Bhalawi 1
1
Nyambiku ya kujochakeka
1Bambo Chapanga akundohiki Musa na kulonge naku kuhuma mu Lihema Lihuhu, na kumpwaghila, 2Ulongila na Bhaizilaeli, na kubhapwaghila,
Pachilanda jinu ngati mundu anaapala kumbokeha Bambo Chapanga nyambiku ja chinyama, chinyama hechi achihaghula kuhuma mulipogha laki mweni la ng'ombi, mambeleli na imbuhe. 3Ngati nyambiku jeabhoha mundu heji nde ja kujochakeka kuhuma mu lipogha laki la ng'ombi, abhohaje ng'ombi likambaku langakubha na chilema. Aletaje pundyangu wa Lihema Lihuhu, nahuli ajetakaliwaje palongi jaka Bambo Chapanga. 4Mundu jonihoju abhekaje chiwoku chaki panani ja mmutu wa chinyama hechi cha nyambiku ja kujochakeka, na nyambiku heji anajijetakaliwaje kwa ndandi jaki, nahuli Bambo Chapanga andekakya mahoku ghaka mundu jonihoju. 5Bhela, anachinjaje litoli likambaku heli palongi jaka Bambo Chapanga. Nabhombi bhapenganyambiku, bhana bha chikambaku bhaka Haluni, anabhatola mwahi na kumicha mu ipambala yokapi ya pandu pa kubhokeha nyamabiku, jejibhi pundyangu wa Lihema Lihuhu. 6Mundu hoju abhoha chingumba cha chinyama cha nyambiku ja kujochakeka na kuhekatana ipandi ipandi chinyama hechi. 7Bhela, bhana bha chikambaku bhaka mpenganyambiku Haluni anabhabheka moto panani ja pandu pa kubhokeha nyambiku, na kujala hanju panani ja moto ghonihoghu. 8Bhela bhapenganyambiku bhana bha chikambaku bhaka Haluni bhala anabhatola ipandi ya inyama jela, papamu na mmutu na mahuta, na kuibheka panani ja hanju yeibhelela panani ja pandu pa kubhokeha nyambiku. 9Mundu hoju agholulaje matumbu na magholu gha chinyama hechi kwa machi. Mpenganyambiku ayonangaje nyambiku jokapi panani ja pandu pa kubhokeha nyambiku. Jeniheji nde nyambiku ja kujochakeka kwa moto, jejinungi wichu na kunyambiha Bambo Chapanga.
10Ngati nyambiku jaki ja kujochakeka atola kuhuma mu lipogha laki la mambeleli au imbuhi, bhela, ahaghulaje lipongu langakubha na chilema. 11Achinjaje chinyama hechi ku upambala wa kungonde wa pandu pa kubhokeha nyambiku palongi jaka Bambo Chapanga, nabhombi bhapenganyambiku bhabhelakeka bhaka Haluni, anabhamichaje mwahi wa chinyama hechi ipambala yokapi ya pandu pa kubhokeha nyambiku. 12Bhela mundu hoju anahekatana ipandi ipandi, na kuibheka pakanjika mmutu papamu na mahuta ghaki, na mpenganyambiku anaibheka pamoto panani ja hanju yela yeibhelela panani ja pandu pa kubhokeha nyambiku. 13Mundu hoju agholula matumbu gha chinyama hechi kwa machi. Mpenganyambiku anaijocha yokapi panani ja pandu pa kubhokeha nyambiku. Jeniheji nde nyambiku ja kujochakeka kwa moto, jejinungila wichu na kunyambiha Bambo Chapanga.
14Ngati nyambiku ja kujochakeka jejibhohakeka kwaka Bambo Chapanga nde chijuni, bhela, aletaje nyambiku ja ngunda au libhunda la injebha. 15Mpenganyambi anachileta chijuni hechi pandu pa kubhokeha nyambiku, achitunyula hingu na kunyofola mmutu wa chijuni na kuchijocha panani ja pandu pa kubhokeha nyambiku. Mwahi waki umichakikaje muluteta lwa pandu pa kubhokeha nyambiku. 16Abhohaje chifuku cha chilebhi papamu na uchafu waki wokapi, na kuilekela upambala wa kolipita lyobha wa pandu pa kubhokeha nyambiku, pandu papabhi na ilihu. 17Achikamula mapapanilu na kuchighanga, nambu ngachiheketa ipandi ibheli. Bhela, mpenganyambiku anaachijochaje chijuni hechi panani ja hanju yeibhelela panani ja pandu pa kubhokeha nyambiku. Jeniheji nde nyambiku ja kujochakeka kwa moto, jejinungi wichu na kunyambiha Bambo Chapanga.
Currently Selected:
Bhalawi 1: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
