheti ng'o, nambu, lingalyaje Chapanga anyangatili kubhabhona na bhana bhaku bhelabhela.” 12Yusufu akabhabhohiki bhana bhaki pa majuwa ghaka Izilaeli, na kujinama kwa utopelu mbaka pahi.
13Yusufu akabhatoliki bhana bhaki bhabheli, Efulaimu ku chiwoku chaki cha kumalelelu, akalingalyaje ku chiwoku cha kumangeja jaka Izilaeli tati waki, na Manase ku chiwoku chaki cha kumangeja, akalingalyaje ku chiwoku cha kumalelelu jaka Izilaeli tati waki, na kubhaheghakela pambipi na hokolu wabhu. 14Nambu Izilaeli akang'anambwili mabhoku ghaki, na kubheka chiwoku chaki cha kumalelelu panani ja mmutu waka Efulaimu, hata ngati akabhi nchoku, na chiwoku chaki cha kumangeja akabhekiki panani ja mmutu waka Manase, joakabhi mbelakeka wa kutumbula. 15Bhela Izilaeli akumpengali Yusufu, akapwaghaje,
“Chapanga ambaju akatati bhangu, Ibulahimu na Isaka bhakatehi kumtii mu matamu ghabhu,
Chapanga joakanongwihi mu matamu ghangu ghokapi, mbaka lichobha la lalenu,
16na mtumika wa kunani waka Chapanga joakangengalile kuhuma mu mahakau ghokapi, na abhapengalya akakombu abhabha!
Lihina langu na mahina gha akatati bhangu, Ibulahimu na Isaka, ghatamakyaje kwa akakombu abhabha!
Nabhombi bhajonjukikaje na kubha bhamaheli pundema!”
17Yusufu paakaweni kubha tati waki abheka chiwoku cha kumalelelu panani ja mmutu waka Efulaimu, ngacheakapalike, bhela akachitoliki chiwoku chaka tati waki kuhuma pamutu ja mmutu waka Efulaimu na kuchibheka panani ja mmutu waka Manase. 18Yusufu akumpwaghi tati wake, “Ngabhela atati, hajoju nde mbelakeka wangu wa kutumbula, ubhekaje chiwoku chaku cha kumalelelu panani ja mmutu wake.”
19Nambu tati waki akakaniki, akapwaghaje, “Manyi, mwanango, manyi. Jombi bhelabhela anaakubha litaifa, najombi anaakubha nkolongwa. Hata bhela, ndongu waki nchoku anaakubha nkolongwa kupeta jombi, na bhabhelakeka bhaki anabhakubha mataifa ghamaheli.”
20Bhela, akabhapengalili mu lichobha lela, akapwaghaje, “Bhaizilaeli anabhatumilaje mahina ghinu kupengalela. Bhakapwaghaje, ‘Chapanga na akutendilaje ngati Efulaimu na Manase’ ” Bhela Izilaeli akundongukili Efulaimu palongi jaka Manase.
21Panihapa Izilaeli akumpwaghi Yusufu, “Nepani nheghale kupotela, nambu Chapanga anaakubha papamu na mwehapa, na anaankelabhuha ku inchi ja akatati bhino. 22Nakanopi ja ghanihagha, nepani nukupekihi wehapa pandu papabholalanile pa Shekemu nakanope ja bhalongu bhako, panakatoliki kuhuma kwa Bhaamoli kwa lipanga langu na mshali wango.”
Currently Selected:
Utumbulilu 48: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
