Bhalawi 11
11
Hinyama ihakau na yangakubha ihakau
Kombukombu la Tolati 14:3-21
1Bambo Chapanga akabhapwaghi Musa na Haluni, 2Mubhapwaghila Bhaizilaeli: Pachilanda ja hinyama yokapi yeitama panani ja ndema, ayeyi nde yeanamkulaje: 3Muweza kula chinyama chokapi chechibhi na mangolokotu ghaghakajwiki pandu pabheli na chekibokola.
4Kubhi na hinyama yengi ambayu ibokola pela au yeibhi na mangolokotu ghaghakajwiki pela, nambu yeniheyi ngamwikula ng'o. Ngamia, papamu na kubha atenda kubokola nambu ngachejibhi na mangolokotu ghaghakajwike, kwa ntetu wa kujojabhela chinyama chenihechi nde chihakau kwinu. 5Chibhela, papamu na kubha chitenda kubokola, nambu ngachechibhi na mangolokotu ghaghakajwike, chinyama chenihechi che chihakau kwinu. 6Chipecha, papamu na kubha chitenda kubokola, nambu ngachechibhi na mangolokotu ghaghakajwike, chinyama chenihechi nde chihakau kwinu. 7Nalombi ligholobhi papamu na kubha libhi na mangolokotu ghaghakajwiki pandu pabheli, nambu ngachelibokola, leniheli nde likahau kwinu. 8Ngamwikula hinyama yeniyehi wala kukamula mituhi jabhu, yeniheyi nde ihakau kwinu.
9Homba yokapi yeibhi mu bahali au mu nkoka yeibhi na mapezi na mang'amba, muweza kula. 10Nambu chokapi chechitama mu bahali au mu mikoka, ambachu ngachekibhi na mapezi na mang'amba, yani hiumbi yokapi yeijenda mumachi na hiumbi yengi yokapi yeitama mumachi, yeniheyi nde ihakau kwinu. 11Nayombi anaikubha mahakalilu kwinu. Ngamwikula inyama yabhu, najombi mituhi jabhu anajikubha mahakalilu kwinu. 12Chokapi chechitama mkati ja machi ambachu ngachekibhi na mapezi na mang'amba anachibya mahakalilu kwinu.
13Hijuni yenjenu yokapi nde ihakau kwinu, bhela ngamwikula: Ngwahe, chijuni chechilowakeka fulukombe, kapongu, 14limbanga, na chijuni chechilowakeka kozi kwa ntundu waki, 15ntundu wokapi wa makongolu, 16mbuni, kihomba ndela, litipitipi, chununkwangula, na ntundu wokapi wa mambanga, 17litungutu, mnandi, linhinhita, 18mumbi, mwali, mdeli, 19kolongo, na ntundu ghokapi wa koikoi, hudihudi na malemalema.
20Hidudu yokapi yeibhi na mapapanila na yeijenda kwa magholu ghaki nchechi, yeniheyi nde ihakalilu kwinu. 21Nambu, ibhi hidudu yeibhi na mapapanila ambayu ijenda kwa magholu nchechi yemuweza kula: Yela yeibhi na mahundwa mu magholu ghaki malachu na kuhomba homba panani ja inchi. 22Pachilanda ja yeniheyi, anankula nzige kwa ntundu wokapi, senene kwa ntundu waki, mapahi kwa ntundu waki au palale kwa ntundu waki. 23Nambu hidudu yengi yokapi yeibhi na mapapanila na yeibhi na magholu nchechi nde mahakalilu kwinu.
24Mwehapa anamkubha bhahakau kwa hinyama yeniheyi, kila joanakamulaje mituhi jabhu anaakubha muhakau mbaka pakamihe. 25Mundu jokapi joanatotula mituhi ja hiumbi yeniheyi, impalika achapaje ingobhu yaki, najombi anaakubha mhakau mbaka pakamihe.
26Mundu jokapi anaakamwili chinyama chechibhi na lingolokotu lelikajwiki pabheli nambu ngachechibokola, mundu hoju anaakubha mhakau. 27Pachilanda ja hinyama yokapi yeijenda kwa magholu nchechi, yela yeijenda kwa highanja yabhu nde ihakau kwinu, mundu jokapi joanakamulaje mituhi jabhu anaakubha mhakau mpaka pakamihe. 28Mundu jokapi joanatotulaje mituhi jabhu, impalika achapa ingobhu yaki, najombi anakubha mhakau mbaka pakamihe. Hinyama yeniheyi nde ihakau kwinu.
29Kubhokana na hinyama yeikwabha panani ja inchi, ayeyi nde ihakau kwinu: chindindi, likuli, na ntundu wokapi wa manjocholi kwa ntundu waki, 30chinyama chechilowakeka gulugulu, lighondwa, manjocholi gha mulumatu, chinyama chechilowakeka golomoe na lwiha. 31Yeniheyi yokapi yeikwabha panani ja inchi nde ihakau kwinu. Jokapi joanakamulaje mituhi jabhu anaakubha mhakau mpaka pakamihe. 32Anakubhi chimu cha chinyama anachiwile na kuhabhukila panani ja chindu chokapi chela, chombu hechi, hata ngati cha kuhengela lihengu lokapi lela, anachibya chihakau, hata ngati chilenganakiki kwa mikongu, ingobhu, chingumba au ligunila. Chibhekakikaje mkati ja machi, anachikubha chihakau mpaka pakamihe, bhela anachikubha chinyahi kabhete. 33Anakubhi jumu wa chinyama chechiwili anachihabhukili mkati ja chipika, kila chekibhi mkati ja chipika hechi anachibya chihakau, na wehapa ikupalika ukajulaje chipika chenihechi. 34Chilebhi chokapi ambachu chechiwezikana kula nambu anakubhili chijingili machi kuhuma mu chipika hechi nde chihakau, na chindu chokapi cha machi machi ambachu chiweza kunyweleka kuhuma mu chipika hechi nde chihakau. 35Kila chindu ambachu pandu pa ntuhi utehi kuchihabhukila, anachikubha chihakau. Anakubhi chihinja au chipika cha kutelakela ipalika chikajulikaje. Nde chihakau, na wehapa ipalika umanya kubha nde chihakau. 36Nambu chemichemi ya machi au chilibha, pandu pa kuteka machi, anapakubha panyahi, nambu chokapi chechigusaje chimu cha mituhi jeniheji anachikubha chihakau. 37Ngati ntuhi anauhawiki panani ja imbeju jokapi jela ambaju nde ja kupanda, anajihighalya kubha jinyahi. 38Nambu ngati imbeju jijeghaliki machi na ntuhi anauhawiki panani jaki, imbeju heji nde jihakau kwinu.
39Ngati chinyama ambachu njetakaliwi kula anachihwili, jokapi joanagusa ntuhi waki, anaakubha mhakau mbaka pakamihe. 40“Mundu jokapi anaakuliki inyama ja ntuhi hoghu anachapa ingobhu jaki na anakubha mhakau mbaka pakamihe. Na jokapi joanatotula ntuhi hoghu, anachapa ingobhu yaki, najombi anakubha mhakau mbaka pakamihe.
41“Kila chiumbi chechikwabha panani ja inchi nde lihakalilu, ngamwikula. 42Ngamwikula chiumbi chokapi chela chechikwabha panani ja luhombi, chikubhi chechikwabha kwa lutumbu lwaki au chechikwabha kwa magholu nchechi au kwa magholu ghamaheli, nde lihakalilu. 43Ngamwalijeghe uhakau kwa chokapi mu hiumbi ayeyi. Ngamwalijeghe uhakau kwa hiumbi heyi na bhela mwehapa mabheni kujeghaleka uhakau. 44Nepani nde Bambo Chapanga, Chapanga winu, muligholulaje mkubha bhahuhu, kwa ndandi nepani nde mhuhu. Ngamwalijeghe uhakau mabhete kwa chiumbi chokapi chela chechijenda panani ja inchi. 45Nepani nde Bambo Chapanga nenunkwehiki mboka ku inchi ja Misili nahuli mya Chapanga winu, bhela mkubha bhahuhu kwa ndandi nepani nde mhuhu.
46“Aghagha nde malaghalakilu kubhokana na hinyama, ijuni, kila chiumbi chomi chechijenda mkati ja machi na kila chiumbi chechijenda panani ja inchi. 47Impalika mumanyaje pachilanda ja chinyama chechibhi chihakau na chechibhi chinyahi, na pachilanda ja hiumbi yomi yemuweza kula na yangakupalika kula.”
Currently Selected:
Bhalawi 11: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.