Bhalawi 24
24
Malaghalakilu gha kujighoha taa
Kubhoka 27:20-21
1Bambo Chapanga akumpwaghi Musa, 2“Ubhalaghalakya Bhaizilaeli bhakuletila mahuta manyahi gha zeituni jinyahi ghaghaminyakiki wichu kwa ndandi ja taa jela, nahuli taa heji jibhelalaje chikahi chokapi. 3Haluni anaajibheka taa heji mkati ja Lihema Lihuhu, kunja ja lipazia la lisanduku la ulandilu, nahuli jipata kubhelela palongi jaka Bambo Chapanga kutumbu pakamihi mbaka lukela. Aleli nde lilaghilu la mileli kwa ibheleku yokapi yeihika. 4Haluni abhekaje taa heyi panani ja chinala cha taa cha zaabu jinyahi, na ipalika ibhelalaje chikahi chokapi palongi jaka Bambo Chapanga.
Mabumunda ghaghabhohakeka kwaka Bambo Chapanga
5“Utolaje uhembi laini kilu komi na ibheli, na ujochaje mabumunda komi na ghabheli. 6Mabumunda ghanihagha ughapangaje misitali jibheli panani ja meza ja zaabu jinyahi, kila msitali ubheka mabumunda sita palongi jaka Bambo Chapanga. 7Kila panani ja msitali ujeghala ubani unyahi nahuli ukamulana na mabumunda ghanihagha, na kubha pandu pa nyambiku ja kujochakeka kwa moto ja kombukombu kwaka Bambo Chapanga. 8Kila lichobha la Sabato mabumunda ghanihagha ghabhekakikaje kwa kulengana palongi jangu nepani Bambo Chapanga, kwa ndandi ja bhandu bha Izilaeli, kubha lulaghilu lwa mileli. 9Haluni na bhana bhaki pela nde bhabhapalika kula mabumunda ghanihagha, maghambu nde pandu pahuhu namaa pa lifungu labhu la nyambiku jejibhohakiki kwaka Bambo Chapanga kwa moto, kwa amuli ja mileli.”
Utemulu ghoupalika
10Bhela lichobha limu kukapitali kukomana kulikambi hoku pachilanda jaka Muizilaeli jumu na nkombu jumu waka mabhu Muizilaeli joakalowakiki Shelomisi, nambu tati waki akabhi Mmisili. 11Nkombu waka mabhu Muizilaeli hoju akalilongimi lihina laka Bambo Chapanga kwa kulipeke masolu, bhela bhandu bhakumpeliki nkombu hoju kwaka Musa. Lihina laka mabhu waki akalowakiki Shelomisi, mwali waka Dabili, wa likabila laka Dani. 12Nabhombi bhakumbekiki mu chifungu, mbaka mapalu ghaka Bambo Chapanga ghayekuliwa kwabhu.
13Bhela, Bambo Chapanga akumpwaghi Musa: 14“Untola nkombu joakalongimi hoju mbaka kunja ja likambi, na bhandu bhokapi bhabhakunjowini chikahi paakabhi alonge ghanihagha bhabheka mabhoku ghabhu panani ja mmutu waki, na panihapa uhimanganu wokapi bhundapula kwa maganga. 15Ubhapwaghila Bhaizilaeli: ‘Anangati mundu jokapi jola anaampeki masolu Chapanga waki, anaatemuliwaje kwa lihoku laki. 16Mundu jokapi jola anaabhi mwenehi au ngeni joantondola Bambo Chapanga, uhimanganu wokapi anabhunkoma kwa kundapu maganga.’ ”
17“Mundu jokapi jola joankoma njaki, najombi ipalika akomakikaje. 18Mundu jokapi jola joakoma chinyama chaka njaki, apalika alepaje, apalika alepaje chinyama ngati chela chela.
19“Mundu jokapi joampoteka njaki, ipalika najombi apotakika bhelabhela kulengana na moampotaki njaki. 20Ngati anaantunywi chihupa, najombi anaatunyuliwa chihupa, lihu kwa lihu, linu kwa linu. Ngati moampotaki njaki, najombi anaapotakika bhelabhela. 21Mundu jokapi joakoma chinyama chaka njaki apalika alepaje, nambu mundu jokapi jola anaankomiki njaki, ipalika najombi akomakikaje. 22Shelia ajeji anajihenga lihengu kwaka ngeni na mwenehi, maghambu nepani nde Bambo Chapanga, Chapanga winu.”
23Bhela, Musa akalongi na Bhaizilaeli bhokapi, nabhombi bhakuntoliki nkombu joakumpeki masolu Chapanga jola mbaka kunja ja likambi, na kundapula kwa maganga. Bhaizilaeli bhakatendiki ngati Bambo Chapanga moakundaghalaki Musa.
Currently Selected:
Bhalawi 24: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.